بنات ليبيا نبي مساعدتكم***افكار السبوع

[79nana]

يامشاء الله عليكم ياعويلة ان شاء الله ربي يتمملكم ويتمملي بخير ياربي
اني ليا في الغربة ستة سنين والحمد لله حسيت ماتغير عليا شي الا اسماء الدكاكين هههههههههه اني طرابلسية من باب بحر وسبحان الله طرابلس سبرها سبر واحد باختلاف الادواق في التقديم وعند الحق ياواتقة الواحد يبي يدير الحاجة القنينة ويدير الماير ولاكن عاد علاش التبدير والاسراف والله حتى اني مانحبش الي زايد علي حدة حتى من حلاوة الشي معادش تبدى فيها حلاوة لان في ناس تقدر وفي ناس ماتقدرش عليه غير نكدرو عليهم وخلاص الواحد يفكر بالعقل يقدر يدير حويجة نويزكة ومن غير مصروف ولاكن في حاجات بصراحة مافيهاش كيف لازم ابتتدبسي فيها ماعندك ما بتهربي
واني مش مع فكرة مترد المكسرات علي الطاولة زي ماقالت وخيتي الواتقة ولا عيون مش متاكدة ياخدو الي يبوه ويلوحو الباقي والشي التاني في ناس مع احترامي ماتعدلش مايهمهاش من خدي ومن ماخداش تلقي حد خدي بالكمشة وفي الي يتحشم يمد ايده فالاحسن الواحد يدير كويسات خير كل واحد ياخد نصيبه وهو حر يعطي لصغيورته ولا ياكلها ولا اي شي يبيه
والكويسات مش بالضروري تكون غالية ولا كرستال الواحد يقدر يدير حويجة رخيصة ومعبرة وعلي قد امكانياتك
والحاجة التانية مانعرفش ايديرو فيها ولا لا لاكن اني نحبها بصراحة هو سبوع بيبي يعني الموضوع فيها صغيويرة واكيد صغيورة العيلة ماننسوهمش بحويجة قنينة لعيبة ولا كويسة فيها حلوة مشكلة ولا بالونات تعرفو الصغويرة يفرحو باي حويجة يعني ماتكلفيش نفسك وفي نفس الوقت ارسمي ضحكة وبسمة في وجيه الصغيويرة وتريحي الام شوية لما العيل يلهى في اللعبة ولا ياكل من كويسته
والله هدا فكرتي وان شاء الله منكم نستفيد وادعولي ربي يسهلي ولادتي حتى اني ليا ستة سنين متاخرة في الحمل والحمد لله من عليا بالحمل بعد قرائي لسورة البقرة الحمد لله
تحياتي لكم