تجمع حوامل المدينة المنورة

ملكة المشاعر · 04-14-2010, 07:04 AM

كيفكم كروشات ؟

الهام كلام روز صح اشربي خروع مع عصير البرتقال وامشي والله انا شربتو ايام حملي وافتكر شربتو وتاني يوم رحت المستشفى
ربنا يقومك بي السلامه

روز روحي توب تاتو عندو فساتين تنفع لي الحمل لانها وسيعه انا صح المحل مايعجني بس ايام العيد كنت مضره اخد منو

ملكة المشاعر · 04-14-2010, 07:37 AM

ممكن استفسر من الي عندها خبره

انا توي مخلصه الاربعين وبعد ماخلصت الاربعين بسبوع رجع نزل عليا دم الله يكرمكم متى ابداء استخدم حبوب منع الحمل وايش افضل نوع في حبوب منع الحمل

الاموره رغد · 04-14-2010, 12:55 PM

الله يبارك فيكم انشاءالله والله يسهل لكم كلكم يا كروشات
الي سئلت عن الحضانه والاسعار الحضانه يحافظو مره على الطفل وحضانتهم نظيفه وغرفهم بعد نظيفه والممرضات مره حبوبات وبشوشات يريحونك نفسيا والاسعار الولاده الطبيعي اذا بدون تامين 2500 واذا معك تامين 3000 بس بصراااحه لو باولد مره ثانيه بعد عمر انشاءالله راح اولد بالمواساة واحلى مافييهم لما يطلع البيبي ينومونك على طول يعني ماتحسي بالخياطه والتنظيف

الاموره رغد · 04-14-2010, 12:56 PM

مدام الهام الله يسهلك ياقلبي ويسهل لكل البنات

دلع · 04-14-2010, 03:20 PM

اهلين صبايا

الهام
انشالله تولدي بدون طلق صناعي والله مااتمناه لـ اي بنت لاني جربته وعرفت يعني ايش سكرات الموت..
الله يقومك بالسلامه انتي والبنوته..

رغوده
حمدلله على سلامتك وطبعا زي ماقلتي الولاده تسهيل من الله والله انا من ساعة ماادري اني حامل ادعي الله انو يسهل علي الطلق والولاده..
عندي سؤال..
يعني فـ المواساه تحسي بخروج راس البيبي ولا يخدرونك قبل مايطلع الله يسعدك ردي علي..

توتي فروتي · 04-15-2010, 12:06 AM

مرحبا انا متابعة التجمع من فترة طويلة بس مع الحمل وتعب الحمل كنت ادخل واتصفح واستمتع بصحبتكم والله من دون مشاركة واقول في نفسي ان شاء الله لمن اولد ادخل عشان افيد البنات بتجربتي... والحمدلله ولدت يوم الاربعاء في 8/4 في مستشفى المواساة . بصراحة انا ولدت اول مرة في المطبقاني وكانت تجربة سيئة وبعد كدة ولاداتي كلها في المواساة على يد الدكتورة منال . وكنت اظنها احسن دكتورة وفي حملي الاخير كنت مسوية متابعة عندها ب1200 بس مررة ندمت من الزحمة والانتظار وبصراحة كانت مررة عصبية فحسيت اني كرهتها وزوجي كان يقولي مولازم تدخلي عندها خلاص تابعي عند اي دكتورة في نفس المستشفى فدخلت 3 مرات عند الدكتورة ايمان وكانت المتابعة عندها زي منال روتين عادي ..
ولمن دخلت التاسع كنت مترددة اولد زي دايما في المواساة عند منال او في الاحمدي عند الدكتورة فوزية .. وكنت استخير الله طول الوقت واطلب من الله يسخرلي احسن مستشفى واحسن دكتورة مين ماكانت .. المهم يوم الثلاثاء الساعة 8 نزل علي دم لونة بني الله يكرمكم وكنت حسب اخر تصويرفي التاسع( عند مستوصف البيان والدكتورة نهاد رأفت)( قصة ثانية احكيلكم هي بعدين) انا خلصت 38 اسبوع وحسب تصوير المواساة 37 اسبوع .. المهم رحت مستشفى المواساة عشان اشوف الرحم مفتوح كم سانتي لاني معايا المغص اللي يجيني كل يوم من يوم مادخلت التاسع وكان الالم محتمل بس كنت مييييتة من الخوف ...
المهم ودخلت عند الدكتورة هالة وعمري ماشفتها بصراحة وما اعرف عنها اي شي بالنسبة للولادة وكشفت وقالتلي 3سم والراس فوق وطلبت تخطيط وبعدها تقرر اذا كان ولادة وتنويم اولا . وسويت التخطيط وكان فيه طلق بس مو منتظم . ومع كدة كتبتلي تنويم وطلعت في الغرفة وكانت عادية وصغيرة وطلبنا جناح بزيادة 600 ريال . وكانت الساعة1 ليلا وجلست في الغرفة وسولي تحليل دم وركبولي محلول وحطتلي السستر ابرة سألتها ابرة ايش؟ قالتلي ابرة ضد التطريش وكل شوية تجي سستر وتسمع ضربات قلب الجنين بسماعة صغيرة زي حقت الدكتورة في العيادات بس ماشفت الدكتورة هالة الين الساعة5 صباحا... تخيلو لمن شفتها كدة باردة قلت لزوجي اطلبلي الدكتورة منال يمكن لو كانت موجودة كان ولدتني من زمان قالي من يوم مادخلتي الغرفة وانا طلبت استدعاء الدكتورة منال بس قالو مافي نظام الاستدعاء الا في الحالات الخطيرة والعمليات وبس للاستشاريين خلاص فوضي امرك لله
وجلست ادعي وجات فجأة هالة وقالت كشف من تحت يا الله شفت الموت وربي كشفت بقوووة وقالت بكل بروود لسة 3سانتي والراس فوق امشي ! تخيلو الاحباط اللي جاني والخوف اللي سيطر عليا ومعايا امي المسكينة تصبرني وانا بيزيد عليا الالم صرت امشي في الغرفة وانا دايخة وبعدين انتهى دوام هالة وجاتني الدكتورة ايمان وطلبت تكشف من تحت وشفت الموت مرةتانية وصرت اصرخ من شدة الالم لانها الظاهر كانت بتوسع مدري تحرض مو بس تقيس خصوصا انها قالتلي برضو الراس فوق و3 سم والطلق بيقطعني خفت اتعذب الين7و8سم وفي النهاية يقولوا قيصرية عشان الراس فوق وصرت اترجى الدكتورة ابغى عملية قيصرية وكانت الساعة 6 صباحا وقالتلتلي اعطيكي ابرة مسكنة وطلبت اني امشي واعطوني الابرة بس تهدي لكن ماتسكن الم الطلق ابدا وصرت اترجى زوجي يوافق على العملية وهو والدكتورة رافضين يقولوا مافي داعي وانا عصبت مررة وحسيت ان مالي الا الدعاء واللجوء الى الله يفرج كربتي ولما جات الساعة 8 الصبح جات الدكتورة وكشفت وفتحت موية الراس وانا لسة في الغرفة
و الساعة11ونص جات السستر تكشف وقالت 3ونص ! هنا انا انهرت تماما معقولة بعد فتح الموية ومروركم ساعة لسة 3سم ؟ وصرت استغفر واستغفر وجات الدكتورة بسرعة وكشفت بنفسها وقلتلها لا ارجوكي دوبها السستر كشفت وقالت لسة 3 قالت لا يد عن يد بتفرق! وكشفت وقالت سم 4 يالله نوديكي غرفة الولادة ونعطيكي كمامة ورحت الغرفة مشي عشان اساعد في نزول الراس وبعدين دخلت امي معايا وكانو في قابلتين حنونتين واعطوني الكمامة الشفافة وصرت استنشق وما احس انها تسوي شي لاني احس بالطلق بس مااحس بالوقت المهم بعدين صار الطلق اقوى والقابلة قاست قالت 8سم وانا اصرخ داخل الكمامة غصبن عني وشوية قالت السستر اذا تبغي تدفي دفي ودفعت وحسيت ان الراس بدأت تقرب وصرخت وقلت ابغى الدكتورة وكانت في الغرفة الثانية توها خلصت من توليد حرمة ثانية وجات بسرعة ولبسوني شراب طويل الين الفخد ساااتر وكنت ادفع وهي تشجعني وحسيت بالراس تخرج وبعدين مادريت عن نفسي الاوانا في غرفتي منتهية بفضل الله تعالى وجبت احلى مولود بعد معاناة 12 ساعة في المستشفى كأني بكرية
ملاحظاتي : 1/ الدكتورة هالة بااردة واستعجلت لمن كتبتلي تنويم وانا لسة3 سم والراس لسة فوق المفروض اروح البيت وامشي الين يحمى الطلق
2/الدكتورة ايمان احسن من الدكتورة منال ساعة الولادة خصوصا انها تبنج بعد طلوع الراس فورا اما مع منال كنت ااواصل الدفع حتى خروج الجنين كله طبعا زي كل الولادات وبعد كدة تبنجك
3/ خياطة ايمان احسن وتجميلية وغير مشدودة بس ما ادري كيف بعد الاربعين
اما منال كانت مشدودة وتوسع كثيربس نتيجتها حلوة بعد الاربعين
4/ المستشفى رائع من ناحية النظافة والممرضات والعناية قبل وبعد الولادة
اتمنى اني افدتكم بتجربتي واسفة على الاطالة و ادعوا الله ان يسهل على كل الحوامل

Ro0o0o0z · 04-15-2010, 01:58 AM

يا حبيبتي والله انك قطعتي قلبي عانيتي الله يكتبلك الاجر انشاء الله والحمدلله على سلامتك وسلامت البيبي
شكل هاله هاادي ما تخااف الله الكل يشتكي منها الله ينتقم منها بااارده وماهمها شي الله يدوقها المر ما تصبر وتكتب على طول تنويم وتبهدل الواحده حسبي الله عليها
انا افكر انشاء الله في الاحمدي عند فوزيه رغم انو اول مره راح اولاد في خاااص والله يسهل للجميع يارب
والحمدلله على سلامتك حبيبتي وسلامة النون

نسمة بحر · 04-15-2010, 03:26 AM

الف مبروك يتوتي بس والله بجد خوفت وجلست افكر لو طحيت بيدها وانا اصلان خوافا

ملكة المشاعر · 04-15-2010, 04:51 AM

الف مبررررروك ياتوتي

يتربا بعزكم والحمدالله على سلامتك وسلامة البيبي

ام عبودي 615 · 04-15-2010, 12:49 PM

الحمدلله على السلامه ...اه ياقلبي خوفتيني الله يعين ...الخياطه انتي طلبتي تجميلي اوهم يسوونها ..
قبل 5سنوات جربت الولاده في المواساه حلوه واهتمام وماتحسين بالتنظيف والخياطه تصحين وانتي بغرفتك