حبيباتي كيفكم
الله يبارك فيكم ومشكورات على دعواتكم الحلوة. الله يسعدكم.
أحكيكم قصة ولادتي بالتفصيل
طبعا كان يوم الجمعة اتصلت عليا خالتي بعد المغرب تسألني تقولي أميرة حبيبتي ما تحسي بطلق او اي شئ قلتها لأ والله ولا شئ قالت لي لا يا بنتي لا تسكتي على نفسك قومي امشي خلي زوجك ياخذك على المخططات وامشي قلت لها ان شاء الله
وفعلا جا زوجي من الصلاة وقال لي يللا مشينا على المخططات. ورحت مشيت مشي ربع ساعة بس مشي سريع مو زي كل مرة كنت امشي على اقل من مهلي. حسيت وانا بامشي بمغص قمت خفت قلت يمكن اجهدت نفسي .ورجعت عند زوجي قلت خلاص كذا يكفي احس تعبت. طلعنا السيارة وقعدنا نلفلف وانا احس بالمغص يجي ويروح بس طالعت في الساعة لقيته مو منتظم فقلت اكيد مو طلق.
رحنا البيت حممت ولدي وبنتي والألم كأنه يزيد. رحت اخذت ملعقة زيت زيتون قريت فيه آيات الرقية وتسهيل الولادة.طبعا زي ما قالت جوانا الله يسعدها دنيا وآخرة المهم وقرفت من طعمه واخذت بعده على طول ملعقة عسل عشان اضيع الطعم .ووراه موية زمزم. المهم نومت الصغار وقمت ارتب الصالة الا سبحان الله يزيد بقوة الألم وكل ماجا ما أقدر اتحرك .ماقدرت اكمل شغلي. حسيت خلاص انه طلق بس كان تقريبا كل ثلث ساعة. فتحت في الجوال على ورد الولادة وقعدت أقراه كامل ووالله يا بنات الألم يزيد بقوة. الموهيم صارت الساعة عشرة في الليل والطلق صار كل ربع ساعة .قمت سويت لي مغلي عشبة مريم. ومع اني والله احس باستفراغ الله يكرمكم بس المهم شربت شوية وقمت امشي واتحرك في البيت على قد ما أقدر واستغفر واسبح .ومشاعر عجيبة غريبة جاتني .وبكيت شوية. اقولكم كوكتيل من كل شي هههههه.وشوية اروح ابوس ولدي وبنتي وهم نايمين. وقعدت جنبهم ادعي ربي بقلللللللب انه يسهل عليا ولادتي ولا يحملني فوق طاقتي.
جات الساعة 1في الليل خلاص صار الطلق كل عشرة دقايق وضار قوووووووييييييي قمت رحت اصحي زوجي قوم وديني المستشفى عندي ولادة .وهو انواع البرود مسكين يا حرام مايدري لاني مابينت له ولاشئ. مو مصدق يقولي نامي لا تطيري لي نومي وجاتني ذيك الطلقة واتلوى جنبه قام نط من فوق السرير قال اشفيك انت اش تحسي .خلصت الطلقة وصرخت فيه طلللللللللق فيني طللللللللللق هههههههوالله الرجال جاله رعب مو طبيعي قال يللا المستشفى بعيد يادوب نلحق .وجري على السيارة وقبل ما اخرج كمان شربت شوية من مغلي عشبة كف مريم وحسيت اني بقوة ابغى استفرغ الله يكرمكم
وكان الطريق طوييييييل
والطلق يزيد لدرجة صرت اصرخ اصرخ وامسك في يد زوجي وهو يا حرام يبغي ينط من الشباك من الخوف ههههههه اول مرة يشوفني في حالة ولادة
وصلنا وجابلي كرسي المستشفى اللي بعجلات قمت ابغى اقعد والله يابنات تجيني طلقة واقعد في مكاني وصار الطلق ورا بعض ورا بعض .ياربي خلاص ابغى اتسدح مو قادرة اقعد في الكرسي وكشفت الدكتورة اللي في الطوارئ قالت 7 سم ماشاء الله لا قوة الا بالله وجري في الاسياب الين كشك الولادة وانا صراخي معبي المكان وولدي وبنتي خايفين حبايبي ولدي يسأل ابوه ماما تبكي ماما زعلانة وابوه خلاص يبغى يبكي ما توقع اني اتألم للدرجة هاذي.
المهم دخلت وحطوني على السرير وطللللللق الى ان صرت الساعة اربعة انفكت موية الراس وحسيت بدفع قوووووووي وقالت لي الممرضة ادفعي ادفعي ادفعي ودفعت ودفعت ودفعت والحمد لله خرج عبودي حبيب قلبي للدنيا آه الحمد لله من جد يا بنات ابغى احمد الله واشكره طول الوقت على انه يسر لي ولادتي اللهم لك الحمد كما ينبغي لجلال وجهك ولعظيم سلطانك
المهم في مستشفى حراء كان زحممممممممة بس والله انهم يؤدوا واجبهم على قد مايقدروا
السئ في الموضوع انهم خيطوني بدوني بنج هم اعطوني ابرة صغيرة في طرفها شوية بنج واحسه ماكان كفاية .والله حسيت بالخياطة كلها .تقول ان الشق بسيط وبس ثلاث خيوط لكن انا حسيتها مية .وصوتي كأني اولد بالتمام صرا ا ا ا ا خ.
هذا الشئ السئ الوحيد والا كل شئ تمام والله اخلاقهم زي العسل كلهم السعوديات والفليبينيات مرة رائعات واهتمام طول الوقت ماشاء الله وقعدنا كلنا ننتظر غرف تفضى يعني ما طلعونا التنويم الا بعد ثلاث ساعات .بس طول الثلاث ساعات وهم رايحين جايين علينا
والحمد لله مافي شئ كامل. الكامل وجه الله سبحانه وتعالى .بس عن نفسي انا ارتحت عندهم كثير لولا الخياطة المزعجة.اللي نكدت عليا بس
وانا الحمد لله راضية
10-24-2011, 10:57 PM
رد: دردشة حوامل أهل مكة المكرمة - دردشة بنات مكة المكرمة - تجمع حوامل مكة المكرمة
Mamy Mirza 
العرض العادي
