ام زوجي جننتن

[مرهفة حس]

بسم الله
حسيت ان هالمنتدى فيه تعاون وحبيت افضفض وتكفون بنات ابي مشورتكم
متزوجه من خمس سنوات عندي بنت وولدو حامل
مشكلتي من ام زوجي يعلم الله اني بريت فيها بر مايعلم فيه الا رب العالمين كنت ساكنه معهم بنفس البيت بغرفه وحده صغيره 4×4ودورة مياه وانتو بكرامه المهم
مو كل وقتي فيها خميس وجمعه والايجازات بس بحكم طبيعت عمل زوجي
والله يابنات اني من اجي انا الي اسوي الوجبات لها ولعيالها وانها ماتدخل المطبخ الا نادرا
والحين الحمدلله سكنت ببيت لحالي بس قريب منهم
لازم سياره
والله من سكنت وهي يوميا عندي بعيالها يا غدا ياعشاء
طيب ومتحمله عشان زوجي الي محتار وش يسوي
وبعد فتره صرت اروح لهابقهوتي وحلاي والله يابنات انها تعيب بقهوتي رغم كل من جاني يمدح قهوتي ومامدح نفسي بالمطبخ
من طبخ وسنع بصراحه اني ان اشتغلت اشتغل من قلب
لابد من الذم والله عمرها ماقالت ماقصرتي الله يعطيك العافيه
وتمدح بنات عند زوجي فلانه فيها وفيها عمرها مامدحتني بشي
رغم الحمدلله اني جامعيه ومتواضعه
لها على ان مرت ولدها العود ساحبه عليها هي وزجها العلاقه رسميه والله يابنات ان عمرها ماسوت جميله لعمتي شفتو على هذا كلها تمدحها قدام زوجي المشكله زوجي عارف نجاسةمرت اخوه وعيالها دايم يمدحوني قدام امهم والله تسكت ماتقول ولا شي
قبل فتره زارتني مرت اخوي وبنتها عمرها سنتين ماهي حلوه مره لما اروح اجيب قهوه وشاي تقول بنتك شينه طالعه لعماتها على ان والله ان اعلي فيهم جمال ومافيهم الشين يعني بالمختصر من وراي تتكلم
والحين في جنب يتها شقه وزانه على زوجي يستاجرها صغيره الشقه مره ومافيها صاله ولا سطح ولا حوش تقول خليكم قريب تخدموني غداء وعشاء
يابنات لما اشتكي لزوجي يقول تحملي هذي امي وش اسوي بس والله ماقدر تتدخل بكل شي
الي عندها حل الله يحرم وجيهكم على النار وانا وزوجي نحب بعض واخاف امه الي تفرق بيننا


على فكره انا خجوله مااقدر ارد عليها ولا احط عيني بعينها ولما اروح السوق كل شوي وينكم وينكم لدرجة اني اتوتر والله مااخذ راحتي مره حياتي تصعب علي قلت لزوجي انا بعيده ومشاكل امك لاحقتني كيف لو قربنا منهم

والحين في واحد من عيالها بيعرس بعد اسبوعين وفي ديره ثانيه يعني سفر 6ساعات تقولي لاتخسرين زوجك
اطلبي من صاحباتك فستان للعرس
تخيلو واسالها اقول بنطول هناك قالت لا يوم الزواج بنروح والفجري بنرجع ديرتنا ولما سالت زوجي قال خذي احتياط ملابس عيالك ترى بنجلس ثلاث ايام
شفتو خبثها واسمع من بنتها تقول امي بتشتري قماش لها بالف ريال يعني ماتبيني اكشخ
اذلا العجيز بالف انا ياشباب ليه معوره راسي ببربرتها

[#عيــ الجوريه ــون#]

هلافيك ياختي

عندنا وعندك خير ،،المشكله انها أم الزوج ،،وأي كلمه فيها بيقلب علينا،،

ماعليك منها طنشيها وكل إلي تسوينه لها ،،علشان خاطر زوجك وعيالك ،،

الله ماينسى عباده ،،والجميل عند الله ،،بكره عيالك بيبرون فيك من أفعالك الطيبه،،وخاتمتها بتعرف قيمتك ،،اليوم ولا بكره،،

أهم شيء أصبري والله مايضيع تعبك يالطيبه ،،


ههههههه كلهم كذا ماتبي تخسر ولدها ،،تشوف الغالي عليك حسره ،،

أم زوجي تلاحقنا في كل مكان وتلبس الذهب والملابس وتزين بيتها ،،

ولاشفتنا مسوين شي زعلت وقومت الدنيا ،،تقول خساير ،،


طنشيها شكلها تغار منك ،،

[مرهفة حس]

عيون جوريه تدرين امي ماتدري بالي يصير والله لو اعلمها ان تقولي تطلقي لان اهلي ماديتهم جدا كويسه الحمدلله واهل زوجي ضعيفه شوي وصاحبتي يقولو لوي انتي مثاليه بزياده وطيبه وريها الوجه الثاني بس هذي طبيعتي مااقدر اتغير

[مرهفة حس]

مشكلتي ودي اطنش بس اقول ماقصرت معها المفروض تعاملني بالحسنى مو خدامه عندها وعند عيالها

[ريم الفلاء]

عندنا وعندك خير
بس الحل الوحيد التطنيش
والبسي واكشخي ودلعي اعيالك
ولاتهمك العجوز اهم شي احشميها واحترميها بس لاتحرمين نفسك
على احساب غيرك وهم متهنين
انا زيك بس مطنشه لاني بعيده عنهم اشووي ومريحه ادماغي
والله يكتب لك الخير ويسخرهم لك يارب

[اميرة الورد ~]

ياعمري
ادعي بآخر الليل ان ربي يحنن قلبها عليك
وماعليك زوجك عنده عيون ويشوف كيف تعاملها معك والعكس
ربي يجزاك خير عالبر اللي بريتيها فيه
واصبري عليها
شتسوين بعد
بس خلك بشقتك لاتروحين لهم كلمابعدتي عنهم
كل مابتصير احسن ان شاءالله

[مرهفة حس]

مجنونته وريم الغلا الله يارب يحنن ازواجنا علينا ترى زوجي عارف امه ودايميحلف انه غير يعوضني ماشفت شي يمكن بعد الصبر فرج
وعوض

[سمار]

عزيزتي خليك طيبه معاها وبالعكس كل ماحاولت تكدر عليك أو تضايقك ردي عليها بالدعاء لها والضحك والمزاح وكأنه مو هامك أي شي من اللي جالسه تسويه ولاتبخلي على نفسك او عيالك بشي ومو كل ماشريتي شي لازم تعرف عنه وعلمي عيالك دائما مايقولون أي شي عن حياتكم لأي أحد مهما كان قريب لا روحاتكم ولاجياتكم وبعدين مو ضروري إذا دقت عليكم وانت بالسوق تقولون لها وينكم فيه أطلعوا وسوو اللي تبون بدون أي توضيح ماله داعي تقرير عن كل تحركاتكم حتى زوجك لايقول لها وبالنسبه للمناسبه أشتري وماله داعي تعرف حنا نعرف أنه أي أم ماتحب ولدها يصرف ريال واحد كل شي تشوفه تبذير
وخالتك هذي شكلها فاضيه لكم طول الوقت ماعندها رجل تنشغل به وين عمك ؟
خليك منها وسوي مثل ماقلنا لك
والله يوفقك ويسعدك يارب

[مرهفة حس]

والله اني اقوم افكر وانام افكر موترتني والحين بنتها جايه من ديره ثانيه وش تنصحوني بالتعامل معها

[قرعوطه]

اسمعي عن تجربه اهل زوجك لو تعطينهم عيونك ما يقدرونك وان صرتي رسميه يدورونك ويركضون لرضاك ليه هي ماعندها شغاله وبناتها وين انتي بري فيها وقللي زيارات وسوالف يعني كلمه ورد غطاها وعيشي حياتك انتي وزوجك ما حد بيدري عنك لو تنكدتي وخربتي على نفسك زين ولله يفرجها خذي لها هدايا وخلي اطفالك يسلمون عليها وبس اطلعي لاتشيلين قهاوي وتعبين نفسك