السفر بالسيارة في السادس

[حلا جدة]

سلام يابنات ياكروشات
ابغى استشيركم في موضوع انا من جدة والاسبوع الجاي بنسافر أبها بالسيارة ، طبعا انتم عارفين انه المشواار طويل من الغرب للجنوب وانا الان بالشهر السادس
هل فيه ضرر عليا أو على الجنين ؟
ومين فيكم سافرت بالسيارة وهي حامل؟
وايش هي الاحتياطات اللي اتخذها ؟
افيدوووني

[بـدر البدور]

والله مادري شاقولج بس احسه تعب عليج
والله يساعدج وتوصلين بسلامه

[خجل*أنثى]

والله أفضل ماتساافري قبل ماتسألي دكتورتك..وهي راح تقول لك بنااء ع وضعك لأن مو كل الحوامل زي بعض..ربي يتمم لك ع خييييير ياااارب..

[أم روضة]

هلا حبيبتي
تعرفين أنا عندي خمس اسقاطات
وبحملي هذا وهو الحمل السادس وكلت آمري لله سبحانه وتعالى وكنت توني بالشهر الاول وسافرت من اليمن للإمارات وتمييت 4 أسابيع وبعدها سافرت للسعودية من أبوظبي للدمام ومن الدمام للمدينة ومن المدينة لمكة ومن مكة لجدة ومن جدة للمدينة وبعدها للدمام وبعدها لأبوظبي صحيح تعبت

بس كنت مريحة نفسي بالسيارة ونايمة طول الوقت وريلي يضحك عليه وكان يسوق بالنهار علشان يشوف الطريق عدل هذا كله وانا بالشهر الثالث تقريبا والحمدلله

حبيبتي انتي الحين بالشهر السادس إذا انتي خايفة وسفرتج مب مهمة لاتسافرين

وبعدين وكلي أمرج لله سبحانه وتعالى وإن شاء الله راح يثبت حملج وتقر عيونكم بشوفته....أهم شي حسن الظن بالله

والسموووحة على الاطالة

[جمان]

انا برد عليك وانا في ابها ومثلك بالشهر السادس بصراحه سافرت الاسبوع للي فات يوم الخميس الفجر الساعه2ونص ووصلنا 11 ونص الصباح صراحه كانت السفره روعه ولا تعب ولاشي بالنسبه ليه تعبني ولدي عمرهسنه ونص لانه من مكه الين ابها وهوه على رجلي لانه كان يدوخ ويطلع الله يكرمك فعشان كذا تعبت شويه معاه لاكن من ناحيتي لا بالعكس كانت روعه بس ريحي نفسك لو تعبتي

[Ghaawe]

اسألي دكتورتك واتوكلي على الله

[خواطر مكسوره]

والله بعد انا ودي اسافر وانا الحين توي داشه الشهر السابع والله يعين

[اميره باوصافها]

احس المسافه بعيده ...انا مثلك بالسادس بس سافرت من الاحساء للخبر
ولاحظت رجولي تنفخت لاني طول الوقت منزلاها ...حاولي ترفع رجولك بين الوقت والثاني وان شاء الله مافي الا الخير

[أميرة زماني]

انا سافرت وكنت في الخامس من الشرقيه للمدينه المنوره

والدكتوره قالت لي اشربي ماي كثير وكل ما نزلتو محطه انزلي امشي وتحركي

والحمد لله صار الي طلبت الدكتوره

[ميزتي صبري]

مو كل الحمل سوا بس اذا مو ضروري لاتروحين مو زين السفر يسبب ارهاق ويمكن ولاده مبكره وانتي ماتدرين وش ربي يكتب لك استخييري ربك