تجمع حوامل ليبيا

[أم عويضة]

المشاركة الأصلية كتبت بواسطة hatoo

شكرآ يايقين وان شاء الله ربي يفرحك بشوفه هلك عن قريب, واهلين ام عويضه شنو الجو انا برضو من بنغازي انتي من وين في بنغازي؟؟؟

اهلي في البركة وانا في الماجوري وانت وين تسكني

[hatoo]

انا نسكن في بوعطني

[أم عويضة]

المشاركة الأصلية كتبت بواسطة ميراس

اعيون حبيبتى انا مازعلت منك بالعكس انا انحب انوضح للناس وضع ورفلى وفعلا سلم فمها يقين زمان لما ورفلى دارت الانقلاب الليبين حالة وطلعوا عالاداعات وقعدوا يتشدقوا ودارونا خونة كلنا وماخلوا ماقالوا علينا وكل مانتلاقوا احنا وحد ايقولوا كيف اديروا هكى وكيف وكيف زى توا وهدا الحال حبيبتى وبعدين وين بتهربى ياماما تلات ايام

سلام ميراس كيف حالك يابنت عمي
اييييييييه لوكان تشوفي وتسمعي هنا في بنغازي كل مانطلع ونشوف حد براني ايقول ورفلة وورفلة لكن اني نرد ومانيش ساكته وخاصة ان عندي ولد سيدي استشهد في 15 رمضان في البريقة
الناس في العموم دائما هكي غالي عليهم النقد

[أم عويضة]

واااااك مابعدك هههههههه

[hatoo]

ههههههههههههه شوفي من الفويهات عند هلي لبوعطني سفر هههههههههههههههههههه

[أم عويضة]

المشاركة الأصلية كتبت بواسطة اعتدال

بالسلامة انا عندي امتحان يوم الجمعة وعيوني من السهر والتعب ذابوا ياهمي كرهت القراية نشوف في البنات يحكوا على المزينات (ربي يدوم النعمة عليكم) سهفوني انا في القراية والعياط وخلاص الحمد لله على كل حال ولدي يعيط ماباش يقبل الحليب الصناعي ودارله اسهال (حاشاكم) وانا ناااااشفة والله كان هذا قعد حالي ولدي يموت من الجوع قولولي كيف اندير قولولي تربحوا

السلام عليك اعتدال كيف حالك وحال زوجك ووليدك
عظم الله اجرك في سلفك والله ايعينك علي قرايتك وتعبك وان شاء الله ربي يكافيك بالنجاح والتوفيق
نبي نسألك وليدك كم عمره وليش ماترضيعيش فيه ؟؟؟

[أم عويضة]

المشاركة الأصلية كتبت بواسطة اعتدال

ياميراس اقاربي من الثوار وسبق وقلت ان اهلي كلهم منحازين للثوار
وانا من الزاوية لكن وجهة نظري تختلف احنا همنا الوحيد نحولوا القذافي من السلطة على اساس اللي يجي بعده ملائكة والله الليبيين زي بعض اللي يشد منصب يلصق بيديه ورجليه ويفكر في نفسه بس والفساد اللي في ليبيا مش بسبب القذافي بروحه معقولة اللي يحطوه في مكان يخنبه تحت شعار (معادش نلقاه مرة اخرى) حتي مدير الجمعية الاستهلاكية تلقيه منتف وتعبان من حد يرموه في الجمعيه بعد اسبوع بس يبدى باشا وتتغير السيارة والحوش والباقي انتم عارفينه على حساب مصلحة المواطن اللي مسكين يشوف لبضاعة الجمعية زي هلال العيد لذلك الليبيين مش حيعيشوا كويس لن يتغيروا ويغيروا تفكيرهم السلبي وتغيير القذافي لوحده مش حيغير شي بالعكس حيزيد الفوضى والايام راح تثبت كلامي للاسف
سامحوني هو مش وقت تنكيت لكن الحالة اللي احنا عايشينها فكرتني في نكته - فيه واحد مسكين عنده سوسة في اسنانه متعباته ومذوقاته الويل (السوسة اعتبروهة القذافي) وباقي اسنانه تمام (الاسنان البيضاء اعتبروها الشعب الليبي) مشي للدكتور شافه قاله لازم تنحيها السوسة لان السن ملتهبة قال المريض معقول بالبساطة هذي لها سنين متعبتني انحولها بدون ماننتقم منها اسمع يادكتور قلع الاسنان كلهم وخليها السوسة بروحها زي الكلبة (اكرمكم الله) !!! يعني من كثر كرهه وحقده على السوسة نسي مصلحته ومستقبله حتى احنا كرهنا للقذافي عمى عيوننا والدم الليبي نزف بسبب التهور وليبيا بدت بلاد العزايز والشيابين والأرامل كيف راح تكون دولة قوية ومتحضرة كيف؟؟
القذافي مانبوشي لانه دمر ليبيا وخلاها متخلفة ومسحها من الخريطة اي نعم لكن مش هذا الحل مش هذا

اختي اعتدال والله حاولت نفهمك وما قدرتش شن هالكلام اللي قاعدة اتقولي فيه
الليبيينشن خلاهم هكي تعبانيين وطايح سعدهم الا معمر انا متاكدة ان الشعب الليبي ح يكون في الف خير بدون معمر وشلته الفاسقة
وبعدين معمر من كان يحط في المناصب اللي فيها الفلوس بالهبل الا الفاسقين اللي زيه اللي نهبوا وجابوا من ينهب معاهم
الليبيين عمرهم ماكانوا اصحاب فوضى وان كانك صغيره اسألي من هما اكبر سن منك
وبعدين سياسة معمر كانت تهدف الي قتل الانسان واحلال روح الغابة والفوضى والهمجية بدل منها والدلائل واجدة ماتنعد
ولا معمر ولا غيره يقدر يمحى ليبيا من الوجود والدليل الزاوية شوفي شن دار فيها سحنها سحن لكن ماقدرش عليها مازال فيها خير وطلعوا الرجال منها مجروحين لكن عايشين بعزة وافتخري بيهم
وفي الاخير انقولك خليك متفائلة فيه رب في الوجود وعلى قيس النية ربي يعطينا
سلام ياوخيتي وربي ايوفقك

[أم عويضة]

أو وسونة الله يسلمك والله خليك انت وبنيتك

[أم عويضة]

المشاركة الأصلية كتبت بواسطة hatoo

ههههههههههههه شوفي من الفويهات عند هلي لبوعطني سفر هههههههههههههههههههه

هههههه
الله ايعينك ع المشوار

[اعتدال]

اهلا بيك ام عويضة ربي يخليلك عويضة ماشاء الله عليه ربي يحفظه طالع ليك انت وإلا لبوه وإلا لاشيء مما ذكر؟

انا مش صغيرة (على فكرة وجعتني كلمتك) وعندي من الخبرة والثقافة مايكفي انه تكون عندي وجهة نظري المستقلة

اسفة على كلمة فوضى لكن احنا مش مجتمع ملائكي ولا مجتمع مثالي للاسف والادلة على هذا كثيرة مثلا في التصعيد دم للركبة !!! وفي المباريات والكورة بدون تعليق!!! حتى في الجمعية الزراعية تلقي عراك ودعاك على العلفة ماحدش يعرف يشد دور ولايحترم الثاني والبضاعة نصفها طبعا ماشية لتجار الجملة قبل ماتوصل حتى مكانها وحتى كوشة الخبزة تلقي عليها دعاك بالبوني مع انها متوفرة تلقي اللي عندة غنم يشري الف خبزة للشياه والمواطنيين مرات مايحصلوش فطور صغارهم (نفسك نفسك) هو كل شي متوفر والحمد لله لكن مايحلاش إلا بالمشاكل وفي رمضان عاد ماتدويش بكل ماتقولوش لاهذي حقيقة غير قابلة للنقاش

على فكرة انا زرت بنغازي انا وراجلي مرة وقعدنا فيها اسبوع قعدنا في فندق اسمه اعتقد (الدوجال) مطل على البحر روعة بصراحة حلوة بنغازي بالمرة شن اسمها المنطقة اللي فيها الفندق هذا لانها عجبتني ( سؤال لهاتو وام عويضة)