تجربتي بتاخر الدوره ورحمة الله بي..

[جسور المحبة]

السلام عليكم ورحمة الله وبركاته

اخواتي حابه اقولكم عن قصتي لعلها تبعث فيكن الامل واحب اقول ربي قادر على كل شئ سبحانه

انا تاخرت بالحمل لمدة سنه ونص كان عندي تكيس بسيط واخذت كلوميد بدون متابعه وحملت بفضل الله وجبت بنتي بعمليه طبعا الدكاتره قالوا لي مافي حمل الابعد سنه واعطوني حبوب مانع حقت الرضاعه لانها خفيفه علي لاني تاخرت بالحمل سابقا اخذتها شهر سببت لي نزيف وغيرتها لي الدكتوره الى مارفيلون واخذتها سنه وكنت ارضع بنتي مع الحليب الصناعي وقلت ابترك الحبوب اكيد تعطيني مناعه كم شهر وبعدين احمل على اساس عندي مشكله من اول ..اخرمره اخذت الحبوب كان في رمضان وكملت شريطين لاني ماابغى افطر في رمضان وتركتها وجتني الدوره في 8 شوال وفي شهر ذو القعده جتني في يوم 10 يعني تاخرت يومين والوضع كان طبيعي في يوم 10 ذي الحجه مانزلت الدوره انتظرت اسبوع احلل مافي حمل وانتضرت كمان اسبوع ثاني مافي حمل راجعت المستشفى اعطوني حبوب تنزل الدوره ومانزلت قالوا يمكن هرمون حليب لاني ارضع بنتي وفطمتها واعطوني حبوب الهرمون خذت حبه منها على يومين وجاني اكتئاب منها وتركتها واستخدمت البردقوش والمراميه كان هذا الكلام في بدايه شهر محرم طبعا من غير الكلام اللي كنت اسمعه من اللي حولي انتي اخذتي الحبوب المنع وسببت لك تكيس وسببت لك ضعف ومن هالكلام وكنت متوتره موبيدي ياااناااس ايش اسوي وكنت ادعي ربي ان يجعل حملي معجزه بالرغم كنت مأجله فكرت الحمل حاليا لان ببنتي الاولى حملت فيها بشهر 12 وولدت في رمضان وانا ماابغى اولدمره ثانيه في رمضان او ان يلطف بحالي وتنزل الدوره جاء 10 محرم الموعد الثاني ولسا مانزلت حللت دم ومافي حمل وكنت وقتها صايمه عاشورا المهم دعيت ربي وبعد صلاة المغرب جلست انطنط من فوق الكنب ابغاها تنزل لاني منت محلله دم ومافي حمل لدرجه تعبت من كثر ارقى وانط من فوق الكنب وبرضوه مانزلت وفي يوم 16 اي بعد ست ايام من تحليل الدم وكنت ابسوي تحليل منزلي صحيت الصباح وتوضيت وصليت ركعتين لله ودعيت ربي اذا كان حمل يبان وان يجعله معجزه( بكون اني تاخرت بالحمل وحملت بالاول بمنشط واخذت مانع)وان كان دوره تنزل وكنت ابكي وبعد ماصليت جلست استغفر 1000 مره وسويت التحليل بس ماشفته توضيت مره ثانيه ورجعت لسجادتي وجلست استغفر ربي 1000 مره واروح اشوف التحليل الا

خطيـــــــــــــــــــــــــــــــــــــن بفضل من الله ورحمته فرحت وجلست ابكي مو علشان طلعت حامل لا لان ربي استجاب لي ورحت للمستشفى واسوي تحليل دم واطلع حامل واسوي سونار قالت لي الدكتوره لسا مابان شي الحمل ببدايته كنت حامل باسبوعين وقلتلها طيب كيف وضعي ان ماجت دوره شهرين وبعدين طلعت حامل قالت صار عند تبويض مفاجئ وصار الحمل وهذا كله بفضل من الله ورحمته وكل الناس استغربت وتفاجأت بحملي وجبت بنتي والحين عمرها سنتين واللحين اسعى للحمل مره ثالثه لعل الله يكرمني به وان يكون ولدا صالحا انه لايعجزه ذالك سبحانه

حبيت اقولكم تجربتي بان الله لايرد من يلتجا اليه فقط كوني صادقه معه الحي اليه بالدعاء مو شرط تاخرت عليك الدوره حللتي ومافي حمل تفقدين الامل تتركين الدعاء لاااا الحي بالدعاء ان الله يحب العبد اللحوح وان جتك الدوره ارضي بقضاءه وقدره وادعي الله ان يعوضك خيرا..

دعواتكم لي ان ماتجيني الدوره وان اكون حاامل بولد صالح سليم معافى ..