المستشفى السعودي البريطاني ،،

[Ōяαήģэήā]

مساء الخيرات والورد والفل على احلا كروشات وامهات

كيفكم ان شاء الله تمام

يابنات انا حابه اسأل عن المستشفى السعودي البريطاني
كيف عنايتهم ودكتوراتهم والحضانه حقتهم؟؟؟

وهل تنصحون بالولاده فيه !!

اللي جربته او تعرف احد من قريباتها او صاحباتها جربته ياليت تفيدنا
وشغله ثانيه اذا النونو ولد كيف الختان. عندهم هل هو كويس ويهتمون فيه او لا،،

ياااارب اللي ترد علي توفقها وتصلح لها عيالها وتسخر لها زوجها وترزقها من اوسع ابوابك
وتحقق لها كل ماتتمنى ياعزيز ياجبار...*

[Ōяαήģэήā]

معقوله محد عنده خلفيه
وين بنات الرياض؟؟

تكفوووووون افيدوني

[~ L o l a]

صراحة ماعرف أحد ولد فيه لكن عموما لو ماعندك مشاكل في الحمل راح يكون خيار جميل غرفهم رايقة حسب وش راح تختارين.
لكن اللي أعرفه ماعندهم بنك دم في حالة صار نزيف أو أي مشكلة لاقدر الله.
ولا عندهم حضانة للطفل أقصد لو صارت ولادة مبكره مثلا أو صار للطفل أي مشكلة لا قدر الله مو الحضانة العادية للطفل الطبيعي اللي ماعنده مشاكل.
هذا اللي أعرفه عنهم.
على الختان مو لازم تختنين عندهم إذا مالقيتي معلومات عنهم بعد أسبوع روحي ختنيه في أي مكان معروف

أنا أخواتي كلهم يختنون عند صبحي عزام. :)

الله يسهل عليك استخيري وراح يكتب لك ربي الخير لك

[نور العيوووووون]

اعرف مرة اخوي هو صراحه بالشكل حلوو وفيه اطباء ماعليهم لكن المشكله لو لاقدر له حصل شيء مضاعفات ماحس ان المستشفى يعتبر ممتاز جداً مقارنه بالمستشفيات القديمه الي فيها بنك دم مثل الحبيب دله المملكه الحمادي لكن اذا تحسين ان شاء الله وضعك طبيعي وماذكر لك خلال حملك بمشاكل فان شاء الله انه حلو
مرة اخوي تتابع مع دكتوره اسمها احلام بمستوصف اسرة المجد يمدحوووونها الناس هي الي ولدتها بالبريطاني وقتةالولاده تطقين عليها وتنزل معك

[Ōяαήģэήā]

لولا ، نور العيون

الله يجزاكم الف خيييير ويوفقكم

انا الحمدلله حملي مافيه هذيك المشاكل العويصه
يعني مشاكل الحمل العاديه الوحام والثقل والام الظهر يعني كذا

وانا خاطري اجربهم بس متخوفه شوي قلت اشوف احد جرب يشجعني على هالخطوه

لولا
صبحي عزام بأي مستشفى؟
وهل شغله حلووو ؟؟
انا متعقده من لف الشاش والخرابيط حقت الختان
لان ولدي لما طهرناه ماحطو عليه شاش واشياء كذا
بس كريمات وارتحت مررره من هالناحيه
وطهروه ثاني يوم وهم اللي ابتلشو فيه يوم الختان

وهالمره شايله هم الختان وبشوف هم اذا عندهم خليتهم يطهرونه ثاني يوم ويبتلشون فيه هم

[سفن بارد]

والله ياحبيبتي اعرف وحده توها والده فيه تمدحه مدح بكريه وتقول كل شي فيه ممتاز فوق ماتتصورين وتثني عليهم مع العلم كان عندها فقر دم في حاله الولاده ولاشافت منهم الا كل خير

صبحي عزام هذا دكتور تختيين معرووف له عياده خاصه في شارع التحليه معروف من اكثر من30سنه يختن اطفال ولاياخذ الا 5دقايق روووعه شغله ونظيف الله يتمم علي وعليك يارب

والدكتوره احلام في اسره المجد اعرفها واعرف الدكتوره سوسن بعد في نفس المستوصف يولدون فيه انا مجربه سوسن رووووعه وامينه وتخاف الله في كل شي وشااااطره ماشاء الله مارح تندمي وادعي لي ربي يتمم حملي على خير ياااااارب ضايقه بي الدنيا

[Ōяαήģэήā]

ياربي يسعدك سفن ويتمم حملك على خير
ويرزقك ولاده سهله ميسره

[sky-love]

أنا بكررر ومن المراجعات بهذا المستشفى
كلمه روعه قليل عليهم
والخدمات ممتازه ومستشفى هادي وراقي
وتنومت عندهم 3 ايام لان جاني طلق الاسبوع اللي فات وانا بالثامن
واعطوني ابر توقف الطلق وابر تساعد في نمو رئه الجنين
والحمد لله خرجت بالسلامه انا واللي ببطني
والمستشفى مجهز بالكامل
مافي اي نقص
ونا ساالت عن الحضانه قالو في عنايه مركز للطفل
لاني كنت خايفه اولد وقالت دكتورتي ماتخافي
مجهزين كامل احتياطاتهم بعد الله
وكل شي بيد الله
الاهتمام ممتاز وعنايتهم فائقه
ودكتورتي رائعه وطيبه اسمها رضا الشيخ
ادعولي اكمل الثامن على خير ...

[Ōяαήģэήā]

الله يهون علي وعليك اختي سكاي ويرزقنا ولاده سهله وطبيعيه

الله يطمنك بالعافيه
انا رحت لهم وشفت المستشفى مررره هادي ورايق وخدماتهم سريعه
وتابعت عند كورانا مرره بشوشه وتسولف معاي مع انها مو كثير بالعربي

يارب يكون كل شي طبيعي وميسر ياحي ياقيووووم

[مكة ربيع العمر]

اختي ولدت عندهم من شهر اخذت غرفة خاصة على حسابي من غير تامين
للاسف تجربة جدا سيئة ماشفت عندهم عناية واهتمام زايد يذكر ولايستاهل اسعارهم الغالية
انا اتألم من الطلق والدكتورة والممرضة يتحكوا عن المستشفى ومشاكلها الادارية بكل برود وقت الولادة سندات السرير اللي على اليمين واليسار نازله مافي شيء امسك فيه واشد على نفسي
بعد انتهت الولادة على طول اعطوني ابرة مهدئ وخرجوا كلهم من الغرفة وتركوني وحدي على بالهم نائمة من غير ينظفوني وبعد ساعة ونص نزلوني غرفتي
والغرفة تنحسب عليك من يوم تدخلي المستشفى
حسبي الله عليهم خدمتهم اقل بكثير من مستوى اسعارهم