سيدات ليبيا الحبيبات ..تفضلووو

[fefe93]

السلام عليكم
كيف حالكم جميعا
مبروك التجمع الجديد
شكرا لكل من سال عليا
انا كنت تعبانه شويه عندي ضرس العقل ناض عليا و راجلي قلي ما نقدرش انحيهولك لانك حامل فقعدت انعالج فيه بالمضاد الحيوي و ماء الاكسجين و توا باهي احسن من قبل
سوسو الف مبروك لحماتك و انشاء الله ربي يهانيها
خوله الحق اني مش حنقدر انفيدك لانه اول بيبي بنجيبه وانشاء الله البنات يقدروا يساعدوك وانشاء الله يلف راس البيبي و تجيبي طبيعي

[هدية الخالق]

السلام عليكم ورحمة الله وبركاته
كيف حالكم اليوم
خوله إن شاء الله ربي يسهل عليك ويخلصك علي خير
شوفي بالنسبه ليا الافضل إنك تستني لموعدك وين تعلمي ممكن يلتف في اخر لحظة ولو ما التفش وقتها يدخلوك للعملية
وما تخميميش لو جبتي بالعملية والله حسب ما نشوف في اللي مدايرينها مش هاديكا الصعوبة اللي متخيلينها احني ممكن كان كترتي الاسبوع الأول بس ومرات أقل يعني زي الطبيعي غير بتحافظي من ناحية رفع الثقيل والاشغال الشاقة زي التنكيت والفلاحة امتاع الليبيات ههههه والباقي عادي والله في وحده ليبيه نعرفها اهني عندها ثلاثه صغار وجابت الرابع بالعملية وقعدت تلاته أيام في المستشفي ولما روحت أول ما وصلت للحوش دارت عشي راجلها وصغارها وحاست علي روحها وقالت عااادي أهم شي نبهوها انها ما ترفعش تقيل ما عدا البيبي
لكن مشكلتهم اهني يخيطو مش يلحمو لحم زي في ليبيا عموما إنتي لو لسمح الله صار من العمليه تقدري تسأليهم عاللحم وان شاء الله ما تستحقيش وتجيبي طبيعي يارب

[هدية الخالق]

فيفي كيف حالك إن شاء الله لاباس عليك وربي يسهل عليك يا رب
فروسه وسوسو كيف حالكم وينكم اليوم
أوشي جيجي أثري ام نوزه جنوده ام معاذ ام ورد كيف حالكم ليكم وحشه

[sosolibya]

السلام عليكم مساكم سكر... كيف حالكم

هلا فيفي ليك وحشة.

[sosolibya]

هلا هدهد شن أخبارك..

اليومة طبعا نتغدو عند امتعيني ولأن البارح كسكسي وبازين درنا غدانا رز مبوخ

ودرت لقمة القاضي

وبعد ماروحت من امتعيني درت خبزة ملفوفة والعصر مشيت لخوالي,,

كيف حالكم .. وشن جو سوما ,.

باقي البنات كيف حالكم جميعا..

[sosolibya]

خولة ,, عزيزتي الله يسهل عليك وتولدي بالسلامة ,, أهم شىء السلامة
يعني مهما كان طبيعي ولا عملية ألأهم الصحة والعافية ,,

أنا كنت مثلك يوم من ألأيام وكنت أعتبر أن العملية صعب وشىء مستحيل ومش عايزة أعملها بس بعدين أكتشفت أنها مش أخر الدنيا ولا نهاية العالم ..

وخصوصا لسمح الله لما يخوفوك أنه ممكن يصير شىء للبيبي ,, قلت الحمد لله خلاص أعمل عملية ولا يصير شىء للبيبي,,

وبصراحة لو العملية ضرورية أعمليها على طول بدون عملية اللف ,,

هي أول يوم صعب بس من ثاني يوم تصيري تتمشي,,

وألألم ألأسبوع ألأول ,, ويظل خفيف لحد ألأسبوع الثاني ,,

وربي يسهل عليك يارب,,

عزيزتي لا تخافي ولاتضايقي نفسك ,, لو حيعملولك عملية والله إسأليني عن تجربة أكيد حتتضايقي وحتزعلي وصح أنك عايزة تولدي طبيعي بس كله فدى صحة البيبي..


وتأكدي إن حياتك بإذن الله حتستمر طبيعية ,, يعني صح ألأفضل ألإنتظار بعد العملية بدون حمل لسنتين بس حتى لو حملتي مافي شىء يضرك بإذن الله,,


بس حافظي على نفسك وحافظي على نظافة الجرح وماتحملي رزين,..


وربي يسعدكم ويوفقك ,


ويارب يرزقك ولادة سهلة وميسرة يارب,,

[sosolibya]

أثري نحن هنااااااااااااا


البوريك ,, من مطبخ سوسو.. مقرمش ولذيذ ..

[sosolibya]

هيا أثورة تعالي نحن هنا ,,, نشوف في أثورة في تجمعنا ألأول ..

[sosolibya]

ماجي حد ,,,,

إن شاء الله ألإثنين موعدي وإن شاء الله يكون الكيس أختفى ,, وربي يطعمني الحمل هذا الشهر يااارب,

[fefe93]

أهلين هدهد تسلمي
سوسو والله حتي انتم كلكم ليكم وحشة وإنشاء الله يكون كيس اتنحي وربي يرزقك الحمل الشهر هدا