التجمع الاول للمتاخرات بالانجاب بعد الطفل الاول

[اميرة بلا مدينة]

مرحبا
ام اميرة ياحياتي الف سلامة ع رتولة يارب وقدامها العافية ....الحمد لله اللي ربي ستر عليها وماجاء ع وجهها استعملي ميبو فعلا مرة ممتاز ومابيترك اثر للجروح بس لازم تستمري علية يوميا وبيخفف حرارة الجروح وربي يحميهم من كل شر

بيبي - ان شاء الله لقيتي غرفة للانسة جودي الحلوة اذا مالقيتي لها فصلي لها تفصيل عند اي محل اطفال وخبرية بالشكل اللي تبغية ....وربنا يقومك بالسلامة يارب ....ماشاء الله عليكي نشيطة ماتستعجلي بيجيكي اللي يسهرك الليل كلة ههههههه



راجية الفردوس الله يحفظ لكي ابنك يارب ويكرمك قريبا بالحمل السليم ....طيب عملتي تحاليل لكي ومتابعة للتبويض وزوجك لازم يعمل تحاليل وكشوفات حتي تعرفوا الاسباب وتبدوا بالعلاج ماتضيعي وقت وربنا يكرمك يارب




وردة حبيبتي فينك اليوم طمنينا عنك


باقي الصبايا فين الناس اتمني الكل يدخل ويشارك

[نتال]

مرحبا صبايا

اخباركم يا حلوين

والله اشتقتلكم كتييير بس كنت مشغوله الفتره يلي مضت

مشكوره ورده حبيبتي عالدعوه

وان شاء الله يكون التجمع فال خير على الجميع واهلا وسهلا بالصبايا الجداد

اميره _ ورده _ بيبي _ زهوره اخباركم واخبار ولادكم

ام اميره يا قلبي عليها بنتك سلامتها الف سلامه ... ازا بتقدري تجيبي ورقة صبار افتحيها نصين واعصري الجل يلي جواتها وادهني عالحرق رائع وما بيترك اي اثر للحرق

[راجيه الفردوس]

هلا حبيبتي اميره انا بديت من شهرين او ثلاث اشهر بالمحاوله للحمل بس الله ما رزقني و الحمدلله على كل حال من كم يوم احس بالام نفس مال الدوره و كان باقي على دورتي تقريبا تسع ايام بس رحت للدكتوره وقررت اني ابدا بالفحص و نشوف شو المشكله وفعلا الدكتوره كشفت علي ولقت عندي التهاب بسيط و عطتني دواء و سالتها انا حامل قالت هذا الشهر مافي امل مع انها دورتي بعدها بعيده و اعتقد انها ما تبين بهذه السرعه المهم انا تكلمت وايد قالتلي الدكتوره اتصل عليها اول يوم دوره و هي بتقولي شو اليوم اللي ارجها فيه و ادعولي اكون حامل هذا الشهر او اللي بعده وبنسبه لزوجي فا عنده مشكله ما ادري اذا تاثر على الحمل عندو وحده من الخصيتين متورمه بس ما تقعد على طول اسفه على الشرح و الاطاله اللي تعرف او صار مع زوجها نفس الشي تخبرني كيف تعالج

[وردة حلب]

سلام مربع لكل القمورات

اليوم كنت مشغووووووووووولتن مع الاولاد الله يصلحهم ...حمام وواجبات ليونة ...وحمام حمودي
والطبخ والنفخ وحالة الان حتى فضيت

ام اميرة ...اهلا يا قلبي ...سلامتها رتولة ...وطالما كل وحدة من البنات عطتك وصفة ماوقفت علي ههههههههههههه
انا بستعمل زيت الزيتون اذا احرقت اصابعي بيريح ومابيترك اثر ...وطمنينا عنها
وان شاء الله بنبقى مجتمعين مع بعض

راجية الفردوس ...يارب يحفظلك ابنك ويرزقك اخوة واخوات له

اميرة ...دايما بتسالي عن الكل ...الله يسعدك وماتفقدي غالي
بيبي ياحلوة ...للاسف راح علي فنجان القهوة واليوم راسي عم يوجعني لاني ما شربت
لا قهوة ولا نسكافية ههههههههههههههههه

نتولة ...اسفرت وانورت ...كيفك يا قلبي ...ططمنيني عن هيسومة الحلو ...وكيف اخته مبسوطة عليه
نحن بخير ياقلبي
بس احوال الاهل بسوريا مقلقة
لاتنسونا من الدعاء

[نتال]

وردتنا الله يسعدك منوره بوجودك يا قمر

هيسومه بخير الحمدلله هيو سهران هههههههههه وصاير يضحك ويتفاعل معنا ..واختو مبسوطه عليه بس بدها يا يكبر بسرعه ههههههه

ويارب يفرحها على اهل سوريا ويجعل نصرهم قريب ان شاء الله

[جلكسي والدنيا عكسي]

اهلين مساء الخير لكل الامورات ان شاء الله تجمعنا تجمع خير ونسمع ان شاء بشاير خير يارب

[نتال]

يسعد مساكي جلاكسي والله يسمع منك يارب

راجية الفردوس الله يرزقك بالحمل عن قريب يارب ... بس غريب على اي اساس حكتلك انو ما في امل ولسه باقي على الدوره تسع ايام !!! ان شاء الله تكوني حامل وما تحتاجي شي
وبالنسبه لزوجك ما عندي فكره ان شاء الله البنات بفيدوكي

[راجيه الفردوس]

المشاركة الأصلية كتبت بواسطة نتال

يسعد مساكي جلاكسي والله يسمع منك يارب

راجية الفردوس الله يرزقك بالحمل عن قريب يارب ... بس غريب على اي اساس حكتلك انو ما في امل ولسه باقي على الدوره تسع ايام !!! ان شاء الله تكوني حامل وما تحتاجي شي
وبالنسبه لزوجك ما عندي فكره ان شاء الله البنات بفيدوكي

ان شاء الله يارب يسمع منج اختي

[وردة حلب]

مساء النور والسرور جالكسي ...يارب يستجاب لدعائك ويصير التجمع مليان بتباشير الحمل

نتولة ...اهلا يا عسل ماشاء الله على هيسومة الله يحفظه بكرة بياخد الجو كله من اخته
بس ماتصير تقلك متل ماعم تقلي بنتي ....خلينا نبعت حمودي على سوريا ..حتى مايضربني بس يكبر هههههههههههه

راجية الفردوس لاتهتمي لكلام الدكتورة ...اكثري من الدعاء والاستغفار والله كريم

[نتال]

ههههههههههههه ورده ياقلبي على ليونه ما احلا برائتهم هالزغار ... الغيره بتبلش كل ما الطفل التاني صار يفهم ويتفاعل مع يلي حوليه بس بتعرفي بنتي بتغار من ابوها اكتر من اخوها بتلاقيها اعدتلو عالدئره ازا حكا شغله وضحكت انا بتسير تحكيلي ليش ازا حكالك شي بضحك بتضحجي وازا انا حكيت شي بضحك ما بتضحكي!!! عاد شغلاتها يلي بتضحك قمة السخافه وبضطر انا اضحك على شغلات فارطه ههههه