المشد الاندونيسي فترة النفاس

[بريق اللجين]

السلام عليكم ورحمة الله وبركاته
حابة اسألكم عن لبس المشد الاندونوسي فترة النفااس
لان فيه ناس يمدحونه حييل والبعض يسبه
وانا محتارة ومترددة اشريه ولا لا ؟؟
واللي جربته متى البسته.. بعد الولادة على طول ولا كيف؟
وكم المدة؟؟........
واذا لبسته وتركته فيه مضار على شكل البطن !!
اتمنى اللي تعرف او جربته تقولي لاني على وشك ولادة
الله يسهل علي وعلى بااقي الحواامل ياااارب

[rooraa]

اهلين اختي والله انا ما عندي خبره بس اشوف كتير يربطو لومو بالمشد بالشماغ بس انا ماعمري ربط وان شاء الله يفيدونا المجربات

[حنين الجنة]

انا عن نفسي ماعرف عنه بس وجدت لك هالموضوع



معلومات عن المشد مقتبسه عن ام الجوري من الكويت بعد الاستئذان منها ,,


المشد الاندونيسي وكما هو معروف يمنع ترهل البطن بعد الولاده ويشد الظهر والجسم ولكل من تعمل ريجيم

المشد طوله 10 امتار وعرضه تقريبا شبر يلبس طول اليوم ما عدا وقت النوم وعلى الاقل لمدة شهر وراح تلقين الجسم ملفوف والكرشة رايحة وحتى ممكن تخسرين وزن لأنش راح تبطلين تاكلين طول ما هو حاكرش طول اليوم >>>

بالنسبة للوالدة يلف المشد حول البطن بعد الولاده بأسبوع

يجب عدم شد المشد بقوة حول البطن في الايام الاولى لما بعد الولادة ولكن يتم التدرج في الشد كل ثلاث أيام
أما اللي بتسوي ريجيم فعادي تلفه بس انها تسوي تمارين ويفضل المشي ولو نص ساعة 5 ايام بالاسبوع ...
ما في شي يجي بسهولة ابد اذا تبين الكرشة تطير اولا لازم يكون عندش صبر وبال طويل والكرشة اللي جات بعد سنين وكم طفل ما تروح بيوم وليلة وفي المقابل الايام تمشي بسرعة ...
المشد باول يومين بيضاقش وهذا شي طبيعي بس بعدها بتتعودين عليه خاصة لو انش في اللحظة اللي بتتضايقين منها بتفكرين انها بتكون السبب في رشاقتش اللي دايم تحلمين فيها وانش راح تلبسين اللي تبين من غير احراج
المشد تسوينه مثل الباندج او الشاش و تدهنين بطنش بالزيت او اي كريم تخسيس و تشفطين بطنش كثر ما تقدرين وتلفينه على بطنش من تحت لفوق وتظلين فيه طول اليوم ... ما عدا وقت النوم ... ...


بس هو غير عن الكورسيه

الفرق بينهم ان الكورسيه يخش الكرشة مؤقتاً ...
اما المشد بعد الاستعمال الصح يشيلها تماما ويخفيها للابد ان شاء الله
تخلينه عليش طول اليوم ما عدا وقت النوم واقل شي لمدة شهر والافضل شهرين
بتلقين جسمش صار ملفوف وعندش خصر وتختفي الكرشة للابد
فعمله نفس تحزيم المعدة لأنش طول ما انتي لابسته ما راح تاكلين وايد ... ويفضل الاكثار من شرب الماي
وكلي تفاحة بعد كل وجبة غداء...
كلي روب قليل الدسم بالليل كل يوم ...
واذا ما عندش مشاكل بالمعدة
تجهزبن كل ليلة كوب ماي مغلي تعصرين فيه نص ليمونة ونص ملعقة صغيرة كمون وتقطين النص ليمونة داخل القلاص وتغطينها
الصبح تشربين كوب ماي بدرجة حرارة الغرفة وبعدها هذا الكوب اللي فيه الليمون والكمون وبعدها بنص او ساعة الريوق ...
اشربي الشاي الاخضر .. امتنعي عن الشرب اثناء الأكل .. كلي ببطء .. ابتعدي عن النشويات واتركيها اسبوع كامل وعودي اليها ثلاث ايام ثم اتركيها اسبوعا اخر وهكذا ... ( النشويات هي الارز – البطاط – المكرونة – أي شي مصنوع من الطحين مثل الخبز والفطاير والكيك والبسكوت وغيرها )
اكثري من الخضروات... واشربي العصائر الطازجة ... وابتعدي عن البيبسي ...

بعد انتهاء الفترة المفروضة لنيل مطلبك من المشد لا تنسي انه وحتى وقت الدوره يجب شد البطن ولفها بالمشد بشكل ثابت على البطن والمعده وهي مفيدة جداً في شد البطن ... أي كل شهر لفي بطنك بالمشد وقت الدورة الشهرية ... حتى تتجنبي مستقبلا ترهلها ....


لا تنامين وانتي لافة المشد ... افتحيه وريحي نفسش وقت النوم علشان الدورة الدموية تمشي وتنشط وتفقدين خلالها الكثير من السعرات الحرارية

[rose]

انا جربته ياعسل من خامس يوم بالولادة انتبهي ماهو باول يوم تلبسيه اعطي مجال للدم ينزل
وهو ممتااااااااااز من اسبوع وشوي تشوفي شوي البطن تختفي اتوكلي ع الله واشتريه ولازم وحدة تربطلك هو

[!~¤ حياتي لك ¤~!]

الحمد لله اني اشتريته
ان شاااء الله ما يضرر


يسلمووو على الطرح

تقبلي مروووري

[الريم الشارد]

انا بعد ان شاء الله ناويه اشتريه للنفاس لاني سمعته عنه انه كويس

[Queen DadoOo]

اشترية مررة حلو
انا شغالة اندونيسية قالتلي على الاقل 6او7شهور تربطي بطنك بعد الولادة عشان مايصير فيه بطن

[بريق اللجين]

يعطيكم العافية
صراحة ماقصرتوا
كفيتوا ووفيتوا
وان شاء الله بكرة اروح اشتريه
لكن بسألكم ؟؟
وين الاقيه بالصيدلية ولا بمحل الملابس الداخلية.....؟
وكيف اعرف الاصلي""يعني كم سعره""

[rose]

ماتلقيه بالصيدلية ممكن تلقيه بمحلات شعبية
او لو عندكم شغالة اندونسية توصيها ترسل وتجيبلك
المهم ماهو بالصيدليات
وسعره مرة رخيص مايكلف المية

[روح قلبو]

موضوع مميز
انا ناويه اشتريه لاكن عادي استخدمه من اول يوم مو افضل من بعد اسبوع