ولدت الحمد لله و جبت احلى يوسف - قصة ولادتي و الطلق الصناعي -

Om Youssef · 03-20-2011, 06:51 AM

السلام عليكم ورحمة الله وبركاته

تذكرتوني؟ يوم الاتنين اللي فات كتبت موضوع اطلب تدعون معي

الحمد لله ولدت يوم الاربعاء و جبت احلى يوسف نور حياتي الله يخليلي ياه و لابوه يارب

المهم نحول ع MBC Action

طبعا متل ما اخبرتكم من قبل اني كنت خلصت التاسع و مافي اي بوادر ولادة و اتفقت معي الدكتورة على الطلق الصناعي يوم الاتنين اللي فات

رحت يوم الاتنين الصبح كشفت علي لقت الرحم مسكرررررر بعد ما كان فتح نتوفة

عطوني اول تحميلة على اساس اذا ما جابت مفعول باخد تحميلة تانية بعد 6 ساعات

قالتلي الدكتورة انه عادة بعد تحميلتين او 3 بيبتدي الرحم يفتح و بيجي الطلق

بس بحالتي اخدت 6 تحميلاااااااااااااااات و مافتح غير 2 سم

يوم الاتنين ماكان في وجع .. يوم الثلاثاء الساعة 12 الظهر ابتدت اوجاع شديدة بس محتملة لحتى الساعة 7 المساء

وقتها الوجع صار قووووي .. و انا عم اتقطع و كل شوي يجو يكشفو علي و الرحم حالف ما يزيد على 1سم و نص

وصلت الساعة 1 بعد منتصف الليل و الرحم لسه 1ونص و انا عم اتقطع بس ما كنت بصرخ والله كنت بدعي طول الوقت .. هنا ابتديت اقطع امل انوالرحم رح يفتح عندي و صرت اطلب العملية لانه خلاص الالم شديد و الوقت طول و الرحم ما عم يفتح و انا ما ضل عندي جهد و ما بقدر اقوم امشي مشان التحميلة تضل في مكانها و مو ماكلة شي

زوجي مسكين قلي اللي بدك اذا بدك عملية خلص نسويها

بس امي و حماتي ضلو يصبروني و يقنعوني انو اتحمل لحتى اولد طبيعي
و انا اصلا كنت رافضة فكرة القيصري و كنت مصرة اولد طبيعي بس الرحم اللي ماكان يفتح احبطني و نزل معنوياتي

و الدكتورة كل شوي تتصل ع اساس حالة خاصة انا لانو 6 تحميلات و ما فتح الرحم

اتصلت و اجت القابلة كشفت علي و عطتها خبر انو فتحت 2 سم
الدكتورة طلبت منها تزيدني طلق صناعي ابر عن طريق المحلول

هالشي صار الساعة 1 ونص بعد منتصف الليل
و صار الاوجاع مرررررررررة شديدة كل دقيقتين و كانت بس في اسفل بطني ما اجاني الوجع بالظهر ابدا

و انا عم اتألم و بسمع حماتي بتقول انو هالشي مو طبيعي كل دقيقتين طلق يعني المفروض خلاص قربت اولد بس الرحم 2 سم :(

الساعة 5 و نص بعد الفجر نبض البيبي صار عم ينزل و يطلع
وصل ل 77 انا هون كنت رح جن و ابتديت ابكي

رنينا ع القابلة اجت بكل برودة عم تقلي يمكن شلتي الحزام تبع النبض من غير ما تحسي

ماما حبيبتي و حماتي الله يخليلي ياهون صارو يصرخو عليها مشان تتصل بالدكتورة
قالتلهم طيب بس اكشف عليها مشان اعرف شو تقول للدكتورة

و ماخدة كل وقتها و من غير مسؤولية كشفت لقتني لساتني 2 سم و انتبهت انو فعلا نبض البيبي عم ينزل لل السبعينات و يرجع عادي و طلبت منها تشيلي المحلول تبع الطلق لانو عم اتوجع بدون فايدة بس ما شالتو في هديك اللحظة اتصلت بالدكتورة و دكتور التخدير وحماتي اتصلت بزوجي لانو كان راح

ابتدو يجهزوني للعملية :( و سبحان الله بس شالولي محلول الطلق الصناعي خف الوجع بزااااااف و اجاني على فترات متباعدة

دكتورتي الله يهنيها اجت بسرررررررعة و الله احلى دكتورة شفتها بحياتي ما بنساها ابدا
طريقة تعاملها بتخلي المريض ينسى كلشي

عكس القابلة يللي لو ماكانو امي و حماتي جنبي و انتبهو ع جهاز التخطيط كان راح ابني مني

خبرتني الدكتورة انو الحبل السري التف حول رقبة ابني و انو ان شاء الله كلشي بخير و خدوني ع غرفة العمليات و انا سبحان الله ع قد ما كنت رافضة و كارهة اني اولد قيصري ع قد ما كنت مطمئنة و هاااااااادية لاقصى درجة رغم كل التعب اللي شفتو و خوفي ع البيبي

ماما و حماتي عم يبكو و يدعولي و زوجي مسكين وصل دايخ مو مستوعب شي عم يقلون خلصوها هي الاولى قبل كل شيء

و انا فتت ع غرفة العمليات ااااااخر رواق

و يمكن بكون عشت احلى ساعة بهديك الغرفة :)

دكتور التخدير عم يغنيلي و الكل عم يعمل معي جو و الممرضات معاملتهم كتير منيحة الله يجزيهم كل خير

حطولي بنج بظهري الساعة 6 ونص و حطو ستارة بين راسي و بطني لحتى ما اشوف شي بس اللمبات اللي فوق كان فيها شوي انعكاسات و شفت كلشي من غير ما يحسو

الساعة 7 الا ربع من يوم الاربعاء شفت حبيب قلبي و نور عيوني طالع من بطني و الحبل ملتف على رقبتو زي ما قالت الدكتورة بالظبط بس فكت الحبل و طلع من بطني ابتدى يبكي
احلى صوووووووت سمعتو بحياتي

عطوني ياه بستو و خدوه ينظفوه

و خيطتلي الدكتورة الجرح و نظفوني و طلعت من غرفة العمليات الساعة 7 و ربع

يعني العملية كلها خدت وقت 45 دقيقة

يومين تنويم و تحاميل و طلق صناعي وقلة نوم و اكل و يوم من الالاااااااااااام و في الاخير ولدت قيصري :)

بس تغيرت نظرتي ع العملية القيصرية خصوصا لما فاجئتني الدكتورة بعد العملية انو ما خيطتني غرز بس استعملت شي تاني ما بعرف شو هو المهم ما رح يكون عندي اثر واضح للخياطة و لا جرح اعتني به و لا غرز اشيل همها بعدين

دخلت المستشفى الاتنين و لدت الاربعاء و طلعت الجمعة مع ابني و الحمد لله رب العالمين على نعمته

و المستشفى روعة و الدكتورة روعة و كل واحد بيشتغل هناك روعة من غير القابلة

و دعيت معاكم و الله دعيت بالتساهيل للحوامل و بالذرية الصالحة للمحرومات

و اي سؤال انا حاضرة سواء ع الطلق الصناعي او ع القيصري لاني جربت الاتنين

بس اذا تأخرت بالاجابة اعذروني و الله ما عم لاقي وقت مع يوسف و الناس اللي عم يباركو

طولت عليكم ادري بس من يوم يومي و انا احب التفاصيل

و السلام عليكم و رحمة الله

المستحيله · 03-20-2011, 07:07 AM

الف الف الف مبروك... والحمدلله على سلامتك وسلامه البيبي...
يتربى بعزكم ان شاء الله...

تقوي الله · 03-20-2011, 07:10 AM

الــــــــــــــــــــــف مبرووووووووووك علي سلامتك
يتربي بعزك ياعسل اللهم اجعله من مواليد السعاااادة

دعواتك ليه بظهر الغيب

ام سيد علي · 03-20-2011, 07:20 AM

الف الف الف مبروك... والحمدلله على سلامتك وسلامه البيبي...
يتربى بعزكم ان شاء الله...
وعقبالنا عشا نفتك ياررررب مشتاقه الى النونو حيل مع اني بكريه

الملاك · 03-20-2011, 07:54 AM

الف الف مبروووووووووووك ان شاء الله..
والحمد الله على سلامتك يااااااااارب....

shahad · 03-20-2011, 08:43 AM

يااقلبي الف مبروك والحمدالله على سلامتك انتي ويوسف يتربى في عزكم ان شاء الله صح الولاده تعب بس سبحان الله بس تشوفي البيبي تنسي الهم والتعب
عقبالي يارب افرح بمولودي خلصت التاسع وتحدد لي موعد طلق صناعي ادعيلي

lo0ols · 03-20-2011, 09:00 AM

الحمد الله على سلامتك

وردةالطائف · 03-20-2011, 11:09 AM

الف مبرووووووووووووووووووووووووووووووووووووووووووووووو ووووك
والحمد لله على سلامتك و سلامة النونوووووووووووووووووووووووووووووو

كل الحلى · 03-20-2011, 11:28 AM

الف مبرووووك حبيبتي

الحمدلله على سلامتك أنتي وسي السيد

ويتربى بعزكم يارب

اخت العرب · 03-20-2011, 11:41 AM

والله عانيتي والله يخلي لج يوسف ياااارب
مبرووووووووووووك

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
الطلق الصناعي	عزيزة النفس	إستفسارات حوامل من الشهر السابع إلى الشهر التاسع	23	06-11-2013 05:51 AM
الحمد لله ولدت وجبت احلى قمر	أسيرة فلسطين	إستفسارات مرحلة الولادة	20	12-30-2010 08:06 PM
الحمدلله ولدت وجبت احلى لورآآ وقصت ولادتي بالتفصيل..	سسآآندرآآ	إستفسارات مرحلة الولادة	16	11-11-2010 06:34 AM
الطلق الصناعي	الدلوعة	إستفسارات مرحلة الولادة	12	07-07-2010 09:02 AM