حاليا في عملية طفل انابيب طلو على موضوعي انا محتاجه دعمكم ودعائكم

[يارحيم]

انا حاليا في كورس ابر التنشيط استعدادا لعملية طفل انابيب.. طبعا محد من اللي حولنا او اقاربنا يعرف شي عن الموضوع الكل يعتقد اننا اجلنا الحمل شوي لظروف معينه وبس.. وحنا قررنا انه شي خاص فينا وطبعا اي موضوع يطلع عن اثنين شاع لذلك انا وزوجي قررنا ما نقول لاحد ابدا مهما كان قريب..

هالشي تعبني شوي احس احتاج اني افضفض واتكلم واحس انه فيه احد يتابعني غير زوجي وهالسبب خلاني اشترك في هالمنتدى.. كنت بكتب تطوراتي في موضوع تجمع امهات اطفال الانابيب بس صراحه الموضوع ميت وكتبت ردين ومحد شارك..

عشان كذا قررت اكتب موضوعي الخاص واتمنى انكم تشاركوني وتؤازروني في هالفترة الصعبه والخوف المرتقب.. احتاج دعمكم ودعائكم لي..

انا وزوجي سليمين وسبب عدم الانجاب مجهول (متزوجين لنا اكثر من ثلاث سنوات وحاولنا لمدة سنة) ولان وقتنا ضيق وعشان توفير الفلوس الدكتور نصحنا بالانابيب وقال ان الاخصاب الصناعي ممكن يكون ضياع وقت ومال واحنا مرة مستعجلين ونبي الاضمن..

توكلنا على الله وبدينا .. اول شي اخذت حبوب منع حمل مدة 24 يوم ومعها مضاد حيوي اخر ثلاث ايام وبعدها وقفتها ولما نزلت الدورة بديت كورس الابر.. انا اخذ الابر بالبيت وكان شي مرعب بالبدايه لاني في حياتي ماضربت نفسي ابره واساسا اخاف اشوف الابر حتى لو بسوي اي تحليل عادي دايما اغمض لاني اخاف اشوف شكل الابره.. لكن قدر الله وماشاء فعل..

بصعووووبه قدرت اخذ اول ابره كنت ماسكتها عند بطني عشر دقايق مو قادره ادخلها لين توكلت على ربي ودخلتها بشويش والحمدلله ما عورتني ابدا بالذات اني حطيت ثلج على المنطقه مرة يخدر.. بس يعني اول مرة اخذتها غريبه دخت وتعبت وعورني المكان من داخل واتوقع لان اعصابي كانت مشدوده وخايفه لاني لما اخذتها من بكرا عادي ما دخت ولا شي..

حاليا احقن جونال اف 225 ومينابور وهو عباره عن سائل اخلطه مع بودره واحقنها.. كلها اخذها في منطقة البطن تحت السرة.. اليوم هو ثالث يوم بكورس الابر رحت الصباح سويت تحليل دم وقالو كل شي اوكي وبكرا بروح الصبح مرة ثانيه اسوي سونار.. مادري كم باقي لي بعد بس اتوقع 10 ايام زياده ويحددون لي عملية الترجيع..

هذي تطوراتي الى اليوم وان شاء الله بوافيكم بكل شي اول باول وابي منكم الدعاااااااااااااااء لانه صعب علي ماديا ووقتيا اني اعيد العمليه امنيتي تضبط من اول مرة ولكن طبعا رح ارضى بقضاء الله مهما كانت النتيجه..

اسفه على الاطاله واشكركم لسعة صدوركم..