نصيحة لأخواتى الحوامل

[storm]

بسم الله الرحمن الرحيم
هذه تجربتى احكيها لكم واتمنى من الله ان يحفظكم من مثلها
كتبت هذا الموضوع لتحذروا من الناس واعينهم
انا كنت حامل وتعبت فى الحمل لدرجة ان القىء استمر للشهر الثامن
بس كان اول حمل وكنت فرحانة جدا
ورغم تعبى كنت فرحانة لأن السونار كل مرة بيكون تمام
وعملت كمان تصوير رباعى الابعاد والبيبى كان زى الفل ووضعه طبيعى
وحركته بحس بيها كتيره وكان ولد
انتهى الشهر التامن وكنت اشتريتله كل حاجه من السرير لكل حاجه تلزمه
بس قدر الله وما شاء فعل
قابلت واحده معروفة بالحسد وكنت مخبيه عنها خبر حملى عشان آذتنى كتير
قبل كده
وبصت لبطنى بصه اقسم بالله مش ناسياها رغم مرور سنه دلوقتى
المهم انا كنت خارجة من عند الدكتورة
ودخلت بعدى سالت الممرضات عن حملى فى الشهر الكام نوع المولود....
وده عرفته انا بعدين من واحدة من الممرضات
المشكلة ان الشخصية دى مرات أخويا
تخيلوا
انا عانيت منها 4 سنين حسد
لدرجة ان اخويا كان عارف انى حامل وهى لا
بس المرة دى الضربة كانت شديدة اوى كلفتنى حلمى اللى عشت احلم بيه
المهم..
حركة البيبى وقفت
رحت اعمل سونار قالوا مافيش نبض
ومات ابنى
وعشت فترة طويلة فى تعب نفسى وعضوى
وهى كانت شمتانة فيا وعملت حفلة
ودلوقتى بعد سنة هى حامل فى شهر وده اول حمل ليها
وانا كمان حامل فى شهر و10 ايام
وعارفة انه برغم حملها مش هاسلم منها برضه
لانها بتحسد اى حاجة حتى لو عندها احسن منها ده مرض عندها
ادعولى
طولت عليكم بس عايزة اقول لكل واحدة حامل تحصن نفسها
وتحذر من عيون الناس
صحيح اللى حصلى قضاء ربنا وانا راضية بس الحسد سبب
وربنا يجازى كل واحد على عمله
انا اتجوزت كبيرة يعنى فرصى مش كتير ادعولى ربنا يسترها المرة دى
وحافظوا على نفسكم
والله يحميكم جميعا من عيون الناس