سندريلا العراقية

[@moon light@]

هذه القصة مكتوبة باللهجة العراقية يعني مو الكل راح يفتهمهة
قصة السندريلا العراقية
كان ياما كان في عتيك الزمان
جان اكو بنية
اسمها سندريلا خوش ابنية اصيلة و علمودها غنى حسام الرسام الاغنية مال العكربة
,,,المهم جان عدها مرة اب كلش خبيثة
و ابوها خطية يبيع قوايش مبردات حجم 1100 ومرات يبيع
شخاط فلّ بس هو خوش زلمه من اهل الاول ... و جانو الكل سايكين على سندرلا خطية
روحي سوي الجوزة مال المولد فصلت ,,,
روحي اوكفي سرة على الغاز,,,
روحي لابو المحل ابراس الفرع اشتري شحاطات لخواتج
(اللي همة جانو 3 خوات بس هم خبيثات),,,
روحي غسلي الشتايكر مال السطح ,,
روحي جيبي لفات فلافل ,,
روحي بدلي الدهن مال المولدة
...
و هاي خطية جانت كلش
حبااابة و تروح ولا تفتح حلكها المهم,,,,,الى أن يوم من الايام
جانت دا تصعد ماي بجليكان ابو ال 20 الماي ضعيف و الماطور ما يصعد
لان ماكو كهرباء لكت بالطرمة فانوس بس شنوو مزنجر و عتيك عبالك جان
بدوائر الدولة و تحوسم جتي عليه فركتة كام يطلع دخان سندريلا
انرعصت و رجعت خطوتين للخلف بسبب
المفاجأة
شنو هال دخان هذا ؟ الدخان شوية شوية اتحول الى جني
لابس دريس مال ا ريال مدريد و بوتين اديداز وسوار ذهب و حاط معطر
freedom for men
و كللها:-
-شبيك لبيك عبدك بين ايديك انا الجني عادل من حي الجامعه شتريدين اسويلج بس عالسريع لأن ماما دكتلي مسكول لازم ارجع
كالتله
-عمو جني اريد كهرباء وطنيه 24 ساعة ممكن؟
-ولج بابا هوة اني ساحب واير 5 امبير من مولد للفانوس
شلون اجيبلج وطنيه 24 ساعة؟ شنو جني لو وزير الكهرباء؟
-زين عمو عمو اريد قنينة مال غاز متروسة لأن معوزين كلش .....
-ولج عمو شنو هال حجي؟ ولج انتي شكد فكرية.. اكو
واحد يطلب من جني قنينة مال غاز؟ شايفتني رابط الفانوس عال حصان؟
-عمو عمو لعد شتكدر تسويلي؟
-باعي عمو انتي
بعدج اصغيرة و محرومة و الامير راح يسوي حفلة و ادري عائلتج
راح تروح شنو رايج لو اخليج تروحين و تتونسين؟ احتمال تطلعين
ابصاية و صرماية لأن الشرقية هم دا تصور هناك حفلة طاكة
- زين شلون اروح عمو؟نفرات لو كيا؟
-بابة معليج هسة غمضي عينج...... سندرلا غمضت عينها (و من الغريب يا جماعة انه اول ما غمضت عينها ما كامت اتشوف و هذا الشي محد لكالة تفسير لي هسة )
وشافت سندرللا نفسها لابسة تنورة
كصيرة و بدي و حذاء مفتوح يعني طلعت مو طبيعيه
و كللها الحلفة اقصد الحفلة تخلص بال 8 و نص
علمود منع التجوال و كل هاي الهدوم راح توكع و الحذاء و الميك اب و
كلشي راح يختفي اذا عبرت ال 8 و نص و احتمال تنعلسين بالطريق
-حاضر عمو شكرااااااااااااااااااااااا
وصلت سندرللا البيت الامير جان مسوي حفلة
لان طلع 77 بالسادس راح يروح كلية اهلية احتمال او طب بيطري بعد ما اعرف
و الحفلة جان بيها نجود و سمراء و ساجدة عبيد(كلة هجع و عالكة) و
و الامير شاد الرباط على راسه و مقندل و
و ردح لليافوخ و فجأة الامير صاد سندريلا و عجبته و كابلها
جتف ساعتين و ساندرللا نست روحها و نست الكراب و السراوات و
البهذلة و نزلت ردح الى ان صارت 8 و نص ........واللهّّّّ انلاصت
اتذكرت الوصية مال رامي الجني و كالت لازم اشطح و ركضتلك عال
سريع جنها برازيلي هس توها مجفتة و الامير وراها
:
-ولج تعاااي شبيج تخبلتي؟مو دا احاجيج
؟؟؟ وين امولة ؟؟؟ فضيلة(هلكد ما سكران نسه اسمها)
المهم ركضت سندريلا و وكع الحذاء مالتها بلا ما تدري
جان الامير يشيل الحذاء و لزمة و ضل صافن عالعالم اللي
انتبهوا عال لقطة و كامو ايباوعون عليه الامير بقة شايل الحذاء و
مصدوم و صورة سندرللا
الحلوة ببالة,,, الحفلة توقفت طبعا و العالم سكتت من المفاجأة
جان يباوع الامير عالعالم ....صنطة.......
و كال للناس :
الشركة العامة للصناعات الجلدية - فخر الصناعة الوطنية العراقية
خبرة وتميز في مجال المصنوعات الجلدية من الاحذية والحقائب بأرقى المواد

[مجنونة بحبها]

ههههههههههههههههههه

لعنتي قصة سندريلا حرام كلشي ولا سندريلا

تخرب قصتها

يسلمووووووووووووووووووو

[@moon light@]

ملينة من القصة الاصلية كلنة نحورها
ههههههههههه

[مجنونة بحبها]

لالالالالالالالالالا حرام ماكو احلى من سندريلا الاصليه

[عقد لؤلؤ]

صراااحة ما فهمت من البداية ما كملتها

مشكووووووورة

[حياتي انا]

وحتى انا مافهمت شي

[@moon light@]

مافتهمتوها لانها باللهجة العراقية العامية
وانتو اكيد مو من العراق
شكرا على مروركم

[ام ارجواااااان]

الشركة العامة للصناعات الجلدية - فخر الصناعة الوطنية العراقية
هههههههههههههههههههههههههه
يعطيييييييييييييييك العااااااااااااافييييييييييييييييه

[واثقة من رحمة الله]

هههههههههه أحلة شي طلع 77 بالسادس وكابلهة جتف يعني حتى سندريلا ما سلمت من عدنة عاشت الأيادي

[صبا العراق]

لو بس ادري حتى سندريلا دخلتوها بحياتنا وصناعه الجلديه اشو الحذاء وكعع دخلوها مرتاحة