ولدت الحمدلله بعد ما هبلت فيهم

[موزه فوشيه]

السلام عليكم ورحمة الله وبركاته

أبشركم ولدت الحمدلله بتاريخ8/11/1432 <<<بدري

أنا بكريه ومعروف ان البكريه تطوف عن موعدها أنا طوفت اسبوع بس <<<ماقصرتي
لما كان اخر موعد دخلوني على دكتوره سودانيه وسالتني اذا احس بوجع او لا

او نزلت مويات او شي اسئله روتينية

سوت اشاعه للبيبي وكل شي تمام

بعدها قالت لي اشلحي الكلوت<<<

وانا مسكينه مادري وش بتسوي
*
سوت كشف داخلي على قولتها بس يدها ثقيييييييييله

كان هذا يوم الثلاثاء وبعد ما طلعت من عندها صار ينزل معي دم
طنشت أحسبه من كشفها
بعدين بدا الطلق يروح ويجي بس مو منتظم ولا قلت لزوجي شي
ورحت لاهلي وانا ساكته
يوم الأربعاء في الليل بدا الطلق ينتظم ومطنشه <<من الخوف

ورحت للصيدليه اشتري مصاصه (لهايه) للنونو <<رايقه وهبلت فيهم كل ما مشينا شويه قلت وقفو جأت طلقه
الى الساعه 1 ونص الليل جا زوجي بياخذني شاف وجهي قال فيك شي

ضحكت بوجه وقلت لا قال الا وجهك مرررره اصفر قلت فيه الم يروح ويجي
قال يالله على المستشفى
قلت مو الحين شوي لين يشتد الألم كلم الدكتور وسأله قال الافضل انها تجي

قلت ابي أمي معي قال زوجي مايحتاج جلست ابكي وامي تبكي معي
وزوجي مصمم ان أمي ما تجي

ركبت للسياره وانا مبوزه ومشينا قالي تبغين امك تجي قلت إيه أبيها معي

ورجعنا لامي واخذناها معنا ورحنا وكل ماجات طلقه وانا بالسياره قلت وقف <<مدري وش كان قصدي يعني بتروح مثلا اذا وقف

وصلنا المستشفى ودخلت وقاسو الضغط والحرارة وحولوني على قسم. الولاده
مادخلت من الخوف رحت امشي فس المستشفى وأقول لامي خلينا نضيع مابي

ادخل <<<<ام الذكاء ياشيخ

ودخلت لهم الساعه 2ونص طبعا لحالي اول مادخلت كانت فيه وحده تصارخ

أنا جتني ام الركب ماقدرت امشي والسستر تقول تعالي أقولها لا مابي بطلع

وهي تضحك تقول انتي اول مره أقولها يس يس

قالت مافي كوف ولاده حلوه <<<لا ياشيخه شكلك ماجربتيها عشان تدرين

أخذت وزني وطولي ونوموني على سرير وركبو جهاز الطلق ونبض البيبي وركبت الغذايه وقالت في انتظار دكتوره تجي

قلت وش ورانا واسمع الحريم يصارخون وتجي الدكتوره المناوبه وتكشف <<يدها خفيفه ما شالله

وقالت توه 1ونص قالت الطلق عندك منتظم بنخليك ساعتين وبعدها آذا مافتح بنطلعك
وجلست ساعتين ورجعت الدكتوره وقالت بنطلعك الحين وكشفت توه 2 سانتي

قالت اتوقع انك بترجعين بكره في الظهر او العصر
طلعت وزوجي رفض أنام عند أمي يقول المستشفى اقرب لبيتنا

ورحنا رجعنا أمي لبيتها ونزلت معها شوي الا حسيت شي يصب وأقول لامي الحقيني <<نزل مويه مع دم

ورحت مع زوجي ولا قلت شي لانه اذا قلت له بيرجعني للمستشفى وانا ابي أنام

وصلت بيتي على 6 ونص ونمت اصحى على الألم بس اطنش النوم غالبني

اصحى اتالم وارجع أنام لما الساعه 10 ونص صحيت وصحى زوجي يصلح الفطور

رحت الحمام <<وانتو بكرامه
نزلت في يدي كتله غريبه دم مع اشياء أنا شفتها جلست استفرغ وهي باقي في يدي زوجي يقول ارميها وانا مو قادره من الخوف

كلمت أمي وقلت لها تجي عندي وجات أمي وجلسنا ننظف البيت ابي أنسى الألم
وجلسنا لما الساعه 3العصر جاب زوجي غدا أنا ماقدرت اكل بس نائمه مثل المخدره
ورحنا للمستشفى وصدق كلام الدكتوره
دخلت قسم الرعب

والحريم هاتك صياح

وفيه سستر تصرخ على حرمه تقول انتي مافي بيبي انتي كبير هذا بيبي رقم ثلاثه انتي تسوي كذا خلاص اسكت ...والله رحمتها

وجات السستر تركب الأجهزة والغذايه وجات سسترتهم العصبيه تسألني: تقول انتي ايش يشرب
وانا من الخوف أقولها شاربه لبن <<<
وهي تقول لا انتي تشربين قرفه قلت لا والله مافي اشرب وتناظرني بطرف عينها يمممممممه تخوف
بعدين جأت دكتوره سودانيه استشاريه حبوبه ومعها طبيبه امتياز وكشفت الطبيبة وتصارخ علي وتقول خليني ياماما اكشف
صرخت عليها وقلت أنا ماسكتك هذا انتي تكشفين
وسكتت ما عاد قالت شي
والدكتورة تقولي اسمك حلو قلت الله يحلي أيامك بس خلي ذي تنقلع
ضحكت وقال الحين أنا عاوزتك تنسيها

وقالت ينفك المويه انو مشتبهين انها تبرزت ونبضها ضعف لازم يركبو جهاز النبضات من تحت

وفكو المويه وقالت نبضها مره ضعيف اذا استمر كذا بنحولك عمليات وانا اقول إيه إيه<<اسلك

شوي جا اخصائي التخدير ويسأل متى اخر وجبه أكلتها وايش كانت وفيه امراض شي <<الاسئله المعتاده

وهو ياخذ البيانات اقوله اصبر معي طلقه وهو يضحك ويقول خذي راحتك أنا استحيت اصرخ او اتالم قدامه فقطعت شرشف السرير

وجلست انتظر واسمع حرمه تصارخ تقول سستر الحقوني بموت ابي مويه

واسأل السستر اللي عندي لسى ما ولدت قالت لسى4سانتي <<اسأل عن الناس ولا سالت عن نفسي

شوي الا جأت الدكتوره قالت راح ندخلك غرفه الولاده قلت توكلنا على الله <<مسالمه
ودخلوني غرفه الولاده ومعي سستر من جنوب افريقيا اول ماشفتها خفت بس حبوووبه مره عسل

وجلست وحطو لي الأكسجين وشوي دخلت أمي عندي وكل ماجات طلقه أمي تفرك ظهري تبي تتخفف عني الألم اصرخ عليها مابي احد يلمسني

وشوي دخل زوجي وجلس عندي وأخذ هوشه شوي <<خله يحس بالمعاناة

وطلع عطوني مخدر رهييييب تشفطين تروحين عالم ثاني
طبعا جلست اهذري على السستر

ومادري كيف لساني انقلب انقليزي واونواع التحشيش

أقولها سستر
هي:يس
أنا : اخوي يدرس طب <<<سلامات
هي: جود <<احسها تقول وش اسوي لك
أنا :سستر
هي:يس
أنا:أنا ادرس جغرافيا بس مو حلو
هي:أوكي <<احسها تقول ياذا البثره
أنا: سستر
هي:يس
أنا :انتي شكلك بخوف بس انك حبوبه <<انواع التحشيش
أنا :سستر
هي:نوم نوم <<طفشتها

وخلص شفتها ومسكت بلوزتها وحلفت عليها ماتروح وهي تقول أنا يبي يروح بيت نوم بعدين يجي <<تلعب علي

وجات بعدها سستر بعد حليله وطبعا التحشيش مستمر
أنا :سستر
هي:يس
أنا:اذا قلت لك شي مو حلو تكفييين سامحيني <<<حسيت أني بموت

وبعدين عطتني عصير الربيع تفاح حاااار تقول اشرب
أقولها مابي تقول بيبي أنتا جوعان أقولها ابي مويه تقول لا ممكن انت عمليه بعدين مشكله
واشرب وتعطيني واحد ثاني واشرب
وجلست لما العشا وجات الدكتوره كشفت فاتح3ونص بس من العصر ماتغير ومعها الطبيبة ودكتوره ثانيه

شوي جا دكتور يقول لي خذي أبره الظهر قلت ما أبيها قال ليش سامعه عن أضرارها قلت إيه

قال مو بكيفك بنعطيك إياها قلت مو بكيفك انت قال عطيني سبب مقنع حتى ما اعطيك أيها

قلت أنا ابي الأجر << احلفي
قال انتي ماجوره بس راح نعطيك أيها وأصرخ عليه وأقول مو بكيفك

شوي الا الدكتوره تقول بسرعه على غرفه العمليات البيبي خلاص بيموت

وانا ماسكه المخدر واخذته مني السستر وأصرخ عليها هاتيه والدكتور يضحك يقول أعطيها الشيشه

وتروح السستر تجيب لي مويه تنقط في فمي تقول انتي مسكين يبي مويه

*وجابو لي السرير قلت كيف اطلع عليه مقدر قالو ترى البيبي بيموت ما ادري كيف نطيت عليه

ويودوني غرفه العمليات وانا أتشهد<<حشى صار حرب مو ولاده

ودخلت غرفه العمليات وكلها رجال
جا واحد شكله توه متخرج المهم انه صغير وقال بنعطيك بنج نصفي قلت مو بكيفك قال هو احسن
قلت انت مالك دخل قال بنادي الدكتور مسكت يده قلت ماتروح خفت يبنجني نصفي

والتفت الا أشوف دكتور كبير سن صرخت عليه دكتور
هو خاف قال أش فيه
قلت انت اللي بتشقني <<حسيت نفسي أني قطعه قماش على غفله

هو ضحك وقال ايوه أنا اللي بسوي العمليه

وحطو شي قدامي مثل الحديده وماحسيت الا ثوبي طاااااار <<يافشله

وجابو الكمام قال اشفطي شفطت وحسيت بهم يمسحون بطني قلت اصبروو

قالو أش فيه قلت أنا باقي صاحيه <<<سلامات

واسمعهم يضحكون وشفطت ثانيه وغبت عن الدنيا


سوو لي العمليه الساعه 9،45 بالليل

لمافقت ناظرت الساعه11وربع

والسستر تقول مدام قوم انتي في ولاده
والمس بطني راحت الكرشه

وبجنبي حرمه توها تفوق واسأل السستر وش جابت <<يقطع ام اللقافه

وتقول مدري وأسالها ايش جابت طنشتني <<مالومها لقافه زايده

وأسالها أنا ايش جبت <<<أخيرا فكرت اسأل عن نفسي

قالت بنت وجابوها لي شفتها وبستها وأخذوها للحضانة


وتوته توته خلصت الحدوته


ادري طولت عليكم بس حبيت أنكم تعيشون معي الجو

ولدت في مستشفى الحرس بالرياض عنايتهم ممتازه بس عيبهم يخلون البيبي عندك وماياخذونها ولازم ترضعيها طبيعي

وختاما اي سؤال او استفسار الرجاء الاتصال على الرقم <<<معليش الذاكره مضروبه هذي الايام

[سرووءة]

ههههههههههههههههه
ربي يسعدك ضحكتيني
الحمدلله عسلامتك والف مبروك..
تتربى بعزك يارب
حلوة التفاصيل بقصتك
عشان تفيدنا نحن البكريات ..
^^

[خجل*أنثى]

الحمدلله ع السلااامه..
عشت الاكشن مزبووووط..
ربي يحفظ لك بنوتتتك..

[فليك]

الف الحمدلله على سلامتك و سلامة بنوتتك
تفرحوا بيها يارب

[hanofh]

الف الحمد لله على سلامتك ومبروك ماجاك وعقبالنا ان شاء الله

[سهاد-الروح]

ههههههههههه الف الحمد لله ع السلامة وتتربى بعزكم يارب وربي عيشتيني الجو ....

[&&RORO&&]

ههههههههههههههههههههههههههههههههههههههه وربي انك توووحفه الله يسعدك
الف مبروووووووووك البنوته يااعسل تتربى في عزكم يارب

[ام هشومي]

الحمدلله على سلامتك والله انك فعلا انواع التحشيش رهيبه الله يتمم عليك

[ايفوريا]

ههههههههه
الف الحمدلله على سلامتك
والف الف مبروووك ماجاك
صراحه حلو التحشيش مع الممرضات
وقصتك حلوه
الله يعجل بولادتي ويسهلها

[هنّوسه]

موزه ،،، دخلتيني جو لدرجة مسكت بطني حسيت نفسي بآولد الحين هههههههه

والله خوفتيني ،، بآصيح من الخوفّ

ألف الحمدلله عً لسلآمة ومبروووك مآ جآااك

وقولي لنآ كيف شعورك آول ما شفتي البنوتة