تجمع حوامل سوريا-دردشة ورود سوريا-دردشة الغاليات

[Nayota]

كيفكون جميعا ونهاركون سعيد ان شالله
انا اليوم طابخة فول مقلى وشوربة عدس
ونينو صايرة هالايام عم تنام تقريبا عالوحدة والصبح عم تفيئ عالعشرة هية بتحاول تفيئ عالسبعة بس مابخليها برضعا وبرجعا تنام نائصها عفرتة بئول خليها تريح جسما شوي ههههههههههه

[عاشقة جوجو2]

كيفكم صبايا والله حاسة حالي تعبانة ما بعرف ليش
صحة نايوتا على الاكل اليوم انا عندي شويت فطاير وبيتزا من مبارح وسويت جنبن صحن تبولة وصنية خضار مقلية بالفرن
الله يديم هالنعمة ويفرجها على اهلنا بسوريا
بسبوسة حبيبتي كيفك مع الحمل هلاء والله اشتقتلك ان شاء الله تزبط فيزة بيت حماكي بسرعة وتخلصي شو بدي قول انا يالي معي طول العمر ههههههههههه عم امزح الله يديمهم ويهديهم
الام الحنون الف مبروك الحمل حبيبتي الحموضة لازمها دواء اكيد الدكتورة بتكتبلك اذا رحتي كتير بتخف وبترتاحي عليه
بالنسبة للالتهابات انا من اول شهر بتجيني وبتروح قالتلي الدكتورة اهم شي وقت الولادة ما يكون فيالتهاب لانها وقتها بتاثر على البيبي
بس بباقي الاشهر ما بتاثر على البيبي بس والله بتهلك الام
سلامي للجميع انا ما نسيت حدا بس ما بحب اذكر اسامي عشان ما انسى

[بسبوسة زوجها]

سلامات نايوتا
حبيبتي ياريت تكتبيلي الطريقة بالتفصيل ولو بعرف حالي غليظة
لان بتعرفي نفس الطبخ يللي بعرفو عم اطبخو بتكرار وبحب جدد بالطبخ
وخاصة بموت بالاكل الشامي وكيف تكون المعلمة ام نايوتا ياعيني
وكمان حبيبتي لو سمحتي بدي طريقة الفول المقلى
لان بسمع كتير فيه بالمسلسلات وبتشهون عالاسم ههههههه
بتعرفي وانا بتسلى بالطبخ بس لما بكون لحالي لاني بجهز الطبخة عالتلفزيون بس لما بكوني عندي بتم وائفي بالمطبخ وبمل كتير
يارب بعدهن عني وريحني منهن

[syria]

كيفكون صبايا شو اخباركن
انا ضايجة كتير


بدي اسماء بنات تكون ناعمة وحلوة ومعناها حلو\

مع اني ماعرفت شو نوع البيبي يس انا بصراحة حابة كتير البنت

وزوجي حابب صبي بس حاسس انو بنت

ورجوني شطارتكون

[أم ملاك ومالك]

السلام عليكم حبيباتي

كيفكم اشتقتلكم كتير والولاد بوسوا خدكم

طبعا" قريت كلشي راح علي وبس جيت ارد نسيت كلشي

ياربي صاير النسيان بدمي وماني عرفانة شو اعمل

المهم بعتذر عن ذكر الاسماء وبتمنى تكونوا كلكم بخير وشكرا" لكل الي سألوا عني

صحيح تذكرت أم نايوتا يسلم أيديكي ريحة طبخك معبية الجروب شي بيشهي والله وخليكي هيك ديما" نزلينا وصفات طبخ حبيبتي .. وبدي قلك شي كانوا البنات الله يذكرهم بالخير موضوع لطبخات السورية ياريت تشاركي فيه وتجدديه بآكلاتك الطيبة والله يخليلك نايوتا يارب ويلا شدي الهمة وحضري الكاميرا ع الفيديو وعطيها صحن ومعلقة وصوريها وضحكي شي بيجنن بس بعدا بدك تعزلي البيت هههههههه بس والله راح يفرفح قلبك ومرة ع مرة بتصير بتأكل لحالها الله يفرحك فيها يارب نزليلي صورتها اشوفها

أم جوجو ألف الحمدلله ع سلامة جوجو وماع قلبها شر الله يحميها ويقومك بخير وسلامة شو راح تجيبي بنوتة ولا صبي إن شاء الله

زهرة سوريا حبيبتي قوي قلبك ولا تخلي الشيطان يوسولك أبدا" استودعيه عند رب العالمين وهو راح يحفظلك هو بحفظو بتذكر وقت كنت حامل بملاك كنت بالشهر السابع عملت رباعي الابعاد وقالولي الجنين مو سليم وكانوا بدهم يأخدوا من سائل الجنين بس رفضنا وبس عدناه بغير مكان قالولي ماشاء الله بنت متل القمر هههههه الحمدلله

سيريا يا سلام عليكي خلص مشي عليكي لقب دلوعة التجمع ويسلك ايديكي حبيبتي ع الطبخات ولا تقولي لا مبتدئة ولا شيماشاء الله عليكي وصدقيني الرجال بينبسط بطبخ مرتوا لو عاملتلوا زيت وزعتر الله يتمم حملك ع خير ويقومك بسلامة يارب

بسبوبسة زوجها الله يقومك بخير والسلامة يارب وتروح حماتك ع السعودية وترتاحي منها بجاه الحبيب المصطفى طمنينا عن اخبارك ديما"

أم كوكي شذى حداد كيفك ياحلوة وكيف كوكي يلا نزليلنا صورتها خلينا نشوف القمر الله يحميها يارب


ميووووووووووووووووورة حبيبتي بالي عندك وعند هنودة والتوينز الله يحميكم يارب ويقومكم بخير وسلامة ياااااااااارب

جد بنااااااااااااات سامحوني بس والله العظيم هاد الي قدرت اتذكروا لا حدا يزعل مني أبوسكن أناااااااا

أي صحيح بدي عرفكن عن حالي من جديد خخخخخخ أم ملاك ومالك سورية من حلب عمري نسيت خخخخخ بس أكبر وحدة هون مواليد 1/8/1983 متزوجة في 15/8/2009 في حلب وفي 20/8/2009 في الأردن زوجي فلسطيني أردني استقرينا بالارن سنتين وجبت ملاك بتاريخ 14/2/2011 الساعة 12:6 ظهرا" بعيد الفسق قصدي الحب هاهاهاهاوبعدها سافرت ع سوريا لعند أهلي ورجع زوجي ع سعودية وبعدها ب 3 شهور لحقتوا زيارة ولهلق موجودة هون بس لسا ما أخدت أقامة ادعولي قدمنا ع الأقامة بس لسا ماوافقوا أي وجبت مالك ب 19/8/2012 الساعة 7:27 صباحا" وكان أول يوم من العيد الصغير وهلق حامل يمكن يا بآخر ال2 او ب3 لسا مابعرف بس أتأكد راح قلكم بس بتذكر قالتلي الدكتورة بولد ب10 رمضان الله يقومني ويقومكم بخير وسلامة يارب

صحيح بنات أيمتى مواعيد ولادتكن الله يسهلها عليكن وعلينا يارب

صرعتكن أكيد عم تقولوا ولي إذا مو متذكرة وهيك كيف و كانت متذكرة خخخخخخ

مع كل الود

تحياااااااتي (^_*)

[Nayota]

المشاركة الأصلية كتبت بواسطة syria

كيفكون صبايا شو اخباركن
انا ضايجة كتير


بدي اسماء بنات تكون ناعمة وحلوة ومعناها حلو\

مع اني ماعرفت شو نوع البيبي يس انا بصراحة حابة كتير البنت

وزوجي حابب صبي بس حاسس انو بنت

ورجوني شطارتكون

عندك كتير اسماء
ليان
ليليان
يمنى
يمان
ألمى
لمار
وأنا ناوية ازا جبت بعد نايا بنت بدي سميها ماريا كتير بحبو هالاسم
وكل مااتزكرت شوية اسماء حلوة بئلك

[syria]

المشاركة الأصلية كتبت بواسطة Nayota

عندك كتير اسماء
ليان
ليليان
يمنى
يمان
ألمى
لمار
وأنا ناوية ازا جبت بعد نايا بنت بدي سميها ماريا كتير بحبو هالاسم
وكل مااتزكرت شوية اسماء حلوة بئلك

اممم يسلمو حبيبتي
انا عفكرة فكرت بنايا بس بعد تفكير طويل ئلت لئ لانو لاسم بجنن بس اهل حلب بيفخمو لالف
ولما ينادو للبنت نايا كتير رح يصير غليظ

يعني بشوهو لاسم تشويه كامل لهيك غيرت رئيي بدي احاول الائي اسم مايتحرف معون

اسيل حلو بس خايفة ينادولا سمنة اصيلولله اهل حلب مابينحزرلن ههههههههههههه

[Nayota]

سلامتك ام جوجو من التعب وبيقولو تاني ولد أصعب من اول ولد وحاولي اتغزي منيح احيانا نقص شي عنصر بالجسم بيعمل تعب
انا وقت بيكون ناقصني كالسيوم بحس سناني بيكزو وبيجعوني رجليي كتير

[Nayota]

الله يسلمك ام مالك ويسلملك ملاك ومالك وأخيرا طلع حدا أكبر مني بالتجمع مو مشان شي بس مشان ياخد مني هالمسؤولية
لان ماكان حدا يعمل شي بلا مشورتي هههههههه منيح اجيتي تاخدي مني هالمسؤولية
ومشان قسم الطبخات السورية شاركت فيه بطبخة الملوخية
وانا بكتب وصفات لطبخاتي بس على طلب رفقاتي بالتجمع يعني انتو اطلبو وانا بكتب هههههه
وموبس بعرف بالطبخ بعرف بغير شغلات تطريز وكنفا وصوف سنارة وسنارتين يلي بدو مني أيا شي أنا بالخدمة

[Nayota]

الفوليه لبسبوسة خانم

بتسلقي لحمة موزات وطبعا بعد ماتئيمي الزفرة بتحطي بصلة صغيرة ورق غار وكم حبة هيل بس ولاااااا تحطي لا قرفة ولا مطيبات تانية
بتحطي بالطنجرة شوية زيت وبتجيبي فول اخضر او فول متلج الموجود وبتقلبي الفولات شوي وبتضيفي من ماء سلق اللحمة ولحتى يستوي الفول بتضيفي السلق بيكون مفروم بس لاتفرميه ناعم افرميه وسط وقلبي الفولات والسلقات وضيفي اللحمات والسلق بيستوي بسرعة
وآخرشي ضيفي توم مدئوئ وشي غلوتين بعدين ضيفي كزبرة مفرومة كمان شي غلوتين
واعصري عليها ليمون وقت الاكل وهي الاكلة كلها حديد بحديد وكتييييييييييير مفيدة الحديد بالسلق والفول ووقت بتعصري عليها الليمون فيتامين سي بتصير كلها فوائد

الفول المقلى كتير سهل
بتحطي بالطنجرة زيت زيتون وبتضيفي فوقا الفول الاخضر وازا كان الفول صغير اطيب وألز وشوية مي فوق الفولات لحتى يستوو بتحطي توم مدقوق غلوتين وكزبرة مفرومة كمان غلوتين
وبس تاكلي حطي شوية خل ولبن فوق صحنك وكلي كتير طيب وكمان بيتاكل معا بصل اخضر
الخل واللبن اختياري مو اجباري وكمان لو مقطوف الفول بأوانو بتنقي الفولات الزغار بالأشر تبعون كمان بيطلع الفول المقلى كتير طيب