سيدات ليبيا الحبيبات ..تفضلووو

[هدية الخالق]

وينكم اختفيتوا فجأة
هيا بالسليمة اني منوض نصلي الضهر ومنفكر شن مندير حاجة بيضاء غدي لانه راحلي بيرفع منها لصاحبه اردني كيف جاي قالي ديريلنا حاجة مش حارة وحمراء هلبة فكرت في رز بلاو أو مكرونه بصلصة الدجاج والجبنة في الكوشة

[هدية الخالق]

وينكممممم
فرحت سوما رقدت سلامتها ومنوض نحوس علي روحي امشي خشيت عليها في الدار منحط حاجة ناضت علي صوت الباب ولما طلعتها للصالة ولت رقدت عليا توا نضت من تحتها بالشوية وخليتها عالكنبة والمشكلة مانقدر ندير شي لانها بتنوض علي صوتي لقيتها سبلة قعمزت منرتاح شسوية ماعندي جو ندير شي
هبلة ولقت سبلة
طلعت دجاج دوبته في الميكرويف لانه بياخد وقت باش يدوب بروحه ومندير مكرونة بالدجاج في الكوشة وعندي عجينة بيتزا وصلصة فاضلات من يوم العزومة منديرهم عشي وبس

[هدية الخالق]

رقدتوا شكلكم تصبحوا علي خير نوم العوافي

[جوهرة ليبيا]

انا قاعده ياهدهد

وقريب انموت انحس نفسي خلاااااااص

الاموره فاتحه عيونها وتبيني نلعبها وبس

تصدقوا !!!!


طيبت غداي !!!!!!!!!!!!!!!!!!!!!!!!!!!!!!

توا بس طفيت عليه

درت رز وبازيليا

وعجنت بيتزا وطيبتها اول حاجه بردت وحطيتها في الفريز باش انسخن تطلع طازه

قلت نرقد براحتي

حوشي مرتب

وغداي نطمن عليه

انوض مش جري في جري

صح


هذا لو رقدت العسل

[dr.loly]

المشاركة الأصلية كتبت بواسطة جوهرة ليبيا

انا قاعده ياهدهد

وقريب انموت انحس نفسي خلاااااااص

الاموره فاتحه عيونها وتبيني نلعبها وبس

تصدقوا !!!!


طيبت غداي !!!!!!!!!!!!!!!!!!!!!!!!!!!!!!

توا بس طفيت عليه

درت رز وبازيليا

وعجنت بيتزا وطيبتها اول حاجه بردت وحطيتها في الفريز باش انسخن تطلع طازه

قلت نرقد براحتي

حوشي مرتب

وغداي نطمن عليه

انوض مش جري في جري

صح


هذا لو رقدت العسل

صباحو جيجي

احسن مادرتي استغليتي الوقت
دام بنوتك ساكته احسن شئ طيبتي غداكم

حتي نا نايضه من ال 5 أرق

نفكر ف مرواحه قبل رمضان وحوسة الشحن
وقصه ان شاء الله ربي يسهل الامور بعد
نوصلوا طيبين ان شاء الله

وبالنسبه للتسنين ف ناس تسنن بدري وتمشي

شفت بنت سلفتي عمرها 10 شهور ومشت ماشاء الله
ووقتها عندها 6 سنون ماشاء الله

توا لولي سنة وشهرين ومازلت ما مشتش اهئ اهئ

قت بالك عشان ترضع طبيعي بس

لان خوها مشي ع سنة

[جوهرة ليبيا]

ماعنديش قدره عالكتيبه والتعليق

سلام وخياتي

[dr.loly]

ماشاء الله ربي يحفظه له ويتربي ف عزها ان شاء الله رغوووده
والحمدلله ع سلامتها هي تجيب بالعمليه قالت

والموضوع هذا كان مخوفها يمكن هذا ليش أجلت سفرتها لبريطانيا

لان تأشيرة عويلتها طلعت 6 شهور

بالله سلميلي عليها سوسو تعبتك بتوصيل السلامات صح؟ هههه


وعقبال مانفرحوا بسلامة وجياب حواملنا

فيفي وشمووسه وجنوده

وكل متمني ياااارب


وان شاء الله ب نسمعوا خبر حملك عن قريب سوسو
يارب قولي امييين

[هدية الخالق]

السلام عليكم ورحمة الله وبركاته
كيف حالكم اليوم يا حلوات

[هدية الخالق]

فروسة ياغالية مشكورة عالرد بارك الله فيك مش غريب عليك حب الإفادة ان شاء الله في ميزان حسناتك
وصحيتي عالمعلومات بخصوص موضوع صاحبتي فعلا قالولها زي ماقلتي بالزبط وقاتلي قالولها انهم بيدخلولها جهاز ابصر شن بيديرولها شكله هذا هوا بيديرولها ربط غير هيا مافهمتش
وبالنسبة لردك علي دورتي لا حبيبتي والله مازعلت منك بالعكس درتها بضحكة قلت طالما أجمعتوا الثلاثة انتي وصاحبتي وراجلي معناها فيها إن ههههههه قصدي شككتوني في روحي لانه الواحد لما الحاجة تكون ليه مايحسش وينسى لكن لما حد متابع معاك الحدث يذكرك إنه هذا طبيعي وصايرلك قبل ومعاكم حق اني صارتلي كذا مرة لكن المرة هادي طولت اليوم ليها اسبوع ماجتش عمري ماصارلي هكي إلا في حملي الاول تصوري كنت جديدة عالوضع وغبية حشاك ههههههه غايبة عليا الدورة ومش مهتمتلها ماجاش في بالي انه حمل حتي نهدرز مع حماتي. قلتلها راجلي ينوض فيا بالثلج في الفجر وهيا تفكيرها مشي لبعيد طول شكت فيا حامل لانه موعد دورتي نفس موعد دورتها ووقتها كانت عليها الدورة واني قاعدة نصلي فاستغربت لكن ماقاتليش طول
وكلمت اختي الكبيرة وتقولي شن اخبارك قتلها بحسن نية باهي هالدورة رقتهلي ماجتش قاعدة طول قاتلي باهي هذا خبر حلو نقولوا مبرووووووك وقتها هذا وين صحيت وبدي الفار يلعب في عبي وشكيت هههههه حتي وقتها راسي صداع رهيب راجلي قالي وقفي الحبوب اللي تاخدي فيهم لراسك لين نتأكدوا ومشينا للسوق جبنا اختبار الحمل لكن ماقدرتش نديره خايفة ومتوترة هههههه قعد ملوح والصبح مشيت للمستشفي دارولي تحليل هما وخبروني ههههه حكيتلك قصة حياتي ااااسفة
المهم المرة هادي طولت هلبة بالاضافة انه عندي اعراض كسل وراسي صداااااع اليوم الفجر لما نطبس نسجد قريب نعيط نحس في حاجة بطيح من راسي وتوا لما نضت ندير في الفطور لراجلي نشم في التوست في الماكينةأخيييييي حشا النعمة وان شاء الله خير بديت خااااايفة حسيبت انه الموضوع جد اكثر حاجة خايفة من الوحم وبنيتي كيف يصير فيها وخايفة من المرواحة واني حامل صعب بصراااااحة حمل وترزين وطيارة عشر ساعات متواصلة عالكرسي ربي يسهل ويكتبلي اللي فيه الخير
وبالنسبة لكلامك علي قلة الاتصال والتطنيش كلامك صح مية في المية في النهاية احني بشر مش انبياء باش نتحملوا ونقابلوا الاساءة بالحسنة ساد واحد لازم يدير قيمة لروحه باش يحترموه ويدوروه ويحسبوله الف حساب اني كان مندور المواقف ومنحاسب عليهم معادش نكلمهم بكل اولها لما ما عزونيش في جدي وبعدها لما سمعت بوفاة خوي الله يرحمه تصوري لما كلمتني عزوزتي شن قالت ؟؟؟؟؟
بدل ماتعزيني وتهديني قاتلي اسمعي راهو احني مادخلناش اهلك هما اللي قالولنا ماتخبروش ودسوا عليك!!!!!!!!
توا وقته الكلام هذا مع العلم انه شيبانيه مشارك مشاركة كبيرة في دس الخبر تصوري يوم الدفينة وبوي حالته حاله جاه شيبانيه بكل بساطة وقاله ماتخبروهاش تو تقول منروح وتفسد عالولد يروح ويسيب قرايته هذا ماهمه وقتها قراية ولده وجاي لبوي في وقت حساس يزيد عليه بوي قاله اني نفهم مش حنقوللها لانها مراة حامل ومش حمل خبر زي هذا وطبعا وقتها اهلي مازال مايعلموش انه بوي بيدس الموضوع امشي اتصلت بيا اختي بتخبرني لكن كنت راقدة مارديتش واتصلت براجلي خبراته ولما سمع شيبانيه انهم خبروا راجلي جي لبوي بكل صحة وجه في العزي وقعد يقوله وين الكلمة اللي عطيتهلي هكي خبرتوا الولد ورعشتوه وعزوزتي الكريمة تلود وتهدرز في العزي للخاص والعام تقوللهم يرعشوا في ولدي ويخبروا فيه ليش ؟
شوفي قلة الذوق في عزي وفي وقت حرج واهل المتوفي مايعلم بحالهم الا ربي وهما دايرين هالحالة وكل اللي هامهم من الموضوع انه ولدهم رعش وماهمتهمش المسكينة اللي ملوحة تتوحم وزي الاطرش في الزفة ولا همهم البو والأم اللي والعة فيهم النار ومش محتاجين في هالوقت الا المواساة والطبطبة لكن شن بتقولي ربي يسامحهم الموت هذا حق علي الجميع وكل حد حيذوقه فلهذا ليش الواحد مايحسش بغيره والا اللي ايده في المية مش زي الي ايده في النار
المهم حبيت نحكيلك هذا كله باش نوضحلك إني بعد ماشفت هالمواقف مفروض كانه وحدة ثانية تقطع صلتها بيهم نهائي وماحد يلومها لكن اني اصلي طيب ونسامح لكن ماننساش يقعد الموقف جارحني وواجعني منهم لكن مايأثرش علي تعاملي معاهم والله لما يكملم فيهم راجلي عالسكايب يقولي تعالي كلميهم نجي ونتكملم وننشد عليهم ونضحك لكن اللي في القلب ماعالم بيه الا ربي وهما حقهم عليا نحترهم ونعاملهم بما يرضي الله ونوقف معاهم في افراحهم واحزانهم كلا باش نحبهم زي بوي وامي هادي صعبة كل واحد ومكانته والبو والام مايجي في مكانتهم حد ولا يتساوي معاهم حد في الغلا
وكلا حماتي هادي مش فرض عليا نسايرها زي مانساير بوها وامها لانهم شيابين واحترامهم فرض عليا حتيب لو كانوا مايمتوليش بصلة فمابالك والدين زوجي نحترمهم علي هالاساس عالاقل اما هيا فقررت نجبد روحي عليا شوية ونشوف قدري عندها يعني لو نوقف معاش نتصل هل حدورني وتنشد علي بنتي والا لا وهيا تكلم في خوها لما يتصل براجلها يعني من الاخير خلاص بالنسبة ليها مكالمة خوها تكفي وتوفي الباقي مش ملزومة بيهم
سامحيني طولت عليك فرصة ولقيتها باش نفضفض وربي يسامحني ان شاء الله والله ماقصدي من هالدوة الا الفضفضة لا اكثر

[هدية الخالق]

تعرفوا سلفتي علي مواقف بسيطة شافتهم من العيلة قطعت علاقتها بيهم مايشوفوش فيها بالشهور وولدها شوفتهم فيه
كان شافوه مرة فيب الاسبوع مازيهم حد وحتي لما تمشي للعمل كل صبح ترفع في ولدها لامها وماتحطش فيه عندهم هذا وماشافت منهم الا مواقف بسيبطة وعادية تصير بين الكنة والعيلة امالا كان شافت منهم نفس المواقف اللي شفتها كيف دارت
لكن اني الحمد لله مش هكي طبعي ومستحيل ندير اللي داراته ولا نحرمهم من حفيدهم ولا ننقطع عليهم بالشهور لدرجة يصيرولهم مناسبات ومانعلم بشي واني فوق منهم ربي ماقال بيه هذا كله في النهاية الواحد يتعامل بأصله ويحط اهله ديما في مكان اهل الزوج واللي مايرضاشي لاهله مفروض مايرضاشي لاهل زوجه
والله هي طيبة وكويسة تنشد وتهدرز لكن عيبها ماتسامحش كان حد غلط فيها هيا قالتها بروحها قالت اني طيبة وكويسة لكن لما حد يديرلي موقف ويغلط فيا مانعرفش نساير ونسامح نجبد روحي عليه نهائي ومعاش يهمني
فلهذا اني الحق نحمد في ربي إني عندي طبع التسامح ومانظهرش للشخص ٱني متحاملة عليه أو مضايقة منا بالعكس لما نتلاقى معاه نصفي نيتي ونهدرز ونضحك حتي لو واجعتني منا ومش نفاق أو حاجة لا نوع من المسايرة علي عيون شخص ما فقط