مشكوريييييييييييييين حبيباتي .. الله اتمم لكم حملكم على خير و اقر عينكم بشوفه توأمكم سليمين معافين .
رجعت اقول لكم قصه ولادتي مثل ما وعدكم .gif "hwaml9")
بدأت قصتي في يوم السبت تاريخ 30/6/2012 اتصلوا فيني المستشفى الساعه اربع العصر و خبروني انه غرفتي جاهزه عشان ارقد لانه عندي عمليه يوم ثاني الصبح و لازم ارقد قبل عشان الفحوصات . بعد ساعه من الاتصال اتوجهت انا و زوجي للمستشفى و كنت طبعا مستعده لانه الدكتوره حجزت لي الموعد و خبرتي بالموضوع و كنت بس انتظر اتصال منهم .
وصلنا المستشفى و كانت اللحظات في الطريق حماسيه و فيها خوف شوي كأني اول مره اطلع من البيت !! حس زوجي اني مرتبكه و بدأ اشجعني و قول لي من زمان كنا ننتظر اللحظه الي نستقبل فيها توأمنا . بعدها دخلت قسم الحوامل و عطوا زوجي اوراق بيانات و اجراءات اكملها و اخذتني الممرضه معاها الى الغرفه و خبرت زوجي بعد ما اخلص الاوراق يقدر اشوفني في الغرفه . اول ما وصلت رحبت فيني الممرضه و كانت قمه في الاخلاق و عطتيني تعليمات المسشتفى و بعدها بشوي وصل زوجي و جلس اهداني و يتكلم معاي عن الاشياء الي احتاجها و كنت حاسه انه يبغي اخفف من التوتر الي انا فيه . طلبت الممرضه من زوجي ان يتركني انام و ارتاح لانه العمليه بتكون بكره الصبح و لازم اكون مرتاحه .
طلع زوجي من المسشتفى الساعه ثمان و نص و بعدها جات الممرضه و اخذت تخطيط القلب للبيبي الاول و بعدها البيبي الثاني و ضغط الدم و درجه الحراره و فحص دم و بول و طلبت مني ارتاح . بعدها بربع ساعه وصل دكتور البنج و قام يسألني عن صحتي بشكل عام و اذا كنت اعاني من امراض وراثيه او كحه و بلغم و لله الحمد ما كان فيني و فحص بلعومي و ضغط عليه و قال انه اوراقي ممتازه و بكره التخدير بكون موضعي . بعد ما طلع دكتور البنج دخلت عليي دكتوره ثانيه و قالت لي انه نسبه دمي وصلت 9 فقط و هدا بحد ذاته خطر علييي و اسبب مضاعفات في العمليه و سألتني اذا احد اتبرع لي او يستعملون دم من المستشفى . خبرتها انه زوج اختي اتبرع لي و افضل الجيس الي اتبرع به . قالت الممرضه بعدها اني لازم انام و ارتاح و امتنع عن الاكل لانه لازم اكون صايمه من الساعه 10 . طبعا انا من كثر التفكير ما قدرت انام بالمره و الثقل ما كان اساعد اني انام بعد و ظليت اكلم زوجي في التلفون و اصر عليه انه ما اصكه لانه اعصابي كانت تعابنه من كثر التفكير .
قال لي زوجي بعدها اني افتح القران الي معاي و اقرأ سوره مريم و استخفر ربي لين ما انام
و فعلا سويت الي قاله زوجي و نمت في حدود الساعه 11 و نص .
الساعه خمس الفجر حسيت بدخول ممرضه عليي و قالت لي اني لازم اقوم اللحين اجهز نفسي للعمليه . اخذت فحص ثاني للضغط و درجه الحراره و نبض التوأم و قالت لي انه لازم اتزيل شعر الفخد و البطن و المنطقه الحساسه . خبرتها اني خلاص ازلت كل هذا في البيت لاني كنت مستعده للموضوع . استغربت مني و قالت صعب على حامل اكيد في احد ساعدش و قلت لها لا محد ساعدني بس استحملت لوحدي و ازلته اشوي اشوي . قالت لي انه لازم اغسل جسمي و اغير الملابس الي ملابس العمليه و فعلا سبحت و غيرت الى ثياب العمليه . طلعت من حمام الغرفه و شفت زوجي كان قاعد . حسيت بالراحه و الحماس وقتها و كانت الساعه تقريبا سبع و ربع . شوي و دخلت ممرضتين و قالوا لي اللحين لازم انحط لج قسطره البول . كانت حاره و مؤلمه و حصلوا صعوبه الممرضتين في تركيبها و ظليت اعاني من ألمها و حرقه الشديده فيها الى فتره العمليه . و زوجي كان اهدأني و كنت احاول ما اتحرك عشان ما اتألمني . و خبروني سبب الالم ضغط البيبي على المثانه لانه القسطره ما اتألم
الساعه 9 و نص تقريبا دخلت الممرضه و قالت لي انه موعد العمليه بكون الساعه عشر و بينقلوني القسم بعد اشوي و فعلا الساعه 9 و 45 دقيقه دخلوا لي السرير و ركبوا عليي جهاز التغذيه . ساعتها مسكت ايد زوجي و طلبت منه انه يدعي لي اقوم بالسلامه و كانت علامات الارتباك واضحه على وجه زوجي و بعدها اتوجه زوجي الى قسم الانتظار. و انا كنت في السرير و اجروني الى الغرفه كنت اطالع في السقف و اقرأ قرأن و كنت جدا هاديه .
وصلت غرفه الملاحظه و وصل كيس الدم و خلوه في ثلاجه صغيره على طاوله جنبي و كانت الممرضات حلوين معاي و كل اشوي اجون يسألوني اذا كنت بخير و طبعا كنت اتألم من قسطره البول فقط و كانت تحرقني و طول فتره الانتظار كنت احس بتوأمي يتحرك في بطني و كنت اكلمهم انه اخيرا وصلت اللحظه الي ننتظرها .
مرت اكثر من نص ساعه و ما دخلت العمليات و اول ما وصلت الممرضه تطمأن علي خبرتها اني تعبانه و ابغي خلاص اولد . قالت لي وصلتهم حاله طوارىء و دخلوها الغرفه و اول ما اتخلص بجي دوري !!! و مرت بعدها ساعه و نص وصلت حزتها قمه الارهاق من الانتظار والم القسطره . ضربت الجرس و جوني الممرضات خايفين قلت لهم اني حاسه بتعب مو طبيعي و الم فظيع في القسطره . رفعت الممرضه الفراش عني و شافت انه البول اختلطت بالدم و انه لازم ادخل العمليات حالا و الجيد في الموضوع انه غرفه العمليات جاهزه لي في الوقت الي تعبت فيه وركبوا لي جيس الدم و هم اجروني للغرفه جاني الدكتور و بدأ اكلمني شنو بسمي العيال و اذا كنت مستعده او لا و هذي لحظات حلوه و لازم ما انساها .
دخلت الغرفه و شفت حركه الممرضات اجهزون الاغراض و الدكتوركان يسولف معاي . الغريب اني نسيت الخوف و بدأت اسولف معا طاقم العمليات عادي .
وصلت دكتوره البنج و رفتعتني ممرضتين الى وضعيه الجلوس و نزلت راسي تحت مع استرخاء الكتفين و حطوا لي مخده على بطني اسند روحي عليها و ضمتني ممرضه على جهه اليمين و الثانيه اليسار عشان ما اتحرك و قالت لي الدكتوره انه الابر عاديه جدا و ما اتألم.
مسحوا ظهري بماده بارده اتوقع معقم و ماده ثانيه و حسيت بأبر عاديه جدا و اصلا كنت شاغله تفكيري بتوأمي فقط و بعدها حسيت بوخزه ثانيه و مثل السائل ينزل في ظهري
و منها بدات احس بتنميل في رجلي و فقدت الاحساس بألم القسطره و كل شعوري اني احس انه جزيء السفلي فيه تنميل و بس .
كانوا مركبين عليي جهاز التغديه و جيس الدم و جاهز قياس الضغط و تخطيط القلب .
وصلت الدكتور مباشره و غطوني بستاره ما اقدر اشوف منها و لا شي و على راسي ممرضه تمسح على راسي بين فتره والثانيه . حسيت بشق الموس لكن ما كان مولم ابدا عادي جدا و خفيف.
الجو كان جدا جدا بارد و بدات ارجف من البروده . حسيت نفسي في المحيط المتجمد الشمالي
و في الفتره الي الدكتور يسألني اي دوله احب اسافر له اول ما يكبرون التوأم . شوي و قال لي اللحين بنطلع الاول و سمعت صوته اصيح شعوووووووووور قمه في الروعه و احساس مو طبيعي . قالوا لي ثواني و بنجيبه لج . و بعدها بشوي قال لي الدكتور و هذا اخوه و سمعت صوته . انا حزتها ما قدرت اتمالك نفسي و نزلت دمعتي من الفرح .
جابوهم لي بعد خمس دقايق تقريبا و حطوهم عن وجهي . كانوا مفتحين عيونهم و طالعوني و بست كل واحد منهم في خده و ظليت احمد ربي و اشكره طول فتره الخياط .
بعد ما خلصوا خياط و مشى الدكتور و شالوا الستار و نظفوا المكان نقلوني على سرير ثاني عشان ينقلوني الى قسم الملاحظه .
كنت ارجف من البرد و ما احس في جزيء السفلي بالمره شعور بالتنميل فقط . غطوني الممرضات بثلاث فراشات عشان ادفى و جهاز الاكسجين و كيس الدم و التخطيط و الضغط ما زالوا عليي مع المغدي . كنت تعبانه و محتاجه نوم بس مضايقه من البنج . بعد مرور فتره حسيت انه التنميل بدأ اقل و اني بدأت احس بحرقه خفيفه في منطقه الجرح و قسطره البول ما عادت اتألمني مثل قبل كانت عاديه . طول فتره الي كنت فيها في قسم الملاحظه الممرضات ما تركوني و كانوا معاي و جابوا لي توأمي اشوفهم بس بدون ما اتكلم او اتحرك .
بعد ما استقر وضعي جات الممرضه الي كانت اتابعني في الجناح و اخذتني الى غرفتي . و شفت زوجي كان ينتظرني هناك و كان جدا متوتر و اول ما شافني ابتسمت له رغم انه الجرح كان المني لانه مفعول البنج قل و بدأت احس . طلبت الممرضه مني انام و عطوني مسكنات و قالت الى اهلي بس يطمئنون عليي بدون ما اكلموني . و فعلا نمت و كنت افتح عيني بين فتره و ثانيه و اشوف اهلي جبني بس كنت محتاجه للنوم رغم وجود الالم مكان الجرح .
في اليوم الثاني جابوا لي كتاكيتي اشوفهم و كان وضعي افضل بس الم الجرح مزعج . و كل ما احس انه الالم ازيد كنت اطلب منهم المسكنات و صير وضعي افضل . بعدها جت الممرضه و شالت عني قسطره البول و كانت حاره جدا لكن ارتحت اني اتخلصت منها و ساعدتني عشان اتحرك و ادخل الحمام كانت اللحظه صعبه جدا و بعدها قمت امشي اشوي اشوي لين ما بدا الالم اقل . و كل مره احسه ازيد كنت اطلب المسكنات و ارتاح
مرت 3 ايام و في المستشفى و الحمد الله كل مره اشوف عيالي افرح و انسى الالم كله . و الممرضات كانوا اتابعوني اول بأول و كنت احاول امشي على طول عشان اخف الم الجرح .
حاليا احس نفسي و لله الحمد تمام و صحتي افضل من قبل و الم الجرح بسيط لكن اقدر امشي و اهتم بتوأمي و ارضعهم و استقبل الناس . لحظات في قمه الروعه خواتي عيشوها لحظه بلحظه
الله اتمم لكم جميع على خير و يسر اموركم و فرحكم بشوفه توأمكم سليمين معافين .
صار عدنا خبره اللحين اذا احتجتوا شي لا تتردوا في السؤال حبيباتي
07-07-2012, 03:32 PM
رد: 【ツ】أحلى تجمع لأحلى حوامل التوائم 【ツ】 الجزء الثالث
انا الله معا الصابرين 
بصراحه شلت هم.gif "hwaml10")
.gif "88")
جديد منتدى منتدى أنواع الحمل
العرض المتطور
