قصة وللدتي بأحلى ادم

[مياسه محمد]

صباح الخير عالجميع..حبيت اكتبلكم قصة ولادتي لاني حسيت اريد اشارك الكل بفرحتي ويارب تفيدكم تجربتي..في اليوم الي سبق موعد ولادتي رحنا انا و زوجي سويت دوبلر والحمد لله كان كلشي تمام وبيومهه تمشيت ومن رجعت للبيت كان كلشي طبيعي ولا احس بأي الم لكن كان ينزل عليه ماء قليل ولكن على دفعات** وبليلتهه كنا سهرانين انا وزوجي ولاحظت الماء بدا يزيد وبصراحة بديت اخاف..ولما صارت الساعة 5 الفجر نمت وما صحيت الا ساعة 11 على اوجاع خفيفة بلحظتهه جاني احساس وكلت لزوجي شكلي راح اولد اليوم وكان يوم 27 من شهري..المهم بدت الاوجاع تزيد والوقت ينتضم*دكيت على اهلي وانطيتهم خبر وكلت لزوجي نروح المستشفى بعد ما اجهز نفسي*اكلت ملعقة عسل وشربت كاسه هيل لان سامعة انه يحمي الطلق..وبالفعل شوية شوية الاوجاع تزيد..رحنة للمستشفى وفحصتني رئيسه الممرضات طبعا خبرة وتفهم اكثر من الطبيبه ومجربه. وخلال الفحص سوتلي تحفيز.كالت اليوم تولدين التوسع اصبعين لكن ميه الطفل قليله يعني لازم تولدين اليوم..وخبرت زوجي انها بتخليلي طلق صناعي وبولد تقريبا ساعة 6..زوجي كال بنرجع ونجي ساعة 5 ..رجعنة البيت والوجع يزيد اكثر..استحميت بمي حار وبدا الطلق يجيني كل شوية وانا اقرا ادعية كنت جامعة ادعيه تسهيل الولادة والايات كلهه بورقة واامشي بالبيت واقراهه وانا ابكي من شدة الوجع.. وبعد ساعتين ما اتحملت كلت لزوجي وديني لمستشفى ورحنة انا وامي واختي واخويه وزوجي..واخذت معي 7 تمرات اكلتهم بالطريق ولما وصلنة المستشفى فحصتني مرة ثانية وكالت التوسع اصبعين ونص وهم سوتلي تحفيز وخلتلي المغذي مع الطلق الصناعي وزاد الوجع اكثلر واكثر والله اباوع على الساعة احس الوكت ما يمشي ..امي بجنبي تقرا عليه واختي ماسكه ايدي وانا اصيح يا الله يا رب سهلي..وكل شويه تفحصي واسألها الله يخليكي شوكت اولد راح اموت تقولي اصبري بعد شويه..والوجع يارب لا يحتمل الله يجازي امهاتنا الجنة..وبعد فترة فحصتني كالت يلا لصاله الولادة**انا فرحت اريد اخلص
ما دريت الي جاي اصعب..وبصاله الولادة انتضرت اكثر ونفس المعاناه صرت اصرخ راح اموووت الحكولي اريد اولد قيصري الله يخليكم وتكولي ما يصير انتي وصلتي مرحلة وراس البيبي دا اشوفة وبعد انتضار كالت يلا ادفعي وادفع واتنفس ويلا ويلا وادفع وطبعا اختي بجنبي وساندة ضهري وانا ادفع الى ان سحبت البيبي وسبحان الله اول ما طلع اختفى الوجع كله وما عاد حسيت بشي ومن شفتة يا عمري نسيت كل التعب..وصرت اصيح الحمد لله الحمد لله.يا كريم يا الله لا تحرم انثى من هذه اللحضه..وبعدة كلت لهم اريدة اريد اشوفة ودخل زوجي وخلة ادم بحضني ..والان هو بحضني ومالي عليه حياتي الله لا يحرمني منه ..صح تعب ومسؤليه وحارمني طعم النوم لكن احساس الامومه احساس رائع..اسسسسسسسسسسفة عالاطاله وربي يسهل لجميع..