حبيباتى سيدات ليبيا تفضلو لأعرف ما حالكم

[شموسه 88]

فروسه غداي لازانيا " اوشربه اوكفتة دجاج علاشان خاطر زوجي مايحبش اي حاجه فيها بشاميل

[dr.loly]

صحه غداااك شموسه..
نا زوجي اليوم عنده مشاوير واجد م الصبح برا
ودرت فطوري شــربه وسمبوسه مقليه و بيتزا وكيمياء وسلاطه وبابا غنوووج

[dr.loly]

http://forum.hwaml.com/t274060.html

مبارك جنوده المركز الثــالت

[هدية الخالق]

السلام عليكم ورحمة الله وبركاته
كيف حالكم اليوم
صحيتوا فروسة وسوسو والله الا درت كل اللي قلتولي عليه
أمس ياسوسو درت مكرونة جارية وكترت التومة ودرتها حارة شوية وشربت عصير برتقال على خاطر فيتامين سي
فروسة حتى احنى عندنا الصيدلية في السوبر ماركت تآخدي بروحك عادي بدون صيدلاني ولا وصفة وخديت حبوب مص للحلق وخديت حبوب مسكنات للزكمة وعندنا من قبل حبوب مص للكحاحة جايبهم راجلي مرة لكن ممنوعات للمرضع وباهي اني معاش نرضع فيها خديت منهم ونآخد ونبلع في الحبوب ومافيش فايدة هكي زكمتي اني معروفة من زمان بتآخذ وقتها حتى لو خديت أدوية لكن أول مرة ننزكم بعد تزوجت حتى راجلي استغرب خيرها هكي زكمتي قلتله لا عادي بالنسبة ليا ماتخافش واخدة عليها اسأل أهلي ويخبروك عليها مشهورة بالزكمة الغريبة هههههههه
الصبح أول مانضت شربت يانسون كويس يهدي شوية
أكثر حاجة نخمم في بنتي تنعدى مني والله نين عييت لما منوكلها والا منشدها نغسل في يدي وندير في مطهر اليدين قاللي راجلي حتي التسليم على وجهها معاش تسلمي لكن مانصبرش هههههه

[هدية الخالق]

ماشاء الله فروسة وشموسة صايمات تقبل الله وأجركم حاصل ان شاء الله
والله كان خاطري نصيم لكن الله غالب المرض دارها فيا اني بدواء مش ماشي حالي كيف بلا دواء وراجلي قاللي اشربي اميه هلبة مش مايصيرلكش جفاف
أوشي الحبيبة شن أخبارك مبارك تكميلة الحوش والتفريش ان شاء الله بالصحة عليكم
فروسة غريبة قاعدة ماطلعتيش بروحك ولا مرة مع ٱنه عندك لغة وتقدري تدبري نفسك في الطلعة أكيد بتشوبي شوية في البداية لكن جربي وتشجعي مرة حتى لمكان قريب بعدين تلقي روحك عااادي كل شوية طالعة وحتى تبي حاجة ناقصة تطلعي بروحك مش لازم تراجي راجلك اني اول ماجينا يقوللي راجلي اطلعي بروحك وعلمني ركوب الباص لكن كنت خايفة قتله مستحيييل لكن بعدها بشهر بس تقريبا نتفكر فيها في رمضان كنت قالقة الصبح وراجلي يروح متأخر قلت منتشجع طلعت وركبت الباص وأحسن حاجة نظام الباصات ساااهل ماتتكلمي مع حد ولا حد يتكلم معاك اول ماتركبي حطي التيكيت في الماكينة وقعمزي واسم كل محطة يوقف فيها الباص ينكتب على شاشة فوق ولما تشوفي اسم المحطة اللي تبي تنزلي فيها رصي البطمة يوقف ااباص وتنزلي تعرفي اني مع انه لغتي نص نص نفهم المحادثات العادية امتاع الشارع وهكي لكن هدرزة على اصولها لااا كان انزنقت وحد تكلم معاي كلام مش مفهوم انقوله آي دونت اندرستاند يو( لا أفهمك ) وخلاص ههههه نفك في روحي م الاخير ههههههه

[هدية الخالق]

اليوم راجلي بيعدي يشوف الخروف ويحجزه هو وواحد ليبي عزابي
أما الجماعة المتزوجين اللي نعرفوهم مافيش حد دور ولا دبر راسه عابيين على راجلي امس اتصلوا بيه قالوله كيف يصير ؟قاللهم اني حصلت وتو نشوف الراجل اللي منآخد منا كان عنده نقوللكم
مش عارفه ليش مايدوروش ويعبوا على أرواحهم مع إنهم أكبر من راجلي وعندهم عوائل ويعرفوا جماعه ليبييين أكثر منا
لكن مستغلين راجلي لانه ليه فترة هنا كل مايبوا حاجة حتى بسيطة وساهلة يقولوله هوا استغفر الله وبس

[dr.loly]

السلام عليكم ورحمة الله وبركاته

[dr.loly]

هلا هديه خطرتي عليا ابوفراس نفس كلمتك ديما يقولي ياخسارة الانجليزيه لي عندك اطلعي مرة مره
خصيصا الحديقه خطوتين لي حطيتلكن صورها كان جنبها مركز ثقافي للطفال من اايه يروح ولاده حتي عمر ال12 سنه زي مخيم صيفي وهو قرايه يروح 5 عشيه .. بس والله مانحب حتي ايامات الجامعه مانحبش نمشي بروحي فيها هههههه

[dr.loly]

نفس الغريانيه تحب تطلع ديما مسكينه تغير ف جو فاجئتني بقصتها مع الحمل بعد مشيتلها من ثاني شهر زواج بدت تعالج ودكاتره يضحكوا عليها وعدت لتونس وديما ادويه ... رغم انها تاسع سلفه وعندهم احفاد بس عربها تعبولها نفسيتها ..
تطلع ديما وتلم في الصبايا ويعدن يتغدن مرات بالسلطااان ويدهورن وينزلن للسنتر غادي عند بحيره البجع
جوهن سمح لكن انا الحق مع زوجي وبس الطلعااااات

عموما حتي هي تعرف تطلع روحها خصيصا توا بدت تقرا ف كووورس .. انجلش

قالت بعد نوحل نقول اي دونت سبيك انجلش هههههه

وشارعنا الرئيسي لي مساعدتهن اغلبهن محلات ومطاعم حلال كبيره

[dr.loly]

هديه قاعده ؟؟؟