قصت زوجتي مع مستشفى دلة قسم النساء والولاده ومستشفى رعاية الرياض

[N,A]

بسم الله الرحمن الرحيم


انا ما سجلت بهذا المنتدى الا بعد ما عانيت من مستشفى دلة وشكيتهم عندهم ولكن لاحيات لمن تنادي وان شائ الله ما تتكرر نفس المعاناه اللي صارت لنا.

هذي قصة زوجتي مع مستشفى دله قسم النساء والولاده فقط ،، انا موظف ارامكو وكان تامين ارامكو القديم يخيرك في مستشفى واحد ولسوء الحظ كان مستشفى دله لأن العالم ماخذ فكره جيده عنه وحنا من هالعالم .. جابت فيه زوجتي سابقا ولدنا الاول بعد معاناه مع المستشفى والممرضات والدكتورات حيث انه يوم الولاده تركوها لمده ١٣ ساعه بدون اي مساعد يبونها تولد لحالها وهي بكريه ،، وبعد هذا الوقت كله وانا انتظر برا مولودنا الاول وواثق فيهم ،، كلموني قالوا تعال وجيتهم عطوني ورقتين لازم اوقع على وحده منها ،، وحده عمليه قصيريه والثانيه تحمل مسؤليه طبعا ما يعطونك هالورقتين الا بعد ما يخرشونك ، البيبي نبضه ضعف ومانزل والرحم مدري وش فيه ،، وانت في موقف لا تحسد عليه ،، قلت لهم ابي ادخل عندها بس دقيقه
ودخلت وشفتها ووالله العظيم لحالها ماعندها احد قاطينها بسرير وتوجع كنها طير مذبوح وشفت هالحال دريت انهم يبون القيصريه باي طريقه ومن رأفتي بحالها وتعبها والله بغت تموت وهم تاركينها وقعت بقهر على العمليه وحسافه العذاب وكل هالوقت ،، مع ان الرحم فاتح ١٠ ،، بس ماحد ساعدها ولا شفطوا ولا سوو اي شي
وصارت العمليه والحمد لله على كل حال وقدمنا شكوه عليهم عندهم يعني هم القاضي والحكم ! ولا صار اي شي
ومرت السنين وراحت وحملت زوجتي بعد ٤ سنوات من العمليه وكانت القناعه ان هالمستشفى يتعمدون يولدون قيصري بس من كلام الناس ومدحهم له قررنا نتابع معهم بس عند دكتوره ثانيه غير اللي كنا عندها اول
وكانت المتابعه مع دكتوره عراقيه اسمها ماجده والله ثم والله اكثر كلمه سمعتها منها ( كولش زين ) ماعندها غيرها وكل مانجي تطمنا ولا فحوصات زي الناس ولا نصايح بس كولش زين ونمشي
لين جاء الاسبوع الاخير وكان مقرر ولادتها بتاريخ ٢٦ اوغست ٢٠١٩ جينها وسوت فحوصات سريريه وقالت الرحم مقفل والبيبي مرتفع واذا ما فتح من الان لاسبوع ترا قيصريه ( اسهل شي عندهم هالكلمه )
للمعلوميه زوجتي من بدايه التاسع كانت تمشي باليوم اقل شي ساعه واخر الايام وصلت الى ساعتين
وعدا اسبوع بعد تاريخ الولاده المقرر وحنا بما اننا كنا تامين ارامكو القديم وبتاريخ ١ سبتمبر ٢٠١٩ فتح تامين بوبا لموظفين ارامكو وتقدر تحجز اي دكتور حتى لو استشاري مو زي اول محدودين على الاخصائيين قلت اجرب استشاريه من مستشفى دله وقريت كثير وكان فيه كلام واجد عن الدكتوره (جيهان فاروق) مصريه واكثر الكلام انها كانت الافضل بس تغيره الفتره الاخيره
حجزنا عندها موعد بتاريخ واحد سبتمبر الساعه ٦ المغرب ودخلنا عليها وكشفت سرير اقل من دقيقه وجتنا بكل ثقه قالت الرحم مقفل والبيبي مرتفع الى الان واحتمال وزنه ٤ كيلو فمستحيل تولدين طبيعي ( قلنا لها اول ما دخلنا نبي طبيعي لان الاولى قيصري ) وقالت راح نحدد لك عمليه بكره الصباح قيصري بتاريخ ٢ سبتمبر يوم اثنين،،، قلت لها لا لا قيصري مانبي ابد اصبروا عليها
عاد بدت فلسفه المصريات ،، كان معها كوب صغير قالت ازاي عاوز كوره تخش جوا الكوب دا حجم البيبي وراسه كبير و المدام عنها الحوض صغير واحتمال البيبي عنده براز فراح ياثر عليه ومن هالكلام ،، وهذي اعتبرها خيانه امانه كيف دكتوره تعطي معلومات زي كذا بدون اي اثبات لا فحص ولا شي كلها توقعات ؟؟؟ المصيبه استشاريه وتعرف معانات القيصريات ومحدودية الولادات بعدها وتاثيرها على الحرمه ،، معقوله تبيع ضميرها اذا كان عندها ضمير عشان تكسب المسشتفى اكثر بالقيصريات او انها تبي تخلص باسهل طريقه وتفتك ،، الزبده قلت لها خلاص مشينا نشوف مستشفى ثاني وهي تزعل وتطير عيونها وراح تتحمل المسؤلية وتوقع على ورقه انك مسؤل ( هذي سلاحهم لتخويفك ) والله وامشي واسحب عليها وهي تسولف وقلت لزوجتي مشينا رعايه الرياض نعرف كذا وحده ولدت عنده طبيعي ورحنا لهم بليلتها قلوا مافيه مجال اليوم وحجزنا اليوم الثاني الصباح مع استشاريه اسمها زينب سعوديه ودخلت عليها زوجتي وفحصتها قالت الرحم فاتح ٣ والبيبي نازل !!!! كيف امس بالليل كان مقفل والبيبي مرتفع والمفروض الان عمليه معقوله ب ١٢ ساعه صار كل هذا او ان دله نصابين وحده منها ،، وقالت لها الدكتوره انتي الان بحاله ولاده نبي نرقدك لاكن رفضت وقلنا ماراح نسوي زي المره الاول لا جاها الطلق الصحيح رحنا
ورجعنا البيت وعلى الساعه ٢ الظهر بدت الالم والطلق ورحنا على طول ودخلوها غرفه الولاده وشوي قالوا فاتح ٦ مشاء الله وانا كل شوي رايح جاي اسال ولاحضت اهتمامهم بها وعندها ممرضتين طول الوقت والدكتوره هنديه متواجده دايم وماجت الساعه ٦ المغرب الا والرحم فاتح ١٠ واسمع صياح الممرضات والدكتوره عند راسها يالله يالله ادفعي ويحمسونها (( فرق عن دله مخلينها تولد مع نفسها )) وشفت حماسهم وقلت للممرضات فلبينيات لكم هديه لو وولدت طبيعي وجلسوا ساعه يحاولون معها وما طلع شي اخر شي قالوا شفط ووقعت عليه وجت دكتوره سعوديه محترمه اسمها شربيني الله يوفقها وبدوا الشفط وقصوا شوي وما سمعت الا صياح الولد ..... والحمد لله من قبل ومن بعد ونضفوها وخيطوا الجرح واهتمام ورعايه حلوه والبيبي جاء به تفخه براسه من الشفط بس خفت ثاني يوم
والحمد لله هذا ولدي عندي الان و ٢٤ ساعه وسوينا خروج من المستشفى والحمد لله من قبل ومن بعد
الهدف والله العظيم من القصه ذي ماهي تشهير ولا لي اي مصلحه فيها الا اني ما ابي احد تتكرر معه نفس هالمعاناه مع مستشفى دله ووالله العظيم ان كل كلمه قلتها صحيح ولا زوده اي شي

[Baghdad Mohammed]

لاحول ولا قوة الا بالله العلي العظيم
الحمدلله على سلامة الأم والبيبي وكويس اخذتو خذركم