قصة ولادتي بوردة حياتي عائشه

عاشقة طيور الجنه · 11-05-2011, 10:53 AM

بسم الله الرحمن الرحيم

السلام عليكم ورحمة الله وبركاته

وحشتوني يا احلا حوائيات

اليوم جايه بقولكم قصة ولادتي بوردة حياتي وراح اختصرها لعيونكم
بسم الله ماشاء الله
لاحول ولاقوة الا بالله

كان عندي موعد بالمستشفى يوم الاحد بتاريخ 25/11/1432

رحت لموعدي وقال الدكتور لازم تنويم بكره الي هو يوم الاثنين 26/11
لانه انتي حمل بعد 8 سنوات واربع اجهاضات وعندك سكر حمل

المهم طعت من المستشفى ورحمت كملت اغراضي من السوق

ورجعت البيت وجهزت شنطتي عشان اروح بيت اهلي

وطول ليلة الاحد وانا ابكي مادري وش السبب

ماحسيت بخوف حاسه ببرود
ماشاء الله
المهم الصباح الاثنين الساعه 6 توجهت للمستشفى لانه قالو لازم الساعه 8 اكون بالعياده عشان اخلص اوراقي

وانا بعيد مشوار للمستشفى

وطول الطريق اوصي زوجي

وصلت المستشفى وخلصن الممرضات الاجرائات

ودخلت قسم التنويم ع الساعه 9 وزيياده ورفضو يدخلون زوجي لانه مو وقت زياره حسيت بضيق وبكيت

جاني دكتور مو دكتوري وقال لازم اكشف واشوف الرحم

كنت خايفه من الكشفيه بس الحمدلله تساهيل

وقال بحط طلق صناعي تحميله

وحطها ع الساعه 11 وقال ساعتين ماتقومي من سريرك

وجلست ساعتين بعدها حسيت بنوم وكسل وخمول ضحكو مني الي معي بالغرفه قالو اول مره نشوف وحده يحطون به طلق وتنام

المهم ضليت على هالحال لوقت الزياره

ع الساعه 5 قبل لاتجيني امي واختي جاني دكتور ثاني كمان مو دكتوري وقال لازم اكشف

قلت اوك وكشف قال الرحم 1 سنتي

وعطاني تحميله ثانيه وقال ساعتين ما اتحرك

قلت مو وقته ذا وقت زياره ابي افلها مع اهلي
ماشاء الله

المهم جلست ع الحال ذا وصرت احس بالم خفيف كانه الم الدوره

كل ذا وجهاز التخطيط علي

احس اني مربطه اتعقدت

ع الساعه 12 اااااااااااااااااااااه جتني دكتوره سودانيه وجلست ع السرير قالت بكشف

انا ضحكت قلت عادي الكشفيه سهله

يوووو يابنات قسم شفت الموت لمن كشفت وهي جالسه حسيتها حاقده علي

جلست ابكي والعنها قالت لسه الرحم 1 سانتي وعطتني تحميله وراحت

وجلست اتعور وادعي عليها قلت الله يجعلها بولادتها تكشف عليها وحده مابها رحمه

زاد الالم وجهاز التخطيط علي وكل شوي يهاوشون لاتتحركين وانا غصبن عني اذا حسيت بالطلق التويت

ع الساعه 2 اكلت رطب وشربت مويه وجلست اقراء الافاده في ماجاء في الولاده

قريت الورد كله وشغلت جوالي ع سورة مريم

ودعيت ربي مايطلع يوم الثلاثاء غير حبيبتي معي

والحيت في الدعاء وبكيت

خوفوني الممرضات والدكتوره يقولو التخطيط يبين انه نبض البيبي ضعف

وانا وين هالالم ووين ها البنوته

المهم ع الساعه 4 شالو التخطيط قلت خل اروح لدورة المياه وانتو بكرامه

الا احس في شي بينزل

اسفه ع صراحتي بس خذيت منديل الا اشوف دم

واخاف قلت للي جنبي الله يخليك روحي نادي الممرضات نزل دم ومويه وما اقدر امشي

راحت الله يجزاها خير وصوتت لهم شويات الا جايين

قلت به دم وشافوه قالو قليل موب شي

وسالتها ليه الدم قسم اني دلخه يعني ليه

قالت هذا يعني ولاده قريب

راحت شويات الا الدكتوره باكستانيه جاييه وكشفت قالت فاتح 1 سانتي وفي طلق وتروح الدكتوره

واستنى لحد الساعه 6 تقريبا الا المرضه جايه قالت شيلي عفشك

قلت وين قالت بننزلك قسم الولاده تحت

والبس عبايتي واجلس ع الكرسي وينزلوني تحت

وحاسه ببرود واتصل ع زوجي لانه كان بالرياض وانا بالقصيم قلتله نزلوني قسم الولاده لاتنسا تدعيلي

واتصل ع ميمتي حبيبتي واقولها وحسيتها مره طفشانه قالت ليه يسوون فيك كدا طلق واخر شي بيقولون عمليه

نمت ع سرير الولاده وحطو جهاز التخطيط
ماشاء الله

الا اخيرا دكتوري شرف ومعه دكتور ثاني جلسو يتكلمون ويطالعون التخطيط

ويسالني دكتوري كيفك قلت تمام وينادي ع الممرضه ويتكلمون الا مدخلين علي سرير ثاني

كل ذا وانا مثل الاطرش باالزفه مدري شسالفه

واسأل الدكتور قال الرحم فاتح 3 سانتي وفي طلق بس البيبي تعب لازم عمليه موافقه

قلت اكيد موافقه بس خلصوني مابي غرفة الولاده مجرد التفكير وش بيصير هنا يخوفني

نقلوني لسرير العمليات وحطو اكياس برجولي وقبعه ع شعراتي خخخخخ <<< رايقه

كلمت امي قلت تراي بدخل غرفة العمليات ادعيلي واخذو جوالي مني وكل اغراضي واخزياه حتى شيلتي فسختها

طلعوني من غرفة الولاده وحطوني بالممر انتظر دكتور التخدير يوصل

واسمع صوت الدكتور ياربي شسسوي

حطيت يدي على راسي من الاحراج مابي يشوف خشتي

الا ويجيني ومعه كوب قهوه

ويطل بوجهي وانا دوروني ماتلقوني

ويسالني عن اسمي واجاوبه قال متى اخر مره كليتي

قلت ع الساعه 2 كليت رطب وقال متى شربتي قلت كمان ع الساعه 2 شربت مويه

وقال اوكي

دخلوني غرفة العملياااات شكلها يخووف صرت ارجف مادري برد او خوف

حاولت اهدي نفسي مافي فايده اشوفهم يطالعوني ويتكلمون

احس انه من كثر ما ارجف السرير بييتحرك من مكانه يارررب رحمتك

جاني دكتوري قال راح نغسلك بطنك وانتي لاتطالعين ركزي مع دكتور التخدير

طالعت دكتور التخدير الا مربطين يديني وحده حاطين به جهاز الضغط

والثانيه يركب به دكتور التخدير ابره مدري وش حقته

المهم غسلو بطني بمويه لونها اسود تحط الممرضه القطن به وتمسح بطني

شوي فسخوني وزادت الرجفه عندي احس اني متفشله

ويجي دكتور التخدير عند راسي والممرضات يغطوني بقماش ازرق على بطني ومفتوح مكان العمليه

ويحط علي اكسجين قال خذي نفس واخذ

كنت بقوله بليز مابي احس ريحته موحلوه انكتمت

قال خذي نفس ثاني ومير اخذ

شويات وافتح عيني الا بالممر الحمدلله خخلصت العمليه اشوف الممرضات رايحين جايين

وانا بس اسمع اهاتي واحس انه ارجع انام واصحى

وتجيني الممرضه تساليني انتي كويس واهز له براسي اي

احاول اسال عن بنتي ماني قادره اتكلم

شويات ورفعت يدي الا فيها شريطه بلون وردي ياحياتي

وسالت الممرضه قالت كويسه

صحيت من التخديير ع الساعه 9 ونص

وطلعوني قسم التنويم ع الساعه 10
ماشاء الله تبارك الله

وكل ماشفت ممرضه قلت بيبي كويس تقول اي

قلت للمرضه السعوديه جيبو بنتي قالت صعب لازم معك مرافق

شويات جتني ممرضه فلبينيه قلت جيبي بيبي قالت وين مرافق قلت شوي يجي

قال خلاص يحي مرافق اجيب بيبي

قلت طيب جيبيه بشوفه

راحت وجابت بنوتتي كانت صغيره بس 2 كيلو وكلها شعر حتى وجهها

خفت منها

واتصل ع زوجي بالعمل وابشره ويطلع ويجينا بوقت الزياره

واتصل ع ميمتي وابشرها وتبكي ياقلبي على روحي انا الله يخليها لي ويطولي بعمرها

شويات وجت اختي وجابو لي بنتي بعد الضهر والحمدلله كل شي تمام

واسفه على الاطاله

اول غرامي · 11-05-2011, 11:06 AM

ياااااااقلبي الله يعيني ع الولاده كمان انا
والله يتمم لي ع خير
تتربى في عزك عوووواشي
الحمد لله ع سلآمتك غلاتي
..~

Um Dana · 11-05-2011, 11:13 AM

حبيبتي الحمد لله ع سلامتك يارررب

أم ح ــنونـہ · 11-05-2011, 12:52 PM

الحمد لله على سلامتك حبيبتي
ومبرووووووووك البنوته
تتربى بعزكم ان شاء الله

جلنار2 · 11-06-2011, 12:26 AM

الف الف الف الف الف مبروووووووووووووووووووووك

والحمدلله ع سلااااااااااااااامتك

دلع الأحساء · 11-06-2011, 12:43 AM

الحمدلله ع سلامتك عمري

بس شنو كان اسباب اجهاضك؟

ميــــــــــــــــك · 11-06-2011, 02:50 AM

الحمدلله على سلامتج وسامه البنوته وطبعا ستمتعت حييل وانا اقرا ...
تموت في قصص الولاده<<<

صعب تحقيقه · 11-06-2011, 04:38 AM

الف الف مبببببببببرووك والحمدلله ع سلآمتكمَ

ورردي · 11-06-2011, 07:42 AM

الحمد لله على سلامتك حبيبتي
ومبرووووووووك البنوته
تتربى بعزكم ان شاء الله

ام مسعدة · 11-06-2011, 07:53 AM

الحمدلله على سلامتك ويبارك لك بالمولوده يارب.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
زوجي الحبيب انت شريك حياتي ولست كل حياتي	عشق الصدى	منتدى الحياة الأسرية والزوجية	7	05-03-2013 04:54 PM
قصة حياتي عفوا ولادتي بحبيبي مراد	فطومة	إستفسارات مرحلة الولادة	10	12-10-2011 07:27 PM
اربطوا الاحزمه مع قصة ولادتي بزينة حياتي لورين	غلازوجي	إستفسارات مرحلة الولادة	30	06-06-2011 09:10 PM
قصة ولادتي بجنى حياتي وردعلى استفسار اميرة بامانيها للفائدةللجميع	ميار حسن	إستفسارات مرحلة الولادة	13	05-22-2011 01:28 AM
زوجي الحبيب أنت شريك حياتي ولست كل حياتي	خطاي إني وفيت	منتدى الحياة الأسرية والزوجية	2	09-19-2010 01:09 PM