هنا تجمع لكل حاجه هذا العام 1431للهجره.

[غــــــلاهـ’’]

بسم الله الرحمن الرحيم

السلام عليكم ورحمة الله وبركاته

الحمدلله والصلاة والسلام على رسول الله وعلى آله وصحبه أجمعين

هنا سوف نتجمع ونتكلم عن الامور المهمه للحج وماهي الاساسيات التي لابد من تواجدها مع كل حاجه

..اتمنى من منحجت ان تنيرنا وتخبرنا ماذا يلزمنا في الحج..

[Mقمة البرااااائهM]

الله تجمع في طااااعة الله.....الله يسعدج.....

[غــــــلاهـ’’]

مرورك شرف لكن ماقلتي لي موحاجه هالسنه

انا سجلت بحج هذا العام دعاوتك

[مامي نور]

يارب يتقبل منك غاليتي بإذن الله

ادعيلي الله يرزقني الحج والعمرة

[sweet moon]

ماشالله تجمع مبارك

حج مبرور للجميع وسعي مشكور

انا الحمدلله حجيت السنه اللي فاتت

والزم ماعليكم تكون نفسيتكم حلوه ومتهيئه للفريضه

وهاذي نصايح بسيطه مني ممكن انها تكون عاديه

لكن لما حجيت حسيت انها مهمه

اولا .. اللي تكون عليها الدوره فتره الحج تاخذ حبوب منع الدوره

عشان تقدر تؤدي المناسك وهي مرتاحه

ثانيا : خذي معاك اغراض كفايه لك وحتى لو زادات ماعليش

ثالثا : مانصح بعبايه الراس

كثير من الحريم كانو لابسينها ووقت الطواف والجمرات تطيح عباياتهم واللي رقبتها

طالعه واللي مادرت وصدرها واضح واللي تحسين انها بتختنق بسبب ان العبايه

نازله من على راسها وتصير طويله من ورا وماغير يدعسو في عبايتها

فانصح بعبايه كتف واسعه وساده >> مجرد نصيحه

رابعا : لاتنسين تاخذين معاك شوز وقت رمي الجمرات افضل بكثير من الصنادل

والشباشب ولا تنسي عدة النظافه تبعك كامله من شاموبهات والفرش والمعقمات رغم

ان الحين صارت حملات الحج توفروها لكن للاحتياط

وكمان خذي معاكي جاكيت احتياط للبرد

لان الاجواء اخر مره كانت بالمره برد وخصوصا لما نزل المطر الدنيا مره بردت

خامسا : مانصح تاخذين معك اطفال بتاتا لان بجد بتتعبي حيل معاهم

سادسا : لاتضيعي وقتك ابد .. استغلي كل لحظه بالطاعه والعباده

ولاتنسوني من دعواتكم

والله يتقبل منكم ..

[ام ريفان]

تسلمي حبيبتي ع النصائح
والله يتقبل منا ومنكم صالح الاعمال
الله يسهلنا وان شاء الله حج مبرور وسعي مشكور

[أسيرة قلم]

الملابس :

1- جلابيات قطنية هادية الألوان - لبسة لكل يوم لأنه ما بتفضين تغسلين
2- ملابس داخلية أكثر عن عدد الأيام اللي بتقضينها في الحج و+ شورتات لتجنب الإحتكاك
3- صراويل تكون راصة عند القدم لأنه ممكن من الزحمة تتشلح لكن مش شرط تكون مخورة بامكانج تاخذين اللي فيها دانتيل خفيف
4- عبايات ساترة وتكون نفس طولج مش أطول عسب محد يدوسها وتتخرطفين بسبب الزحمة ( المسكرة كامل الإسلامية كانت الأفضل من تجربتي )
5- شيل تنلف على الراس بسهولة عسب ما تتشلح عنج والبعض يلبس قطعة مثل البونيت تحت الشيلة تمنع الشيلة من انها تزلق وفي أخوات يلبسن الخمار اللي نفس الملفع اللي يلبسنه خواتنا المصريات - وايد شفت إماراتيات لابسينه فوق عباة الكتف.
6- قمصان نوم مرتبة و عملية حق كل يوم قميص
7- لبسة حلوة للعيد
8- أحذية مصكرة تخلع بصعوبة علشان تثبت ويفضل ما تكون كعب وعملية في المشي لأنه ممكن تمشين مساااافات طويلة وبعض السعوديات يلبسن جواتي رياضة
9- شبشب للحمام
10- دلاغات ساترة ( اخذي كمية كبيرة لأنج ما بتغسلين )
11- دلاغ من النوع له قاعدة تحمي الريول من الأرضيات وقاعدته نايلون أو جلد استخدميه للطواف في الحرم
12- لبسة شتوية احتياط
13- فوط
14- شيل البيت القطن تلبس مع القمصان
15- غشوة للاحرام تكون بعيده عن الوجه عند اللبس لأنه ما يجوز تغطية الوجه
16- سكارف شتوي علشان البرد
17- لبسة مرتبة للمطار ( للروحة و الردة )

أدوات النظافة والأدوات الصحية :

1- مشط
2- فرشاة ومعجون أسنان
3- ديودرانت غير معطر ( تلقينه في الصيدلية )
4-صابونة غير معطرة
5-شامبو غير معطر
6- بخاخ ديتول ( للحمامات )
7- مناديل ديتول ( للاستخدام الشخصي والحمامات ) بعض المفتين اعتبروها معطره فكوني محتاطة عند الإحرام
8- كلنكس ( العبوات الصغيرة للشنط ) + كلنكس بوكسات ( على حسب الحملة فيه حملات تكون موفرة كل شي)
9- اكياس زرقاء صغيرة ( شرات مالت الدكان ) اشتري شدة بتنفعج للملابس الوسخة وانتي بكرامة و للطوارئ ولاحتياجات ما تخطر على بالج
10- فيتامين سي ( من تجربتي اخذي الحبوب اللي تنبلع لأنها عملية أكثر من الفوار )
11- لزقات جروح و مطهر
12- حبوب بندول
13- مقص صغير خاص فيج علشان لما تتحللين وبتقصين جزء من شعرج
14- مقص أظافر
15- كريم للحرارة والإلتهابات
16- فوط صحية للاستعمال اليومي
17- كيس بلاستيكي مرتب لأغراض الحمام وملابسج لما تروحين تسبحين ( تلاقينه في المكتبات )
18- بونيت السبوح
19- كريم الفولترين في حالة الشد العضلي
20- كمامات الأنف والوجه - نفس الدكاترة - تنفع في الأماكن المزدحمة ونفعتني بالذات في اماكن ازدحام الباصات وريحة البترول
21- دواء الكحة
22- حبوب ستريبسل او فيكس للبلاعيم
23- أغطية المراحيض-وانتن بكرامة - شرات الكلنكس تكون( يبيعونها في الصيدليات)
24- حبوب الدورة - على حسب الحاجة

حقائب و شراشف و أغراض منوعة:

1 - حقيبة صغيرة تشبه الخاصة بالجوازات يكون فيها مكان خاص بالموبيل ومخابي للبيزات والكتيبات والبطاقات ( هذي الحملة وزعتها علينا وكانت جدا مفيدة كنا كلنا في الحملة معلقينها على رقابنا طول الوقت حتى في السكن لأنه فيها الأشياء الهامة و الفلوس و الموبيل ونفعتنا أثناء أداء المناسك )
2- حقيبة ملابس صغيرة لأغراض منى ( أنا خذتلي وحدة والحملة يزاهم الله خير بعد وزعوا علينا )
3- كفر خفيف وناعم يبيعونه في كارفور + شيت ولبس مخدة ( هذا حق منى لكن الحمدلله ما احتجناه لأنه الحملة وفرت لنا ، لكن في حملات ما توفره وممكن تستبدلينه بسليبينج باج)
4- حلويات وخفايف و سناكس ( اخذي النوعيات اللي تحبينها)
5- حقيبة يد راقية للمطار
6- اوتي صغير
7 - سجادة صلاة
8- جرج الموبيل ( الشحن )

أغراض مهمة لأداء مناسك الحج :

1- كتاب يشرح أحكام الحج
2- مصحف شريف
3- كتاب الأذكار حصن المسلم
4- نوتة صغيرة وقلم
5- كيس صغير لوضع الحصى لرمي الجمرات
6- مقص صغير علشان لما تتحللين وتقصين من شعرج



وأخيرا ارجو ان لا تنسونا من دعائكم وانتم في تلك البقاع الطاهرة


عفوا ...
للأمانة فقط ...
الموضوع منقول من منتدى سيدات الإمارات ...

[غــــــلاهـ’’]

الله يجزاكم خير يارب ويسهل علينا الحج

ماقلتوا من اللي بتحج هالسنه وباي حمله بتروح

[غــــــلاهـ’’]

معقوله مافي حاجات هالسنه يلا ماعاد الا خير الحج قرب تعالوا نتشاور ونتكلم

احلى شي اني باخذ امي معي الحمدلله

[أسيرة قلم]

أنا أول مرة بسير الحج ... إن شاء الله ...
و الحملة من الإمارات ...
حملة الضيافة ...
و راح أكون مع عمتي _ أم زوجي _ ...
نشوفكم هناك ... إن شاء الله ...
وين الحجاج ؟
ولا محد بيسير الحج