تجمع حوامل ليبيا

[الهندية]

والله ام اسيل حنديرها ونزلها فى الكوجينة بتاع المنتدى شكلها سمحا ...
وراجلى يحب الدجاج فى الكوشة انا الدجاجة نطبخ فيها فى مياه مع بصل وطماطم وزنجبيل وحبهان وملح وفلفال اسود نص طياب وبعد نطلعها وندهنها بطماطم وزعتر واكليل مرحى ونحمرها بس تجيبنى فيها اليابسة شويا تو نجرب طريقتين خصوصا فى العزايم ,,
يسلموا ايدياتك شكلك ست بيت شطورة...
ميرنا ..كم ليك سنة متزوجة ..

[ميرنا]

يابنات انا فتح النت على المدار وما نحكيلكم بكل على قبيت مثل الفكرونة بطئى وانت عليش علقت
سلم يديك يام اسيل ننقنك سوية وما شالله عليك كيف قدرة توفقى بين اتسوى والحوش والعيال وبوهم وشغال ربى يعطيك الصحة وديمة ماتبخليش علينا من اكلاتك اى حاجة جديدة اكتبيها لنا

[ميرنا]

الهندية عادى اليوم عزى وانشالله ما يعزوك فى غالى فى الزحمة وقدام الناس خير وسلمى على تعرفيه كل وخلى سلمك سمح وردى بالك تسالك وحدة من قريباتهم على صبيتك وتحكيلهن قولى كويسات وفى حالهن لان كلمة السو مسموعة وخاصتن فى المناسبات والهرايج فى كل مكان وما فى حوش خلى من المشاكل

[ميرنا]

لى 8 سنوات متزوجة وراجلى يبى اعيال خطب وبعدها مصحلش فسخ خطوبته التى استمرت شهر والان قالى دوريلى انتى وانا انقول بالك توة نحمل ونفتك من ها لقصة وماخليتها على الله وينما اطب اطب شفتى يالهندية كان انتى مشكلتك مع صبيتك انا والمحرومات من العيال مشكلتنا مع المجتمع كله قاعد بلا اعيال اجوز فى كل بلاد وكل مدينة وكل منطقة وكل حوش

[الهندية]

عندك الحق ميرنا انا والله هم ماخلوا ماقالوا بس انا متكلمتش بكل ...
نبى نسألك الرضاعة مازال عندى الم زى وخز الابر فى الحلمة مشعارفا من وين
وبنتى طلع فى رويال واجد من وين الرويال مازال عالسنون

[ميرنا]

المشاركة الأصلية كتبت بواسطة أم أيسم من ليبيا

أهلين وسهلين ....أنستكم والله بس مافيش واحدة من مصراتة ...عموما مافيش فرق أنا من مصراتة وانراجع في مصحة الحكمة عند الدكتورة نبيهه لكلوك وتوا في الشهر السابع وما تسألونيش عالموعد لأني فطارة رمضان بالله عزوني على قلة صيامي وربي ايقدرنا على طاعته

يامرحبتين بعرب مصراته مرحبتين ام ايسم باهى جيت اصداف طواجين الدجاج من ام اسيل هى مكترة الملح اشوى بس ما عليش اكيد جاى وحمها على الملح
ومعنا وحدة من مصراتة اسمها احلام وهى حامل فى الشهر الرابع وانتى شنو بكرية ولاعندك اعيال

[ميرنا]

الهندية


الوخز لى عندك من كثرة الحليب لى فى صدرك انا لم جبت بنتى رضعته شهرين واصبح صدرى يشقق ويؤلم فى قالت لى الدكتورة من كثرة الحليب واعطتنى تنتورة المورية وقعدت انحط فيها عليه اما بلنسبة الى جورى اكيد تبنى فى الجبل امتع الاسنان وليس الاسنان ودائما فى الشهر الثالث الاطفال يبدو يريلو ماتخفيش عليه

[حبل الوصل]

المشاركة الأصلية كتبت بواسطة ام اسيل

حبل الوصل : تعرفي عندي شعور الوحم بشكل غير عادي مش عارفة كيف التحليل طلع سلبي قريب نهبل ونرجا توا موعد الدورة وخلاص .
انا بنتي في سنة ثالثة وطلعت الاولى وكلهم يعلقو عليها يقولولها طبعا امك المديرة اكيدة تنجحي الاولى هههههههه وهي والله شاطرة وابلتها هي الي حطت الدرجات وانا والله ما عمري قريتها تقرا بروحها نصدقي توا 8 سنين وتقرا في قصص بروحها وفصص اكبر من سنها زي نوادر جحا و قصص الانبياء وقصص اخرى واجد وحتى تقرا لخوها حتى تصرفاتها اكبر من سنها انا توا نحكي معاك وهي تضم في المطبخ شافتني تعبانة قالتلي تريحي ربي يخليها ليا . وزردة النجاح توا نعزمكم على دجاج محشي في التجمع .
انا نحساب بنتك عمرها سبع سنين قلت اكيدة في سنة ثانية هي مواليد كم وعمر مواليد كم ؟

انا اسيل في 30_10_2001
ابراهيم 25-1_2005

أن شاءالله حمل ومبروك نجاح بنتك ماشاءالله عليها ربي يخليها لك وتفرحي بيها يارب ومشكورة وااااجد عالدجاج المحشي لما نجيكم بنغازى نبيك تديريها ليا اتفقنا
انى صغاري مواليد
إخلاص 8/7/2004
وعمر23/1/2006
ام ايسم مرحبتين بيك نورتينا
نبي نعرف حاجة اللي تخش تجى مرة ولا مرتين وبعدين تهرب شكلهن يهربن مننا ياميرنا وأم أسيل الثلاتى المرح

[حبل الوصل]

وينكم يابنات والله نحس في روحى متضايقة ومش عارفة ليش ونبي حد يخفف عليا وماعنديش غيركم والله خاطر عليا باتى متوفي ليه 5 شهور الله يرحمه ويغفرله ويثبته عند السؤال

[أم أيسم من ليبيا]

مشكورات جدا عالترحيب وبصراحة الطاجين لحقت غير عالعظيمات البركة في الصحاح...وانا حامل في الشهر السابع وعندي اربعة بسلامتهم من قبل وهذا الخامس انحس في روحي اتقول اول مرة ...المهم ان شاء انكون امعاكن في هالملف لكن بجديات مانقدرش انطول هلبا يعني ماعنديش وقت محدد ...المهم اني بإذن الله متواصلة معاكن ...وربي يرعاكن ويخلصكن على خير يارب