ما زالت الحياة مستمرّة وما زال الأمل موجوداً .. تجربتي مع التلقيح المجهري

[تمنيتك بأحلامي]

مدخل...

أشتهي لغة جديدة ...
ألتهم حروفها
لأشبع حديثاً عنك ...
أقطع كلماتها كقوالب سكر...
لأذيب شوقي إليك في أكواب حياتي الفارغة

السلام عليكم
كثير يرسلون لي خاص حابين يعرفون قصة حملي
لذلك اليوم قررت اكتب هالموضوع واذكر فيه كلشي مريت فيه بتفاصيله
مع السعر لكل شي دفعت له

أولاً:بتكلم عن المشاكل اللي مريت فيها وانا بنت قبل اتزوج.....
من أول مابلغت والدورة كانت متلخبطة عندي
مرات تجيني نزيف ومرات متقطعة ومرات تغيب عني شهر او شهرين
ولمن تجي تكون نزيف وغزيرة كثيييير وتطول بعدد الأيام
ووقت الدورة تجيني الام فظييييعة حتى بالمسكنات ماتروح و
اظل طول الليل ابكي واصرخ واتلوى من الألم واهلي ماغير يطاردون بي
من مستشفى للثاني يعطوني بهالمسكنات ولا في فايدة
الى ان مرة تنومت بالمستشفى وسووا لي اشعة وتحاليل
واكتشفوا ان عندي كيس عالمبيض وحولوني على مستشفى الولادة
بدأت مراجعاتي بمستشفى الولادة وظليت سنوااااااااااااااااات اراجع عندهم من دون أي فائدة
وغير المواعيد البعيدة جدا عن بعضها اروح ابي احجز موعد
ومستحيل احصل موعد قبل شهرين او 3
وكل اللي كانوا يسوونه لي هو متابعة الكيس
ومايعطوني أي علاج يساعد على اختفائه لدرجة مرة غابت عندي الدورة الشهرية 8 شهور
وكنت اتألم ورحت لهم سووا لي تصوير قالوا الكيس انفجر بداخلي ><
وبسبب السائل اللي فيه تلخبطت عندي الهرمونات وتأخرت الدورة
وقالوا انتظري جسمك راح يمتص السائل وترجع الهرمونات لطبيعتها
ونصحوني بتنزيل الوزن وفعلا لمن كنت انزل وزني كانت الدورة تجي منتظمة كل شهر
ولمن يزيد وزني تتأخر
المهم مختصر كل هالسنوات والمواعيد قالوا لي مالك أي علاج
والكيس اللي عندك عمره مابيروح وماتحتاجين مواعيد وقفلوها بوجهي
تركت المواعيد والمستشفيات >>أكبر غلط
الدورة كانت مرة تنتظم وكلها فترة بسيطة وتتلخبط تتأخر لي شهر او شهرين
وماكنت اهتم لها بس لمن اتألم من عدم نزولها اروح للمستوصف يعطوني علاج ينزلها
وقبل الزواج دخلت لنادي رياضي ونزلت وزني وانتظمت الدورة
صارت تنزل كل شهر وبالضبط بنفس التاريخ او قريب منه وحتى لو تأخرت تتاخر كم يوم فقط

ثانياً:نجي لبعد الزواج
مثل ماقلت لكم قبل الزواج الدورة انتظمت وتنزل لحالها كل شهر
بس من بعد الزواج غابت عني من اول شهر
حللت مافي حمل ورحت راجعت في مستشفى خاص
>>كرهت الحكومي لانهم اهملوني حسبي الله عليهم
قلت للدكتورة عن الكيس اللي كان موجود عندي وسوت لي تصوير
وشافت ان الكيس حجمه 10 سم >< قالت لازم عملية فتح بطن
علشان نتخلص من الكيس والا لو حملتي مستحيل يتم حملك بسببه راح تجهضين
سويت العملية بعد 3 شهور من زواجي وبعدها صرت اراجع علشان الحمل
كانت الدكتورة تتابع لي التبويض وكان ممتاز يوصل حجم البويضات الى 20 -22
وتقول الدكتورة بهاليوم الفلاني لازم يصير جماع ونسوي بكلامها بس مايحصل حمل ><
عطتني حبوب الفوليك وقالت لاتتركينه الى ان تحملين
بعدها بفترة صار عندي التبويض ضعيف وأقول للدكتورة عطيني منشطات بس ترفض
الى ان طفشت منها ورحت لمستشفى ثاني وهنا المفاجأة قالوا عندي تكيس
وعطوني علاج كلوفاج>>من وانا بنت مااحد ذكر ان عندي تكيس أبداً ولا عطوني علاج له

وصرت ابحث بالنت وقالوا لي التكيس علاجه بسيط جداً والدكتورة اللي رحت لها الثانية كتبت لي منشطات حبوب ومانفعت معاي
حجم البويضات مايصير أكبر من 11 وكنت أقول لها عطيني ابر اقوى وهي ترفض
تقول لازم تاخذين المنشطات 3 شهور ورا بعض وانا كنت مهملة اشوي اخذ المنشطات ولا اتابع التبوض لمن هزأتني والتزمت خخخخ

طبعا نسيت أقول ان الدورة ماتنزل الا بالحبوب ونادر جدا تنزل لحالها
المهم مثل ماقلت لكم ماتغير شي والتبويض ضعيف وكان مر على زواجي وقتها سنة ونص او اكثر
وانا بدأت ايأس من الحمل بالرغم من اني انسانة مؤمنة بربي وكنت احاول مااترك القرآن وادعي ربي لي ونهار
الا ان ابليس كان يوسوس لي وماكان لي وسيلة غير سجادتي ودموعي , وكنت كل افكر وكل سرحانة اتخيل لو عندي طفل , اتخيل وقت دوام زوجي ان طفلي عندي الاعبه او اعطيه رضاعته ووقت الأكل اتخيل انه يزعجني ومااتهنى بوجبتي , ووقت النوم اتخيله نايم جنبي عالسرير او سريره جنب سريرنا ويصحيني من نومتي الفجر
تخيلات كثييييييييييييرة كانت تجيني وكنت دايم حزينة واقل كلمة تخليني ابكي حتى وقت الاكل الدمعة تكون بعيني وزوجي يحاول يخفف عني ودايم يقول لي ان شاء الله راح تحملين وبتشوفين بعدين كلامي بيصدق وانا ماعندي شي غير البكي ><
الى ان جا اليوم اللي جا زوجي من العمل وقال ان أصحابه رشحوا له دكتورة
(حنان بركات – مستشفى دكتور فخري بالخبر) كثير شاطرة وقالوا له كثير تأخروا بالحمل ولمن راحوا لها بسرعة حملوا
وبسرعة رحت لها وشرحت لها كلشي مريت فيه من وانا بنت الى وقت العملية وبعدها المنشطات وقلت لها المفروض اخذ ابر اقوى صح؟
قالت أي راح اكتب لك ابر منشطة تاخذينهم لمن تجي الدورة وبيوم 9 من الدورة نسوي لك اشعة الصبغة
نزلت الدورة واخذت المنشطات وسويت الاشعة بعد الدورة
والمصيبة طلعت الأنابيب عندي مسدودة
قالت لي مالك إلا أطفال الأنابيب وانا اللي تتجمع الدموع بعيني قلت لها مافي علاج يفتحهم؟
قالت لاتضيعين الوقت وبسرعة سوي الانابيب أحسن من تضيعين وقتك وفلوسك على اشيا ممكن ماتنفع والعمر يمشي
وقلت لزوجي وجلسنا كم شهر مو متقبلين فكرة ان نسوي انابيب وانا زادت عندي الكآبة خاصة بعد ما اقتنعت بالفكرة بس زوجي لا
وكل أبكي إلى أن جا رمضان وبعده العيد
ورحنا للمدينة المنورة 4 أيام وجلست أطلب أن ربي ييسر لي الأمور وطلبت ان زوجي يوافق عالعملية وبعد مارجعنا الحمد لله زوجي اقتنع ورحت لمستشفى المانع لأن قالوا هم يسون أنابيب بس الدكتورة الله يهداها كانت تماطل بالموضوع
كانت تقول لي لازم تجين أول يوم من الدورة علشان احولك عالدمام وتسوينها هناك وانا تصير لي ظروف أكون أول يوم عند أهلي>>انا وزوجي ساكنين بالخبر اما أهلنا كانوا بمنطقة غير
كنا كل اسبوع نروح نزورهم بالويكند ونرجع
المهم كنت اروح لها ثاني يوم الدورة وهي تعصب تقول ماينفع لازم أول يوم مو ثاني ولاثالث يوم
وحتى لمن مرة رحت لها أول يوم ماادري شنو صار وأجلتها للشهر الجاي
أنا حسيتها تتلاعب وقلت لزوجي ماابيها ابي اروح لغيرها وصرت أبحث بالنت عن الموضوع واقرا مواضيع لناس سووا العملية وتجاربهم
الى ان شفت وحدة ردت على موضوع قالت أنها سوت العملية بمركز (دكتور سمير عباس بالخبر) وقلت لزوجي عنه قال أحسن لنا بالخبر قريب عن الدمام
وبحثنا بالنت عن المركز وطلعنا رقمهم وكلمهم زوجي قالوا تعالوا ثاني يوم أو ثالث يوم من الدورة
احنا استغربنا لان دكتورة المانع كانت تعصب لمن مااروح لها أول يوم وقلت له معناتها ماتعرف هالدكتورة والا اشكثر ناس يبدأون العلاج ثاني يوم
المهم نزلت الدورة ورحنا لأول موعد بالمستشفى
فتحنا الملف ودخلت عالدكتور قال هالشهر ماراح نبدأ بالعلاج لازم نسوي لك تحاليل للغدة وللأجسام المضادة علشان لو مانجحت العملية نعرف الاسباب وانا قلت له ليش ماتسوون التحاليل ونبدأ بالعلاج في نفس الشهر؟
قال لان التحاليل تطول على ماتطلع النتايج يبي لها اسبوعين
زوجي سأل الدكتور لو في طريقة لفتح الانابيب
والدكتور قال يفتحونهم بالمنظار بس بعضهم ماتنفع معاهم وبعضهم حتى لو انفتحوا وحملوا احتمال ترجع تتسكر الانابيب
يعني مافي فايدة من كثرة العمليات والمصاريف
سويت التحاليل وجلسنا ننتظر للشهر الجاي وانا ليل نهار افكر بالموضوع واطلب من ربي تتيسر الأمور وطبعا لازم ابكي >>تحملوني تراني أحب الكآبة
وطلعت التحاليل وكلمنا المستشفى قالوا عندي نسبة من الاجسام المضادة وبيعالجونها وقت التنشيط
السعر المدفوع للدخول:250 ريال
تحاليل الغدة + الأجسام المضادة:1050 ريال
إجمالي المبلغ المدفوع للموعد الأول:1300 ريال

الشهر اللي بعده اخذت حبوب نزل لي الدورة ومن قبل لا اروح المستشفى صرت أبكي وخايفة ان الدكتور يأجلها خخخخخ
رحت للمستشفى (الموعد الثاني)
بدأت بالمنشطات (أبر) كنت اخذهم يوم ورا يوم وفي ابر اخذهم بالبطن او الفخذ او اليد>>نفس الأماكن اللي ياخذون فيها ابر السكر وانا كنت اخذهم بنفسي<<وبعض الابر لازم اروح للمستشفى يعطوني اياهم بالعضل+ حبوب أسبرين>>الاسبرين اخذته بعد ماانتهيت من الدورة
الدخول:مجاني
الأبر المنشطة + الاسبرين:1323 ريال
والموعد الجاي بعد 6 أيام

بعد 6 أيام رحت للموعد الثالث سويت تحاليل علشان يشوفون نسبة التبويض عندي
وكان الهرمون اللي يبين نسبة التبويض جدا نازل يعني التبويض ضعيف ><
كانت النسبة عندي 25 وهو المفروض يوصل لفوق ال 1000
كتب لي الدكتور ابر منشطة لمدة يومين وركبوا لي مغذي محلول ابيض مثل الحليب هذا يساعد على ثبات الاجنة لبعدين
الدخول:150 ريال
الابر المنشطة:1090 ريال
المغذي:500 ريال
والموعد الجاي بعد يومين

الموعد الرابع:
رحت وسويت التحليل للهرمون والهرمون كل ماله وينزل
>>ماادري كيف اقول لكم شعوري وقتها بغيت انجن بسبب هالهرمون
وقال الدكتور عندنا خيارين إما نأجل للشهر الجاي.......
أنا على طول قلت له لا مأأجل أبي هالشهر
هو كمل كلامه وقال أو نزيد لك جرعة المنشطات إلى 300>>أنا كنت أخذ 150
قلت له ليش من البداية ماعطيتوني جرعة كبيرة؟>>تدور الهواش مع الدكتور خخخخخخخخ
قال لأن أنتي عندك تكيس وأحنا أصحاب التكيس مانعطيهم جرعة كبيرة على طول لازم نبدأ بجرعة أقل لأن ممكن يسبب لهم افراط بالتنشيط>>نسيت كلامه بالضبط بس كأن هو قال كذا ><
وزاد لي الجرعة أخذتها لمدة يومين
الدخول:150 ريال
التحليل:200 ريال
الابر المنشطة:648 ريال

الموعد الخامس:
رجعت لهم بعد يومين بعد مااخذت المنشطات والحمد لله ارتفع الهرمون من 25الى 450 وسوا لي سونار داخلي يشوف التبويض وشاف بويضة جهة اليمين حجمها 19 وأربع بويضات بالجهة اليسار حجمهم 15 وكتب لي منشطات لمدة يومين

الدخول:150 ريال
التحليل:200 ريال
الابر المنشطة:648 ريال

الموعد السادس:
الحمد لله الهرمون ارتفع اكثر وصار عندي 3 بويضات ناضجة وأحجامهم 18 و 19و 20 أما البويضات الباقية كانوا 16 وقال الدكتور العملية على 3 بويضات فيها مجازفة >>لازم أقل شي 4 بويضات
وقال ماندري ممكن حجم البويضات الباقية يتضاعف الى موعد العملية بس انتوا شنو قررتوا نسويها والا ننتظر الشهر الجاي؟
أنا بدون تفكير قلت نسويها وقال خلاص توكلنا على الله
وقعنا على اوراق العملية وكتب لي ابرة تفجيرية أخذتها بالليل الساعة 10 ومن اليوم الثاني "الأحد" أصوم من 10 الليل
وعملية السحب يوم الاثنين الساعة 8 أو 8 ونص
الدخول:150 ريال
التحليل:200 ريال
الابرة التفجيرية:46 ريال

الموعد السابع: (عملية السحب)
مبلغ العملية: 13.000 ريال
رحنا المستشفى الساعة 7 ونص الصبح والساعة 8 دخلوني غرفة بدلت ملابسي وجا زوجي عطونا علبة علشان ياخذون عينة من الحيوانات المنوية
والساعة 9 ونص خذوني لغرفة العمليات ركبوا لي ابرة المغذي ومنها دخلوا البنج وعلى طول بديت احس بالنوم ومااشوف زين احس اني انحولت خخخخخخ
صحيت 10:25 ورجعوني للغرفة وبعد دقايق جا الدكتور قال سحبنا 9 بويضات 3 فاضيات مايصلحون للتلقيح و 6 بنلقحهم
كتب لي علاج مثبتات ومسكنات الى يوم الترجيع

العلاجات اللي اخذتها:
1/تحاميل للألم عند اللزوم voltaren 100mg – rectal suppository
2/تحاميل من يوم السحب الى اشعار اخر >>مثبتات cyclogest 400mg vaginal
3/ابرة بالعضل في اليوم الأول والرابع والسابع من السحب pregnyl 1500 iu
4/ابرة بالعضل يومياً لمدة 3 أيام من السحب solu medrol 40 mg ampoule
5/حبوب كليمين مرتين باليوم من الحبوب البيضاء الى اشعار آخر climen
6/حبوب زينات مرة كل 12 ساعة لمدة 5 أيام zinnat 500 mg or amour 500 mg
7/إبرة تحت الجلد إلى اشعار آخر>>أبر مسيلة للدم علشان يوصل دم للجنين الى الآن اخذهم
Innohep 3500 Iu amp
8/حبوب prednisolone 5 mg حبة يوميا لمدة 3 أسابيع

سعر الادوية:504 ريال

الموعد الثامن:
بعد 3 أيام من عملية السحب
رحنا المستشفى الساعة 10 علشان الترجيع
قالوا لي لازم اشرب ماي وتكون المثانة نص ممتلئة وبعدها ودوني لغرفة العمليات وجا الدكتور قال تلقحوا 5 بويضات من الستة اللي سحبناهم
وأجيكم أنا الذكية أقول له ليش ماتلقحت هالبويضة؟
هو حسيته جاته الضحكة خخخخخخخخخخ
قال اسألي ربنا >< يافشيلتي
قال لي الحين عندك 5 بويضات تبينهم نرجعهم للرحم كلهم والا بس نرجع 3؟
قلت له رجع 3 وجمد الثنتين الباقي قال لازم يتطورون أكثر علشان نجمدهم
رجع لي البويضات وقال لي لاتتحركين احنا نشيلك وشالوني للسرير الثاني ورجعوني الغرفة ووقف يعطيني النصايح
لازم اظل منسدحة ساعتين مااقوم وقال بننتظر اسبوعين وبعدها نسوي تحليل حمل رقمي
وقال لاتشتغلين او تجهدين نفسك ولاتطبخين خليك مرتاحة واكلي فواكه وخضار والدرج ممنوع وكل هذا تسوين به لمدة شهرين لو حصل حمل وخليك مستمرة عالادوية اللي وصفتها لك المثبتات والابر>>الابر المسيلة للدم
وركبوا لي المغذي الابيض اللي مثل الحليب
وبعد ساعتين قمت علشان بنرجع للبيت والحمد لله وقتها كنا فرحانين وانا مو متخيلة ان في بطني كتاكيت صغار وكل اشوي المس بطني وزوجي ماسكني لاتمشين بسرعة اشوي اشوي ولاتشتغلين حسيت كأن احنا في مسلسل خليجي هههههههههههههههههههههههههههه

سعر المغذي المثبت:500 ريال
الادوية:494 ريال

جلست انتظر هالاسبوعين يخلصون على نار واستغليت وقت الانتظار بالتسبيح والعبادة وقراءة القرآن والسبحة ماكانت تنزل من يدي
وفي اليوم الرابع من الترجيع نزل مني إفراز لونه بني ولما سألنا الدكتور قال طبيعي لاتخافين وخليك مستمرة عالمثبتات
انا وزوجي بحثنا بالنت عن هالافراز البني وقرأنا أن هذا ينزل وقت تعشيش البويضة بجدار الرحم واحنا استبشرنا خير قلنا ان شاء الله ثبت الحمل

واليوم العاشر نزل مني نقطة دم وأنا خفت قلت شكله نزلوا مافي حمل ><
كلمت الدكتور قال وقفي الابر المسيلة للدم وزيدي المثبتات 3 مرات باليوم الى يوم التحليل>>كان باقي على يوم التحليل 3 أيام

طبعا من بداية الترجيع من وانا منسدحة عالسرير بالمستشفى وطول هالاسبوعين كان تجيني الام نفس الام الدورة ظهري وبطني يألموني وماغير كل منسدحة مااقدر اتحرك وتعبانة والدكتور قال طبيعي تجيك هالالام
وكان عندي إمساك تكرمون وصرت اكل سلطة وفواكه والدكتور قال لو تبين تاخذين ادوية للامساك قولي للصيدلي يعطيك ادوية للحوامل بس انا خفت اخذ اي شي وظليت عالخضار

وجا يوم 14 من الترجيع اللي هو موعد التحليل الرقمي
قعدت من نومي الصبح ورحت أغسل وجهي مااشوف الا تلوع كبدي واستفرغ ><
قلت شكله من علاج التكيس اللي اخذه لانه يسبب غثيان واستفراغ>>ماكنت حاطة ببالي اني 100% حامل علشان ماانصدم من النتيجة لو طلعت سلبية
رحت المستشفى الساعة 9 وسويت التحليل وقالوا لنا نهاية الدوام الدكتور بيكلمك عالجوال يعلمك بالنتيجة
رجعت البيت وقت الظهر وزوجي راح للعمل وانا طول الوقت على اعصابي كل اشوي اطالع الساعة وكل ماقربت الساعة من 4 بطني يألمني كااني انتظر نتيجة المدرسة خخخخخخخخ
وبس صارت الساعة 4 صرت اتخيل كيف بيكون شعوري لمن الدكتور يقول مافي حمل بقعد أبكي الى ان انام ولو طلعت حامل كيف بيكون شعوري نفس الشي ممكن أبكي من الفرحة
والى 4 وربع اتصل الدكتور وانا اللي ارتبك وارد عليه:الو
الدكتور:مدام...
انا:نعم
الدكتور بفرحة:مبرووووك انتي حامل
انا مو مصدقة:صج؟؟
الدكتور:مبروووك مبروووك حامل
انا مو مصدقة وكان بطير من الفرحة:الله يبارك فيك
شكرت الدكتور وسألته عن الادوية والمثبتات قال لي استمري عليهم الى ان يثبت الحمل وسكرت الجوال وانا حدي فرحانة وطول الوقت اردد :الحمد لله
ورحت توضيت وصليت لربي ركعتين وشكرته على هاليوم
وكلمت زوجي وعلمته بالنتيجة
ويارب يرزقكم بفرحة نفس فرحتي اللي فرحتها وأكثر وان شاء الله كل وحدة تنتظر الحمل ربي يرزقها هالشهر وتجي تبشرني
واخيرا عذرا عالاطالة الشديدة خخخخخ
ودعواتكم لي بتسهيل الولادة طفشت من الحمل ومتلهفة لضمة جنيني

مخرج:

أتحدثُ عن جمال لحظات الحب بإسهاب..
ولكنّي لا يمكننّي أن أرى حبًا أبديًا خالصًا
ينتمي إلى القلب وإلى السماء مباشرة
سوى في لحظات الأمومة المُترفة...
حين تلتقي عينٌ صغيرة بأخرى كبيرة
ويتحول العالم كله في بؤبؤ عين.

[حنان معوض]

ماشاء الله
ربنا يسعدك يارب ويكمل حملك علي خير ويرزقك الذريه الصالحه المعافاه

[قلب سعيد]

ماشاءالله تبارك الرحمن مبرررروك ياعمري الله يثبت حملي وحملك ويقرعينابشوفت اجنتناوهم في اتم صحه وعافيه

[Hana221]

الله يرزقك شوفه عيون جنينك ي رب ويفرحك فيك ويرزقك بره ياارب ..
مريتي بكثير امور وحسيت بشعورك انا كنت من مستشفى لمستشفى وكل اموري سليمه
بالاخير قالت لي الدكتوره انتي تعالجين وتتعبين نفسك وزوجك ماحلل خليه يحلل وهاتي النتيجه ..
وصار معاه ضعف وللحين يتعالج وانا افكر الحين اروح مستشفى الحبيب عند الدكتور بندر عبدالكريم ..
بس بنتظر لين اشوف نتيجه تحليله والله يرزقنااا دايم الطفل الاول مايجي بسهاله بس الثاني يجي بدون ماتفكرين فيه لان المخ خلاص ارتاح من موضوع الحمل وخرابيطه صحيح توني متزوجه 7 شهور بس من اول شهر زواج وانا في بالي اني احمل بس دايم اشك بزوجي والشك صار صح لانه دايم فيه خمول بعد الجماع يتعب بقوا ظهره وحتى الانتصاب مو مراااا
عشان كذا انا ما ارتحت قلت فيه حاجه اكيد وصار ضعف وجرثومه بالبول الحمدلله جات على كذا انا خفت انها دوالي ..


انتبهي لحالك والله يهون عليك ي رب ❤️

[تمنيتك بأحلامي]

شكرا على دعواتكم الحلوة حبيباتي

هانا
زوجك عنده ضعف شديد والا بسيط؟
انا زوجي كان عنده ضعف بسيط واخذ فيتامينات وعسل ملكة النحل لمدة 3 شهور والحمد لله تحسن

[ام جوري&&]

الله يزيدك امل ويرزك باللي تتمني ...

[تمنيتك بأحلامي]

شكرا ام جوري عالدعوة الحلوة
ويارب يرزقك باللي في بالك

[Hana221]

المشاركة الأصلية كتبت بواسطة تمنيتك بأحلامي

شكرا على دعواتكم الحلوة حبيباتي

هانا
زوجك عنده ضعف شديد والا بسيط؟
انا زوجي كان عنده ضعف بسيط واخذ فيتامينات وعسل ملكة النحل لمدة 3 شهور والحمد لله تحسن

ضعف بسيط وعطاه علاج من ضمنه فيتامين باقي هالشهر ويخلص ..
اشترينا العسل حق الملكات مع طلع النخيل بس قالوا ماينفع ادويه مع عسل
وخليته يوقفه بعد التحليل يرجع له ..

[Mayar yahya]

اختي الله يبشرك بالخير وين ما رحتي يا رب ههه
كل ما ادخل موضوع بلاقي في خيبات خيبات خيبات وتنسد نفسي
بس سبحان الله بعد ما قريت موضوعك قلت ربنا بنساش حدا وفعلا دائما في امل
والامل لازم يكون بس بالله .. وانا احييتي فيي الامل لاني هاذ اليوم الثاني بعد ترجيع الاجنة وكنت خايفة
بس والله العظيم ارتحت بعد قراءتي لتجربتك .. ولو ، لا قدر الله ما نجحت هالمرة ما بزعل لانه انتي كان عندك مشاكل
كثيرة وربنا رزقك ما شاء الله وهذا كله من رحمة ربنا وانا ما عندي مشاكل فأكيد باذن الله ربنا رح يرزقني ويرزقنا جميعا الذرية الصالحة
ومبارك انتبهي على نفسك وربنا يرعاكي ويحماكي ويتمملك حمل على خير ويثبته يا رب

[انثى تكره الظلم]

قصتكـَ مؤثرٍه آوٍى

قرٍآئتهآآآآ وٍتآثرٍرٍت وٍآلحمد لله كـَآنت نهآيِّتهآآآ حلوٍوٍه وٍمفرٍرٍحه

آلف مبرٍوٍوٍكـَ على آلحمل وٍآلله يِّتمم لكـَى على خيِّرٍرٍرٍ

وٍتحيِّآآتى لآيِّمآنكـَ آلكـَبيِّرٍ برٍبنآآآ مآشّآء آلله عليِّكـَى كـَآنت آرٍآدتكـَ قوٍيِّه وٍحلوٍوٍه لهيِّكـَ لكـَى منى آحلا فآيِّف سَتآآرٍز للموٍضوٍع آلحلوٍوٍوٍ

تحيِّآآآتى