قصة ولادتي الشيّقة

[مامي نور]

بسم الله الرحمن الرحيم

السلام عليكم ورحمة الله وبركاته

أخواتي حبيباتي

أنا ولدت يوم 27\8

الشهر الماضي والحمدلله الذي وهبني يوسف على خير وسلامة

وبصراحة طولت كتير لحتى إكتب قصة ولادتي لأن كان بدي وقت لحتى إنسى

لأن كل ما اتزكر ولادتي بصير ببكي وبحس حالي رح إنهار ..


المهم يا عزيزاتي أنا أخدت 20 يوم من شهر ونزلت عالمستشفى ما كان في طلق أبدا من يومين قبل وما في طلق بس انا حبيت إستعجل على ولادتي لأن انا كنت عمبولد ببلد وزوجي ببلد وتأخرت على زوجي وصار بدي إولد مشان إرجع بسرعة لعندو .

المهم يا حضور يا كرام نزلت عالمستشفى الساعة 7 الصبح من يوم الجمعة وكان 17 رمضان كنت بغرفة التحضير وبدأت القصة .

أنا كان رحمي سميك وفاتح بس 2 سم وبعيد والراس لسه بعيد يعني مش ولادة أبدا صارت الممرضة تحطلي طلق صناعي أجلكم الله في المهبل هالطلق وأعوذ بالله منو والله العظيم أصعب من الطلق التوسيع من المهبل كتير صعب

يعني كأنك جايبة ملعقة وعمتأحطي قدر وتحفي فيه والعياذ بالله ..

كان الوجع اللي يجيني بعد هالتوسيع بعنق الرحم كتير صعب يعني والله العظيم الطلق كان أرحم .

وكانو حاطين على بطني تخطيط مشان يشوفو نبض البيبي وسرعة الطلقات
وما كان عميجي طلق خفيف ويروح
وكا ما يدخلوا عليي الممرضات مشان يوسعو عنق الرحم حس كأن منكر ونكير فاتوا عليي

لحد ما عملوا هالعملة 3 مرات بالآخر انا ما عاد فيني وأصلا الرحم ما كان عميتجاوب أبدا قمت أنا سألتون كم مرة لسه حتوسعوا برحمي هيك؟ قام قالولي ما منعرف
على حسب ما الرحم يتجاوب يمكن 15 يمكن عشرين مرة قمت انا قلتلون لا والله أنا ما عاد فيني أبدا انا بدي أولد قيصري انا مش مستعدة أبدا إتحمل هالوجع

والله يا إخواتي لدرجة أنا فكرت إهرب من المستشفى من الشباك هههه

المهم قالولي نحنا رح نتصل بالدكتورة وهيي بتقرر قاموا اتصلوا بالدكتورة وقالت الدكتورة إنو هيي جاية عالمستشفى وكانت الدكتورة عندا شي 3 ولادات بنفس هالمستشفى ما شاء الله
والأصعب من هيك إنو هاليوم كان يوم الولادات العالمي كان قسم الولادات مليااان ما شاء الله

وكنت عمإسمع أصوات الولادات بالغرف اللي جنبي وحدة تصرخ وأنا إضرب بحالي آآه والله العظيم حتى أنا وهلأ عمإكتب أشعر بدني وأعصابي عمترجف

المهم إجت الدكتورة وكشفت عليي لقت الرحم فاتح 3 سم يعني بعد كل هالتعب بس 3 سم

لما دخلت الدكتورة قلتلا الله يخليكي بدي أولد قيصري قامت ما ردت عليي الظاهر متعودة على هالكلام

المهم جابت شي وفتحتلي مي الراس وصارت مي الراس تنزل والطلق يزيد وأنا أصواتي وصرخاتي ترتفع

كنت كتير عمإتعذب ما عاد فيني على هالطلق لأن انا بقيت من الساعة 7 الصبح للساعة 6 المسا لحتى ولدت

قامت الدكتورة قالتلي إنو رح تصبر ساعة وترجع تكشف لو لقت الرحم تجاوب رح نولد طبيعي ولو لقت الرحم ما تجاوب رح نولد قيصري

قام الحمدلله الرحم تجاوب بس انا كنت حموت من الأوجاع الرهيبة والطلق وخصوصي أنا كنت عارفة إنو الطلق رح يشتد

قمت انا بهاللحظة قررت حط إبرة الظهر epidural
المهم اجا دكتور البنج وحطلي إبرة الظهر مع إنو انا وزوجي كنا متفقين مستحيل إني حط هالإبرة بس الوجع اللي شفتو خلاني إحكي مع حالي متل المجانين

بس لما الدكتور إجا كان الطلق كتير حامي وسخن معي يعني كانت الطلقة تجي كل دقيقة والمي تنزل مني

أخدت وضعية الإبرة وصار الدكتور يعملي الإبرة ويقلي ممنوع أي حركة
تخيلوا معي لما تجي الطلقة القوية وممنوع أي حركة؟؟؟

والله العظيم لما كانت الطلقة عمتجي وما فيني أعمل أي ردة فعل كنت حس كأن في كهربا بكل جسمي لأن ما فيني إتحرك ولا قول أي صوت والله كنت اللي عمقولو لا إله إلا أنت سبحانك إني كنت من الظالمين بقلبي

بس حتى الإبرة لما تنشك صعبة كتير لأن التخدير بيوصل للعظم
بقي الدكتور شي 20 دقيقة لحتى خلص من الإبرة وانا تدريجيا بدأ الوجع يخف عندي

لحد ما صار الوجع معدم نهائيا بس خفيف كتير أخف من وجع الدورة والحمدلله وقعدت إحكي مع أهلي وإضحك معون والرحم ما شاء الله 4 ، 5 ، 6 ، 7 ، 8 ، سم ما شاء الله يلا ولادة

دخلت الدكتورة وقالتلي يلا ولادة لازم تساعديني بالدفع والشد قمت انا صرت شد معا والحمدلله من دون وجع بس بسيط كتير ما في 10 دقايق حسيت إنو الدكتورة عمتجيب شي فجأة !!!!!

لقيت حطتلي إبني على بطنيييييييي

وأنا طاااااااار عقليييييييي ما كنت عمصدق إني شفت إبني

وشفتو بيشبهني هالمخلوق الضعيف عل بطني وصرت أنا إضحك بهستيريا والله كأني مجنونة ما صدقت وشالو إبني عن بطني وأخدو يتحمم وأنا كنت عمإسمع هالصوت يقبر قلبي

بس الدكتورة شقتني من تحت وصارت تقطبني
بس والله ما حسيت أبدا بالجرح أبدا أبدا كل هالفترة يعني ما تضايقت من الخياطة ..


وهيك والحمدلله تمت ولادتي والله رزقني بإبني يوسف ربي يجعلو من الصالحين وعقبال كل حامل ربي يفرج عنا وعقبال كل محرومة ربي يقر عينا بالحمل ياااارب

بس نصيحة أخواتي :

اللي بدا تستعمل الإبرة تستعملا بس من أول الطلق مش بالآخر

والنصيحة التانية : ماااا تستعجلي على ولادتك اتركي حالك بالبيت تستوي من الطلق لأن الطلق الرباني أرحم بكتيييير من الطلق الصناعي ..

والله العظيم دعيت لكل الأخوات اللي بالمنتدى بشكل عام ولأخوات معينات بشكل خاص ربي ما يحرمكون أبدا ويديم الوفق والمحبة بيناتنا

[ღॐ آية ღॐ]

الحمد لله على سلامتك حبيبتي
اكيد يوسف بيستاهل كل هدا التعب الله يخليه الك
وتفرحي فيه وتشوفيه عريس وتجيبي الو اخوان واخوات
يااااااااااااااارب
وعقبالي وعقبال كل وحدة حامل
تولد وتقوم بسلامه هي والبيبي ياااارب

[مامي نور]

حبيبة قلبي الله يسلمك يارب وطبعا يوسف بيستاهل والله لما تشوفي إبنك عميبتسم بتنسي الدنيا كلا وكل التعب وعقبال ما تقومي بخير وسلامة

[ماري مار]

حرام عليكي واللة خوفتيني.انا على وجه ولادة

[منتظره]

الحمدلله على سلامتك ومبروك ماجاك

عقبالنا يارب على السلامه

[حنين الجنة]

قمت انا بهاللحظة قررت حط إبرة الظهر epidural
المهم اجا دكتور البنج وحطلي إبرة الظهر مع إنو انا وزوجي كنا متفقين مستحيل إني حط هالإبرة بس الوجع اللي شفتو خلاني إحكي مع حالي متل المجانين









سبحان الله كلنا قلنا نفس الحكى
وبالاخير اخذنا الابره غصب عن عيونا
الحمد لله على سلامتك وسلامة يوسف

[مامي نور]

الله يسلمك حبيبة قلبي والحمدلله يااارب

حبيبتي انا قصد عمخوفكون مشان تحطوا الإبرة انا بدي خوفكون يعني تخافي هلأ أحسن ما تشوفي الأهوال بعدين

[ღॐ آية ღॐ]

المشاركة الأصلية كتبت بواسطة ماري مار

حرام عليكي واللة خوفتيني.انا على وجه ولادة

ماري الاخت حكت قصتها للفائدة مو عشان تخوف حدا
توكلي على ربنا وكل تعب بتتعبه الوحدة منا اثناء الولادة
لها فيه اجر عند الله..
لاتخفي لاني تعبت بولادتي بس لما شفت
ابني والله نسيت كل التعب وهيني حامل من جديد وبنتضر لحضت
الولادة بفارغ الصبر
ربنا يسهل عليك ولادتك يارب

[sweet moon]

الحمدلله على سلامتك

ويتربى بعزكم وتشوفيه احلى عريس

[يــارا]

الحــمد للـــه على سلامتك وسلامة يوسف
وان شاء الله يربى بعزك وعز ابوه و ان شاء الله بتشوفو عريس