مساعدة البكريات في التجهيزات ملف شامل

[cup cake]

طبعا هاي الموضوع منقول من اخت ربي يعطيها العافيه ^_^
بنتكلم اليوم عن الملابس اللي تحتاجينهم للبيبي اول فترة


قائمة المشتريات لملابس البيبي:
- تلبيسات - العدد 10 على الاقل
- افورول او طقم نوم او بودي سويت العدد 10 على الاقل
- قبعات قطن او قبعات صوف في الشتاء - العدد 3
- جاكيت صيفي او شتوي عدد 2
- جواريب عدد 5
- اطقم خروج عدد 3

- تلبيسات داخلية اقل شي تحتاجين 10 على الاقل و ممكن اكثر.. اكمام طويلة و قصيرة لازم تنوعين حسب الحاجه.. و حسب الفصل اللي تولدين فيه




و لازم تشترين نص الكمية نيوبيبي و النص الثاني 0-3 اشهر .. لان الطفل يكبر بسرعه و ان شاءالله يجي طفلج دبدوب و على طول تستعملين 0-3 ..
و لازم يكونون من القطن الممتاز لان هذا الشي رح يكون على طول على جسم البيبي
و انا انصحكم انكم تغسلونهم قبل الاستعمال لان انا ماغسلتهم في بنتي الاولى.. و صارت فيها حساسية وبالقوة عالجتها و الكل قالوا لي السبب الغسيل.. اغسلوهم و انا بكتب لكم بعد شوي عن الغسول المناسب للطفل الصغير ..






لهنا نكون خلصنه من التلبيسات ..







الحين نجي للافورولات و انا اعتبرها من اهم شي للطفل .. اذكركم العدد 10 و الاحجام نيوبيبي و 0-3 ... و بالصيف بدون جواريب يجون و بالشتاء يجون مع جواريب .. طبعا هذول يقدر الطفل يطلع فيهم بس لازم تشترين من النوع الحلو عشان الطلعه.. و النوع العادي للبيت .. بس لاتكثرين للطلعه لان الطفل بهالوقت مايطلع كثير ..

هذي وحده بدون جواريب




و هذي تجي مع الجواريب





هذول ممكن تطلعون فيهم ..
و للبيت ممكن هذول.. و للنوم بعد .. انا ماحبيت البجايم للطفل الصغير لان مايرتاح فيهم
هذول اكثر شي يرتاح فيهم الطفل في النوم ..





خلصنه من الافورول ..







نجي للقبعات ..




يحتاج تلبسين الطفل قبعة قطن في كل الوقت .. لان فروة راسه بعدها ناعمة و يطلع الهوى في الراس.. لازم طول الوقت يكون لابس له قبعة قطنية ..




هذا للخروج اذا كنتي تولدين في الشتاء ..






نجي الحين للجاكيتات ..
اذا كنتي تولدين في الصيف تحتاجين جاكيتات قطن خفيف و يمكن ماتحتاجين
و اذا كان في فصل الشتاء تحتاجين جاكيتات بس لاتكثرين .. و ماانصحج تشترين نيوبيبي لان تكون صغيره مهما كان الطفل صغير .. و يفضل تشترين 0-3 و هذي بعض الافكار










و اذا كنتي تولدين في الشتاء تحتاجين افورول يكون شتوي و يدفي الطفل لما تخرجين









تحتاجين بس واحد مو تشترين اكثر






تحتاجين جواريب صغااار للطفل حديث الولادة..













خلصنه من الجواريب ..








نجي لملابس الطلعة ..
بنات .. امهات.. حوامل.. اكرر لكم للمره المليون ان الطفل يكبر بسرعه ..
و خصوصا لما نجي لملابس الخروج مانقدر نقاومهم.. و خصوصا لو كانت بنت .. تروحين للسوق و تنخدعين بهالثياب و الفساتين و تتخيلين بنتج الصغنونه لابستهم
نصيحة من اختكم اللي جربت .. خلصت فلوسي و انا اشتري لبنتي فساتين و ملابس خروج.. اخر شي انصدمت انها مالبست و لا شي منهم غير مره او مرتين .. و كانت في المناسبات..
اخذوا اثنين ملابس للخروج عشان مايكون نفسكم فيهم .. و انا اشوف انسب شي يطلع فيه الطفل اول شهرين هو الافورول .. حتى انتي تكونين مرتاحه . و حتى لما تشيلينه تشيله بكل سهولة .
مع هذا رح انزلكم كم صورة لملابس الخروج ..

للبنات









للاولاد
















خلصنه من الملابس... و ان شاءالله بالرد الجاي رح نتكلم عن شي ثاني ..
اتمنى يكون الموضوع مفهوم و واضح للجميع .. و اي سؤال ياريت تسألون عشان اقدر اجاوبكم ..
و بالنسبه للعدد هذا مجرد تقريبي.. البعض يشوفونه شوي و البعض يشوفونه كثير..

[cup cake]

قائمة مشتريات الحمام

- بانيو الحمام
- بوكس او علبه للشومبوهات و الكريمات
- اكسسوارات الحمام
- المناشف
- مستحضرات الحمام (شامبوهات* كريمات*اسفنج...الخ)


بهذا القسم رح نتكلم عن كل شي يخص حمام الطفل من الالف الى الياء ..
و اذكركم هذا الموضوع كله من تعبي الشخصي و لا نقلت فيه اي شي ..






اول شي تحتاجين بانيو تحميمن فيه الطفل .. و فيه انواع و اشكال من البانيوات .. و فيه الوان.. انتي حسب شنو تحبين و انا رح احط لكم كم صورة


[IMG]http://s7ondemand6.scene7.com/is/image/MothercareASE/ll1470_1?wid=1008&hei=1200&bgc=255*255*255&qlt=95& op_sharpen=0&resMode=bicub&op_usm=0.7*1.0*0.5*0[/IMG]


هذا الشكل العادي الكلاسيكي






و هذا يتطبق عشان اذا ماكان عندج مساحه.. و يصير بهالشكل










هذا على شكل كرسي ..






و هذا كرسي بعد ..


اما عن تجربتي الشخصية و اللي استفدت منها هواي .. هي هذا




هذا مثل الكرسي صغير .. كنت احطه داخل البانيو العادي اللي حطيت صورته بالبداية..
و كان يقعد عدل .. و كنت اخلي بنتي تجلس فيه و انا احممها برااااحتي.. لان ماراح تطيح لان مسوين مكان يمسك رجليها و ايديها و راسها..


و بالنسبه للاسفنجه ..




ماانصح فيها... حسب تجربتي.. فيه ناس تشوفها مناسبه بس انا لان عايشه في شقه و ماعندي اي مكان فيه شمس عشان انشفها فيه بعد مااخلص منها.. استعملتها مره و لما جيت استعملها للمره الثانية لقيت فيها ريحة و رطبه و مانشفت .. و اكيد بهالحاله تكون فيها ملايين البكتيرا..






تحتاجين بوكس او علبه تحطين فيها اشياء الحمام .. تكون داخل الحمام . .يعني فيها الاشياء اللي تستعمليهم بالحمام فقط. اما الاشياء اللي تستعمليهم برا الحمام تقدرين تحطينهم في مكان ثاني..
انا كنت استعمل هذا للاشياء اللي استعملهم في الحمام










اكسسوارات الحمام..





علبة المناكير للطفل الصغنون.. ترى تحتاجونها
علبه تتكون من مقص اضافر و مقص عادي .. و مشط و مرات تجي معاها مقياس الحرارة..






العاب للطفل في الحمام مهما كان عمره صغير... يسكته و يحس بالامان و هو بالحمام






مقياس حرارة ماء الاستحمام .. احسها من الضروريات لان كنت ماعرف شنو المناسب ..
و هذي يتغير لون الشريط احمر اذا كان الماء ساخن و ازرق اذا بارد و اخضر اذا تمام









طبعا تحتاجون مناشف عشان تنشفون فيها البيبي

















نجي الحين لمستحضرات الحمام ..
اهم شي يكون كل شي بدون ريحة خصوصا اول اشهر .. الطفل يكون جسمه حساس و مايتحمل اي شي فيه ريحة.. و خصوصا جونسون.. انا كنت مستانسه على ريحة جونسون و خربت جسم بنتي فيه .. و وين مااروح ينصحون في كل شي بدون ريحة..
انا انصحكم في مستحضرات سيمبل او سيبامد .. انا بالنسبه لي استعملت سيمبل





هذي مستحضرات من سيمبل بيبي ..
شامبو** شور جل**بودي لوشن ** باودر





هذي مستحضرات سباميد ..





اسفنجة لفرك الطفل






تحتاجين قطن تنضفين فيه اذان الطفل.. و ابد لاتفكرين تستعملين غير القطن


الاشياء اللي تستعمليهم في الحمام حطيهم في الحمام بالبوكس اللي حطيت صورته ..
و اللي تستعمليهم في الغرفة تحطينهم في بوكس ثاني يكون فيه يدين عشان تاخذين وين ماتروحين .. و يتسكر بعد مثل هذا ..












اتوقع خلصنه كل شي يخص الحمام ..
و بعد لاتنسون لما تحممون الطفل لازم يكون في النهار مو في نص الليل..
و لازم يكون الحمام داااافي و حتى لو كان في الصيف لازم تدفينه عدل ... و جهزي كل شي قبل ماتدخلين تحممين الطفل لان مايصير تجيبينه عريان و تقعدين تجهزين
و اخذي معاج المناشف لداخل الحمام و خليها يمج عشان لما تخلصين على طول تلفين الطفل فيه .. و بالشتاء انصح الامهات ياخذون الملابس معاهم للحمام و يلبسون الطفل في الحمام ..

اتمنى مااكون نسيت شي يخص الحمام.. و بالرد الثاني رح اكلمكم عن كل شي يخص الحفاضات

[cup cake]

الحفاضات - و كل شي يخص تغيير الطفل و منطقة الحفاضه..


مستلزمات تغيير الطفل:
- حفاضات
- كلينكس مبلل او بيبي وايسب
- قطن
- مفارش
- كريم لمنطقة الحفاظ
-اكياس لرمي الحفاضات





اول شي طبعا نتكلم عن الحفاضات..
انا نصحوني ب حفاضات هاجييز .. و جربتهم و ماحبيتهم .. يتسرب منهم .. و مو ناعمين ابد
و اخر شي استقريت على حفاضات بامبرز نيو بيبي .




طبعا تحتاجين علبتين او ثلاثه .. حسب وزن الطفل .. يمكن يجي طفلج اكبر او اصغر ..
اخذي علبتين و بعدين شوفي وزن طفلج ..






الكلينكس المبلل او البيبي وايبس ..
انا افضل نوع للبشرة الحساسه من بامبرز ..





طبعا الوايسب مهما اشتريتي كمية رح تستعملينه اكيد .. بس اول اشتري اثنين او ثلاثه بس
و لما تشوفين ان طفلج ماصارت له حساسيه من هالنوع كملي.. اما اذا صارت عنده حساسية لازم تغيرين .. بس انا اشوف هالنوع احسن شي لان خاص للبشرة الحساسة . .






بالنسبه للقطن نحتاجه هنا بديل للبيبي وايبس اول ايام ..
انا انصح اول ايام لاتستعملون الوايبس.. يكفي تستعملون قطن و ماي.. قطن من النوع شوي كبير





او هذا






بيكون الطفل حساس بالفترة الاولى خصوصا فترة النفاس .. يكفي هذا القطن و الماي .. مهما كان الوايبس مافيه اي عطورات بعد الاحتياط واجب ..






تغطين القطنه بالماي و تستعملينها .. و تستعملين اكثر من وحده بالطبعا بكل مره ..

و لما الطفل يعدي فترة النفاس تقدرين تستعملين وايبس عادي







نجي للـ changing mat او المفارش استعمال واحد ..




هذول مفارش على الاساس استعمال واحد.. بس انتي تقدرين تستعمليهم مره و مرتين و ثلاثه لحد مايسوي فيها شي البيبي و تخرب .. و انا حسيتها عمليه اكثر من اللي ينغسلون .




تجي في العلبة الوحده 12 وحده ..

و نااااعمه قطن من الصفحه اللي ينام عليها الطفل.. و من برا تصير نايلون.. يعني لو صارت بوله او شي تكرمون ابددد مارح يتسرب على الارض.. مستحييل





تستعمل لاستعمالات هوااايه.. مثلا لما تخلصين من رضاعه الطفل.. تخلينه على الكتف عشان تطبطبين على البيبي.. و البيبي طبعا لازم يطلع شوي من الحليب.. و هذي تفيدج بهالحالات

و تفيد لما تحممين الطفل يجلس عليها.. و تفيد لما تطلعون مكان و تخلين البيبي عليها بالحديقة مثلا.. انا حتى فادتني لما علمت بنتي على الحمام هوااااااي.. و لسه و بنتي عمرها ثلاثه و نص و انا احطها تحتها في الفراش حتى لا سامح الله تسوي شي ..

و اللي مايلقون هالمفارش في السوبرماركتات اللي يمهم .. يقدرون يستعلمون المفارش العادية











كريم لمنطقة الحفاظ




لازم تستعملين كريم للحفاظ بعد كل مره ... انتبهي بعد كل مره.. مو لما يصير احمر تقولين استعمل لاااا .. لازم قبل مايصير احمر تحطين لان هذا واقي مو علاج.. لما يصير احمر لازم تستعملين اشياء من الصيدليه او من الدكتور.. احسن حل ماتنسين و لااااا مره تحطين من هذا الكريم

يكون بكل الاحجام عشان واحد للبيت و واحد صغير في شنطة الطلعه
طبعا بالسوق اكو انواع بس طبعا هذا النوع معروف انه احسن شي.. و اكرر مره ثانيه هذا وقايه مو علاج.






هذي الاكياس خاصه لرمي الحفاظات المستعملة





فيه طبعا انواع .. فيه نوع العطر و فيه نوع مايطلع الريحه ابد و فيه نوع خفيف .. و كل شي

فيه نوع كأنهم سطله صغيره و يتعلق في الشنطه












و هذي شغله مو ضرورية بس اللي ماعندهم مكان كافي للحفاظات يقدرون يستعملون هالشي
شكله كشخه و مفيد

















بعد بكلمكم عن اخر شغله تخص الحفاضات .. و هذي اعتبرها من تجاربي الفاشله اللي مااريد اكررها .. و هو سلطة الحفاضات ..





هذي سطلة و يكون فيها شريط من الاكياس اللي هو هذا





تحطين الشريط فيها و بس تحطين الحفاظه و بعدين تفرين و تصير الحفاظه داخل

صورة للتوضيح










انا استعملته في بنتي.. و ماحبيته
هو المفروض مايسوي ريحة .. و يشيل حفاظات كوووومة..
بس انا حسيته مو حلو و اصلا مو نظيف.. كنت اخلي مثلا كل عشر حفاظات و بعدين انظفه .. بس القى الريحة واصله للجيران اووووف لسه اتذكر الريحة

اسفه على الكلام بس قلت لازم اكلمكم عنه عشان تعرفونه اخاف تشوفونه و تشتهونه ههههه

هو شكله حلو و صح مايطلع الريحة اول شي بس لما تجين تنظفينه تختنقين . و ورا الست اشهر خلاص بتصير الريحة اصلا تطلع..


انا نصيحتي تشترين سطلة صغيره عاديه.. و تخلينها برا مثلا بالبلكونه او اي مكان عندج و تحطين فيها الحفاظات طبعا بعد ماتحطينهم في اكياس..
و كل يوم بالليل تتخلصين منهم . لان ريحة الحفاظات اذا اجت للبيت الصراحه تموت

الطفل اول ماينولد تبدلين له مليون مره باليوم.. و انتي قاعده في البيت ماتمشين الريحة.. بس لما يجيلج احد يشمها اكيد..

حاولي تحطيهن في مكان يكون بعيد عن الصاله و اذا كان مكان برا بعد احسن.

[ام ميدووو]

[Mafaheem]

موضوع حلو مارة

صراحه استفدت كثير ..
المنتدى يحتاج مثل هذا المواضيع **


عوافي قلبي

[Hamsat.3eshq]

يعطيك الف عافية

موضوع قيم ومفيد

🌹

[دانه مول]

مووووووووضوع جميل مشكوره عزيزتي

[المجتهدة...]

الله يعطيك العافية ع موضوع مفيد

[منييرة]

مشكورة الغلا على الموضوع الرائع و المفيد، جزاك الله خيرا

[منى العين]

صرااااحه موضوع مفييييد ومتكامل

يعني انا اشوف مواضيع فيها مبالغه في لبس البيبي يعني مرره دخلت موضوع
يقول اشتري 20 بربتوز و10 قبعات ومدري كم بدلة طلعه شدعوه صارت ملابسه اكثر من ملابس
على هالسالفه وشنطة البيبي الا تقول اخذي مكسرات واشتري رووووب فخم ملكي حق المستشفى
ومكياج ومن هالكلام


بجد الموضوع متعوب عليه واتمنى يتثبت وجد مفيييييد للحوامل مو بس البكريه