تجمع حوامل ليبيا

[أم عويضة]

اهلين أم وسونة أن شاء الله يكون حق ومش كذبة مسكت المعتصم

[أم ردينة]

زحمه حق خبر اعتقال معتصم .. مش مصدقه منعرفش علاش خايفه يصيرلي زل لما شدو مخويه فرحنا وبعدين طلع كذب .... انشاء الله يارب يكون الخبر صح

[أم عويضة]

هاتو ان شاء الله ربي يتمم لك الحمل على خير وتشوفي جنينك قدام عويناتك وربي يفرحك انت وزوجك
ويكبر وايكون رضي ...ومن وسط اصحابه يضوي ..ويرافق زينت الرجال ..ويبقالك من خيرت الفرسان ..اللي تفخر بيهم الأوطان ..وتقسم له ست النسوان ..صاحبة الدين والجمال
ريتي ياهاتو جيبتك الولد وكبرته لك وعلمته وزوجته وهو مازال جنين

ادعي لي حتى انا انجيب ولدين توامه مع عويضة

[أم عويضة]

ام ردينة
ما شاء الله عليها الحاجة ردينة شكلها مش ساهلة من عويناتها ربي يطول عمرها هي وعبادة يتربوا في عزكم
بالنسبة للقبض على المنجوه المعتصم حتى انا شادة اعصابي وخاصة بعد طلع اكثر من واحد من القادة الميدانيين ايقولوا ماعندناش العلم والله اعصابنا مانقصها حرق اظن الاعصاب بدت تقعد زي الفحمة من الحرق

[ليبياقلبي]

يقين العفو ماسلمتي عليا بكل وانا كل مانخش ندور فيك باه باه
هاتو ربي يسهل عليك ويحميك ياارب ويكمل عليك بالخير
اختي تمر حنة ربي يعطيك ويرزقك يارب بس قوللي انت عندك بنوتة عمرها ستة شهور ولاتبي تحملي مفهمتيش
وربي يرزقك ميراس

[ليبياقلبي]

ربي يرزقك التوام يارب ام عويضة \
ام ردينة وليدك قريب لعمر بنتي ربي يخلهولك
وبالنسة للمعتصم انا عندي احساس خدعة مديرها المجلس زي لما قالوا على سيف بعدها تحررت طربلس وخشوا التوار باب العزيزية حتى توا نحس فيها مش الكتائب تسلم ويحرروا بني وليد امين يارب

[أم عويضة]

بارك الله فيك ياليبيا قلبي على الدعاء
وكيف حالك وحال بنيتك الحلوة ماشاء الله عليها
اختي شن اللي زاره المجلس بيش يخدع قولي مش مصدقة نين انشوف فيديو أو نشوفوه ممسوك في النشرات حقك
لكن اتشككي في المجلس وانه يخدع في الشعب هذي في أعتقادي مش كويسة لها ابعاد نفسية سيئة جدا على النفس وتثير الوسوسة فيها
لما أعلن المجلس القبض على سيف كان فيه دول واجدة مازالت ما أعترفتش بالمجلس
لكن توا عليش يبي ايدير البرباقاندة هذي ياخيتي احسني الظن...ممكن لانهم مايبوش الناس في بنغازي تعلم بوقت وصوله ولا مكان تواجده لسرية التحقيقات أو خوفا من تهريبه مثل ماحصل مع محمد لانه أكيد انهم مازال معاهم الفلوس اللي ممكن يشتروا بها الاشخاص اصحاب النفوس الضعيفة وفي النهاية نحن نتمنى العمار للوطن وليبيا في قلوبنا كلنا

[ام قصى محمد]

السلام عليكم
ام عويضه سلمك نشاده اجعنى مانفقدك
وانشاء الله ربى يرزقنى ويرزقك بالتوم خخخخخخخخ والله يستر بعدها
ليبيا قلبى نورتى التجمع الحمدلله على السلامه
ام رودينه انا اول وحده سلمت عليك الله يحفظ بنيتك الاموره
يقين شن اخبارك رابفت عليك فلفوله التجمع
ميراس شن الاحوال انا انخش انتبع فيكم ونبى انرد مانلاقى وقت للكتابه حتى توا شوى وماشيه للمدرسه
هاتو الله يشفيك ويحفظلك البيبى وتفرحينا بيه
ام عويضه بالنسبه لموضوع سيف اصلا كان واضح انها لعبه سياسيهوباهى انهم داروها
بس المعتصمما اعتقد انها كذبه اعتقد انهم مسكوه بالصاح
بالنسبهاموضوع زوجى شن يدلعنى (ببوجى))من الخطبه لى توا
اما من يركب فى الكرسى السياره فى الاول كنت حلفه بحلفه مع امه وهى تقولى لا هذا مكانك فقعدت ال3 سنوات الاولى انا نركب قدام ومن سنتين تركتها هى تركب قدامى لانى لما تطلع تمشى وتركب قدام بروحها فهمت انها خلاص نبى نفرض مفسها قعدت حتى لما نطلع قبلها نركب فى الخلف مع بناتى
اما جديته فى قدام لان القدامى اريح لها

[تمر حنة]

السلام عليكم
كيف اموركم كلكم
ساعدوني انا من الصبح مضايقة ونبكي تعرفوا ليش انا اليوم زي ما قلتلكم يومها عندنا ضيوف مصريين مشي انا اليوم نايضة بكري على اساس نجهز العجينة ونجهز الحاجات اللي نبي نقدمها هم بيجو بعد العصر يعني مش دايرة وجبة رسمية مجرد حاجات خفيفة مثلا بيتزا وشاورما وكفتة وسمبوسة وانا امس درت التلقيح والدكتور قاللي عادي مارسي حياتك العادية لكن بدون اجهاد كبير يعني شغل المطبخ عادي المهم راجلي قاللي لا ماتمسي شي قوليلي شن تبي وانا نجيبلك جاهز من المطعم لانه فيه جنبنا مطاعم عربية مش عادية قلتله لا واضح اكل المطاعم خصوصا ان هذي المصرية يومها تحكيلي قالت ديما نشروا منهم المطاعم هاذو مشي حسيت بيها بايخة تو اتقول ان انا ماخاطريش فيها وجبتلها اكل مطاعم لما قلتله وجهة نظري قاللي وكان قالت المهم صحتك انت تعبتي وتبهذلتي وبعدين تضيعي تعبك باش تجامليها وما تزعلش على الاقل خوذي بالاسباب وهو في النهاية نصيب من ربي
انا بصراحة مانبيش اندير جو خايفة ونرعش لان التلقيح نسبة نجاحه ماتتعداش 10% حسب كلام الدكتور وعادة ما ينجح من ثاني او ثالث محاولة وكل شي بيد ربي

قعدت في دوامة قلتله باهي جيب من المطعم وخلاص وانحس في روحي متحشمة منها
شن رايكم انتم عادي والا بايخة؟

[تمر حنة]

ام قصي يا ام قصي غير بالشوية علينا نحن هنا غير عبرينا وإلا حتى تكرمي علينا بدعوة راهو الدعاء بلا فلوس