رحلتي الجميله لمدينة بون- المانيا 2012

[عيون زوجي]

السلام عليكم ورحمة الله

انا حبيت انزل بعض الصور يلي صورتهم في المانيا يناير 2012 في مدينة بون وقبل فكرت انزلها في تجمعي الغالي تجمع دردشة بنات ليبيا لكن حبيت اتشارك فيهم مع حبيباتي واخواتي الغاليات من كل ربوع وطننا العربي الغالي من المحيط للخليج ههههههههه (وكاني مسافرة هونولولو صح)
ياريت تعجبكم واشوف ردودكم (((ودعواتكم ليا اني اشوف اولادي من حملة كتاب الله))

انا زرت المانيا سنة 2010 وعجبتني هلبه هلبه وكان عندي فيها هلبه صور بس حاليا في ليبيا وانا في المانيا ممكن انزلهم في موضوع ثاني

وزيارتي الثانيه في هالسنه كانت رحلة ترفيهيه انتم كلكم عارفين الحال يلي عشناه في ليبيا وسنة الحرب والالم والخوف كانت سنة صعبه على كل الليبين والحمدلله ربي فرج اعلينا ويارب العالمين عم علينا الامن والامان والسلامة والسلام في ليبيا وكل بلاد المسلمين وفرجها على خوتنا في سورياواليمن يارب العالمين
وزوجي حب بعد التحرير انه ياخذني لبلد تاني انرفه فيه عن حالنا وكان المقرر تونس لانها قريبه وكل الليبين يمشولها حتى في اليوم مرتين ( من باب المبالغه طبعا)
ولاننا زرنا المانيا سنة 2010 وانا حبيت مدينة بون جدا واقمنا فيها 7 شهور اتصل باصحابنا فيها وبعثولنا دعوة ولله الحمد طلعتنلنا الفيزا في اسبوعين وسافرنا عن طريق الخطوط التركية من طرابلس الى اسطنبول اقمنا فيها ليله وحدة

هذا احنا راكبين الطيارة التركية في مطار طرابلس الساعه 7 مساءا بتوقيت طرابلس



وهادي بنتي على باب الطيارة والجو صقع وبرد كان بالتحديد يوم 03/01/2012



واحنا مرتاحين ومقعمزين في الطيارة وكان خدماتهم كويسه اهم شي انه يقدموا الشاهي مع البندق المحمص وطبق التحليه كان باناكوتا باللوز اتجنن




والحمدلله وصلنا مع الساعه 10 مساءا لمطار اتاتورك في العاصمة التركية اسطنبول وهادي المطار اول ما دخلناه عند الوصول










ومشينا لمكتب الخطوط التركيه لان الاقامه في فندق على حساب الخطوط الترانزيت مسئوليتهم وطلبوا مننا نستنوا في مقهى اصغير اسمه استاربكس كفي وكنا تعبانين من السفر والانتظار وانتظرنا في الكفي حوالي ساعه ونص طلبنا كابتشينو مع كيك بالشوفان مش حلو ما ننصحكم تتطلبوه ابدا ههههه









واخيرا جت الحافله ووصلنا للفندق مع حوالي 50 شخص من المسافرين ودخلنا لحجرتنا في الفندق الساعه 12 في الليل واحنا تعبانين جدا جدا





واخيرا بعد ليله متعبه جي الصبح نضنا من نومنا الساعه 7.30 صباحا طبعا لان الفطور يبدا من 6.30 الى 9.00 واحنا الباص يلي بتاخذنا للمطار بتوصل الساعه 9.00 الصبح





فطرنا وطلعنا في الباص الساعه 8.45 صباحا وهذا الفندق ومش عارفه نقرا اسمه بالتركي

هذا الجزء الاول ويتبع خليكم معاي ودعواتكم اكيد

[عيون زوجي]

هادي بعض اللقطات من الطريق السريع مابين الفندق والمطار وكان بعيد عالمطار حوالي 10 كيلو او اقل شوي

[عيون زوجي]

رجعنا لمطار اتاتورك من تاني وكان معانا وقت طويل لان طيارتنا الساعه 12.00 الظهر واحنا وصلنا من الساعه 9.30 الصبح
مطارهم كان كبيرررر وحلو وكان مزين كله لانهم محتفلين بكريسمسهم ناس علمانيه الله يجيرنا بس المنظر كان حلوووو هههههههه












الوقت الطويل في السوق الحرة من حظ المرا ومن سوء حظ الرجل لان اسعارهم نار والراجل مايقدرش يقول لا لانه سفر ومتعه وكلمة لا بتفسد هالمتعه هههه

هادي صورة حلقوم نعرفوه بالليبي حلقوم ومش عارفه بقية العرب شنو يسموه حلقوم تركي طعمته اتجنن شريت 4 باكوات ب 25 يورو تقريبا ب 45 دينار ليبي بس طعمته اتجنن بالمكسرات طبعا




ووصلت طيارتنا عالموعد وركبنا الطيارة وقلنا دعاء ركوب الطيارة وتوكلنا على الله الى المانيا










رحلتنا من طرابلس الى اسطنبول كانت اريح واقل مطبات هوائيه اما من اسطنبول الى مطار كولون كانت صعبه مليانه هزات ومطبات هوائيه لان احوال الطقس كانت سيئه وكانت اصعب رحله في حياتي بجد خفت اما زوجي وبنتي فكانوا هاديين ومستمتعين بمجله اطفال هدتها المضيفه لبنتي وانا كنت ادعي لله واقرا قران واسبح وقلبي يدق من الخوف مع كل مطب ههههههه
وجابولنا مع مجله الاطفال المنيو قائمة الاكل مع اننا مش مخيرين ههههه بس اكلهم كان حلو المذاق






ولله الحمد وصلنا الساعه 3.00 مساءا الى مطار كولون بون في المانيا بس كنت متعبه جدا لدرجة اني ما صورتش في المطار وكان السواق بانتظارنا لاننا اتصلنا بيه فبل سفرنا بيومين ووصلنا لبيتنا المريح في شارع القيصر في بون

[عيون زوجي]

هذا سرير بنتي ولعبتها العملاقه السلحفاه



وهادي معالم الساحه الرئيسيه في مدينة بون نبداها بتمثال بيتهوفن لانه مولود في بون ومدايرين منه حاجه كبيرة وكانه السلطان سليمان




وهادي الساحه يلي قدام التمثال والمكان الرئيسي لتجمعات اهل المدينة واحتفالاتهم يلي ما تنتهيش






وهذا شارعنا




خليكم معي وما تنسوش دعواتكم لاولادي انهم يكونوا من حفظة كتاب الله بالله امانه ادعولهم

[زهرة2000]

الله ياعيون المدينه تهبل والاحلى تعليقك وربي يفتحها فى وجهك يارب ويخليلك عويلتك

[عيون زوجي]

هذا مبنى البلديه عندهم





وهادي قلعه قديمة من مئات السنين قدامها فيه مول ملابس اسمه السي اند ايه فيه ملابس اتجنن واسعارها معقوله جدا جدا وحلوة



وهذا هو مبنى السي اند ايه




طبعا ميزة السفر الى اروبا شهر يناير هو موسم التخفيضات الهائله كل شئ بنص الثمن ومرات اقل من النص





سوق الخضرة تسمعيهم من بعيد اينس كايلو بنانا اينس ايغو
معناها كيلو موز بواحد يورو

مازال تقريري ما انتهاش بس اسئلكم بالله الدعوة لاولادي انهم يكونوا من حفظة كتاب الله

يتبع

[عيون زوجي]

زهرة يا احبيبه شنو رايك في تقريري مازال ما كملته بس نزلته لعيونكم يا غاليات التجمع الليبي

[دودو المغربي]

ماشاء الله الله يوفقك حبيبتي

[عيون زوجي]

اول شي يستهويني في سفرتي مبانيهم الكبيرة الضخمة الله لو بنغازي او طرابلس هكي شكلها ويلي حكمونا كانوا خافوا فينا الله وكل يوم يقدموا لبلادهم الاحسن والاجمل لكان الحال غير الحال ولا احتجنا ثورات ولا نزف دم الله يجازي يلي كان السبب وراء تأخرنا بس ...ويارب ارزقنا بناس تخافك تحكمنا بكتابك وسنة نبيك يارب

[عيون زوجي]

المشاركة الأصلية كتبت بواسطة دودو المغربي

ماشاء الله الله يوفقك حبيبتي

الله يسلمك يا اختي دودو ويبارك فيك