تحبسني و تقتلني و تقول تخاف علي

[فضــــــ بينكم ــــولية]

السلام عليكم و رحمة الله و بركاته
باختصار مشكلتي هي أمي تخاف علي بشكل غير طبيعي, يمكن عشان أنا بنتها الوحيدة (يعني ما في غيري لا بنات ولا أولاد), و ممكن تجي وحدة تقولي هذي أمك و طبيعي تخاف عليكِ و هي تحميكِ..
لأ, خوفها هذا أبداً ما طبيعي, يعني مثلاً في بنت عمرها 15 سنة أمها ما تسمحلها تقطع الشارع وحدها؟؟ يعني مثلاً أكون معاها و جنبها و الشارع فاضي و ما ترضى غير تمسك إيدي و تسحبني كأني طفلة عمرها كم سنة بس, و غير كذا لا تخليني أطلع و لا أخطلت بحد, و حتى تخاف إنه يكون عندي صديقة كثير مقربة, و دايماً تنصحني إن زميلاتي في المدرسة هما زميلات و بس, يعني حتى ممنوع يصير عندي أصدقاء, و إذا مثلاً كنا في حديقة أو مكان عام و كلمت بنت أو سلمت عليها تسألني كأن البنت خطفتني : إيش كانت تريد منك؟؟ و إذا مثلاً رحت أتمشى قدام عينهم بس من دونهم يعني في مكان قريب منهم هما يجلسوا و أنا أتمشى, لما أرجع تسألني: حد ضايقك؟ حد زعلك؟ حد قالك شي؟
يعني أنا أحترم خوفها علي بس ما لها الدرجة, لدرجة حتى تخاف علي من بنات عمي, و ما تآمن علي أروح مكان من دونها و لو كل العائلة رايحة معي, حتى ما تآمن علي مع أبي, إذا طلعنا من دونها لازم تتصل علي, و لما أرجع تسألني نفس الأسئلة : بابا زعلك؟ ضايقك؟ تركك وحدك؟
و حتى تقتل الطموح الي داخلي, مثلاً أنا أحب العلوم كثير و الفضاء, لو قلت مرة بالمزح إني أتمنى أسافر أمريكا أروح وكالة ناسا للفضاء, تصدني بقوة و تقول: يا سلام و من يخليكي؟ مستحيل. أقول مثلاً إني أتمنى ألف العالم , تقول: مستحيل لا تحلمي, ما تتحركي من جنبي.
أقولها: طيب تجي معي. تقول: لأ أنا تعبانة ما أقدر. أقولها: طيب ليش تخافي علي؟ تقولي: هو كذا إنتي ما تتحركي من جنبي.
يعني و الله حتى تقتل الطموح الي داخلي, و من الوحدة الي معيشتني فيها و الله أحس كأني في سجن, و الله كل يوم أتعذب في الليل و أصيح و يتقطع قلبي.
يعني حتى لدرجة إنها من زمان بطلت تنام جنب أبي و تنام جنبي, إذا يوم واحد قلت إني أريد أنام في الغرفة الي جنبها, تصرخ بوجهي و تقول لي: لأ, مكانك جنبي.
يعني و الله ما عارفة إيش أعمل, حتى أحياناً "أستغفر الله" أحس إن أحلامي و طموحاتي ما رح تتحقق غير إذا هي ماتت, أحس إني ما رح أتحرر غير لما هي تموت للأبد أو إني أهرب منها..
بليز ساعدوني و الله ما عارفة إيش أعمل معها ساعدوني و الله أحس إنه صارت فيني حالة نفسية, حتى إذا دخلنا محل ما أقدر أسأل البائع و أقولها اسأليه إنتي

[فضــــــ بينكم ــــولية]

و كمان من كثر الضيق الي فيني منها و معاملتها إلي بجفاف, صرت أتعلق كثير بمعلماتي يعني لو وحدة منهم عاملتني بلطف شوية ولا قالتلي إنتي مثل بنتي يااااااااااااااه ع الفرحة الي فيني و أحس خلاص ها المعلمة تحبني كثير و هي مثل أمي لدرجة إني أصير أناديها ماما بس بقلبي طبعاً ما أقول كذا قدامها
و الله أحياناً أحس إني يتيمة ما عندي أم ولا أب, لإنه بالإضافة لمشاكل أمي كمان في مشاكل كثيرة من أبي و الحين هو تاركنا و مسافر يعني أحس إني يتيمة لا أم ولا أب و كمان عندي حد يحبسني!!

[مشاعل الدوسري]

لا تعليق غير أمك ثم أمك ثم أمك الصبررر زين طيعي امك

[فضــــــ بينكم ــــولية]

أنا أطيعها و صابرة عليها بس ما حرام وحدة مثلي عندها الموهبة و الذكاء و الطموح - ولله الحمد - و لكن يدفن كل هذا من أجل خوفها علي؟؟

[احلى من العسل]

شوفي حبيبتي انتي اولا تمرين بمرحله مراهقه وبهالمرحله تختلط عليك المشاعر ويصير فيه اضطراب بمشاعرك وتكونين حساسه وغيرها من الافكار الوهميه انا اتكلم من واقع كلامرينافيه صدقيني لمن تعدي هذي المرحله راح تتذكري وتضحكي على نفسك اناكنت مثلك وحيده امي وابوي وكنت احس بنفس احساسك كنت احس ان اهلي مايحبوني مع اني وحيدتهم ولكن لمن كبرت عرفت انهم كانوا يحبوني ويخافون علي كثير
وبالنسبه لامك انا مالومها انتي وحيدتها ومن حقها تخاف عليك ومن كثر ماهي تحبك ومتعلقه فيك تحول حبها لنوع من المرض وانتي لازم تراعينها وتحرصين على رضاها ولاتتمنين لها الموت لانها لوماتت راح تفقدينها وتتمنين لوترجع للحياه مره ثانيه عشان تشيلينها بعيونك وساعتها مارح ترجع لان الي يموت مستحيل يرجع اتمنى لك التوفيق

[كان حلم]

حبيبتي انتي لساتج صغيره والمستقبل كدامج كملي دراسه واجتهدي رح تكون عندج شخصيتج حتى امج رح تحترم قراراتج لان كبرتي
انتي مو من الحين تفكرين بأمريكا وناسا الفضائيه وعمرج خمسطعش سنه طبعا ردهه الج راح ايكون الرفض انتي اتكلمي معها بالدروس تبعج ومدح المعلمات
بشطارتج هيه شويه شويه راح تحترم رايج وشخصيتج ولما تكبري وتدخلي الجامعه محد يقدر يتحكم في قراراتج اذا كانت صائبه اصبري ولاتستعجلين

[فضــــــ بينكم ــــولية]

حبيباتي أولاً: هذي ما فترة مراهقة و بس أصلاً من زمان و أنا أحس كذا حتى كان حرام لو ركضت أو قفزت, و أصلاً أحس إني ما زلت في الطفولة, حتى صديقاتي يقولولي دايماً إنه تصرفاتي أحياناً تكون كأني طفلة صغيرة مش مراهقة.
ثانياً: أنا لما أتكلم معاها عن السفر و الدراسة برا أتكلم بمزح بس هي ترد ع المزح بكل جدية بكلمة "مستحيل", و بعدين شو فيها يعني إنه يكون عندي طموح؟
و لا تقولي لما أكبر تحترم رأيي بنت خالتي الحين بالجامعة و أهلها عاملين مثل أهلي, بس على أخف شوية, و حرام تموت طموحاتي يعني حتى الحلم ممنوع!!
و على فكرة أنا ما أتمنى لها الموت أنا بس احياناً أحس كذا بس.

[sahab]

لصرتي ام راح تحسين بالي تحس فيه امك

وغير انك الوحيدة اكيد بتخاااف عليك

حتى لو تضايقين من هالشي

هي مو قصدها تعذبك او تقتل طموحك حتى لو طريقتها غلط

هي ام ام

ولا تقولين تموت وانا يتمية ومادري شنهووو

شوفي حاال الايتاام الله يعينهم

انتي تقولين هالكلام من ضيقتك

من غيرهم راح تضعيين

والله يخليلك امك وابووك ولايحرمك منهم

[فضــــــ بينكم ــــولية]

قلتلكم أنا ما أريدها تموت حتى أخاف أحياناً إذا اتأخرت في الشغل لا يكون صارلها شي, و أنا كمان أخاف عليها..
و عارفة إنها أم, بس شوفوا الأمهات الثانية ما لها الدرجة الخوف يكون, أنا ما يضايقني خوفها أكثر ما يضايقني إنها تسببلي عقد و حالات, يعني صرت أخاف أكلم حد, و حتى إذا أريد أسأل سؤال ولا حتى أسلم على حد صرت أخاف و أتردد, و صرت كثير مترددة, و صرت أخاف كثير من الألمو يعني مثلاً إذا كدمة بسيطة أو حد ضربني شوية بمزاح أحس بألم قوي كأن يدي انكسرت, و كمان بسرعة أحس بخوف, حتى أحياناً إذا صديقتي جات تكلمني تخضني (تنقزني أو تنزقني), و غير كذا حتى أحس إني ما أقدر أتحمل مسؤولية أبداً..
و هي إذا تخاف علي المفروض تخاف علي نفسياً كمان مش بس جسدياً, يعني مثلاً ليش ما تراعي مشاعري و بإيش أحس؟ ليش دايماً عودتني إني أخاف إذا نادتني عشان 90% من المرات الي تناديني فيها تكون عشان توبخني أو تتهمني إني كسرت شي أو خربت شي, حتى صارت عندي عقدة ( وهذا ما كلامي هذا كلام اختبارات نفسية و تحليلات للشخصية و حتى كلام الدكاترة الي يطلعوا في التليفزيون) و صارت عندي عقدة الذنب, معناها إني كثير أخاف لا أزعل حد لدرجة إني آجي على نفسي كثير, و أصلاً أنا إذا قلت لحد شي و ما رد أخاف لا يكون زعل مني, أبسط مثال: أمس رسلت رسالة لمعلمتي سألتها سؤال عادي, و ما ردت -الله أعلم ليش- فرسلتلها على طول " أنا آسفة إذا كنت ضايقتك" و ما بس ها المرة داايماً إذا رسلت لحد شي و ما رد بعد دقيقتين أرسل ها الرسالة و بعد ما أرسلها أفكر ليش أنا رسلتها, و دايماً أسأل الناس إذا زعلانين مني, و كثير أتأثر بالصوت العالي و بنظرات الناس :(

[@ ام ميزو @]

اه اه قهرتيني ياالله امك مره مره تحبك وانتي تشوفي هذاشي مزعج ولله لوكنت مكانك لحطها في عيوني امك تخاف عليك من الهوا الطاير والله لو كنت مكانك لعذرها انتي بنتها الوحيده وانتي كثير غاليه عندها هذا الي تسويه من شانك بسبب حبها الشديد