قصة ولادتي....أجمل لحظات حياتي

[عبوورة]

بسم الله الرحمن الرحيم
السلام عليكم ورحمة الله وبركاته
كيف الحال ... يارب الكل يكون بخير
اليوم سجلت دخولي بعد غياب طال عدة ايام بسبب الولادة
حبيت اسرد لكل الحوامل قصة ولادتي .. مع العلم اني نزلت موضوع وانا حامل بحكي فيه عن خوفي من الولادة .. طبعا لاني بكرية ما كنت بعرف كيف الولادة وكنت اسمع قصص كتير عنها بس لما جربتها بنفسي عرفت انه ربنا ارحم فينا من انفسنا .. والآن إليكم الحكاية بالتفصيل..
يوم السبت 16/6 رحت للدكتور اطمئن على وضعية الجنين لانه موعد ولادتي يوم الاثنين 18/6 ومو حاسة بأي بوادر ولادة .. الدكتور قال مو من مصلحة الجنين يتأخر عن التاسع لذلك بدي افحصك فحص داخلي طبعا ما رضيت قلتلو مو مستعجلة عالولادة وعموما لسه موعدي باقيلو يومين شفتو عالتلفزيون وكان الوضع تمام
روحت البيت والساعة 9:00 مساء لاقيت نقاط دم .. طبعا ما تسألو عن الرعب اللي صابني رحت ابكي لزوجي قاللي شو فيه.. قلتلو شوف الدم .. طبعا فرح وقاللي هادا اللي بنستنا ما تخافي .. رح تولدي قريبا .. وما رضيت اروح على المستشفى الا لما زادت كمية الدم تقريبا الساعة 3:00 فجرا رحنا عالمستشفى ومن هوون بدت الحكاية
لما دخلت المستشفى كنت خايفة كتير اجا الدكتور وكان معصب ومكشر قاللي يللا جهزي حالك لفحص داخلي.. كنت ببكي قلتلو طول بالك علي أنا بكرية احكيلي كيف الفحص وبيوجع ولا لأ
قاللي مش فاضيلك عندي حالة ولادة جوا خلصي بسرعة.. طلعت لزوجي قلتلو ما بدي انفحص في هاي اللحظة سمعت صوت صراخ من غرفة الولادة ارتعبت .. طلعنا من المستشفى وزوجي ما رحمني صار يبهدلني وقاللي ليش ما خليتيه يفحصك .. مشينا برا المستشفى ودموعي عم تنزل قلت لزوجي وين اهرب .. انا شو ورطني هالورطة وطبعا كل هادا الكلام من الخوف
رحت على مستشفى تاني.. ودخلت قسم الولادة لاقيت دكتور عكس الدكتور الاول تماما قاللي ليش خايفة وحكيتلو القصة .. طمني وقاللي لازم تنفحصي ووعد مني ما اوجعك .. قلبي ارتاح وسمحتلو يفحصني.. لاقى الرحم مفتوح بس 2 سم
قاللي معك وقت كبير للولادة روحي البيت وخدي دش ونامي وارتاحي وجهزي حالك للولادة في الساعات الجاية اذا زاد الدم او زاد الوجع بتيجي فورا .. استغليت الوقت باكل التمر والشوكولاتة حسيت الوجع زاد بس بشكل مش كبير قدرت اتحمل لحد يوم الاثنين الساعة 5:00 الفجر رحت المستشفى لاقيت نفس الدكتور حمدت ربي.. فحصني قاللي مفتوح 4 سم وضليت فالمستشفى اخدت محلول وابرة مهدئ .. حسيت بالدوخة..كنت شوية اتوجع وشوية انام
والساعة 12:00 فحصني الدكتور قاللي مفتوح 9 سم يللا نزلوها غرفة الولادة.. ولما سمعت هيك بكيت بشكل جنوني حتى ماما وحماتي صارو يبكو معي .. قلت للدكتور شو بدك تسوي فيني .. صار يضحك وقاللي ما تخافي ..
نزلنا لغرفة الولادة .. وقعدوني على سرير الولادة .. قلت للدكتور بدي اروح الحمام بسرعة .. قاللي لأ خليكي تنفسي وادفعي .. صرت اتنفس وادفع .. بعدين الدكتور قاللي الراس بين يللا ادفعي كمان شوي .. دفعت ( ووالله يا بنات ما حسيت بوجع في لحظات الدفع ابدا .. بتحسي بشي زي الامساك بالزبط بس ما بتتوجعي .. بس بتحسي انه ما فيكي طاقة يعني المشكلة انه بدك جهد لازم تكوني مريحة حالك كتير قبل الولادة حتى تقدري تدفعي)
بعدين قاللي الدكتور خلاص هلأ بس باقي الراس يطلع بدك تحسي بطلعة الراس ولا اعطيكي ابرة مخدر .. قلتلو اعطيني طبعا .. اعطاني ابرة مخدر ونمت .. صحيت وهو بيخيط بس ما كنت حاسة بشي .. سألتو انا ولدت.. قاللي ولدتي وخلصتي
حمدت ربي كتير .. جابولي ابني ما صدقت حالي .. لدرجة اني قلت للمرضة حاسة حالي عملت انجاز عظيم ..
الحمدلله ولادتي كانت من أجمل ما يكون وهلأ حبيبي حسام في حضني .. الولادة تساهيل من ربنا
ما بتصور انه في حدا فالعالم كان خايف من الولادة اكتر مني .. بس ربنا سهلها عليا بالاستغفار وبذكر ربنا وبالدعاء الانسان ممكن يحقق المستحيل
يارب ترزق كل محروم وتسهل على كل حامل وتكرمنا بالذرية الصالحة ...