مشكلة الحمل و مشكلة أمي

[Aum Reda]

السلام عليكم و رحمة الله
مرحبا يا بنات و أمهات
لأول مرة أفكر أكتب مشكلتي و أصلا لولا أن عندي مشكلة ما اشتركت بالمنتدى لأن صار لي فترة قاطعة المنتديات
حبيت المنتدى أحسه كأنه بيت كبير و كل فرد فيه له قصة
المهم قصتي هي تأخر الحمل
تزوجت من سنتين و 8 شهور تقريبا ما حبيت أحمل بالبداية و لا فكرت أصلا
من حنيت للأمومة صار لي سنة و أنا و زوجي نحاول يكون عندنا طفل و الله ما كتب لنا
سوينا تحاليل هو سليم بس أنا حجم البويضة طلع صغير عندي و أخذت كلوميد لثلاث شهور و نفع معاي لكن ما كتب لي رب العالمين و ما خليت شي ما جربته زنجبيل و عسل و أصلا وزني زاد من الأكل أقول عشان لا ينقصني فيتامينات بس ربي مو كاتب وش أسوي
الأفكار توديني و تجيبني أقول ما أدري زوجي بيصبر علي يمكن أطول أكثر من كذا و هو يحب الأطفال و كان وده فيهم من تزوجنا بس أنا ما رضيت
إضافة لهذه المشكلة هو المشكلة الأكبر اللي هو أمي
تقريبا بشكل شبه يومي تسألني ليش للحين ما جبتوا أولاد و أنا أتحجج لها بالدراسة و الديون و ما أبي أقولها إني أتعالج خايفة عليها و على أبوي لأن اللي فيهم كافيهم و مو حابة يشيلون هم زيادة كفاية هم أخواني
أحس ضغط نفسي علي من جهة المعاناة اللي عايشتها و من جهة أمي و المجتمع
برأيكم شلون أتصرف معاها احساسي يقولي أنها حاسة فيني شي لأن تسألني ليش كل متضايقة
الحين حتى أبوي تكلم للمرة الأولى و هو ما فتح الموضوع معاي من تزوجت
شورو علي ؟
و لا تنسون تدعون لي