بنات ليبيا نبي مساعدتكم***افكار السبوع

[عيون زوجي]

وماتنسيش الوشق كدسيه من توا لانه يشرح الصدر وشعار حوش كل نافس




للعلم ليس له علاقه بالحمايه من العين هادي خرافه وشركيات انما للريحه وتوسيعه الصدر

[الواثقة بالله ..]

السلام عليكم ورحمة الله وبركاته ...

ساليتو ... كيف حالك ياحبيبة وكيف حال البيبيات ... طبعا كالعادة ... مواضيعك لازم يطيحوا بين ايديا .... هههه


آني حنقولك بالنسبة لعاداتنا كطرابلسية ... والبرنامج اللي ماشية عليه عيلتنا الفترة هادي ... ماهو كل فترة موضة ... ههه

برنامجنا ياستي كالتالي ...

طبعا اول ماتجيبي في العيادة لازم يكون عندك شكلاطة قنينة كواليتي ستريت او باتشي او فيريرو روشيه ... لأن كيف بتجيبي يعني لأنك نضتي والحمد لله بالسلامة اول حاجة توزعي شكلاطة على الممرضات اللي في القسم اللي جبتي فيه وكان في دكتورات ودكاترة موجودات وفي هادي الحالة اكثر حاجة اطيح كمية كبيرة كواليتي ستريت... وبعدين القراب منك هلبة اللي بيسمع بيجيك .. زي عماتك وخالاتك والخوات ... وامالي راجلك زي عزوزتك وحماواتك وكان عندك سلفات واماليك طبعا هما في الغالب اللي بيستلموا تقديم الشكلاطة للي بيجي في العيادة .. وبيكونوا القراب هلبا .... باهي ..

وبعدين كيف تطلع النافس من العيادة .... يبدوا الناس يسئلوا يقولوا شني بتدير اسبوع والا نلموا بعضنا وانجوا والا بتدير هيا لمات في الحوش وهادي كل حاجة وليها برنامجها... طبعا في حالة ان يسمعوا بيها انها بتدير اسبوع فكل واحد يشد مكانه لين تجيه عزومة السبوع ... لكن في الأسبوع الأول ... يجو في حوشك العمات والخالات وكان الحناني موجودين يعني مش شرط يعتمد على المقربين في العيلة ... وامها طبعا وكان عندها وخيات لازم للعوالة طبعا كله كله يوم والا يومين هادوا كان العمات يلموا بعضهم في هضاكا اليوم وهادي جية الأقارب هلبا يعني كمعزة خاصة انهم ماعتبروش روحهم برانية وبيقعدوا للصالة بس فيجوا ... والجية هادي اللي يندار فيها .. عصير وشكلاطة " مش روزاطة وعبمبر " بحكم ان في اسبوع بعدين ... وبعدين طويسة شاهي معاها حلويات .. وفي الغالب في الأيام هادي تكون الحلويات الزمنية يعني مقروض وغريبة وكعيكات ... وبعدبن ياحنة ... " العصيدة بالرب " " وعصيدة بالعسل والسمن " لازم يكونوا موجودين الخيارين .. بش اللي مايحبش حاجة ياخد الثانية ...
وبعدها على حسب في اللي يكتفوا بالحاجة هادي بس .. وفي اللي يدير فاكهة او فروت سلط .. وبعدين كان تبي تعطي كويسات مكسرات بما اني مانشوفش فيها لازمة ماداما بعدين في اسبوع او الأفضل عندي انها تندار المكسرات في متيرد كبير ومعاه صوينيات صغيرة وكلينكس ويلودوا بيه بعد الحلاوات والشاهي وقبل العصيدة آني انحب اللقطة هادي اكثر في الحوش احلى من الكويسات .. وهادوا ياحنا الأقارب هلبا ...

كويس ... وبعدين في اليوم السابع .. انديروا العقيقة .. اللي هوا ندبحوا ... وتصير عزومة رجالة ... عندنا اللي يديروا فيها في الصالة وعندنا اللي يديروا فيها في الحوش " كل قدير وقدره " .. يدبحوا ويديروا حاجة بصيلة " رز بالبصلة والا كسكسي " ومعاها سلاطة ومسير وزيتون ومعاها بوريك وامبطن او واحد منهم كان تبي وطبعا المشروب وبعدين الفاكهة ..... وفي اللي يقول للعمات وبنات العمات والخالات وبنات الخالات والقراب في هذا اليوم يجوا بش يحضروا ويعولوا في نفس الوقت البنيات ههه ويصير جو يهبببل في هادي الحالة كيف يعرفوا انهم يوم العقيقة بيجوا فمايجوش يوم قبلها يقعدوا ليوم العقيقة ..

وبعدين تحدد موعد اسبوعها آمتى ماتبي وتوتي برنامجها ...

وبش نضمن ان الرسالة ماتمتسحش وتكون طويلة هلبا توا انكمل الباقي في رد ثاني ...

[الواثقة بالله ..]

آآه ونسيت نقولك ان عندنا البيبي الأول للبنت اغلب حوايجه وحاجاته تشريهم ام النافس باهي يعني " اميمته " البيبي.. وفي يوم بعد ماتروح النافس لحوشها يجيبوا الحوايج هادوا ... طبعا وفي تفتليك في طريقة جيبة الحويجات وحاجات البيبي يعني يحطوهم في سويبيتات او كويتيات الهدايا الكبار او كل واحد وفكرته .. ويلفوهم لفة قنينة المهم يلتفوا وينحطوا بطريقة حلوة ونويزكة طبعا سويبيت فيه الشويشات والحاجات هادي وسويبيت في الكنيدرات والشخيشيرات وسويبيت فيه البديلات وسويبيت للكولونيا والشامبو والبودرة وعود تنظيف الوذان امتع البيبي وقصاص الظوافر وفرشة الشهر وووووو كل سويبيت وحاجاته .. المهم حتى هادي كل قدير وقدره في اللي يطلعوا بأفكار جديدة ويتفننوا في الحاجة هادي وفي اللي يجيبوهم بطريقة عادية جدا يعني كل واحد وقدرته وهادي بعض الأفكار من النت


















وفي هلبا صور حلوة في النت تعطي افكار حلوة وينجابوا وتجيب معاهم اللي نتفكره رب وعسل ونسيت شنو ثاني ... ويجوا عاد عويلة الراجل وكان جاي حد هضاكا اليوم يتفرجوا على حويجات البيبي ولفتهم ..

[الواثقة بالله ..]

[الواثقة بالله ..]

[saly.me.91]

ايه الوشق نموووووووووت فيه ريحته اتهبل
ماشالله عليك يابنية اتهبلي انا نعرف الحاجات هذي
بس نبي من يرشدني شن اندير وشن انخلي
وانتى ماشالله كفيتي ووفيتي ربي يبارك فيك وفي صغارك
ونردهولك لما تجيبي انا نعطيك افكار خخخخخخخ<<<<لا فالحه
المهم مشكووووورة هلللبا وكان عندي استفسار تاني اكيد نتفضل
في اي وقت عارفاتك وخيتي ومش ح تبخلي عليا
الله يعطيك العافية على تعبك

[عيون زوجي]

اختي الواثقه بالله...عوايدكم نفس عوايدنا يلي كتبتها في مشاركتي مافيش فرق بس نسيت لقطة ان الحاجات على اهل الام بس انحس مش كل الناس ايديروا فيها اللقطة هادي احني في سوق الجمعه اكتر وحديين متشبتين بيها ووصلت عندنا ان الاب لازم يجيب خروف ( كبش) وعوالة العشي الفلفل والبزار والحمص والمشروب والشكلاطة والبدله الصغيرة وكله نعرف وحدة جابت بعد 10 سنوات زواج مننا قريبتنا بوها يلي جاب الجمل حي ههههه وذبحوه والزوج مستريح عيل وقضيه الزوز هديه

[الواثقة بالله ..]

المشاركة الأصلية كتبت بواسطة عيون زوجي

اختي الواثقه بالله...عوايدكم نفس عوايدنا يلي كتبتها في مشاركتي مافيش فرق بس نسيت لقطة ان الحاجات على اهل الام بس انحس مش كل الناس ايديروا فيها اللقطة هادي احني في سوق الجمعه اكتر وحديين متشبتين بيها ووصلت عندنا ان الاب لازم يجيب خروف ( كبش) وعوالة العشي الفلفل والبزار والحمص والمشروب والشكلاطة والبدله الصغيرة وكله نعرف وحدة جابت بعد 10 سنوات زواج مننا قريبتنا بوها يلي جاب الجمل حي ههههه وذبحوه والزوج مستريح عيل وقضيه الزوز هديه

ماشااء الله تبارك الرحمن " عيون " فعلا صح العادات قريبة هلبا من بعضها لكن لتوا آني ماشفتش اللي وصلوا للدباير والجمل .. لكن هادوا ما شااء الله من الفرحة حتى هما عشرة سنين تباارك الرحمن عليهم وربي يحفظ ان شاء الله لكن آني مش من سوق الجمعو آحني اصلنا من لمدينة "المدينة القديمة "

استمتعت هلبة بقراية اللي كتبتيه ... بالتفصيل وحلو .. وهذا اللي شجعني نكتب آني مشكلتي حتى كيف نكتب ننسى هلبة حاجات .. هه تريح مني ... وانتي ماشاء الله شكلك خاطم عليك من قبل اسبوعك يعني عندك خبرة اكثر بالتفاصيل ... آني الا اللي نشوف فيه بس وخواتي يعني مش خاطم عليا شخصيا ... مازال ان شاء الله على خير ياارب ..

[يقين]

قعدت كان اني لا اسبوع لا ثمون اهئ اهئ اهئ

[الواثقة بالله ..]

السلام عليكم ورحمة الله وبركاته ..


يقونة حبيبتي معليشي ياحبيبة المهم انت تنوضي ومابيكش وصغيويرتك كويسين وتوا بإذن الله تروحي وكيف تروحي تكوني كيف جايبة بيبي جديد .. واديريه اسبوع باسماء صغيويرتك الثلاثة بإذن الله ... وبيبني وبينك افتكيتك من المصاريف الزايدة .... هههه


وتوا نكملوا باقي قصة السبوع ياحنة .... توا تكلمنا في لبسة ام البيبي ... وعندنا البيبي ليه حتى هوا لبسة خاصة يوم السبوع ... تكون مخصصة ليوم السبوع يااما تشريها واتية كان لقيتي حاجة قنينة او في اللي يخيطو فيها وهيا تكون لبسة زي قفطان على طويل وكله مخدوم بالراكام ويديه فيهم فرافر وحتى اللي يرقد عليه البيبي يعني يكون على فراشه حتى هوا يكون مخدوم نفس خدمة بدلة البيبي كله راكام ونويزك ... وفي الوان اللي ايديره ابيض او سكري يعني زي الوان الفيلو وهيا اللبسة وحدة للوليد والبنية ..

باهي وبعدين نجوا للحطان والتفريق ..

اول مايخشوا ياحنة يكون في مترد على طاولة اول مايخشوا الصالة وفيه شكلاطة نوع الشكلاطة اللي تفضليها ... وطبعا كل واحد وقدرته في طريقة تغليف الشكلاطة لكن تغليفها في الغالب على قولة " عيون " مكلف هلبة ... ولو واحد عنيده ويقدر يغلف ... تعجبني هلبة تغليفات باناش اللي في بن عاشور وعنده حتى العربات اللي تتستف عليها الشكلاطة ماتكونش على طاولة الصالة ... لكت لتوا قاعد مافتحش بعد الأحداث "باناش "... تغليفته صح حلوة لكن اسعارها غالية ... وحتى الشكلاطة امتاعه حلوة وقنينة وكان عنده هلبة خيارات ... آني من رايي ان الواحد يشري منه الشكلاطة ومن الأول يختار النوع زي اللون اللي يبيه سماوي والا بودرة والا لون محايد ... وما يخصرش على تغليفها .... وفي الأخير كل قدير وقدره ...

باهي وبعدين بعد مايلتموا الناس تتوزع " امية اللوز " او الروزاطه والعبمبر ... .. وبعدين انجوا للحلو .. وهنايا كل وحدة وشني تبي ... في اللي ايدير على كل طاولة تورتة دائرية والناس يقصوا وكل واحد ياخد طرفه .. لكن آني شخصيا الطريقة هادي مانحبدهاش هلبة لأن التورتات كلها تتلبز ويفضل منها لكنها ملبزة وما تقدريش تستفيدي منها والناس اللي مايقدرش يكملها مايقدرش يروح بيها فنفضل في الحالة هادي لو ان الوحدة بتدير تورتة ادير تورتات صغيرات يعني بحجم الباصطي الصغير اللي يبيعوا فيه لكنها تكون مزينة كأنها تورته من كل الجوانب وآني نعرف وحدة ادير فيها روعة وكل واحد يقدر يروح بالتورتة امتاعه لأنها تكون في كويتيات ... وآني الفكرة هادي درتها في عرسي وهلبة عجبتهم والتورته اللي ادير فيها بنتها رووعة... او تقدري اديري كويتيات وفيهم انواع مختلفة من الحلويات يعني حويجة مالحة وحويجة لوز وحويجة شكلاطة وتزيدي معاهم حويجة رابعة او خمسة حاجات ... او تقدري اديري من الأول على كل طاولة مترد يكون ملفوف من الأول على الطاولة وفيه 6 او 8 طروف من كل نوع ... ومع الشاهي يفتحوا المترد وكل واحد ياخد اللي يعجبه حتى الفكرة هادي حلوة ومش مكلفة يعني ماتحتاجش انك تصرفي على الكويتيات .. باهي وبعدين انجوا للعشي ... وهنايا زي ما انتي تحبي في اللي قاعد مايقتنعش الا بالحاجة الزمنية وحاجات قبل يعني مايقتنعش بالحاجات الغرييبة والجديدة ويحب ديما الصونية تكون عبارة عن " امبطنة ، وبوريكة ، وضولمة ، ورز خلوط او شعيرية ويدير معاها سلاطة مشوية وسلاطة ثانية اي نوع وضيف سكالوبة " وفي اللي يحب الحاجات الجدية اللي هيا حدثي ولا حرج اشكال وانواع وفي اللي حلو وفي اللي لا وفي اللي يخلط المبطنة والبوريكة ويدير معاها حاجات ثانية ....
او في فكرة ثانية حتى هيا حلوة .. .في اللي ايدير حاجة غليظة رشيتة كسكاس ومعاها امبطنة وبوريكة وكل واحد وصوينيته مسقية بروحها .. ومعاها صوينيتين مسير على كل طاولة .. هادي مرة حضرتها في اسبوع وعجبتني هلبا خواتي كانوا بيديروها غير ماصارش بعدين ...

وبعدين وهما مروحين ياخدوا البكلاوة و البونبونييري او الكنفيتي ... والبكلاوة يا اما تكون في كوتيها يا اما تكون في متيرد وفي جنبها كلينكس بتطبيقة حلوة وغريبة ... وهذا هوا ياحنة اللي تفكرته وكاني تفكرت حاجة ثانية نكتبهالك ....







وفي الأخير عندي لفتة بسيطة لازم نكتبها .... طبعا هذا اللي كتبته اللي متعارف عليه كويس ... وكويس ان الواحد يكون يبي السترة ويبي الحاجة الباهية .... لكن في نفس الوقت نتمنى ان نحاولوا ان انقصوا من الإسراف شوية حتى ولو كان الواحد مستزيد وعنده .... يعني الواحد يحاول يدير الحاجة اللي تفرحه واللي تستره لكن بالمعقول وبما يرضي الله ... لكن بصراحة التشقليع هلبة والصرف على حاجات تستاهل وما تستاهلش مش ضروري منه ... وصح صعب الواحد كيف يوصل في المناسبة يلقى روحه يدير ويدير وبيدير زي الناس .. لكن نتمنى ومن كل قلبي ان نبدوا بالشوية بالشوية نغيروا في العادات اللي فيها صرف هلبة ويصرف بما يرضي الله .... وان شااء الله ربي يقدرنا ان نفرحوا بنعمته علينا من غير مانغضبوه .... ياااارب ونحاولوا على قدر مانقدروا مانديروش معاصي في المناسبة ... وآني نقول الكلاك هذا لأني نتمنى ان نبدوا نحاولوا انديروا المعقول ... وربي يسترنا ديما بستره ويرزقنا ونعرفوا قدر نعمته علينا ياااارب



وفي النهاية ياساليتوا ياااارب ربي ينوضك بالسملامة وتنوضي لا سو لا سوية ياااارب والبيبيات كلهم بخير ياااااارب واديري زي مافي خاطرك ... وربي يكون معاك ..

وماتنسيش تدعيلي ..