بنات ليبيا نبي مساعدتكم***افكار السبوع

[زهرة2000]

انا ان شاء الله حندير عصير فرش ومعه فريرو روشيه وبعدها قهوه ومقروض لايعلاء عليه الصراحه ونوع بالمكسرات ونوع بالشوكلاوته وممكن نوع تانى بعده صوانى رز بالخلطه ومعه اسياخ دجاج بالبطاطا وكبه ونوعين تانين ممكن كباب وبقلاوه حاره معاهم مشروب غازى بعده مترد كبير مكسرات وتورته او اى نوع قاتو حلو وجديد ممكن كب كيك بعدها فروت سلات والبوبونيره حقه نحن نديرو فى لوبان وبخوره فى تحف اديرو فيهم انتم ولالا وخلاص هما طبعا يزلفولى نهاهم بعد هدا كله ما يزلفوش اقل شي 10 وير هكى مش حناخد هههههههههههههههههههههه يارب نولد بالسلامه والباقى كله ساهل

[عيون زوجي]

سالي رغم انك ما جيتيش لكن رح نكملوا قصة السبوع

انتي بديري في الحوش وانا ننصحك اديريه في خيمة وتجيبي شغالتين عالاقل وحدة لغسل الماعين والتانيه للتقديم ممكن الزوز يجوك ب 80 دينار مع بعض

اولا:

- لازم اتخممي شنو تلبسي انتي لانك انتي عروس الحدث والعين اعليك

-ننصحك تقري اذكارك واتحصني روحك وصغارك بالرقيه الشرعيه وما اطلعيش اصغارك نهائي حذرتك...

-في العادة في طرابلس النافس تلبس لبسه عربيه زي البدلة الصغيرة وتمشي للمزين لكن لا تحني ولا تلبس شنبير




او اللبسة الشرقاويه لكسر المعتاد والفجرة ( الفضه) :



وممكن ساعه بالكثير واتبدلي تلبسي شي واسع ومريح يساعدك عالحركة وانك ترحبي وتسلمي وتاخذي الرمي ( الفلوس) ههههههههههه

زي الجلابيات الخليجيه او المغربيه وخاصة انتي بطنك كبيرررررة ههههههه




ويمشي معاك المغربي لانك قلتي انك طويله لونغو




اتحطي طاوله في باب الاستقبال اعليها مترد الشكلاتة ويحبذ لو تكون مغلفة ومفتلكه






التغليف شئ شكلي تقدري تستغني اعليه لانه مكلف اشوي صح حلوو بس مرات يوصل سعر التغليف بس لل 200 دينار

ولما يلتموا احبابك ومش بالضرورة كلهم كل مجموعه معينه توصل قدميلهم الروزاطة والعبمبر
ممكن تحسبيها كل لتر يطلع من 4 ل 5 اكواب وكيلو العبمبر حوالي 30 طرف لو ما انسيتش


وممكن اتقدمي عصير هافانا الطبيعي وما يستاهلش اتمدي معاه شي هو اغلى من الروزاطة متاع اللوز بشوي



ونجوا للحلو متاع الشاهي او النسكافيه انتي شنو اتحبي بس في الحوش الشاهي اسهل

[عيون زوجي]

المشاركة الأصلية كتبت بواسطة زهرة2000

انا ان شاء الله حندير عصير فرش ومعه فريرو روشيه وبعدها قهوه ومقروض لايعلاء عليه الصراحه ونوع بالمكسرات ونوع بالشوكلاوته وممكن نوع تانى بعده صوانى رز بالخلطه ومعه اسياخ دجاج بالبطاطا وكبه ونوعين تانين ممكن كباب وبقلاوه حاره معاهم مشروب غازى بعده مترد كبير مكسرات وتورته او اى نوع قاتو حلو وجديد ممكن كب كيك بعدها فروت سلات والبوبونيره حقه نحن نديرو فى لوبان وبخوره فى تحف اديرو فيهم انتم ولالا وخلاص هما طبعا يزلفولى نهاهم بعد هدا كله ما يزلفوش اقل شي 10 وير هكى مش حناخد هههههههههههههههههههههه يارب نولد بالسلامه والباقى كله ساهل

يارب تولدي بالسلامة وبرنامجك حلو وراقي ويشبه لعاداتنا في طرابلس
بس ما قلتيش شنو تلبسوا وشنو تلبسوا البيبي

[saly.me.91]

اي عيون كمليلي شوقتيني حلوات افكارك
بس عصير الهافانا وين نلقاه

[عيون زوجي]

الحلووو جينا لمربط الفرس ههههههه لانه الشئ يلي عليه العين والبطن ههههههه

- ممكن اتقدمي مع النسكافه او الشاهي



باكو امغلف فيه 3 انواع حلويات راقيه بالمكسرات والشكلاطة ....





- او اتقدمي كب كيك لان منظره روعه للسبوع وهو موضه توا





- او كيكة موس الشكلاطة والكنافه بالقشطة ( موضه قديمه)




- بس الكنافه النابلسيه ايم يم يم اتجنن لو درتيها اعزميني هههههه







وتوا وصلنا للعشي الوجبه الرئيسيه والمهمه جدا جدا

[عيون زوجي]

المشاركة الأصلية كتبت بواسطة saly.me.91

اي عيون كمليلي شوقتيني حلوات افكارك
بس عصير الهافانا وين نلقاه

اخيرا شرفتي يا حلوة وين كنتي

العصير تلقيه في محل في قرقارش اسمه هافانا ويبعثوا معاك الماكينه ووحده عامله تصنعه فريش بس السعر تو نسئلك بنت حماتي داراته في حفلتها

[زهرة2000]

قصدى لوبان وسواك ههههههههههههه اديرو فيهن ولالالا بالنسبه للبس بدله حلوة قصيره متلا قفطان تيير او بنطلون وبدى حلو لكن مش عربي زيكم انا استربت وحده جايبه تلبس عربي صعب ولالالاههههههههه تحسيه يبي جهد والبيبي تلبسيه لبسه حلوى وخلاص

[زهرة2000]

شرفت الهانم سالى وسعو الطريق حولى من قدامها عيون وين وين ياماما

[عيون زوجي]

لو بتذبحي وبديري عقيقه صح مكلف ماشاءالله بس رح يكون عندك لحم هلبه وما اتخمميش في العشي
- في الحوش انفضل المسقي ( قعاد) لان الحار والصواني لو معازيمك فوق ال 100 صعب اتسخنيه وتقدميه اسخون في نفس الوقت في الصاله ساهل لان الافران متاعم كبيرة والتقديم ساهل

شن رايك اتقعدي وخلاص دري رز او اي شئ مسقي




ديري معاه مخللات وسلاطة وامبطن وشئ تاني زي طاجين اجبن او فلفل محشي او بوريك




-وممكن تلغي الاطباق الجانبيه وتخلي الرز او الكسكسي مع السلاطة والمخللات بس

والمشروب طبعا...

-بعد العشي خلاااص كملنا هههههه
اتجهزي باكوات المكسرات والكونفيتي


المكسرات تقدري من البدايه اديري على كل طاوله مترد فيه مكسرات يتسلوا فيها المعازيم

وتقدري تلغي الملبس وترتاحي من تكاليفه مش شئ اساسي



وما ننسوش باكو البقلاوة




فيه منو ايدير باكوات هدايا باكو فيه حصن المسلم وطرف شكلاطة مغلف ومزين وملبس وتحفه على شكل مولود وملبس ومرات مصاصات مزينه
لما تمشي لمحل الشكلاطة تحيري وتحتاري من الافكار يلي يعطيهالك

[عيون زوجي]

المشاركة الأصلية كتبت بواسطة زهرة2000

قصدى لوبان وسواك ههههههههههههه اديرو فيهن ولالالا بالنسبه للبس بدله حلوة قصيره متلا قفطان تيير او بنطلون وبدى حلو لكن مش عربي زيكم انا استربت وحده جايبه تلبس عربي صعب ولالالاههههههههه تحسيه يبي جهد والبيبي تلبسيه لبسه حلوى وخلاص

انديروا فيه بس مش كلنا ناس دون ناس والربي لبسته في السبوع من عاداتنا الحلوة ونحبوها