تجرتي مع الرجيم

[العاااالي مستواها]

السلام عليكم ورحمة الله وبركاته

أخواتي العزيزات . الدبدوبات <ولاتزعلوون النحيفات في المستقبل

بقولكن بعض الأشياء من واقع تجربتي أنا شخصيآ . إن شاء الله تنحفين مأقول أنها شي سحري على طول ينزل الوزن في يومين لا . إن شاء الله ينزل وزنك كيلو ويمكن أكثر في الأسبوع .

وبينزل وزنك بالتوكل على الله ومع المتابعه والاراده . والاستمرار .

بسم الله نبدأ


السكر ..أستخدم بديل السكر .على الاشياء الي ماتنشرب الى حاليه و خاصه لاصرتو تحبونها وماتستغنون عنها . مثل الحليب ..الكابتشينوا ..القهوة الفرنسيه والتركيه .

الحليب وللبن والزبادي ..بدلتها بقليل الدسم أو خالي الدسم ــ مع التكرار على زوجي خلاص تعود مايجيب الى خالي الدسم أو قليل .

الخبز ..أكثر الأحيان وأغلبها صار بر وستغنينا بعض الشي من الخبز الابيض .

زيت الطبخ ..ناخذ أخف زيت في السوبر ماركت ..وأكثر الاحيان أبدله بزيت زيتون .

المقليات ..أستغنيت عنها وإذا صـــار وبقلي سمك قليته بزيت زيتون فقط وغيره لا ماقلي . ومو على طول مره في كم شهر . والمصقع بعد مره في الشهرين

الرز .. حاولت والحمد الله ماعاد أطبخه الى مرتين بالاسبوع .وأذا طبخته سويت كمييه قليله مرره وقدمت معه نوعين سلطه .


المشروبات الغازيه ..حاولت أخفف منها على الأكل خاصه على الوجبات الأساسيه والحمد الله أستبدلتها بعصير ليمون بالنعناع .

اللبن .نطلبه لبن أكتيفيا قليل الدسم .



معجون الطماطم ....أستبدلته بطماط معلب أسمه طماطم مقشر .. أسميه ثنين في واحد ..لانه يغني عن الطماطم والمعجون في نفس الوقت لطبخ ويعطي نفس تسبيك المعجون للاكل .ويوفر الطماط العادي لسلطه .

أكثر الاكل أحاول أسويه بالطريقه الصحيه .الدجاج أسويه بالفرن والقصدير ...

الحلويـــــــات ..ماجيب مقاديرها مرره ..إذا مسكت وبسوي حلا جبت المقادير على حسب الحلى وفي وقتها ..

السنكرس وتوابعه وأخوانه المزايين ..إأطلب بالحبه مره في الشهر ذوق فقط .

طبخاتي .أكثرها خضـــار أو أدخل فيها أصناف خضار .واستغني عن الحوم قدر المستطاع .


والمهم وهو الأهم الي طبقته والحمد الله أنتظمت عليه ..

مقادير الطبخ ..صرت أطبخ مقدار لشخص واحد .بطبعنا ياسعوديين نحب كثر الاكل والاصناف .

فتبعت هالطريقه أطبخ نص الكميه ..اإذا شخصين أطبخ حق شخص واحد وهاكذا .. والحمد الله مايبقى شي من الوجبات .


المطاعم ...إذا رحنا لها ..أول شي نطلب السلطه والمقبلات الحجم الصغير . وبعدها بوقت نطلب الطبق الرئيسي .<< هاذي الطريقه تخليكم ماتطلبون واجد وأصناف كثيره من الأكل لأن السلطه خلاص يمدي الواحد شبع منها . فيكون الطبق الرئيسي صغير مره وخفيف ...الحلا مانطلبه لكل روحه للمطعم .. وإذا طلبنا نطلب لشخص واحد ههههههههه مو بخل بس خوفآ من السمنه وعلى أسمه حلا ذوق فقط. والحمد الله نطلع من المطعم وحنا خفاف وذقنا شي غير وتغيير روتين ..


المعجنات ..نادر مأسويها وإذا سويت بيتزاء أخليها مره رقيقه وخميرتها قليله .


التمر ...إذا قدمته أقدم كميه قليله في صحن صغيير .وخاصه لاصار نوع السكري ..

المكسرات والشبسات ..مأطلبها مـــره في البيت .لأنها تسمن بقووة .

الفواكهه ..أقدمها لوحده .مره في اليووم ..سواء في الليل أو العصر ..

العصائر المعلبه ..مأطلبها لأن كلها سكر ...أسوي عصير طازج إذا فيه فواكهه في البيت .


أنظف بيتي كل يوم ..حتى وهو نظيف .. كل يوم لازم أفر فييه .منها زياده نظافه ومنها حركه للجسم ..


في المناسبات وجلسات النسوان الي فيها أكل وسفر أشكال وألوان ..

علشان ماتكثرين في الأكل في المناسبات أكلي فواكهه أو ذوقي الأكل ذواقه فزي قومي من على السفره لأن السوالف مع الحريم على الاكل تخليك تاكلين ماتدرين عن نفسك .

إذا قهوة وفيها سفررة ..ذوقي على خفيف علشان موب حلووة تعزمك المرأه وتاعبه على سفرتها وتجلسين بجنب السفرة تصورينها ههه .. ولارجعتي بيتك إشربي شاهي مر بدون سكر .واذا جات عندك العزيمه .خليها قهوة على خفايف قدمي فواكهه مشكله .. و إقترحي عليهن الفواكهه أفضل من السفره .


**جربت البابونج ونعناع بدون سكر ..أأضيف ملعقة بابونج .مع ورق نعناع في إبريق .ثم أسكب عليها الماء المغلي .واتركه دون غليان .لمدة عشر دقائق .واشربه . ينحف ومع الاستمرار يبن فيك .
** الزنجبيل والنعناع ..بدون سكر ..
** أشرب ماء قبل الاكل ..
**أشرب شاهي بدوون سكر واضيف له نعناع ...
** إذا كان فيني حماس مشيت على السير الكهربائي .
**إذا بجلس عند الاب توب .ماخذ شي عندي لاأكل ولا شرب ..واذا مره ابي شي ..أخذت قهووة عربيه .
** أقفل فمي ههههههههه وخلاص ماعاد أكل من الساعه تسعه الليل .. فقط سوائل .


كل هاذا الي ذكرته جربتها ومازلت مستمره عليها ..أول شي لصحتي وراحتي النفسيه ..وثاني شي لنزول وزني بطريقه صحيه ولتثبيت الوزن ..

مافيه شي حارمه نفسي منه أكل بحدود وأعرف وش أكل .. والحمد الله وبفضل ربي .عرفت وش الي يزيد وزني وصرت أبتعد عنه .


أتمنى إنكم تستفيدون من تجربتي وإن شاء الله تعالى ينزل وزن كل وحده تبي تكون في قائمه النحيفات الغير هياكل .. <<يمديكن على التعبير .



أي سؤال أنا حاضره وفي الخدمه .


دمتن ودام (الطيب والصحه) فالكن




سبحان الله وبحمده ..سبحان الله العظيم

[ام السوس001]

الف الف مبروك اختي العالي مستواها بصراحة انتي غيرتي اسلوب حياتك كامل وانتي الكسبانة الجسم الحلو والصحة اللي الله يديمها عليكي


كنت حابة اسألك كم سؤال

كم كان وزنك قبل ؟ وكم صار هلأ ؟ وكم المدة الزمنية اللي نزل وزنك فيها



ان شاء الله يديم عليكي الصحة والهنا والرضا ....


وكل عام وانتي بخير يا أمر

[ام لميتى]

انا انضم لام السوس واسالك كم كان وزنك وكم صار لان تجربتك حفزنني لانك موبس غيرتي نضامك انت لا غيرتي نضام البيت كله

[صيد الخاطر]

ان شاء الله يديم عليكي الصحة والهنا والرضا ....





,والعقبال لنا ننحف

[ام ارجواااااان]

[إحساس إمرأة]

الله يعطيكالف الف عافية حبيباتي
تسلمييييييييين يا الغلا
على الموضوع الرائع ♥

[الحياه حلوة#]

الله يديم عليك الصحه والعافيه

[υм вtℓαα]

يعطيك الف عافيييه