بنات انا تعبت ابا حل

[احساس أم]

السلام عليكم ورحمة الله وبركاته

انا والله يابنات عندي مشاكل مو مشكله في حياتي الزوجيه

صارلي سنه ونص متزوجه والحين عندي ولد عمره 3 شهور الله يخليه ويحفظه

وكل مره اقول زوجي بيتغير وما ادخل اي حد من اخواني فالموضوع

لكني تعبت مايبي يتغير ابدا ولا مسولي اي قدر

اولا زوجي عديم المسؤوليه ابدا مايهتم فيني او فالبيت

لدرجة اول ماحملت قلتله ابي خدامه لان كان عندي نزيف لمدة 3 شهور

والدكتوره قايلتلي مااتحرك غير هذا كان عندي سوائل في جسمي من اول الحمل

وغيره اني موظفه ارجع البيت الساعه 5 العصر وهو دوامه شفتات

ودايما فالبيت واذا دوامه الصبح يخلص دوامه 2

المهم اصريت عالخدامه مارضى لين وصلت للشهر السادس

قال اذا تبين اييبلج خدامه بشرط انتي ادفعي نص وانا نص للمكتب

مع ان المبلغ مو كبير 5000 درهم وراتباها كل شهر عليج

في وضعي لاني محتاجه للخدامه رضيت

بس لما وصلت الشهر الثامن تعبت وايد بحملي وبدا الضغط يرتفع عندي وبدوا يعطوني ادويه علشان مايضر الجنين

قلتله يافلان انا بقدم استقالتي وبعد ماولدي يكمل السنه ان شاءالله يحلها الف حلال بدور وظيفه غيرها

صرخ علي وقالي كيف تطلعين لا خلج في دوامج الدنيا غاليه
ومن هالكلام ابدا مافكر في صحتي وصحت البيبي

وعدت على خير واستحملت التعب لدرجة اني فالنهاية ولدوني قيصري

بسبب هذا التعب والضغط الله يسامحه

ثانيا من خذني لين يومكم ماقالي كلمه حلوه ولا يدلعني ودائما دفش

حتى فالعلاقة الجنسية دفش والله اني صرت تلوع جبدي ومالي خلق له ولهذا الشي ودايما اتهرب

مايتقبل مني اي كلمة او نصيحه حتى في ملابسه احيانا ودي يلبس شي احبه كيفي ريلي ياناس يقولي لا مابا انا مااحب وانا لبسي جي وطبعي جي مستحيل اغير

ثالثا حياتنا ماشيه على كرة القدم اللي يموت فيها ومحور حياتنا عليها يعني يبي يتمرن يروح بالثلاث والاربع ساعت مايرجع ماعندي مانع بالعكس لصحته ولياقته من يرجع على طول على التيلفزون مسوي اشتراك للقنوات الرياضيه يقعد لين الفجر وانا دايما بروحي فالغرفه والحين مع ولدي ابدا مايقعد معانا ولا يساعدني مع ولده والله اني اسهر طول الليل مع ولده واروح لاماره ثانيه الصبح انزل ولدي بيت امي وارجع امارة ثانيه للدوام كل هذا وانا سهرانه مع ولدي وارجع البيت الساعه 4 ولا همه كل همه الكره والمبارياات
ماتطوفه ولا مباراه مانجتمع الا على الغدا او العشا واذا طلع مايبي يرجع وانا محكوره مع ولدي حتى الحمام وانتوا بكرامه محسوب علي بحكم تن ولدي دايما يصيح ولو ادوره ان يقعد مع الولد دقايق مااحصله والله اني تعبت نفسيا وجسديا وهو ولا همه

كل حياتنا فالبيت كل مااقوله يافلان خلنا نطلع نغير جو يتعلث بزحمه مااحب الزحمه والا مالي خلق والا الجو بارد والياهل مايقدر على هالجو او انا مااحب هالاماكن وعلى هالموال تعرفون اخر مره تمشينا فيها متى لما كنت توني حامل وماكنت ادري بعد يومين رحت حللت وبشروني اني حامل ولليوم ماطلعنا

وصح نسيت اضيف نقطه هو دايما بخيل علي وكريم مع اهله لدرجة ان نفقتي اللي هي 1000 درهم قطعها عني من تزوجنا واخوه يعطيه 3000 مستحيل مايعطيه او ينقص المبلغ ومن غير اللي يعطيه اهله ونحنا اولى دايما لما نبغي شي للبيت ماعندي نقص شي ماعندي لو ماانا اخذ من راتبي مايكمل شي فالبيت لو مو راتبي ما اثثنا البيت وهو دايما ماعندي من الريال انا والا هو؟؟؟؟؟

ساعدوني شو اسوي خلاص احس مو قادره واحيانا احس اني كرهته واحس اني ماابي استمر معاه لكن ارد وافكر بولدي شو ذنبه

الله يخليكم عطوني حل

[ام علاوي1]

انا قريت قصتج والله موتيني من القهر. طبعا هاي الحاله مو بس انتي عايشتهه
في نساء كثيييييييييييره بتعاني من الرجل البارد في علاقته مع زوجته وفي كرمه بالخارج وبخله في الداخل ومقابله التلفزيون من الليل حتى الصباح
انا عندي امل انو زوجك يتغير 50%تعرفي ليش؟؟؟انا زوجي كان مايجلس معي ولا يساعدني ولا يعمل اي شي ودايما نتعارك انا هوه حتى الجيران يسمعون ويعرفون
كنت الليل كوله ابكي وساعات الطم على وجهي وابني في حجري وهوه نايم ولا على باله
وساعات اجلس وحدي بالغرفه مثل المجنونه بحرق باعصابي وهو ولا على باله بيضحك مع اهله ويرجع للغرفه عندي وينام
والحين ياحبيبتي انا في اوربا وصار عندي 4 اطفال الله يخليهم وزوجي اتغير 90% قبل شويه انا وصلت ابني على المدرسه بسيارتي وهو جلس يسوي فطور لبناتي الصغار
صار فيه مشاركه صار فيه حب بعد 14 سسنه زواج
صدقيني انا كنت اريد اطلق منه عدة مرات بس علشان اطفالي بقيت
الرجال يغير ولا يهمك حتى لو متغير كثير على الاقل ولو شويه
اصبري والصبر مفتاح الفرج وكل دقيقه تصبري على الالم الله يحسبها الك اجر وتدخلين الجنه باذن الله

[احساس أم]

الله يعين يااختي ام علاوي1 والله ان نفسيتي خلاااااص احيانا احس
ودي اكفخه هههههههه بس مستحيل بس الواحد من القهر بكل شي يفكر

لكن الله كريم يااحبيبتي واتمنى انه يتغير

بس شو الشي اللي خلا ريلج يتغير اذا في طريقه قوليلي الله يخليج مليت والله

[ام علاوي1]

والله ماعرف شنو اللي غيره بس مرات اشك انو اتغير لاني ابتعدت عن اهله وهربت الى اخر الكره الارضيه وصدقيني لاحقيني حتى بالتلفون يتصلو ويعكرون مزاجه وبالتالي ينقلب على البيت عكسيا
اريد اعرف هل انتي عايشه مع اهله ولا لوحدج؟

[احساس أم]

لا والله بروحي في بيتنا مافي حد غير انا وهو والبيبي والخدامه

[احساس أم]

لكن بيت اهله مو بعيد وهو عنده 7 اخوان بس الاعتماد الكلي عليه

في كل شي ودايما يتصلوله ود هذا وجيب هذا روح مااعرف وين وسو مااعرف كيف ومستحيل يردلهم طلب على حسابي لدرجة لو انا كنا بنروح مكان يكنسل و يروحلهم

[أم رزاان]

حبيبتي أنت لسى في بداية حياتك
لازم تصبري وزوجك راح يتغير صدقيني
من اول مايكبر ولدة شوووي راح يتعلق فية
وراح تكون حياتكم كل اهتمااامة بس أنت لا تستعجلي وطولي بالك
وعاااملية باللين ومع الوقت راح يتغير بتعاااملة
لا تحكمي على حياتك معه من الآن !
يبغالك 3 سنوات لتستقر حياتكم وتتعودوا على بعض
ويعرف ايش اللي تبغية وتعرفي ايش اللي هو يبغاااه !

حافظي على بيتك وزوووجك ولا تخبري احد باي شيء يحصل منة
أنت ممكن تتكلمي علية بساعة غضب وزعل منة
وبعد فترة تنسي .. لكن الناس ماتنسى وخصوصاً " اهلك " !!

وبعدين ليش تعزلي نفسك عنة في غرفة لوحدك ؟!!
حتى وهو يتابع المبارة او على التلفزيون اجلسي معه أنت والولد !
وإذا كان عندك شغل في البيت مثلاً اتركي الولد عندة وقولي له
الله يرضى عليك انتبه للولد شوووي وراااجعة !!
ممكن مايرضى في البداية بس مع الوقت بيتعووود يهتم بالولد
ويساعدك فية !!!

اسأل الله لك حياة ملؤها السعادة

[احساس أم]

مشكوره اختي ام رزان

بس بوضحلج نقطتين اولهم انه هو اللي يقول انتي قعدي مع ولدج فالغرفه وانا بطلع يعني مايبي ازعاجنا

ثانيا هو يتشرد عن يشله ويبتلش فيه ثالثا هو لما يندمج فالمباراه مايحس فعمره يناقز ويصارخ بيخوف الولد ولا بيفره وانا الصراحه اخاف على ولدي

[فدوى عيونه]

امممم تصدقين في اشيا ف زوجج نفسها ف ريلي ..

اهله مايقولهم لا .. مع انهم 5 شباب غيره بس تصدقين لوو ابي اسير المستشفئ وقالوله فالبيت نبي نسير السوق مابيقول لهم حرمتي مريضه بشلها عادي بيخلص امور اهله الي مب مهمه بعدين بيشوف اموري ..

وبالنسبه للطلعه تخيلي متى طلعنا انا وياااه تاريخ 14/1/2011

والحين نحن بنكمل سنه من لما طلعني .. قبل كان عذره اني حامل والحين يقول بنتج صغيره ومايحب الزحمه ومن هالاعذاار ..

مافي ريال كامل صدقيني .. وحتى البشكاره مارضى اييبلي بسبة اهله ابوه وايد شديد ولازم كل شي بموافقته مع اني ما اقدر ع الشغل حملت واجهضت ومرضت وحملت مره ثانيه وفالبيت اهل ريلي مخليني خدامه عندهم بس متحمله ..

لو شفتي ف ريلج بتحصلين له ايجابيات صدقيني .. وشوفي فيه من اكثر من ناحيه ..

يعني انا الحمد لله مايقصر عندي انا وبنتي .. بنتي صياااحه الحين لها شهرين والحمد لله يساعدني فيها بس انا السبب كنت اخليها عنده اقوله بسير اسبح يعني اجبره يشيلها عني .. ولا انظف غرفتي واخليها جدامه والرضاعه عنده اذا صاحت رضعها .. انتي افرضي عليه لاتشاورينه

وادعيله ان شالله يتغير

[عقد لؤلؤ]

الله يألف بين قلوبكم يارب

أولا:دايما أدعيله وأنتي تصلي يارب سخر لي قلبه وأهديه وأصلحه وبين الآذان والإقامة وقت مستجاب الدعاء لا تفوتيه إلا وأنتي تدعي له أن ربي يهديه ويحننقلبه عليكم.
ثانيا: أنتي حاولي تقربي منه وأمزحي معاه وحبيبي ومن هالكلام والدلع ما رح يقدر يقاومك بس طبعا تخيري الوقت المناسب والأسلوب المناسب يعني إذا حس إنك تحبيه وتتقربي منه إن شاء الله بيرجعلك وما رح يطنشك وقوليله بالكلمة الحلوة حبيبي ممكن تمسك الود شوي لحد ا أخلص شغلي شوي ما رح يمانع إذا قلك أدخلي غرفتك أنتي وولدك قوليله أبى أجلس بجنب حبيبي شوي
ترى حيحس فنفسه بس ممكن يتغلى فالبداية لكن مرة على مرة بيتغير وكثرة الدق يفك اللحام
لكن أنتي لا تعرضي عنه وتقولي هو مايبى لكن كل ما تقربتي منه حيحس فيك إن شاء الله

والله يسعدك يارب