فاذا ضاقت الارض بالامنيات ..فسماء ربي لها اوسع..(تجربتي الثالثة مع التلقيح المجهري)

[تمنيتك بأحلامي]

السلام عليكم
اليوم حبيت اتكلم عن تفاصيل عمليتي الثالثة فالانابيب

بس قبل أبدأ بسرد تجربتي بكتب باختصار عن حالتي

السبب في تأخر الحمل
واللجوء لأطفال الأنابيب:إنسداد في قنوات فالوب
المركز اللي سويت عنده كل عملياتي:مركز دكتور سمير عباس بالخبر

العملية الاولى:قبل ست سنوات عند دكتور سعد الدين القناوي
والحمد لله نجحت وربي رزقني بولد
العملية الثانية:قبل 10 شهور تقريبا عند دكتورة غزالة
(بسبب اصرار زوجي اني اتعالج عند دكتورة افضل للكشف )
فشلت والسبب تساهل الدكتورة فالخطة العلاجية وتنازلها عن المثبت
وفي اخطاء راح اذكرهم فهالموضوع وطبعا بعد فشل العملية بكيت كثير
وقلت لزوجي لاتقول لي روحي لدكتورة كلهم فاشلات مااثق في علاجهم
لذلك اتفقت معاه اروح لدكتور

وفي خلال هالفترة زوجي انفصل من وظيفته بسبب أوضاع كورونا
والحمد لله احنا مخصصين مبلغ للعملية وقررنا نستغل هالوقت
علشان زوجي يكون متفرغ ويهتم بولدنا والبيت
ولاني ماابي اقول لأي أحد لو بسوي عملية حتى أمي

العملية الثالثة: عند دكتور وائل الشربيني
نزلت الدورة ورحت لموعدي وقبل أتكلم وضح لي ان الدكتور شاطر
وقعد يشرح لنا كلشي صار وشنو المفروض ما يصير
من عمليتي الاولى الى الثانية والى العملية القادمة
وشنو بيسوي لي وقال:الدكتورة غزالة غلطت لمن رجعت لك الأجنة وماركبت لك المحلول المثبت ...
أنا معجب بعلاج الدكتور سعد الدين وبمشي على نفس خطته العلاجية

قلت له:فالعملية السابقة نزل علي دم والدكتورة رفضت أني أوقف الإبر
>>الدم نزل علي اول وثاني يوم وقبل التحليل بيومين ظل ينزل ماوقف وهي رافضة اوقف الابر تقول هذا طبيعي
الدكتور:الدم لو نزل في أول يوم هذا طبيعي
لأن مرات الدكتور وهو يرجع الأجنة يمكن يجرح الرحم وينزل دم خفيف ،
بس لو نزل ثاني يوم او بعده لا هنا المفروض توقفين الإبر أو الحبوب اللي لسيولة الدم ،
ونوقفهم لو الدم وردي أو أحمر بس لو بني أو أسود لا
نخليك تستمرين عالابر لان هذا يكون دم متخثر

سوا لي سونار وقال:كلشي تمام شوفي هنا الرحم
وهنا البطانة وهنا التكيس >>عكس دكتورة غزالة تسوي سونار وهي ساكتة ماتشرح أي شي

كتب لي تحليل هرمون الحليب وحبوب كليمين
2 حبة<3 أيام
3 حبات<3 أيام
4 حبات< الى الموعد القادم بعد أسبوع
بالاضافة الى حمض الفوليك +
حبوب أسبرين للأطفال قال لانه خفيف واذا بدأت أخذ الإبر أوقفه

الدخول:200 ريال
الأدوية:95 ريال
التحليل:215 ريال

بعد هالموعد صارت عندنا حالة وفاة توفى أبو زوجي الله يرحمه ويغفر له
لذلك أجلنا العملية الى الشهر اللي بعده

بعد شهر رجعنا نبدأ من جديد ورحنا للموعد الأول:
سوا لي سونار وشرح لي كلشي هنا البويضات وهنا سماكة الرحم
كتب لي:حمض الفوليك 5 ملم + أسبرين أطفال + كليمين
والموعد الجاي بعد 9 أيام

الدخول:200 ريال
الأدوية:52 ريال>>ماشريت الاسبرين لان عندي فالبيت

الموعد الثاني:
سوا لي سونار وقال:لو بطانة الرحم 8 أو أكثر بيكون تمام
والحمد لله كانت سماكتها 9 وحدد لي يوم العملية بعد 4 أيام

كتب لي في نفس اليوم اخذ مغدي للأجسام المضادة
وفي نفس الوقت هو مثبت للأجنة ومن بكرا أزيد فالعلاجات
(4حبات كليمين +علاجي للسكر + دوفاستون 2 فاليوم +
تحاميل سايكولجست 3 مرات فاليوم + إبر السيولة)

الأدوية مو كلشي شريته أخذت بعضهم والباقي أخذتهم من مستشفى حكومي

الدخول:150 ريال
الأدوية اللي اشتريتهم:17 ريال
المغذي للأجسام المضادة والثبت:400 ريال

الموعد الثالث: عملية الترجيع (أجنة مجمدين)
رحنا للمستشفى 8 الصبح ودفعنا للعملية:3000 ريال
دخلوني الغرفة بدلت ملابسي أما زوجي أخذ ولدي ورجع للبيت لأن ممنوع الأطفال
شربت ماي وهم تأخروا علي ماقدرت أصبر ><
لذلك دخلت للحمام تكرمون ولمن جاول قلت لهم لذلك أخذوا مريضة غير
سوو لها عملية سحب
دخلوني العملية قبل الساعة 10
جا الدكتور وقال:بنرجع لك 4 أجنة
>>بسبب فشل العملية السابقة يزيدون عدد الأجنة علشان تزيد فرص الحمل


توكلنا على الله ورجع لي الكتاكيت الحلوين ♥ ومن أول لحظة من الترجيع حسيت بشعور حلو وفرحة في قلبي ♥

رجعوني الغرفة وركبوا لي نفس المغذي اللي قبل (للأجسام المضادة + مثبت)
بعد ساعة ونص من الراحة عالسرير جا زوجي ورجعنا البيت
والحمد لله كنت فرحانة وقتها
وأول مادخلت البيت مسكت جوالي وفتحت السناب
شفت واحد من المشاهير اللي ضايفتهم من زمان وساحبة عليه ماافتح سناباته
كان ماسك طفل في يده وقلت خلني أشوف شنو مصور
وفتحت سنابه الا مصور انه جاته بنوتة
انا وقتها فرحت ورفعت يدي لربي وطلبت
ان ربي يثبت حملي ويرزقني ببنوتة


فترة الإنتظار (أسبوعين)
ماحسيت بأعراض كثيرة بس ألام فالظهر والبطن ومو كثير كان قليل جدا

وزكمت يومين بس مااخذت علاج للزكام كنت أشرب ليمون وماي دافي
وكنت مريحة نفسي وزوجي مو مقصر الله يرزقه ويعطيه العافية
مهتم بكلشي يطبخ لنا ويغسل وينظف
اما انا كنت كل عالسرير اما نايمة او جالسة عليه لانه اريح لي من الارض
ولان عندنا تلفزيون بالغرفة ف استغليت الوضع وتابعت افلام

بعد ماخلصت الاسبوعين سويت تحليل رقمي في نفس المستشفى
السعر:215 ريال
رجعت البيت وكنت متطمنة وخايفة في نفس الوقت
صليت الظهر ونمت وخليت جوالي عند زوجي يكلمهم اذا اتصلو
الساعة01:40م لازلت نايمة الا
دخل زوجي الغرفة وهو يكلم فجوالي ويقول:الله يبارك فيك
أشرت له؟؟؟؟
وهو كان مبتسم وأشر بيده فهمت أن التحليل إيجابي
خلص من المكالمة وبسرعة اتصلنا على اهلنا بشرناهم الحمد لله


ستزهر من الداخل بعد كل ذاك الظلام ، فقط ثق بربك واصبر ثم توكل عليه وابتسم ♥


ربي يرزق كل منتظرة بالذرية الصالحة
دعواتكم لي ربي يتمم لي اللي بقى من حملي على خير ويسهل ولادتي
ودعواتكم لزوجي يثبتونه بالوظيفة

[ازاهير]

ماشاء الله تبارك الله
الله يثبت حملك وتولدين بالسلامه ي رب
ويسخر لك زوجك ي كريم
ويرزقني بتوائم ذا الشهر ي ذا الجلال والاكرام
وكل من يريد الذريه الصالحه من المسلمين والمسلمات����

[ازاهير]

ماشاء الله تبارك الله
الله يثبت حملك وتولدين بالسلامه ي رب
ويسخر لك زوجك ي كريم
ويرزقني بتوائم ذا الشهر ي ذا الجلال والاكرام
وكل من يريد الذريه الصالحه من المسلمين والمسلمات🤲🏻

[تمنيتك بأحلامي]

المشاركة الأصلية كتبت بواسطة ازاهير

ماشاء الله تبارك الله
الله يثبت حملك وتولدين بالسلامه ي رب
ويسخر لك زوجك ي كريم
ويرزقني بتوائم ذا الشهر ي ذا الجلال والاكرام
وكل من يريد الذريه الصالحه من المسلمين والمسلمات🤲🏻

الله يسلمك ويسمع منك وربي يرزقك بالتوام السليمين المعافين الصالحين

[مبروووك حامل]

ماشاءالله الله يتمملك على خير يارب

انا سويت محاولات كثييييييره

وحده منهم نجحت والحمدلله من ظ§ سنيييين

والاخيره كلها فشل متكرر

الان مقبله على عملية وربي يكرمني فيها ببنت او توأم يارب

وربي يتمملك فرحتك

المحلول هذا اذا هوه اللي يقولو عنه محلول البيض
ولا مر دكتوره كتبته ليا

وطلبته قالتلي ماله داعي وماثبت عنه شي

[تمنيتك بأحلامي]

المشاركة الأصلية كتبت بواسطة مبروووك حامل

ماشاءالله الله يتمملك على خير يارب

انا سويت محاولات كثييييييره

وحده منهم نجحت والحمدلله من ظ§ سنيييين

والاخيره كلها فشل متكرر

الان مقبله على عملية وربي يكرمني فيها ببنت او توأم يارب

وربي يتمملك فرحتك

المحلول هذا اذا هوه اللي يقولو عنه محلول البيض
ولا مر دكتوره كتبته ليا

وطلبته قالتلي ماله داعي وماثبت عنه شي

نفس كلام الدكتورة في عمليتي الثانية رفضت اخذه قالت مو مهم ومايثبت ماله داعي
جربي هالمرة قولي لهم يعطونك اياه مو خسرانين شي الا ربح لهم بتزيد الفلوس
وانتي يارب يثبت حملك والله يرزقك بالذرية الصالحة

[*عسل*]

ماشاءالله الف الف مبرووك الله يبارك لك

[*عسل*]

كتبت رد عن فرق الاسعار جدة عنكم وطلعلي طلاسم
شكلة ممنوع

[تمنيتك بأحلامي]

الله يبارك فيك يارب