حبيباتى سيدات ليبيا تفضلو لأعرف ما حالكم

[جوهرة ليبيا]

السلام عليكم ورحمه الله وبركاته

[جوهرة ليبيا]

بارك الله فيكم ياغاليات اللي فرحتوا لفرحي الله لايحرمني منكم

اثري ان شاء الله انبلغكم بولادتي علي طول يااااااااااارب يسر ولادتي والله هالايام تااااااااعبه والحمد لله علي كل حال

[أمل ليبيا]

تسلمي جي جي ان شاء الله ربي يسهلك ويسهلي


الغاليه اثري الله يبارك فيك بس للاسف جنودة مش نفس ولايتي بس يلا المهم في امريكا وخلاص

سوسو والله مانحكيلك قداش متحمسه للولادة نستنا فيها باللحظه ونستشعر في اي الم او حاجه هههه مستااااحشه نشوف فطومتي وع قولتك خليني مانعرف شئ خير
بس احكيلنا شن ضيفوك السوريين وظايقه الكبة البرغل عندهم والا لا



اوشي الحنينه تسلمي حبيبتي وان شاء الله ربي يدوم الافراح عندكم وصحتين الكسكسو وفعلا موقف حزين للبنت الله غالب مسكينة ان شاء الله توصل لحظن زوجها بالسلامه
والف مبروووووووووك ع اوخيك وان شاء الله بطول عمره يارب


ام فروسه زعما مشت لاسكتلندا وغاطسه فيها ؟ربي يهنيها ان شاء الله وتدخل تطمنا مخليه مكانها


هدهد وينك يابنت اكيد توا مع زوجك ربي يحفظهولك بما انه عطله

شموسه تسلمي وان شاء الله ربي يتمملك حملك ع خير حتي انتي يارب

[أمل ليبيا]

االبارح مشيت لجارتي حتي هي في شهرها لكن فايتتني بايامات بس قالت ليها يومين تحس في وجعات قوية الحق خفت حسيت الوضع بيبدا جديات
ههه

سوسو علاش قلتي فكك من ابرة الظهر؟؟؟الحق مدايرتها في بالي

[أمل ليبيا]

اليوم ان شاء الله بنأجر مكينة غسل بساطات بنغسل بيها بساط الصاله والدار مداما الشمس تزرق مرة مرة اقل حاجه يجفو خير من يخش الشتاء رسمي
مع انه الجو صققققققع

وغداي رشدة كسكاس واخيرا شريت مكينة رشدة اونلاين وبنبدا ندير فيها هي والدبله وبوريك الجبد استاااااحشتهم

[هدية الخالق]

السلام عليكم
كيف حالكم يابنات كيف نايضة واليوم عندي عزومة عشي هيا مش عزومة عزومة غير راجلي وامتاعين العمارة الشباب داريين زي اللمة كل واحد يجيب معاه وجبة ويتلاقوا في غرفة عندنا في المبنى خاصة بالمناسبات اللي عنده مناسبة يحجزها قبل كانو يديروا فيها كل سبت يتلاقوا عشي وكل واحد يجيب معاه اكلة تراثية من بلده لكن وقفوها فترة وتوا شكلهم بيولوا المهم منديرلهم رز بالبصلة هذا الوحيد اللي ماضاقوشي وبتجيني مراة في الحوش جارتي من بنقلاديش والله ماني عارفة كيف منتفاهم اني وياها المشكلة حتى انجليزيتها مش مية في المية واني احرف مني جتني مرة في رمضان والله هدرزنا كلمتين ومعادش عرفت كيف نتفاهم معاها راجلي قاللي مشوا حالكم وخلاص وفيه مترجم في قوقل اسمه قوقو ترانزليت يترجم من عربي لاي لغة ثانية والعكس قاللي هدرزوا بيه قتله تخيلت شكلنا كيف مقعمزين نهدرزوا بالكتيبة ههههههههههه بااااايخة اللقطة الله غالب مافيش حل ثاني وهيا ماشاء الله ملتزمة هلبة هيا وراجلها تعرفوا راجلها ملتحي وديما يصلي هو وراجلي في مصلى في المبنى
وهيا تلبس في خمار وعباية حتى لما جتني لابسة خمار مع اننا في نفس المبني وبينا طابق بس ومساكين شكله وضعهم بالهون قاللي راجلي حوشهم مساكين مش مأثث يادوب مفرش ودار نوم ماعندهمش لما جتني تلف في الحوش وتتفرج عالآثاث وخشت حتى لدار النوم تشوف فيها قاللي راجلي بما انا قريب نروحوا احني وهما قاعدين مازااال منعطوهم اثاث الحوش لما مروحين كان نقوللكم ضحكني موقف اول ما جت اني نصلي في العصر في الدار راجلي فتحلها واني في الدار ونحول في جلبابي مانعلمش لين فتحت عليا باب الدار انخلعت ههههههه شكلها مالقتنيش في الصالة قالت نخش للدار وخلاص وبدون حتى تخبيط والا استئذان
هيا سلام توا ندير في الفطور قلاية وطلع مافيش هلبة خبزة مشي راجلي بيجيب وقريب يخش عليا قاعدة مقعمزة ههههه
بعدها بيطلع بيمشي لصلاة جنازة على واحد ليبي مسكين ليه شهرين بس جاي وعنده عويلة ستة صغار سلامتهم والله وجعني وقريب مارقدتش الليل بطوله امبارح تأثرت هلبة مسكينة مرته الله يعينها قالوا توفى بسكتة قلبية طلع من قاعة المحاضرة قعمز في مكان لقوه ميت طول الله يرحمه قبل نبي نعدي نعزي المراة لكن راجلي قال مانعرفاش ولا نعرف حوشهم وين يجي هما من الزاوية وسمع عالراجل سمع بس من اصحابه مايعرفاش من قبل قال بيروحوا بيه بيدفنوه في ليبيا
الله يرحمه ويصبر أهله

[هدية الخالق]

تعرفوا امبارح قعدت نفكر الموت ماأقربها تخيلوا لا سمح الله تصير فيه حاجة راجلي نهبل والله مابعدها المراة متغربة وبروحها وفي رقبتها صغار ربي يكون في عونها
وطبعا اهني عندهم لا يعرفوا ورثة لا شي اي حاجة تبع الراجل بياخدوها الا اذا كان الراجل كاتب وصية وكان مش كاتب مايعطوك شي حتى فلوسه اللي في البنك
اني راجلي مرة حكالي عليها الحاجة هذي بالصدفة قاللي راهو مايعطوكش شي وهكي بعدين اعترفلي قاللي اني كاتبلك وصية وداسها في مكان وقاللي على مكانها قاللي كان صارت فيا حاجة ماياكلوش حقك تعرفوا خلعني قعدت نبكي وقتله ليش تقول هكي بعيد السو عليك وحتى لا سمح الله لا سمح الله صارتلك حاجة مانبي شي بعدك قلتله مناخد الورقة ومنمزقها مانبيش شي نبيك انت وبس وتوا كل مايخطر عليا كلامه نبكي ونرعش لما نفوت قدام المكان اللي فيه الورقة ماتجرأت نشوفها بكل ربي يطولي في عمره ويحفظه والورقة ان شاء الله نمزقوها جميع لما نروحوا ونضحكوا عليها

[sosolibya]

السلام عليكم ورحمة الله وبرته

كيف حالكم خيره المنتدى مكسسسسسسد وينكم أنا أمس النت بلهوووووووون

اليوم تغدينا عند عيالي وجي بابوعيدنا عليه طبعا ماحضرش العيد زي ماقلتلكم

وامي مطيبة قريش البارح وانا بصراحة نمووووووت فيه مانقدرش نقاومه بكل

ندور وناخذ طرف خخخخخخخخخخخ

[sosolibya]

اوشي
الله يرحم قريب عروستكم موقف محزن جدا

والحمد لله جت على هكي وماالتغاش العرس كله

تعرفو بنت خالتيللي كان عرسها ألأسبوع الجاي

في لحظة ألتغى العرس

والجماعة من الجهتين صايرة حالة نفسية متحطمة ودموع..

الله غالب مافيش نصيب

وصحتين كسكسييييي مش كسكسوووو ههههه الاعراس على قلك ياغزالة


وبالنسبة للتنطيش يعني تعترفي انك كنت متكبرة صححح هههههههه
بس شجعتيني شووووووية عندن لمة مراة جديدة على الجيهة واخدها قريبنا وهي من زليطن

ووو الحق اول مناسبة ليها وكنت مدايرة في الي مانمشيش بس مرات نمش وخلاص

..........

[sosolibya]

يعطيك الهناء هدية والله دموعي في عيني اثرت بكلامك اه

ربي يحفظلك زوجك وتضحكو عالورقة لماتمزقاها إن شاء الله

وربي يرحمه جل والله موقف محزن جدا ربي يغفر له إن شاء الله ومابعد مراته

ممكن تسأليلي عالإسم

وبنسألك حاجة ثانية نبي نسأل على واحد من عيلة القيفر يقرأ في كندا بالك راجلك يعرفه