دردشة حوامل أهل مكة المكرمة - دردشة بنات مكة المكرمة - تجمع حوامل مكة المكرمة

[أميرة الوجود]

توتة البنوتة : ماعليك ترى الرجال كلهم كذا ما عندهم احساس استغفر الله العظيم ما همهم الا نفسهم ... الله يعيننا عليهم بس وفعلا الامساك مو طيب للي في التاسع .. انا لما كان يجيني امساك الله يكرمك كنت اخذ ملعقة زيت خروع مع عصير برتقال ... كثير ناس يحذروا من الخروع انه يسبب مغص يمكن لانهم ياخذوه بكميات كبيرة اما انا بس ملعقة لاني بصراحة ماما قالت لي انها هي واخواتها وعيلتهم كل ابوها كانوا ياخذوا الخروع عشان ينظف بطنهم قبل الولادة لااااااازم ولا البطن يتحجر وما يجي الطلق ... وانا كمان اخذ دايم ملينات فجسمي متعود عليها أما البنت اللي ما عمرها تاخذ ملينات او مسهلات فالخروع ماراح يناسبها لانه حيسببلها اسهال فظيع وانتي بكرامة ومغص وهي مو ناقصة هم فوق همها في التاسع

فأنتي تعرفي نفسك اذا كنتي تقدري تتحمليه اولا ...وعندك التين المجفف ملين مرة كويس وما يسبب اي مغص

طبعا انتي طالما زوجك مسافر مرررررررة لا تاخذي زيت خروع او اي شئ علشان خوف انك تحرضي نفسك على الولادة وحضرة جنابه مو جنبك لما يجي مري على الدكتورة حقتك وقوليلها تعطيك ملين آمن






أنشودة المطر خوفتيني بصراحة .. ايوة هي الدبدوبة حتى تشوفيها تستغفر وتسبح ... والله ما ادري ايش اقولك .... بصراحة انا رحت عندها لان جارتي مدحتها مرررررررة طيب والأهم ان السونار عندها رخيص 75 ريال ... ولان زوجي مرررررررة كريم لو تشوفي كيف يسألني ليش 75 ريال قوليلهم يخفضوا السعر قلت له ياابن الحلال هذا ارخص مستوصف الباقين كلهم على 150 ريال .... يقوللي خلاص راجعي في النور حكومي وببلاش ... سالته فين اخلي ولدي وبنتي ؟؟؟ طول يوم بكامله وانا انتظر السرا في الحكومي ؟؟؟؟



وتوها جامعية الله يجزاها خير نبهتني على الاشعة الرباعية .. قلت بسأل عنها في منطقة اللي ساكنين فيها اهلي واروح اكشف هناك
يعني ما راح اعتمد نهائيا على الدكتورة في سليمان القرشي

بسألك انتي ما كنتي حاسة بشئ غريب ؟؟؟ ايش اسباب وفاة الجنين ؟؟

[يكفيني وجودك]

صباح الخير صبايـــا

كيفكم؟

حبيت انظم لكم
اتمنى تقبلوني بينكم أخت ..

[Queen DadoOo]

السلام عليكم
كيفكم ان شاء الله تكونو بخيييير
مبروك لكل اللي ولدو والله يسهل للي بيولد ويقومهم بالسلامة
ويتمم للحوامل وييسرلهم ويرزق كلللللللللل اللي تتمنى الحمل
انا حبيت اشاركم في التجمع اتمنى تقبلوني
اميرة وجامعية كيفكم انا معاكم ويمكن قبلكم هعععععععع
يكفيني وجودك اهلين فيناا انا وانتي

[Queen DadoOo]

بسألكم في مستشفى فمكة تولد ولادة بدون الم زي سليمان فقية فجدة

[جامعية]

صبــــآآآح الخيرات


كيفكم بنااات؟؟حاسة ان في كثير بنات فاقدينهم من زمان ما دخلوا ان شالله خير


توتة حبيبتي الله يسهل عليك واحسن شي فحالتك للامساك عصير البرتقال ممتاز
أو ملعقة زيت زيتون في اليوم مررة ينظموا مش يسببوا اسهال لا ينظموا لك امعاءك بالتدريج لحد مايروح الامساك
ان شالله ربي يهديلك زوجك ومايسافر عنك او انك تشوفي جارتك او اي من صحباتك تتفقي معاها اذا جاكي شي تروحي معاها
حتى انا والله زوجي شغله كله سفر عشان كذا ما اقدر اولد فبيتي لازم عند اهلي

اهلا بالضيفات الجدد يكفيني وجودك وكوين دادو
نورتونــا والله حيااكم

[أم ضيو وفروس]

السلام عليكم بنااااااات

صباح الخير عليكم

كيفكم وايش اخباركم ..مع الحمل واالبزوره الجدد ...

[نلي خانم]

سلام

كيفكم يابنات وكيف الكروش معاكم الله يسهل عليكم يارب

بنات أنا أعاني من ظهري أسفل مره ألم أي حركه بسيطه أحس بألم في الظهر ... قبل كذا لما أجهضت رحت لدايه وقالت أن فقرات ظهري تحركت وفيه فجوات وبعضها مضغوط على بعض... وألحين بالنفاس رحت لدايه ثانيه وقالت لي نفس الكلام أن ظهري فيه فجوات بسبب تحرك الفقرات وقت الطلق من أيام أجهاضي وألحين الحال زاد مع الولاده
أول بعد أجهاضي سويت برنيه لظهري بس مانفعت والدايه ألحين قالت لي أجيها بعد الأربعين تسوي لي برنيه ثانيه عشان تتقفل الفتحات وترجع الفقرات مكانها
الغريب أن الدايه الثانيه اللي رحت لها بنفاسي ألحين قالت لي أني أجهض واربط في الحمل كله بسبب الفتحات اللي بالظهر لو تقفلت ماعاد راح أتعرض للربط مره ثانيه
تعتقدوا كلامها صحيح وألا تلعب عليه .. والله يابنات تعبت من ظهري لي سنتين وألحين أحس أنه زاد بعد الولاده ... ياربي الأجر والصبر

أمس كانو عندي ضيوف والله لايوريكم أحس أني تعبت مرررررره .. الشي الوحيد اللي يخفف عني أسوي مغطس بمويه حاره وأجلس فيها أهم شي المويه تغطيني ألى نص الظهر أحس مع حرارة المويه الألم يروح وأدهن بزيت بعدها.... بس يقولوا مو طيب الوحده تسوي مغطس دايم لأن المويه تدخل الرحم ... محتاره مدري شسوي

[أميرة الوجود]

يكفيني وجودك وكوين هلا فيكم .... مرة فرحت انكم معانا انا وجامعية .. الله يتمم علينا ويسهل حملنا وولاداتنا

كوين حطي لك توقيع علشان نتابعك<<<<< لقافة خخخخخ

والله ما ادري عن الولادات في مكة لاني توني ساكنة فيها وزيك محتاجة احد يدلني .... سمعت بعض البنات في منتديات ثانية يمدحوا حراء ..... بس عموما فقيه اختي ولدت فيه ووقعوها على ولادة بدون الم وطبعا تكلفتها اكثر ووالله العظيم اقسم بالله ان اختي تقول كانت ولادتها كاااااابوس سلامتك .. الم فظيييييييع وحتى وقت الخياطة حست بكل شئ

من قال ان فقيه عندهم ولادة بدون الم يمكن حالات استثنائية

وانا اقولك الولادة تساهيل من رب العالمين .. يعني لما تدخلي السابع ابدأي استخيري الله انه يدلك على افضل مستشفى لك وللبيبي



ام ضيو وفروس :: هلا فيك منورة


نلي : انا بسألك انتي وقت نفاسك ما كنتي تاخذي رشاد على الريق او مع التمر .... لأن الرشاد هو اللي يغلق فراغات الظهر سبحان الله بس لازم وقت النفاس وبعدين في كل دورة رشاد وماش (اللي يجي لونه اخضر وشكله زي العدس ) هذا هو اللي يمسك الظهر صح

اش معنى برنيه ؟؟؟

وترى بعض الدايات فاهمات في شغلهم ويمكن يكون كلامهم صحيح لأنهم بيقولولك نفس الكلام

وبعضهم والله ما تفهم في شئ وتسوي تمريخ يحرك الرحم ويسبب ميلان ويتعب الظهر اكثر ...

[ام جمااانة]

حبيباتي ممكن تساعدوني هادا موضوعي بليز جاوبونيhttp://forum.hwaml.com/t53962.html

[أميرة الوجود]

ام جمانة : شوفي وانتي حامل ما اراح ينزل وزنك
... حتى لو نزل في البداية بسب الوحم وقلة الشهية بيرجع يزيد في الشهور الوسطى والاخيرة من الحمل ....

الجوع وقلة الاكل راح يضرك انتي والبيبي .. اقل ما فيها بيسبب لك انخفاض في الضغط ... وانخفاض الضغط يعني قلة وصول الدم والاكسجين للطفل ... متخيلة كيف الضرر اللي ممكن يسببه الجوع

عموما الطفل اللي فيك راح ياخذ من عظامك ومن دمك ومن عافيتك وممكن ما يكتفي ويجي مرة صغير فانتي ذلحين تهني في الاكل ولا تخلي على قلبك حسافة وما عليك الوزن اللي بيزيد بيكون في حدود البطن والصدر وبعد الولادة راح ينزل ... وبعد الولادة شوفي لك نادي رياضي ادخلي فيه ثلاث شهور تكفيك يصير وزنك مثالي