دردشة بنات ليبيا , دردشة حوامل ليبيا , تجمع بنات ليبيا

[اوشي]

المشاركة الأصلية كتبت بواسطة أم أجنادين 80

هلا جوهرة
شن غداك اليوم
انا اليوم حملة تنظيف تكملة ليوم السبت
السبت حولت الجلسات والصالون وكنست تحتهم ونظفت التراب من الرواشن
وتسيق البلكونات واليوم المطبخ وطبعا ماانتوبش الوركينة ضروري منها بس المرة هذه بالقفازات
مزالي تلميع الأثاث بس
معادش عندي نية انديرهم اليوم ممكن غدوة ؟؟؟

لا قوة الا بالله ربي يعطيك الصحة

المشاركة الأصلية كتبت بواسطة *ام فراس*

عدنا,,,
والله يسلمكم حبيباتي شموووسه وام اجنادين,,, والحمدلله عدت فترة النفاس,,, وانا ماططلعتش ياام اجنادين الا ف بيان بنت صبيتي وفي اخر ايام النفاس....وحتي نا نفسك مانحبش انسيب زوجي بكل ,,لكن الله غالب ظروف يحكمن,, كان زارد وبعدها عدا يوم لطرابلس عبا الابليكشن ف طرابلس مباشر ع النت بالشركه مع جماعة بريطانيا وبعد روح خداني,,

شموووسه حنان العريبي كنت مقتنعه بها هي بس قبل فرحي لدرجة قلت كان ماحصلنهاش مانبش فرقه ماما كانت تبي ناديه ستار والا النجاح ,,,بس اقتنعت فيها ف الفرح ,,الخق دارتلي ليلة سمحه والرقص ماوقفش بكل رغم اني جايبة مصورة فيديو لاكن واجد رقصن عالمسرح والباقي تحت,, وهي بروحها رقصت ودارت جو بس اغلب اغانيها ع الثورة والثوار وشفشوفه وهله خخخخخخخخخخخ فرحي ف شهر6 2011,,, وجبناها ب 750دينار
وتوا ماما وخواتي حضرن فررح ولد جيرانا قالو سليمة الفاخري رايحه جوها سمح وماما تقريبآ بتحجزها وقالت ب850


اوشي ياسمحه مافهمتش طريقه عصبانك م الاخير خخخخخخخخخخخخخ,,,, جيبي سبورة وتباشير واشرحي



جوهرة ليبيــآ ,,,ماشاء الله عليك وربي يحفظكـ ويخليلك رنوده حتي نا زيك بديت نتعلق ببنتي واجد بس ازغيرونه دوبها امربعنه

هلا ياعيني .. هو العصبان عادي بس طريقة التطيب مع الطبيخة او الراس

هذا ياطويلة العمر قبل ما نبدا في تقريض العصبان نمشي نا خذ الكرشة ونغسله كويس كويس

بعدين انتقلي لها ببصلة عادي وانخليها تتشرب طعمة البصلة كويس لين تتحمر بعدين نكون موتية

طماطم مبشور وشوية طماطم حكة المعجون ونحطه عالكرشة ونقلبه اشوية لين يذبل الطماطم

بعدها نبهر ونملح اشوي ما نكثرش لان العصبان فيه ملح ونوطي عليها

ونمشي نقرض العصبان ونحشيه بعد ما نكمله نكون موتية حبات بطاطا ومقصصتهم

وناخذهم ونمشي شور طنجرة الكرشه نحط البطاطا فوق الكرشة بعدها نحط العصبان فوقهن

ونشوف المية اهم حاجة ما نكثرهاش ونبقى كل اشوي انطل عالمية لا نخليها تنزح ولا واجد

نفس الطريقة مع الراس بعد ما تغسليه تبهريه وتتبليه وتحطيه في الطنجرة بعدها اتحطي فوق

منه العصبان وطيبيه وشوفي الطعمة واللذاذة وجربيهم وادعيلي ..

صدقيني طريقة مختصرة ولذيذة ونادرة وصحة وهنا

المشاركة الأصلية كتبت بواسطة جوهرة ليبيا

السلام عليكم

بنات شنو غداكم اليوم محتارة شن انطيب
عندي اكثر من نوع من الحوت لكن مش طايقة ريحتة
وخصوصا ان المطبخ امتاعي بار يعني الحوش حاااالة ساعتين تنضيف وتبخير ويالله الريحة تمشي من الحوش


بنات شنو معني صبيتي والله مافهمتها هههه؟؟؟

هلا بالجوهرة .. انا غداي اليوم فاصوليا علي دجاج مع خبزة ومصير وسلاطة

بالنسبة للحوت انا انتبل فيه قبل بوقت وبعدين ناخذه للحاجر ونجيب غاز البريمس الصغير

وزيت زيتون وطاجين رقيق زي الطاوة يعني ونسخنة بكل بعدها انحط نقاط زيت لين يدخن

ونحط الحوت ونقلب وكل ما احتاج الامر انحط نقطة زيت وبعد ما انكمل مجموعة انكون امجهزة

ورق الالومنيوم ونحط فيه الحويتات ونبدا بالمجموعة الثانية

وهكي تكوني تخلصتي من رائحة الحوت وتحصلتي على حوت مشوي

وطبعا هذا كله انديره بعد ما نكون كملت الاطباق اللي بيتقدمن مع الحوت والحوت انطيبه

اخر شي لانه ما يحيرش سريع في التطييب

________________________________

بالنسبة لكلمة صبيتي تقال لاخت الزوج

[dr.loly]

صبيتي معناها ... اخت زوجي

[اوشي]

ام فروسي شن اخبارك قاعدة والا طلعتي

[اوشي]

شموسة وينك .. هونيها اتهون ولا تزعلي ولا على بالك راه الدنيا ما تسوى شي

وكل ما تتضايقي اقري سورة يوسف راها زي البلسم عالروح

[شموسه 88]

المشاركة الأصلية كتبت بواسطة اوشي

شموسة وينك .. هونيها اتهون ولا تزعلي ولا على بالك راه الدنيا ما تسوى شي

وكل ما تتضايقي اقري سورة يوسف راها زي البلسم عالروح

الحمد لله ربي العالمين مابعد الضيق الا الفرج

[اوشي]

شكلكم عديتي ام فراس بوسينا لولي

[شموسه 88]

السلام عليكم ورحمة الله وبركاته

[شموسه 88]

اوشي ام فروسي جيجي اوسوسو او جنود ام نوزه او اثري "وينك يا لللا" ام معاد او دلوعه اوام وسونه كيف حالكن او لكن وحشه

[شموسه 88]

ام فروسي انستينا او مبروك البدله اتبيديها بلهنا من وين خذيتها او شن جو البضاعه والفساتين السهر علاشان الواحد ياخذ فكره

[شموسه 88]

انا زوجي متغدي بره درت مكرونه بشاميل "اصلا هو مايحبهاش حرامنا منها" جت اتهبل مش عاديه وانا معندش امعاها روح درت 6 صواني قزير كلينا واحد واحد انا او شموسه والباقي دسيتهن في الفريز شكلا الرجيم بيبي يخرب ههههههههههههه