دردشة بنات ليبيا , دردشة حوامل ليبيا , تجمع بنات ليبيا

ام قصى محمد · 09-12-2012, 02:31 PM

السلام عليكم
من اشتاقلى انا استحشتكم هلبه هههههههههههههههههه
انطمنكم كنت مريضه ولله الحمد ازمه ومرت على خير
القصه انى حسيت نفسى الحمدلله شوى قررت انى ناخذ برمه على الكوجينه ونظفتها وسيقتها ودرت برمه على دولاب الخزين طلعت سطل الرز والسكر وعندى حافظه كبيره امتاع المكرونه المهم طلعتهم وخشيتهم
ثانى يوم نوض على دم شويه نازل منى والم فى جنبى
خشيت حاله رعب
وقعدت نذكر فى نفسى انى ما نقولش حاجه تغضب ربى نبكى ونقول قدر الله وماشاء فعل
المهم كلمت راجلى وقتله ان جنى مريضه لانه مرات يجينى يجرى نخاف عليه
شوى جاى ومشينا لعياده خاصه وقعدت راجى نين طفى الضى والعياده جديده مافيهاش مولد
مشيت للمستشفى لقيت دكتوره تبى تفصل ما بتش تكشف على
مشيت ورديت لهم بعد ساعه لقيت ثانيه تعيط وتققول انا مش فاضيه ارجى نين تجى دكتوره ثانيه
المهم حجز عند دكتورتى وراجيت نين المغرب بيش خشيت على الدكتوره وطمنينى على البيبى
وقالت انى بس بذلت مجهود وعطتنى حبوب تثبيت وامرتنى بالراحه 14 يوم
وانى رديت لكم قلت ممكن فى من اشتاقلى
انا اليوم عندى فرح ولد خال راجلى
المهم امس حنيت وطلعت تهبل اليوم نلبس العربى انا وفايزه بنتى
وبكره يوم الزفه رح نلبس فستان احمر

ام قصى محمد · 09-12-2012, 02:34 PM

اثرى انا بنى نسالك
انا نفكر نخمر بس انا مانبيش نلبسه عند اهل زوجى ويعنى عادى نلبسه فى ماكن دون مكان

ابتسامة الصباح · 09-12-2012, 02:45 PM

السلام عليكم كيف حالك يأم قصي تشرفت بمعرفتك وإنشاء الله لاباس عليك وردي بالك عالبيبي في اما شهرانت اني صارلي زيك بالزبط لما كنت في التالت يعني جتني هبلة نشاطة قلبت الحوش ودرت لغدي رشدة كسكاس وضميت الدواليب والحوايج تاني يوم بنصلي الفجر لقيت روحي دم حاله حاشاكم فعني راجلي اصبح لدكتوره قالتلي هدا تهديد بالإجهاض ارتاحي وعدتني متبتات والحمد لله توا في التاسع

ابتسامة الصباح · 09-12-2012, 03:07 PM

بالله اللي عندها فكره علي موضوع الحنة للنافس تقولي طبعا عارفين اني مقيمة خارج ليبيا في كوالالمبور واني قريب انجيل وإنشاء الله بتجيني امي وأختي وخوي ومانقوللكمش قداش خاطري نبي نحني تعرفو ماسكرتش سنة متزوجه من حنة عرسي بعدها حنيت مرة حنتي جارتي يجزيها ربي الخير بس سمعت ان الحنة للنافس مش كويسة يعني لما تكوني مش طاهرة بالله عليكم قولولي اللي عندها فكره عالموضوع متبخلش عليا وجزاكم الله خير يا غاليات

أم أجنادين 80 · 09-12-2012, 05:27 PM

السلام عليكم
الف لاباس عليك ام قصي والحمد لله عالسلامة
وريحوا روحكم شوي انتي وابتسامة الصباح مش كويس اتحركوا حاجة ثقيلة
حتي انا ياام فصي نبلس البدلة الصغيرة اليوم في الفرح
بالنسبة للحنه للنافس والله ماعندي فكرة
اكيد راح يفيدوك البنات ,,,
انتي تقصدي حتي لو مش طاهرة مش كويس اتحني اول مرة نسمع بيها

أم أجنادين 80 · 09-12-2012, 05:29 PM

تقدري تحني وانتي حامل بس سمعت ان زيت الشيح مش كويس في بداية الحمل
تقدري تحني من غيره
واديري زيت قرنفل او نعناع

أم أجنادين 80 · 09-12-2012, 05:31 PM

تعرفوا مكان العرس اليوم ليا 7 سنين ممكن معادش امشيتله
اوهلبة ناس ليا فترة ماشفتهم
انحس بروحي متوترة

أثري في مدادي · 09-12-2012, 11:59 PM

السلام عليكم ورحمة الله وبركاته
صحـــــــــــــــــــــــــــــــة الحنة " أم أجنادين " و " أم قصي "
ربي يكون في عونك "أم أجنادين " تبهدلتي هلبة الحــــــــــــــــــــــــــــــــق ~~~~
أكره شئ لما تتشحوري في الحنة وما تجيش صااااااااااااااااااااابغة ~~~~~
إن شاء الله بالعمــــــــــــــــــــــــار علــــــــــــــــــــــــــــــيك ،،،،

أم قصي """"
ردي بالك علي روحك ،،، وحطي النشاطة في صندوق وصكري عليهاااااااااااااااااااااااااااااااا
يامن عاش نين تجيبي عويلك على خيييييييييييييييييييييير
وتلحقي على القضية والضمان ~~~~

بالنسبة لتغطية الوجه ،،،، والله أعلم ،،،، إن أخذت بالرأي القائل بوجوب التغطية ، فعليك أن تغطي وجهك في كل مكان ،،،
وإن أخذت بالرأي الذي يقول بأنه فضل ، فبإمكانك مبدئيا أن تغطي وجهك في كل مكان عدا أهل زوجك إلى حين ،،، تعتادي أنت تغطية وجهك ويصعب عليك كشفه في أي مكان ،،،،

وبالنسبة للحناء يا " إبتسامة " فكما ذكرت لك أم أجنادين لا حرج أن تتحني وأنت نفساء أو حائض ، المهم أن تحرصي على سترها وتغطيتها عند الخروج ~~~~ وربي يسهلك الحال ،،، ويسخرلك أمورك

أم سعوووووودي ،،، بوركــــــــــــت على التفاعل ~~~~

ام وسونة · 09-13-2012, 12:37 AM

السلام عليكم

كيف حالك وخيتي اثري وتسلمي على مشاركاتك الاكتر من رائعة

~~sosolibya~~ · 09-13-2012, 01:04 AM

السلام عليكم
شججججججججججججججججججججججججج

اقتباس:

المشاركة الأصلية كتبت بواسطة أثري في مدادي

ربي يعاونك ،،،،،،،،، والله تشحوير تعليم الحمام ،،، أني درهلي كبدي عشرة أيام محمسات ،،،حاشاك
وماخلا وين عملها آخرتها
واقف علي حاشية المكتبة يتدرجح ،،،،
ويمشي ينزله °° اكرمكم الله°° ويمشي يتسرب لأدرج المكتـــــــــــــــــــــــــــــــــــبة
تخيلواااااااااااااااااااااااااا
أوراق ـــ شنتروات ،،،،ومفارش ،،،، وحاجات ومحتاجات كلها معطرة بـ................؟؟؟؟
وأني علمته وين ماطق عمره سنتين وثمانية شهور
مش زيك عامين بس ~~~~

ههههههههههههههههههههههههههههههههههه
ههههههههههههههههههههههههههه
والله ضحكتينى من قلبى

يكون فى علمك انا معتبرينى متاخرة جدا فى تعليمه
حماتى من لماعمره عام ونص

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
دردشة بنات مصر , دردشة حوامل مصر , تجمع بنات مصر	سماسم	إستفسارات حوامل من الشهر السابع إلى الشهر التاسع	15243	06-15-2013 02:43 AM
تجمع حوامل ليبيا	ميرنا	إستفسارات حوامل من الشهر السابع إلى الشهر التاسع	21344	01-02-2012 10:29 PM
دردشة بنات مصر , دردشة حوامل مصر , تجمع بنات مصر	سماسم	إستفسارات حوامل من الشهر السابع إلى الشهر التاسع	32704	01-02-2012 10:16 PM
شجرة تجمع حوامل ليبيا	أم أجنادين 80	إستفسارات حوامل من الشهر السابع إلى الشهر التاسع	6	12-19-2011 10:44 PM