الدورة و علاقتها بالاخصاب

[Fa6ema]

السلام عليكم
انا عضوه جديدة بس لي فتره اتابع مواضيعكم و حبيت اشارك معاكم
عندي استفسار بخصوص الدورة الشهريه ما اعرف احسب ايام الاخصاب او ان كانت منتظمه دورتي لو لا
27/8
24/9
26/10
البارحه نزلت علي 20/11

هذي اخر مواعيد دورتي بالميلادي طبعاً ..
و انا طول دورتي 5 ايام ل 6 ايام ..
و زوجي رافض ان اروح مستشفى اسوي فحوصات يقولي تو الناس و مايبي العب بروحي بالمستشفيات
و انا لي 6 شهور متزوجه و ما صار حمل للحين ..

و ساعات اوسوس اقول يمكن لان وزني زاد و هالشي ياثر مع العلم طولي 168 و وزني 75 ..

فياريت تفيدوني بالطرق المناسبه و الاوقات المناسبه و هل يستدعي ان اروح اسوي فحوصات او امشي ع كلام زوجي ان اصبر .. و مشكوورين مقدما ع ردودكم
لان صراحه تعبت من الانتظار و كلام الناس انو لحين ما صار حمل و قمت اشك بروحي ان فيني شي لا سمح الله ..

[ماسه حساسة]

حبيبتي اذا تبي نصيحتي تروحي تعملي الفحوصات

انتي وزوجك عشان ترتاحو وتتطمنو ومايصير توسوسي وتفكري

انا حاليا لي سنه وشهرين من تزوجت ورحت بعد6 شهور من زواجي والحمدلله كل شي سليم

ومافي شي يمنع الحمل وحملت بعد 11 شهر يعني ارادة ربك وقت ما الله يكتب الحمل بيصير

حتى لو كنتو سليمين مو شرط يحصل الحمل على طول

وركزي على ايام الاباضه في اشرطة بالصيدليه تنباع تحدد لك افضل وقت للتبويض

اسمه كلير بلو او انجاب

ان شاءالله اكون افدتك

دعواتك لي الله يعوضني عن حملي بأحسن منه

[ماسه حساسة]

ونسيت اقولك ترا الرياضه مهمه وتنشط التبويض

ماشاءالله احس وزنك زايد حاولي تعملي رياضه والله تحسي بفرق كبير

[neeevooo]

اما دورتك منتظمه يعني كل 25 الي 28 يوم
لكن يوم الاباضه عندك غير ثابت حبيبتي
فالافضل انه يصير الجماع من اليوم العاشر الي العشرين بمعدل يوم اه ويوم لا
او ممكن تاخدي من الصيدليه جهاز كلير بلو للتبويض وتابعي بيه
واتهني بزوجك وحياتك حبيبتي وخلك من الناس وسوالفهم
الله يرزقك ويرزقنا

[عروستة]

حبيبتي انتظري شهرين

اذا ماصار حمل ابدئي روحي مراجعات و سوي فحوصات ..


و الله يرزقك ياربي و يرزقني هالشهر يارب


يافرج الله القريب

[صافو]

ان شالله كل شئ فكي سليم حبيبتي
لا تفكري وتقلقي بعد قدامكن وقت طويل ان شالله
استخدمي جهاز الاباضة يساعدك ويحدد لك انسب ايام للحمل

[Fa6ema]

مشكوورين جميع على مشاركتكن لي بالرد و ابداء خبراتكم ..
و ان شاء الله اول ما اطهر راح اشتري جهاز الإباضة ما اجه في بالي حتى اعرف الاوقات المناسبة للحمل ..
و الله يرزق الجميع يارب الذرية الصالحة المعافاة عما قريب ..