زوجك على ماعودتيه وابنك على ما ربيتيه!!

[قلبي يهواك]

انشهد انهم صادقي

هذا موضوع لاختـ متزوجه ومخضرمه بعد في عالم الزوجيه عن النصائح الي جتها من قبل زواجها لبعده
واكثر الاشياء الي استفادت منها واعجبني انها طرحته بشكل عفوي وغير متكلف


وجمعتها لكم وفصلتها أتمنى تفيدكم..



اللي توها متزوجه راح تضبط معها بسهوله إن شاء الله



واللي تخمرت في عش الزوجيه..يبيلها صبر جبال..



وفيه نقطه لذيذه حبيت أقولها..



مافيه رجال صعب ولا يمكن يتغير



بعضهم ممكن تجيه بالطيبه..



وإذا مانفع بالمسايسه..

وإذا مانفع بالزعل اللطيف اللي تنهد معه قواه..



وإذا مانفع بالحزم..



بعد كل هذا.. الدعاء يلين الصخر نفسه..



كأني طولت عليكم..اعذروني عندي حكي وااااااجد



أول الأشياء اللي قالوا عودي زوجك عليها هي:



00 معاملة زوجك لك والحدود اللي المفروض مايتجاوزها..



وهي بيدك أنتي ..أهم شي أنتي مهما كنت عند الناس تعلقين



على نفسك يعني تستهزئين بنفسك ..المفروض عند زوجك لا



مثال: أنتي في اجتماع صغير بين ناس أنتي ماخذه عليهم يعني مابينكم



تكاليف ..وجلستي تعلقين على طريقة أكلك أو جلستك علشان تضحكيهم



مع إني ماأرى إن هذي شخصية طبيعيه لكن فيه ناس قابلتهم كذا..



المفروض قدام زوجك وخصوصا في بداية الزواج تعلميه كيف يحترمك..



لأنه ممكن يشاركك ويستهزي بصوتك بمشيتك ..ساعتها بتجي في خاطرك



ومو حلوه قدام عيالك حتى..فالمفروض تكوني عنده ذوق

محترمه..وتعامليه باحترام حتى يبادلك..



00أن يخصص لك مصروف شخصي يكون ثابت كل شهر لاينقص إلاإذا كان بضائقه لابد تكونين عون له..

هذا المصروف هو يحدده ثم أنت تحاولين تزيدينه شوي..



يعني لو قال مثلا:



بعطيك 500..وأنت عارفه إنه مقتدر



قولي له : زدها شوي ..أنت كريم واحنا نستاهل..



أنت تدري أغراضنا احنا الحريم واجده..



واللي يخليك زدها لو 100<< كأني مسكت خط.



00 لابد تشعريه بالمسؤليه اتجاهك..



يعني لما يعطيك مصروف مو يقط أشغالك كلها على هالمصروف



يعني يقولك المصروف يشمل فاتورة جوالك ويشمل بعض الأساسيات



كمصاريف المستشفى وغيره..أنتي عوديه مثلا مره وأنتو طالعين تقضون أغراض



للبيت وشفتي شي تحبينه عصيرات كريمات شي ودك تاخذينه حطيه مع



الأغراض من دون ماتتميلحين وتقولين : هذا خله أنا بدفع حقه..



ولا تسأليه : معليه أخذ هذا.؟؟



على طول خذيه وحطيه مع الاغراض..بس لا تكثرين عليه عشان مايرفض ..



على شوي شوي..



وإذا طلعتي وياه السوق وكانت أول مره يوديك ويتسوق معك..



طبعا هو بيدفع ثم بيقول لك تراك صرفتي 400



قولي له على طول : الله يعطيك العافيه ولا يخليني منك..



هو بيستحي ولا راح يأخذ منك شي..



لكن إذا مااستحى خخخخ



قولي له بلطافه: هذي أول مره تدش وياي السوق..خلها عليك هالمره..



00 أن يشعر بقيمتك وبقيمة رأيك..



حلو إنك لمايستشيرك زوجك في شي تقولي : رايي من رايك ياقلبي.



لكن مو في كل شي..يعني مثلا في يوم من الأيام مادريتي إلا وهو جاي يقولك : شريت كنب جديد للمجلس !!



طيب أنا عايشه وياك في هالبيت ماتشاورني.؟..



والزوج حتى يحب إن زوجته وشريكته يكون لها راي مستقل مو طرطوره



كل شي عندها عادي..



00أن يراعيك في أيام مرضك..



تعبتي في يوم من الأيام ..وكان طول الوقوف يرهقك



مو تضغطين على نفسك وتطبخين ومن الدوخه ترتاحين شوي وتكملين طبخ..



مره قولي له :إنك تعبانه إذا كان يقدر يجيب شي من المطعم..



واليوم الثاني سوي شي خفيف ..قولي : من التعب ماقدرت أطبخ.



هذي الحركه سويها في أول الزواج بس..بعدين هو يصير تعود فمن أول



مايدري انك تعبانه بيقول خلاص راح اجيب معي شي ناكله..



ومن الأفضل مايكون اعتذارك عن الطبخ بشكل مستمر..فإذا كان تعبك شديد



يحتاج شهور وأسابيع فالمفروض تبحثين عن حل ثاني مثل ترتاحي كم يوم عند أهلك..



أو أمك إذا هي نشيطه وعندها خدامه تساعدك في هالفتره ترسل لك غداكم..



00انه مايتدخل في معاملتك لأهله طالما أنتي تخافين الله وتعاملينهم


بكل طيب..



وأي موقف أو خلاف بسيط بينكم..لاتفكري تدخلي زوجك فيه.. لا تكرهينه



فيك وفي اهله ..ممكن تحكي له الموقف وتسمعي رايه لكن مو شرط تطبقي رايه..



إلا إذا كان رايه سديد ويرضيك..



وممكن يجيك في يوم أنتي تعبانه فيه أو مرهقه ويقول :



أمي بتروح تزور فلانه اليوم روحي معها.



أنت لو كنت بعافيه ماراح تقصرين معها ولازم هو يراعي ان انتي لك ظروفك..واحاسيسك.



إرفضي بلطف وبيني له إنك لوكنتي بخير من غير مايقولك راح تراعين خاطر أمه..






00 عوديه على انه هو المسؤل يوديك لأهلك ومشاويرك


مو يقطها على غيره..إذا كان يقدر


قد قالت لنا معيده في الجامعه :في السنه الأولى في الزواج لاتخلين احد



غيره يوصلك مشاويرك مهما يكون لو كانوا اهلك مجتمعين موتحطين



حيلك على واحد من اخوانك



علشان يجي ياخذك..خلي كل طاقتك لإقناع زوجك..



حتى لو كان عند أهلك سائق وقالك خليه يجي ياخذك ..



قولي له مشغول وهو مو مسؤل عني وعن مشاويري..



إلى أن يتعود على كذا بعدين ماتحتاجين تناقشينه هو من نفسه بيقول:



متى ودك تروحين لاهلك.؟..



00 عوديه إنكم تتعشون سوا..مو يتعشا عند أصحابه ويسيبك تاكلي لوحدك..



كيف تعوديه.؟..



في أول أيام زواجك اتصلي عليك وهو عند اصحابه وقولي له:



عيوني.. سويت لنا عشاء خفيف..بانتظرك على العشاء..



هو بيكون فرحان فيك عشانك عروسه وكمان حيفرح لأنك تعتنين فيه..

وبيجي بإذن الله يتعشا معك..



حتى لوكنتي أنتي متعوده ماتتعشين كلي شي خفيف وياه لأنك راح تكسبي برجوعه للعشاء معك فائدتين:



الاولى : إنه مايسهر ويتأخر خارج البيت.



والثانيه: مو حلو إنه ياكل برا البيت كأنه عزابيه.



00إعانته على العبادات وتعويده على أنه شي ضروري..



الوحده أول ماتتزوج يحاول زوجها إنه يظهر أمامها بالكمال..



تشوفيه إذا أذن للصلاة بيودعها ويروح يصلي في المسجد..



إذا كانت الزوجه غافله ..إما إنها بتجيب الغداء على وقت الصلاة



أو بتدردش معه دون ماتذكره ان وقت الصلاة دخل ..



وراح يشوف الأمر عادي عندها فراح يهمل خصوصا إذا كان الزوج



لاهياً في مشاغل الدنيا..لا يحضر محاضرات دينيه تجدد همته..



إنتي بإمكانك ..إنك تذكريه مثلا إذا أذن تقولي له : يالله نصلي عشان نتغدى بعد الصلاة..



وإذا كنتوا جالسين تتجاذبون أطراف الحديث تقومين أو تقطعين حكيك..

لترردي الأذآن مع المؤذن..

وهذي أهم نقطه لو عودتيه عليها راح تعيشين سعيده وتضمنين القدوه لك ولأبنائك..



هذي النقاط أنا جربتها ونجحت الحمدلله من دون نزاع ولا زعل..إلازعلات خفيفه ..

توضح إني أرغب في تحقيق مااريد..



والزوج أولا وأخيرا موكمبيوتر تخزنين فيه اللي يعجبك ..



يعني اكيد في نقطه من النقاط اللي ذكرتها ممكن ماتناسبه حسب بيئته




وتفكيره..وهذي النصايح اللي اخذتها من الناس كنت مقرره في

ذاتي إني اخليها سبب لسعادتي مو تعاستي ..

بمعنى لو حاولتي تطبقين وحده من هذي النقاط..وماقدرتي مو تحولين حياتك لجحيم.. لا..


ارميها وجربي غيرها..



ليس كل مايتمناه المرأ يدركه..
.
.

** عوديه إن أيام الويك إند مثل ماهي راحه له..هي راحه لك أنتي كمان



يعني أنتي طول أيام الأسبوع تنوعي له في الاكل وتتفنني ..



كبسات ومقالي وحركات..تصيري تطبخي شي خفيف ..سندوتشات



وأشياء خفيفه تلاقوها في قسم الطهي..



وممكن كمان تعوديه إنه في ايام الويك إند << شابكه معها الكلمه خخخخ



تاخذي عشاك الخفيف..وتطلعوا تاكلوه ..في مكان رايق تغيروا جو..



وإذا تعود على النزهات راح تضمني الترفيه لعيالكم لما يشرفوا لأنهم هم



أكثر من يحتاج يطلعون وينبسطون مع أبوهم..



وبكذا تكون أيام عطلتكم أيام مميزه تشتاقون لها.



**لازم يحس بالمسؤلية اتجاه عياله..



يعني لما يدخل الشتاء لازم يتعود انه راح تكون فيه طلعه تشترين فيها ملابس لعيالك 4 أو 5 بدل مثلا كامله بالجزم بالجراريب..



والصيف نفس الشي..



** عوديه إذا كان مقتدر ماينسى يهديك .. < انا ماحب هالحركه حلات الهديه من خاطره وقلبه مو طلب فشله وفضيحه



أنتي في المناسبات اهديه حتى لو مااهداك ..



أنا مازلت صامده وأهديه ..وأحس انه يحاول..



مناسبه يجيب لي فيها هديه و20 مناسبه لا مايجيب..



والحمدلله هي ان جت زيادة خير وإن راحت راح الشر معها..



ومقابل هذا ..وعشان يكون لزعلك معنى إذا زعلتي..



دلليه قد ماتقدرين ..خليه يعتمد عليك حتى في أتفه الأشياء..



دايم إثني عليه وأمدحيه وأدعي الله إنه يحفظه لك.. راح يكبر راسه



ويحس إن الخير فيك مايضيع..



ابدعي له في كل النواحي اللي يحبها..وتجددي في لبسك وحكيك



لا تظلين على هيئه وحده طول العمر..



؛؛؛ والغيره ؛؛ الغيره ..لاتكون مركزه أضيفي لها شوي من الماء عشان مايشرق بعلك بسم الله عليه..



لأن الغيره الزايده مهما عملتي راح تحول حياتك لجحيم

.
.

عوديه ع الكلام الحلو بحيث انك تبدين انتي حتى لو شخصيته قويه ومسوي رسمي الا بيجي يوم ويخق
وبيتعود يتكلم مثلك ويبادلك هالكلام الزين والعكس بالعكس فانتبهي

عوديه وهذا شي مهم جدا ً اذ راح ينام تروحين معه سوي له مساج وسولفي عليه سوالف هاديه او ع الاقل خليك جنبه لازم يتعود انك حوله وقت نومه سبحان الله اذ تغير عليه المكان او سافر بيفقدك كثير

وختاما ً لا تحكرينه دائم ابعدي عنه عطيه مساحه للحريه الرجل غالبا ً يحب يكون حر بدون قيود
ابعدي عنه واهتمي بهواياتك وخصوصياتك اتركيه يسهر له حق يقابل ربعه الرجل يحب جمعات وسوالف الرجال مثلك تماما ً وحبك لجمعات البنات وحش الحريم

وكل مابعدتي عنه دورك لكن لو نشبتي له يبي ينحاش منك

واخيرا ً عليكم بدعاء بسخره
ان ربي يسخر قلبك لبعلك العزيز ويسخر قلبه لك ويصلح ذريتكم

هذا والصلاه والسلام ع نبي المرسلين محمد







منقول لعيوووونكم

[عسل عسل]

موضوع مميز جدا
الحمدالله تقريبا اغلب الكلام انا ماشيه عليه والحمدالله كل شي تمام

[قلبي يهواك]

[البشرى]

موضوع جميل وبجد تسلمي لفتي انتباهي لشغلات الله لا يحرمنا منك

[Raseel]

موضوع حلوووو واستفدت منه جزاك الله خيررررررررر

[احلى من العسل]

الله يعطيك العافيه نصائح مفيده تسلمي

[يا جعلهم فدوت عيونك يمتون]

الله يجزك خير يارب ويوفقك

[ام رتوله]

نصائح من ذهب جزاك الله خير يا اختي
بس حابه اقول نقطه مهمه انا موظفه وبصراحة زوجي راتبه حلو نوعا ما لكن مايصرف علي ابدا
يعني ماعمري نزلت اشتري ملابس لي وقال خليها على حسابي
والحين بنتي انا اشتري لها على حسابي
لكن جلست معاه وقلت له شاركني بمصاريف البنت مثل ما انا امها انت ابوها بعد
وين حقي بالنفقة انا وياها؟
بكرة تكبر بنتك وتجحدك وتقول مالك فضل عليا لان امي اللي تعبت وشقيت فيني
والحمدلله اقتنع من ناحية مصروف البنت بس
ومصاريف البيت النص بالنص بيني وبينه
هو عمل هالشي مثل اخوه الكبير موظف ومتزوج معلمة
وقال شوفي كيف مستقرين وماشيه امورهم
ولو بتخلين كل شي علي وحدي مابقدر ابني مستقبلنا
بس في داخلي انقهر وتجرأت مرة وقلت له نفسي احس اني متزوجه وانك تصرف علي زعل وقال فين اتفاقنا
الله يعين
الحين عندي مشكلة وصفة اكرهها بزوجي وهي السوق
كل ما اقول ابي انزل السوق يقول وش تبين وليش وماني فاضي او تعبان
يقهرررررررني
وكم مرة اتخاصم معاه واقوله بنزل واشتري على حسابي مارح تخسر شي
بس مافي فايدة اعوذ بالله من هالصفة قبيحة جدا

[قلبي يهواك]

المشاركة الأصلية كتبت بواسطة البشرى

موضوع جميل وبجد تسلمي لفتي انتباهي لشغلات الله لا يحرمنا منك

يعطيك العافيه

اسعدني تواجدك

[قلبي يهواك]

المشاركة الأصلية كتبت بواسطة raseel

موضوع حلوووو واستفدت منه جزاك الله خيررررررررر

يعطيك العافيه

نورتي صفحتي