قصة ولادتي بمستشفى االحبيب (الريان) على يد الرائعة د-خالدة العتيبي

~*جْ ــوَلىْ*~ · 04-16-2011, 01:31 AM

رجعت لكم بالأكشن

المهم
الصباح يوم الاحد صحيت وكنت مارة طفشانه من جد خلاص لا النوم راحة ولا الجلسة راحة:(
وكل يوم اقول بيجيني طلق او اي علامة للولادة بس مافيه
دقيت على امي وقلت لها اني طفشت ومليت وانا خانقتني العبرة
قالت روي اليوم للدكتورة اسم انه باقي لك تخطيط نبض الجنين وخليها تشوف وضعك
قلت اوكي قفلت ودقيت على وقلت آخذ راية قال اوكي انا بجي على الظهر كلمي وخذي موعد
دقيت على الحبيب وقالت مافيه الا تجين على الانتظار
المهم اخذت لي شاور وشلت جسمي;)
ورحت والحمدلله ماطولت سويت تخطيط ودخلت على الدكتوروة قالت وضع البيبي والنبض اوكي
ومافي اي طلق
انا:(
قالت بعطيك فرصة اسبوع امشي وكثري ؟؟؟؟
قلت لها قاعدة اسوي كل شي العلاقة والتمارين ومشيت وطلعت الدرج ونزلت لين
قالت اجل خليني افحصك
انا مرة فرحت وقلت يارب اسمع خبر حلو
قالت ماشاء الله الرحم مفتوح 3وزيادة وبسويلك تحريض واليوم تدخلين ولادة
قالت روحي جيبي شنطتك وتمشي والعصر تعالي

رحت عند امي وتغديت
ونزل معاي شوية دم من الكشف
ومشيت واخذت الشنطة ورحت انا وامي
ودخلت عليها وكشفت قالت صار اربعة سألتني اذا معاي مغص قلت لا
سوت لي تحريض مرة ثانية وقالت خلاص تدخلين وافتح لك الموية ويجيك الطلق
قلت اوكي
دقت على قسم الولادة وقالت للأسف الغرف كلها مليانه اذا بيتك قريب روحي واذا فضت غرفة ادق عليك تجين
عاد الحمدلله بيتي مرة قريب
رحت للبيت وشربت زمزم مقري فية ورد الولادة و ملعقة عسل وشربت مغلي الزعفران
وانسدحت وجتني 3 طلقات خفيفات ودخلت دورة المياة لقيت دم اكثر من اللي قبل
عرفت ان الفرج قريب
الساعة تسعة دقت على الدكتورة وقالت فيه سرير تعالي
رحت لها كشفت علي وقالت لسه 4 سم
ودخلتني غرفة الولادة الغرفة بصراحة روعة ومريحة نفسيآ
بس يوم عطوني اغير ملابسي بكيت
وزوجي قال خلاص الولادة فيك فيك اتكلي على ربك وان شاء الله بتقومين بالسلامة
جت الدكتورة وفتحت لي الموية (( مافيها الم نهائيآ));)
ورجعت شيكت علي بعد ساعة مافي اي طلق
وحطولي طلق صناعي مع المغذي وبدا يزيد شوي شوي بس
شمي وردة وطفي شمعة مفعولها عجيب
وامي بعد قلبي الله لايحرمني منها تقرى علي الورد وسورة مريم
وتمسح على ظهري وبطني موية زمزم
تعطي راحة غريبة
وبعدها كشفت علي وصار 5 سم
وبعد ساعة زادت لي الطلق وصار 6سم
وبعدها عطتني ابرة في الورك وهنا الطلق
وشوي وجات وكشفت وقالت ماشاء الله 8 سم
انا بوسع لك عنق الرحم بس ساعديني عشان تخلصين بسرعة
المهم دخلت يدها وقالت انا لمست راس البيبي وقت الطلقة اذكري ربك وادفعي
وانا ادفع
فكوا السرير ورفعوا رجليني
وجوا معا ممرضتين روعة ساعدوني كثير
وقالت خذي راحة شوي ورجعت وعذنا نفس الطريقة وانا ادفع
وسوت لي توسيع بس الحمدلله ماتحسين بألم
وقالت يالله انا اشوف راس البيبي قولي لا اله الا الله
وادفعي وانا ادفع والنيرسات يقولون برافوا بوش بوش
ود-خالدة قالت ممتاز ماشاء الله يالله كمان ادفعي الطلقة الجاية ان شاء الله خلاص
وثلاث دفعات وصارت هيونة على صدري
وربي فرجها على الساعة 1:23 صباح الاثنين
يارب لك الحمد تساهيل من ربي
وفعلا شعور لايوصف تنسين كل التعب والالم اذا سمعتي صوتهم ياقلبي عليهم
ولاتنسون
1- موية زمزم مقري فيها ورد الولادة اشربي منه كل صبح وقبل ماتنامين
وامسحي على بطنك وظهرك وقولي اللهم اني اسألك حسن الخلق وهون الطلق من تدخلين التاسع
2- عسل نفس الشي تقرين في الورد وتاخذين على الريق كل يوم ملعقة مع 7حبات حبة البركة
ولازم تاخذينهم بنية تسهيل الولادة وتحسنين ظنك بالله00
وفعلا ربي عند حسن ظن عبده به00
وارجع اقول لاتخافون من الولادة اهم شي تكونين متعاونة مع الدكتورة ولاتشدين اعصابك
لاتخافين من الطلق الصناعي والله انه رحمة من ربي00
على كثر ماكنت خايفة منه الا اني حمدت ربي0
وما انسى اختيار الدكتورة والمستشفى كان موفق
ودكتورتي كانت د-خالدة العتيبي مستشفى الحبيب الريان
روعة بمعنى الكلمة الله يسعدها ويوفقها يارب شااااطرة وسريعة انا حبيت فيها هالنقطة

حتى امي تمدحها والمستشفى كويس وممرضاته والحضانة كلو تمام
الاكل من دايت سنتر ماعجبني مرة وخاصة الفطور
وبس اي سؤال انا حاضرة
وربي يتمم على باقي الكروشات ويفرحكم بشوفة بيبياتكم بصحه وسلامة
واسفة على الاطالة
احبكم وما انسى ايام الحمل صدق كلش له طعم يوم دخلت هنا خنقتني العبرة
الله لايحرمني وارجع اعيش هاللحظات من جديدلكم

روح مغليها · 04-16-2011, 02:00 AM

ماشاء الله

الحمدلله على سلامتك ومبرووووووووووك ماجبتي
الله يرزقك برها وعقبال ماتشوفينها عروسه يارب

الله يهون علينا يااااااااااااارب

آلهنوف · 04-16-2011, 02:02 AM

انا رديت عليك بالتجمع بالمنتدي الثاني اغلب بنات الاقلاع هنا

الحمد لله على سلامتك وسلامت البيبي

أإأم ع‘ـــزُوـوزُ · 04-16-2011, 02:05 AM

ماشاء الله تبارك الله ماحسيتي بالطلق إلآ لما فتح الرحم 6 ماشاء الله صدق الولاده تساهيل الحمدالله ربي سهلك ولادتك مثلي ماتعبت كثير كان رحمي بسررررررررعه ينفتح بس 3 ساعات الم الطلق

ومبروووك العروسه والحمد الله على سلآمتكم وتتربى بعزكم يارب ..

وربي حطك بيد دكتوره رآئعه ذكرتني بدكتورتي أحسهـآ ههي إللي ولدت مو أنـآ

مستشفى الحبيب بأي منطقه أفكر بالولاده الجايه ....

واعيد أبارك لك ماشاء الله عليكي ....

روح الورد · 04-16-2011, 02:18 AM

الحمدلله على سلامتك ومبرووووووووووك ماجبتي
الله يرزقك برها وعقبال ماتشوفينها عروسه يارب

روضة المها · 04-16-2011, 02:31 AM

الف مبروك حبيبتي
والحمدلله ع السلامه
والله يبارك لج فيها ويسخرها لج قادر ياكريم

بريق اللجين · 04-16-2011, 02:52 AM

ماشاء الله
الف مبروك وتتربى بعزكم
وربي يوسع عليك دنيا وآخرة ويطمن قلبك
زي ماطمنتينا........
ويخليلك البنوتة

أم ولاء · 04-16-2011, 06:06 AM

الفـ مبرووووووووكـ ..~
الحمدلله على سلآمتج وسلآمة البنووته ...
تتربى بعزكمـ ..~

دلع بنات · 04-16-2011, 06:14 AM

الف الف الحمدلله ع سلامتك انتي وهيووونه الله يخليها لك يارب
وريحتيني الله يريحك حسيت ان الولاده سهله مشاء الله

بس يالغلا كم تكلفه الولاده بالحبيب اذا ماعندك مانع ؟؟

ام تميم 66 · 04-16-2011, 06:21 AM

الف الف الحمد لله على سلامتك يا الغلا وتتربى بعزكم ياارب,,,

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
مستشفى سليمان الحبيب في الريان	nadaey	إستفسارات المستشفيات و عيادات نساء وولادة	18	08-24-2013 05:38 AM
الى امي الصديقة الرائعة	سوار العسل	ملتقى عضوات حوامل	3	03-22-2011 09:51 PM
مستشفى الحبيب الريان	ملكة القلوب	إستفسارات المستشفيات و عيادات نساء وولادة	4	01-14-2011 01:03 PM
معلقة امرؤ القيس الرائعة .....قفا نبك	نورا	ملتقى عضوات حوامل	5	06-15-2009 06:13 PM