الحمد لله ولادتي كانت سهلة وميسرة باذن الله وهادي ولادتي التانية طبعا الاولى كانت عبارة عن رحلة من المعاناه.
بدأ الم متل المغص خفيف جدا من ال4 صباحا والساعة 5 بدأت طلقات منتظمة ولكن خفيفة ومحتملة وكان هادا خامس يوم الي بالعاشر . طبعا باللداية اعتقدت انو طلق كاذب وراح يروح بعد فترة فحاولت اتكيف مع الوضع وارجع انام كنت اغفى بين الطلقات لكن لما تيجي الطلقة ارجع اصحى.
بعد 6 صباحا بلش الالم يزيد وكنت لسة مقتنعة انو حيروح فرحت شربت ميرمية واخدت بنادول ورجعت احاول ارجع انام ولكن بدون فائدة فبعد الساعة 8 صباحا رحت عملت مغطس مي سحنة قلت يمكن يخف الالم وكان وقتها زوجي طلع عالشغل لاني خفت اخليه يعطل عن دوامه عالفاضي لاني تقريبا من بعد نص التاسع وانا بعاني من الام الطلق الكاذب الي بتيجي وبتروح كل يوم والتاني ولكن والمفاحئة اني بعد المغطس وحوالي الساعة تسعة وربع صباحا حسيت بجسمي كله يرجف مع الطلقة واجاني رغبة بالدفع وقتها حسيت انه الموضوع جدي واتصلت فورا بزوجي الي وصل بعد نص ساعة ولما طلعنا عالمستشفى ما قدرت امسك نفسي وبلشت ادفع بالبيبي وانا بالسيارة وسط صراخ زوجي اني اركز عالنفس وما ادفع لنوصل المستشفى . المهم وصلنا المستشفى الساعة 10 و25 دقيقة والساعة 10 و35 دقيقة كانت بنتي مشرفة عالدنيا وطبعا ولدت بالطوارئ والكل بيسألني كيف صابرة عحالي لهدرجة بالبيت. طبعا هادا كلو لاني طلقت ببنتي الاولى يومين وكان الطلق جدا قوي ومؤلم هادا الي ما خلاني اصدق اني بحالة ولادة ببنتي التانية وقلت حتى لو كنت ولادة بكون لسة مطولة بس الحمد لله كانت جدا ميسرة وسهلة .
هﻷ من بين مجموعة الاشياء الي خلت ولادتي بعون الله سهلة وايسر بكتير من ولادتي الاولى اولا الذكر المستمر والاستغفار بنية التسهيل والدعاء المستمر وقراءة سورة مريم يوميا بنية التيسير وعفكرة انا سميت بنتي مريم الله يرزقني وابوها برها .
تانية المشي يوميا وبشكل مستمر لمدة لا تقل عن ساعة انا بعد الاسبوع 38 صرت امشي عالبسكليت عندي بالبيت تلت ساعة الصبح وتلت ساعة المسا غير طلعة المشي مع زوجي بالمولات ببنتي الاولى كنت امشي لكن اخف من هيك بكتير.
تالتا اكل الرطب وبكترة تقريبا بشهري التاسع خلصت اكتر من 8 كيلو رطب مش تمر لفائدتها بتليين عضلات الرحم.
ورابعا لا تقتربي من القرفة ابدا واعتبريها خطر لاني ببنتي الاولى كترت من القرفة مع الزنجبيل والكمون وكان طلقي جدا مؤلم وقوي لكن التوسع جدا جدا بطئ لدرجت اخدت يومين حتى وصل التوسع كامل ولكن ببنتي التانية ما اقتربت من القرفة ابدا ولكن كترت بابونج بحكو منيح للتوسع وبعد الاسبوع 38 كنت كل يوم بعد يوم اشرب حليب دافي بزعفران ومحلى بعسل وداومت عليهم لحد الولادة وبلش الرحم عندي يتوسع من الاسبوع 39 بواحد سانتي وقبل الولادة بيوم كان 2 سانتي غير اني تبخرت بالميرمية 3 مرات كمان بعد الاسبوع 38 كل اكمن يوم كنت اتبخر.
هﻷ واخيرا بالنسبة لقصص تعجيل الولادة انا جربت منها الخروع اكتر من مرة وخصوصا اني اتاخرت بعد التاسع ولكن ما فادني ما كان ييجيني غير طلق كاذب ويروح بعد اكمن ساعة ولكني بيوم ولادتي كنت شاربة خروع وفعلا تعجلت ولادتي جدا فهو ممكن يفيد ولكن بعد ما يبدأ معك الطلق او بالاجمال لما تكون بدها تيجيكي الولادة ولكن هو نفسه ما يجيب ولادة الوحيد الي يجيب ولادة ويعلم متى ولادتك هو ربنا.
هاي مجموعة نصائح من الفروقات الي لاحظتها بين ولادتي الاولى والتانية واسفة ادا طولت عليكم ولكني حبيت تستفيدو من تجربتي.
والسلام