ديوانية البحرين - دردشة حوامل البحرين - البحرينيات

[ام احلى قمر]

شموووووووسة
اصلاا اني ام كشة مثلكم .,,,خخخخ وين راااح حسون كحييييل لعيون
اكوا مغربلني وياه الحفاظة وكل يوم نواح يبي يروووح المدرسة
ويجي ليه الباص
حلم حياتة
كل يتخيل يروح المدرسة ويجي ليه باص

[Roze]

هلا بيكن كلكم

اولشي ابي ابارك لاحلام ام علا خطوبة اختها واعذريني يالغاليه كنتين علا بالي بس امس ولدت مرت اخوي بعملية قيصريه وجابت لينه فطوم مدنية يديده
وكنا بالمستشفا معاها
وكان خاطري يكون عندي رقمش عشان اتصلش شخصيا ابارك لش واعتذر اني ماقدرت اجي

انزين فطوم اليديده فالعايله تهببببل ودكرتني ببنينووو
اول ماولدت
اليوم رحت بيت ابويي وقمت اتشجعت اني واختي وقلنه نبي نقص شعرنه وووين
قلنه بنروح سن شاين فالبديع
ياااااا انه احنه خفنه كل واحد يطووف ييطالعنه
ويش ليي اطاوعش يختي
وقفنه السياره قلنه بتروح ملح السياره بتتكسر اليوم
ههههههههههههههه
دخلنه الصالون
وعقب شوي دخلو بنات من البديع
يا انهي الدنيا تغيرت
قبل يضحكون ويسولفون
والحين مايطالعونه
شي يحز بالخاطر وطلعنه احنه فاهمين الدنيا غلط
وفاهمين الناس غلط
لانه عمره الانسان الطيب مابيتغير علا اخوه مهما صار ومهما سمع

المهم مايهمنه منهم
قصينه شعرنه وطلعنه واحنه نضحك علا روحنه شجاعات ماشاءالله
انخاف منويش صارت البديع بمبي الثانيه


رجعت شقتي
واكتشفت انه القصه معفوسه وقصيره وايد
بل ويش اقول لريلي
وطول مااحنه نتعشا واني مرفعه شعري بكلبسه لايشوفه هههههههههه

[Roze]

والحين طلع

وباقوم اتسبح واغسله واشوف هالفلبينيه ويش هببت بهالصوفتيييين
ههههههههه


يالهي

[أحلام أم]

السلام عليكم
هلا ومرحبا بيكم أحلى خوات إعذروني أشوف ردودكم وماأقدر أرد هنوووي حبيبي مريض مسخن ومزكم وكل حين هالأدول والكمادات أشوى بدى اليوم عليهالزكام والسخونه وخلاني أتنفس البارحه شوي في الحفلة ،ألحين قلت أكتب كم كلمة واقوم له مو راضي يشرب حليب ولاماي وبس يصيح حتى بيت أبويي اليوم مارحت
أم عايشة
هلا حبيبتي ،إيه ماأقدر أنساش أني من سجلت في المنتدى ودخلت الديوانية إنتين أول وحدة رحبت بي وصارت تطمني على حملي وأكثر وحدة ترد عليي في البداية والحمدلله الله عوضش وجبر قلبش وفرحنه بيش لأنه وااايد زعلنه عليش ربي يفرحنه بخبر ولادتش بالكتاكيت وياارب تطمنين عليهم وتولدينه سالمين وبصه وعافية ،إذا أني مانسيتش للحين أكيد مانسيت ولدش خلود وسندويشت الهمبرجر الصبحيه إللي يصر تسوينها من إيدش له ربي يحفظه لش خليه يتدلع عليش شوي قبل لايشرفون إللي ياخذون وقتش عنه ،مشكورة حبيبتي ربي يسمع منش ويحفظ ليي هنووي وأخوته ويشافيهم صايرين مرضى من تغير الجو لين اليوم هنووي جاه الدور سخونه وزكام
شمس الصباح
هلا وغلا بالغالية المدللـه هي وبنتها الحبوبة إللي نورت بيت أبو هنووي ،أفا عليش نشيلش على راسنه وجيتش غالية وتسجل بماي الذهب في دفتر الذكريات ،ربي يحفظ ملوكة ،لاتحاتين بعض الأطفال عليهم حركات جدية ،تعبر عن حاجتها إللي ماتقدر توصل ليها بالتعصب بس لاتخلينها تاخذ على روحها في الشد لين تعصب صدق دلوعه ويحق ليها تدلع عروستنه وياارب دووم نلاقيش في الأفراح والمسرات
روز
عذرش مقبول حبيبتي وأأأأأأأأأأأأأأأأأأأأأأأأأأأألف مبروك قدوم (فاطمة ) ربي يحفظها ويعطي أمها العافية وتتربى في عز أبوها ودلال أمها
عليش بالعافية اللوك اليديد ،لاتذكريني بالقصات /أني من طلعت من الأربعين ورحت سويت تغيير لروحي قصيت شعري للحين قصت شعري أستغفر الله صوب طويل وصوب قصير حتى القصة (في صالون الطاهره )حتى هالمرة يوم أروح الصالون إستغربوا من شعري ومأساته
ياارب نتلاقى في الأفراح خيوتي وموبس إنتين ماحضرتين الضروف البارحة منعت ناااااس واااايد من الحضور
أم أحلى قمر
مشكورة حبيبتي على الرساله وياارب مرة ثانية في مناسبة ثانية تقدرين تشرفينه لأني ماشفتش شرفتينه يعني ماأعرفش بس ماسمعت وحدة سألت عني وعرفت إنها إنتين
خلص وقتي هنوووي سهاري الليلة دعواتكم له بالشفاء مو ساكت

[أحلام أم]

إيه نسيت شرفتنه( أم خليل )البارحه بس بدون راشد فرحت بها بس ماحصل ليي أهر وياها وااايد وهي بخير وراشد بخير بس رابطة سير على دبتها ههههه وتقول دبتي بعدهي على حالها ههههه

[هدوء الليل]

صباح الخيرات ... شخباركم يا بنات اهل ديرتي
يمكن ماتعرفوني لاني عضوة جديدة تقريبا حبيت اسلم عليكم وتعرف ع الاخوات
وابيكم تدعون لي ربي يسهل عليي لاني بشهر التاسع (*_*)

[أم عائشة]

احلام ام فديت قلبج والله ماشاءالله عليج تبارك الرحمن وربي يشفيلج هنوي وتجوفينه معرس يارب فيج الخير وربي والف مبرؤك على خطوبة اختج الله يتمملها على خير ان شاءالله


هدوء الليل هلا فيج اختي نورتي الديوانية والله يهون عليج ويقومج بالسلامة يارب

[شمس الصباح]

سلاااااااااااااام شخباركم

اليوم فيني نووووومة عدلة زين مني افتح اعيوني

روز بالعافية عليش نيولوك ان شاء الله تطلع القصة حلوه اما اني كلش مو حابة شعري وهو قصير لو ادري ما قصيته لا اشيل منه الكلبس ولا شي لان ملاك من تشوف شعري تهجك علية وتمشع فيه وبعدين تاكلة تقولين حلاوة شعر بنات

بااااااااااااااقي الشعب ام عائشة واحلام ام وطف طووووووف وام السادة واروؤ يقيني وام احلى قمر وفلونة وسول روز وحبيبة حسوني وروز اتش وام امل والسيدة وحنوووون والكلللللللللللللل ويش اخباركم

[أم عائشة]

هلا فيج شموسة شخبارج اختي وشخبار ملاك ربي يخليها لج يارب
البنات كله نايمين مايدشون الديوانية الا بين وين وين

[أحلام أم]

السلااااااااااااااام عليكم
ويش أخباركم ،عذروني تعبانه مع ولدي هنووي مسكين من شي لشي
أخر مرة قلت ليكم إنه مسخن ومزكم ،بعدين زادته أعراضة حدة ونقلناه للمستشفى فحصت عليه الدكتورة قالت عنده غحتقان وصرفت لينه دوى إحتقان بالإضافة للأدول والقطور ،المهم عطيته الدوى ونام شوي بعدين قعد يصيح ولانام طول الليل من الصياح أعطيه أدول مافي فايدة ويرفض الحليب وكل شيء ،رحنه لدكتورة ساهرة فحصته قلبته وتالي أخر شي فحصت حلقة شافت كله حبوب على البلاعيم مثل الفقاقيع الصغيرة حمرة وهو على عمري بس يصيح حتى راوتني إياهم مسكين الله يساعده وعطته مضاد وبروفين عن الألم بدال الأدول وجل يبلعه علشان الحبوب المنتشرة على بلعومه لمدة إسبوع الله يشافية ويساعده ويساعدني

الجزء الثاني
قبل كم يوم أخوه علاووي كان حاملنه ،أهدد وأضربه لاحد يحمله مافي فااايدة في غفلة بسيطة مني ماأشوفه إلا بين أياديهم المهم سمعت صياحه وأجي أركض والولد خلاس ماعنده حس من الصياح ويش فيه يقول طاح على ركبتي ماما قمت أسكت فيه بالغصب سكت مو راضي يسكت لمدة المهم هدأ بعد فترة طويلة ونسيت الموضوع وما لاحظت عليه ترجيع ولا إغماء
أمس وأني أحاول أنيمة وأمسح على راسة ، كانه شيء صفعني بقوةراس هنووي فيه كتله كبيرة على صوب أصغر من الكف بشوي وهالكتله صايرة مثل المشحونه ماااي تخوف منفخه ومايرضى أحد يلمسها لين تلمسينه تحسين إيدك تغوص حملته لأبوه وراويته وهو خاف لأنه الكتله كبيرة وعصب عليي يقول من ويش هذا قلتله أذكر أخوه طيحه في غفلة مني هاوشني أكثر قال إنتين هاملتنه حطيت في خااطري بقوووة كانه مايدري عن شطانة اولادة
ضليت لين الليل أتحسسها وقلبي يعورني من ملمسها وكانه ماااي واايد تغوص الإيد ومنتشرة على صوب راسة والكل يطمنه ،حصرت علاااوي وقلت له شلون طاح أخوك أني كم مرة مهددتنكم لاحد يشيله هنية علووي خاف وقال بعدين تضربيني قلت مابضربك خلاص بس قول أخوك تعبان طمني قال طاح على وجهه والأرض بورسلاين آآآآآآآآآآآآآآآآآآآآآآآآآآآآآآآه ياولدي
بس إجابته ماشفت حيرتي أخذته للمستشفى البارحه وأني وأبوة شوي وإنصيح من خوفنه كشف عليه الدكتور وسألنه قال هذا شكله تجمع دموي بس لازم أشعه علشان نشوف الجمجمة آآآآآآآآآآآآآآآآآآآآه وكل لحظة أحس روحي بتطلع أخذوا عليه أشعه مرتين وأبوه مثبتنه على سرير الأشعه ،أخذت الأشعه للدكتور وماأشوف الطريق أحس رجولي كل ما أسرعت ماتمشي شافها الدكتور وقام يقلب فيها وأني عبرة في حلقي وعيون أبوه جاحظة من خوفه عليه ،قال الراس الحمدلله سليم مافيه كسور بس هالإنتفاخ الكبير لازم تتأكدوا منه وأغلب الظن تجمع دموي كبير وقال لازم تحويل السلمانية ورحنه الطوارىءمال الاطفال حاملينه شافه الدكتور المناوب مع الأشعه وأخذا إستفساراته مني وقال هذا نتيجه الطيحه على الأرض وصاير تجمع دموي وهذا التجمع مايروح بسهاله لازم أسابيع وقام يسوي له فحص للحواس علشان يشوف تجاوب الولد وإنه ماتأثر بالطيحه المهم قال لاتحطون له كمادات ولاشي وإخذوا مواعيد في عيادة الأطفال علشان يتابعه دكتور مختص بالرأس
آآآآآآآآآآآآآآآآآآآآآآه إدعوا لهنوووي بالشفاء وإدعوا لأولادي بالهداية متعبيني بشطانتهم مع إني طول اليوم مايغيب الصغير عن عيوني وهذا إللي طيحه في الصف الثالث خااايف متعبني
ربي يحفظك ياهاني ويبعد عنك كل شر ومرض
سامحوني طولت عليكم لاتنسوني من الدعاااء