بنتي ماتقول ماوديني الحمام تعبت ساعدوني :(

[noora88]

السلام عليكم اخواتي

بنتي صار لي شهر أعلمها على الحمام من كملت سنتين و 10 شهور

اول اسبوع وايد تعبت
كنت البسها سروال تعليم الحمام ومرات كانت تسويها
ومرات كانت تخاف وتقول لي كاكا او ماي ( ماي عالارض يطيح يعني بول قصدها هههه )
لكن الحمدلله صارت تتحكم بعمرها اكثر

بس وين المشكله
انها ماتقول لي نهائياً وديني الحمام
لازم انا اوديها واذكرها

لين متى راح استمر على هالحال
الحين صار لها شهر

كنت البسها حفاظة السروال بالبيت عقب التعليم باسبوع وتفائلت قلت خلاص بتعتبره سروال عادي وبعد لبستها عشان النجاسه وتعبت من التنظيف
لاني حامل بداية الشهور وخدامتي مسافره

بس اشوفها ماتخاف وتبول بالحفاظه
وعصبت عليها وايد بس مافي احساس ماشاءالله عليها عنيده
حتى اني كم مره ضربتها
تتأثر فقط نفس اللحظه وعقب عادي جداً وتكرر الغلطه
ف خليتها تلبس سروال قطن عادي


صارت لما تسويها تحس بإحراج
بس شو الفاااايده
عقب ماتسويها وتخلص

ابغيها هي بنفسها اتيي عندي وتقول ماما وديني الحمام

الحين لازم انا كل ساعتين اوديها
بس بعد سنه ان شاء الله بتروح الروضه
لازم بروحها تروح
مافي شخص فاضي يجابلها ويوديها كل ساعتين الحمام


الحمدلله على كل حال
لكن كل يوم تغلط
تمسك عمرها ويوم اسألها تبين حمام تقول لاء
واهددها واقول لها وين يسوون بول و كاكا ، تجاوبني وتقول بالحمام

بس انصدم عقب التهديد والتذكير عادي تسويها على عمرها
عقب تقول مامااا بول او كاكا

القصد خواتي
كيف اعلمها تقولي ماما وديني الحمام
او هي عالاقل تروح بروحها

مليون مره اقول لها خبريني اذا تبيني اوديج الحمام واذكرها

مع انه الله يحفظها احسها ذكيه وتفهم

[MeElYaA]

الله يعينك أختي
حاولي تغريها بالحمام مثلا انها تنظف وراها بالفرشاة والصابون فتصير تتحمس للحمام انا أعمل هيك مع بنتي حتى مرات تروح تقعد شوي وما تعمل شي ههههه.... كمان علميها شي ورا شي انا بنتي صارت تعرف تعمل كاكا في الحمام لكن البول لا قلت أعلمها بالتدريج وما شلتلها الحفاظ
ربي يصبرك حبيبتي

[noora88]

شكراً حبيبتي عالافاده

انا اشجعها دايماً اني اعطيها استيكر بعد ماتسويها بالحمام
بس بعد فتره وقفت عنها هالشي
ودايما اقول لها بشتري لج هديه اذا سويتيها في الحمام


بجرب طريقتج والله يعين :(

[أم حمودي وعبودي]

قليل الاطفال الي يقولون ماما حمام
استمري كل ساعتين ذكريها ولا تنسي ان هذه فترة وتعدي عصبي عليها وخليها تعرف انك زعلانة بس لا تضربينها يمكن تعاند اكثر