في الشهور الأخيرة وأعاني الاكتئاب

[عود مياس]

صباح/ مساء الخير جميعا

هذا أول موضوع لي في المنتدى

أنا بكرة بدخل الشهر الثامن وهذا أول حمل لي
في الفترة الأخيرة أو من بداية حملي بدأت أعاني من ضغوط نفسية متعددة
أم زوجي مريضة بالمرض الخبيث بعيد الشر عن الجميع
وبنت خالتي اللي تربيت معاها وبحسبة أختي مرضت بنفس المرض
من ثلاث أسابيع تقريبا بنت خالتي وصلت لمرحلة أخيرة من المرض
ودخلت المستشفى
ومن أسبوع توفت الله يرحمها
الحمدلله على كل حال
في نفس الفترة زوجي كان مسافر بعيد بس رجع من أربع أيام
وانا نفسيتي كانت تعبانة وما كنت أكلم أحد لأني بطبعي كتومة
حتى زوجي لما أكلمه ما كنت أبين له إني متضايقة
بس كنت أقعد في بيتي أبكي وأحاول كثر ما أقدر إني أطلع أغير جو بس بدون فايدة
كنت انتظر زوجي يرجع عشان يكون لي دعم ويوقف جنبي ويهون علي
المشكلة إن زوجي بعد ما رجع وشافني على هالحال تضايق
مو لأني متضايقة لا أحس إنه مل مني ومن النكد اللي أنا فيه
مع إني اطلع معاه وأحاول إني أمزح وأضحك ولا أنكد عليه كثر ما أقدر
بس لما نرجع البيت أحس إني متضايقة وايد ولما يسألني شنو في أبتدي أبكي
صار الحين يعصب لما يشوفني على هالحال
وما قمت أحس إنه واقف معاي في الظرف المؤقت اللي أنا أمر فيه
آخر مرة قلت له معليش تحملني ترى ما راح أبقى طول العمر على هالحال
كلها كم يوم
عصب وقال بعد في كم يوم!!!
كلامه وتصرفاته خوفتني
المفروض يوقف معاي لو مهما كان
مو يتضايق ويمل من ظرف بسيط وهو ما صار له أكثر من 4 أيام من رجع
تصرفاته صارت تزيد التعب اللي أنا فيه
وأحس إنه صدمني
هذا غير تعب الحمل والألم
أنا الحين أخاف كل هذا الشي يأثر على البيبي
والله خايفة موت بنتي يصير لها شي من الضغط
مالي غير رب العالمين
أهون على نفسي بالقرآن والاستغفار
وكلي ثقة برب العالمين والحمدلله على كل حال
وسؤالي هو هل الهرمونات أو أي شي ثاني له علاقة بنفسية الحامل ؟؟
هل طبيعي تصاب الحامل في الشهور الأخير بالأكتئاب؟؟؟
أنا سمعت الاكتئاب يجي بعد الولادة!!
تنصحوني أخبر الدكتورة يمكن في أدوية أو أي شي يساعدني؟؟

بليز نصايحكم ودعمكم

[اميرة الربيع]

الله يتمم لك حملك ياعمري ويسهل ولادتك ومن ناحية الاكتئاب انا جاني من الشهر الخامس ويشتد ايام ويخف ايام ومعاي الى الحين لي اربع شهور من ولدت بس تطمني ياقلبي بعضهم يجيهم في الحمل ومايجيهم بعد الولادة وان شاء تكوني منهم وبعضهم يجيهم مثلي وانصحك ماتنفسي وحدك علشان مايجيك بعد الولادة وماانصحك باي دواء وانتي حامل وموفقة

[**سماسم**]

في البدايه عظم الله أجرج بوفاة بنت خالتج وربي يرحمها رحمة واسعه ويرزقها جنات النعيم
ويشفي أم زوجج شفاء لايغادر سقمى ..
يالغاليه لاتكوني كتومه وتكتمين همج بقلبج فضفضي وإذا ماتبين حد يعرف شنو إلي مكدرج أكتبيه بورقه وفضفضي فيها وكتبي كل إلي بداخلج وعقب أحرقيها بكذا بترتاحين وترتاح نفسيتج ..
و أشغلي نفسج بأي شيء حاولي تغيرين جو البيت وتسافرين إلي أي مكان ..
وأكثري الإستغفار و قراءة سورة يوسف..
حاولي تشرحين لزوجج تعبج وتبينين أنه من الحمل وتعب الحمل وتشرين له المشكله بأسلوب حتى يتفهم وضعج ويساعدج ..
و إن شاء الله ماكو أي ضرر على الجنين ..
,,

[عود مياس]

مشكورين حبيباتي ما قصرتوا

أميرة الربيع
مشكورة ع النصايح
وإن شاء الله ما يجيني بعد الولادة..

سماسم
أجرنا وأجرج
آمين يا رب يشفي جميع مرضى المسلمين والعالم
صراحة كنت منتظرة زوجي يرجع عشان أفضفض وأرتاح
بس للأسف الوضع زاد سوء
من رجع ما اهتم لي ولا وقف معاي
على العكس جا أمس وقال لي خليتيني البارحة أنام متكدر
مع إني رحت له وأعتذرت له عن الحالة إللي أنا فيها
صار هو اللي متكدر مو أنا
يلله الله كريم
وأخاف أقول له من الحمل ما راح يغير شي
يقهرني لما يقول لي معيشه بنتي في أكتئاب
كأني مستقصده أجيب الهم لنفسي
الحمدلله والشكر على كل حال
طريقتج حلوة وبالفعل مجرد الكتابة هنا ريحتني شوي

أتمنى أحصل على دعم أكبر منكم...

[إيفان]

وانا كمان صايبيني اكتئاب الله المستعان