بدئي في علاج الانابيب و تجربتي لعمليه السحب

[TETA]

اخواتي حبيباتي حبيت انقل لكم تجربتي مع اول محاوله لي في طريق اطفال الانابيب
وعسى اني افيدكم ولو بجزء قليل
واجاوب على استفساراتكم

طبعا بدايه انا اعاني من تكيس المبايض واعلم ان الكثير يعانون من نفس المشكله
اما باقي الاشياء كلها طبيعيه ولله الحمد

جاء اليوم اللي قررت فيه اني ابداء العلاج من بعد فتره 3 شهور
اخذت فيها حبوب الجلوكوفاج كتهيئه وتقليل من التكييس

اول شي طلبو مني فحص دم ومن زوجي نفس الشي + فحص عينه لزوجي
والحمدالله كل شي سليم

بدأت كورس الابر
بدايه ابر جونال اف لمده 4 ايام
وبعدها ابر جونال اف و سيتروتايد كنت اخذ الابرتين في اليوم الواحد


امانه كنت كثير خايفه من الابر ولكن المها جدا بسيط لدرجه اني ماحسيت وهي تدخل جلدي
وحتى استغربت لما النيرس قالت خلاص خلصنا وكله يعود على النفسيه .


ومن الاعراض اللي يتني من الابر هي ثقل في اسفل البطن لان البويضات تكبر حزتها
وابره سيتروتايد كانت تشعرني بحكه لمده ربع ساعه الى نص ساعه من اخذها

المهم بعد ماخلصت علاج الابر سوولي سونار وكل شي كان كما المتوقع وقالتلي الدكتوره
ان الساعه 12 بالليل راح اضرب الابره التفجيريه ( ثلاث ابر في نفس الوقت )

طبعا حسيت بالخوف من الابر ولكن توكلت على الله وحاولت اذكر نفسي ان كلها فتره وتعدي
وعلى الليل رحت المستشفى ( والابره لازم تكون بالضبط ع الساعه اللي اختارتها الدكتوره)

الابره لما تدخل امانه ماتؤلم لكن بمجرد مايدخل الدوا حسيت بحررقق
وجسمي كله قام يحرر واعرق ، حاولت ما اكبر الموضوع واستغفر واتوكل على ربي
واللي عرفته ان في ناس يضربونها في الفخذ او اليد ولكن الدكتوره قالت لي افضل مكان البطن
الحمدالله خلصت من الابره التفجيريه ورحت البيت وبعدها بيومين كان موعد عمليه السحب


يوم العمليه

طلبو مني اني اكون صايمه من الساعه 12 بالليل - وان لا احط اي عطوور لانها تاثر على الاجنه
وكذا مره نبهوني من هذا الشي ..
الصبح الساعه 10 دخلت المستشفى وخذوني على غرفتي للتحضير
حطولي المغذي وعطوني فيه مضاد ومسكن للالم وبعدها طلبو مني اروح الحمام وانتو بكرامه
ودخلت على غرفه العمليات

( احساس الرهبه والخوف من غرفه العمليات كان موجود وفي لحظه حسيت اني بهرب ولكن
تعوذت من ابليس وقلت راح تنامين وماتحسين باي شي و الاستغفار والدعاء يابنات من اهم الاشياء)

قعدت ع السرير وخدروني تخدير كامل وماحسيت بأي شي الا بعد العلميه
وقمت على اصوات النيرسات والحمدالله ماكنت احس بألم فضيع
الالم جدا محتمل وماتوقعته بهاذي الصوره البسيطه

بعدها رجعوني غرفتي وحطولي ادويه في المغذي مسكنات ومانع للانتفاخ
وبعد ساعتين ونص تقريبا جهزولي الغدا واكلت الحمدالله وحسيت الطاقه رجعتلي

اي صح بالنسبه للتخدير العام قبل ابدره التخدير طلبت منهم دوا مضاد للوعه والدوخه بعد الافاقه
وحقنوني اياه بالمغذي ف الحمدالله ماتعبت بعد ماقمت من العمليه ابد ولا حسيت باي غثيان
وهاذي كانت نصيحه امي الله يحفظها

بعدها قالولي خلاص راح تطلعين من المستشفى روحي الحمام وبدلي ملابسج
لكن يوم قمت من ع السرير شفت كله دمم واخترعت بسرعه رحت الحمام وتنظفت
وسالت الدكتوره وقالت جدا طبيعي ومافي اي خوف

خلصت لبست ونزلت المختبر وعطوني ابره سيتروتايد للمره الاخيره + فحص دم
وبجذي تكون عمليتي انتهت ولله الحمد

وايد بنات خوفوني من العمليه وهي المها بسيط لايذكر
مجرد تتوكلين على الله وتستغفرين وتدعين بان ربج يهون امرج ويسهله راح ترتاحين
وترتاح نفسيتج بششكل كبيير

بعد العمليه االالم كان يروح ويرجع وبشكل خفيف الى متوسط
خصوصا بالليل وقت النوم ( ماقدر انام على جنبي لازم على ظهري)
اتجنب الدرج لانه يزيد من الالم واحاول ارتاح كثر ماقدر

والدكتوره ايضا وصتني على ترك الاطعمه اللي تحتوي على دهون واستبدال الماء باللبن
لمده اسبوع تقريبا

وهاذي كانت تجربتي ( اما على ترجيع الاجنه ف الدكتوره قالت راح تسويها لي
بعد الدوره الجايه عشان تكون خلتني ارتاح واتجنب اي اعراض ممكن اتعرضلها )

وانا وافقتها الراي خصوصا اني ادرس حاليا وحركتي مطلوبه
وعسى الله يسهل على كل وحده راح تقبل على هذا النوع من العلاج
واذا عندكم اي استفسار انا حاضضره

[أماااااني]

الله ييسر أمورك يا رب .... بس سؤالي ليه بدها تخلي الترجيع الدوره الجاي ما بزبط انا بعرف انه الترجيع بعد السحب بيومين أو تلاته .. من أي بلد انتي؟

[TETA]

على حسب كلام الدكتوره قالت ابا الرحم يرتاح عندج
خصوصا اني سويت منظار + صبغه في نفس يوم التبويض
كما اني اصبت بفرط فالمبيض بسبب الابر المنشطه
وحجم المبيض اكبر من الطبيعي

فكما قالت لي انها تريد كل شي يرجع لطبيعته
ف طلبت بتجميد الاجنه الى الشهر الجاي

[أماااااني]

المشاركة الأصلية كتبت بواسطة teta

على حسب كلام الدكتوره قالت ابا الرحم يرتاح عندج
خصوصا اني سويت منظار + صبغه في نفس يوم التبويض

فقالت تباني ارتاح وبعدها نرجع .. ف طلبت بتجميد الاجنه الى الشهر الجاي

الله يرزقك الذريه الصالحه عن قريب ياااا رب ... بس انا حابه اعطيكي وصفه للتكيس اللي هي البردقوش واكليل الجبل اشربي كاستين الصبح وكاستين المسا وأيام الدوره ما تشربي استمري عليهم وإن شاء الله تستفيدي

[TETA]

اماني اشكر لج ردج لي وافادتج
الله يعطيج العافيه

[عايشه يوسف]

يعطيك العافية علئ ذكر تجربتك
وان شاء الله تجي تبشرينا شهر الجاي بحملك

[Fetwn2016]

الله يتمم لك على خير يارب وتجي تبشرينا وتشيلي ضناك بحضنك يا كريم
حبيبتي دكتورتك تفهم وكل كلامها صحيح
اللي عندهم فرط تنشيط او وضعهم الصحي مو مستقر الطبيب الشاطر ياجل ابترجيع للشهر اللي بعده
وعموما اثبت علمياً ان نسبة نجاح الاجنه المجمده اعلى من لفرش
الله يكتبلك اللي فيه الخير يارب ويرزقك بكل اللي تتمنيه

[عوووشة]

الحمد لله رب العالمبن يا أختي أن ساء الله تبشرينا بخبر حملك الشهر الجاي وانا من خبرة تجربتين اطفال انابيب احسن الارجاع بعد العلاج متعب ويحتاج الجسم لراحة ولم ترجعي الاجنه بعد راحة تحسي نفسك اكثر استقرار نفسي وراحة جسميه وبالتوفيق يا اختي

[TETA]

يعطيكم العافيه على دعواتكم الجميله
وعسى ربي يكتب الذريه لكل محتاجه

[صابريناا]

احمدي الله ع كل حال وعقبال متبشرينا بحملك ان شاء الله دعواتك حبيبتي